Utshovঅধ্যায় 36
36.1
ঋচং বাচং প্র পদ্যে মনো যজুঃ প্র পদ্যে সাম প্রাণং প্র পদ্যে চক্ষুঃ শ্রোত্রং প্র পদ্যে ।
বাগোজঃ সহৌজো ময়ি প্রাণাপানৌ ॥১॥
36.2
যন্মে ছিদ্রং চক্ষুষো হৃদয়স্য মনসো বাতিতৃণ্ণং বৃহস্পতির্মে তদ্দধাতু ।
শং নো ভবতু ভুবনস্য যস্পতিঃ ॥২॥
36.3
ভূর্ভুবঃ স্বঃ তত্সবিতুর্বরেণ্যং ভর্গো দেবস্য ধীমহি ।
ধিয়ো যো নঃ প্রচোদয়াৎ ॥৩॥
36.4
কয়া নশ্চিত্র আ ভুবদূতী সদাবৃধঃ সখা । কয়া শচিষ্ঠয়া বৃতা ॥৪॥
36.5
কস্ত্বা সত্যো মদানাং মংহিষ্ঠো মত্সদন্ধসঃ । দৃঢা চিদারুজে বসু ॥৫॥
36.6
অভী ষু ণঃ সখীনামবিতা জরিতৄণাম্ । শতং ভবাস্যূতিভিঃ ॥৬॥
36.7
কয়া ত্বং ন ঊত্যাভি প্র মন্দসে বৃষন্ । কয়া স্তোতৃভ্য আ ভর ॥৭॥
36.8
ইন্দ্রো বিশ্বস্য রাজতি । শং নো অস্তু দ্বিপদে শং চতুষ্পদে ॥৮॥
36.9
শং নো মিত্রঃ শং বরুণঃ শং নো ভবত্বর্যমা ।
শং ন ইন্দ্রো বৃহস্পতিঃ শং নো বিষ্ণুরুরুক্রমঃ ॥৯॥
36.10
শং নো বাতঃ পবতাং শং নস্তপতু সূর্যঃ ।
শং নঃ কনিক্রদদ্দেবঃ পর্জন্যো অভি বর্ষতু ॥১০॥
36.11
অহানি শং ভবন্তু নঃ শং রাত্রীঃ প্রতি ধীয়তাম্ ।
শং ন ইন্দ্রাগ্নী ভবতামবোভিঃ শং ন ইন্দ্রাবরুণা রাতহব্যা ।
শং ন ইন্দ্রাপূষণা বাজসাতৌ শমিন্দ্রাসোমা সুবিতায় শং যোঃ ॥১১॥
36.12
শং নো দেবীরভিষ্টয় আপো ভবন্তু পীতয়ে ।
শং যোরভি স্রবন্তু নঃ ॥১২॥
36.13
স্যোনা পৃথিবি নো ভবানৃক্ষরা নিবেশনী ।
যচ্ছা নঃ শর্ম সপ্রথাঃ ॥১৩॥
36.14
আপো হি ষ্ঠা ময়োভুবস্তা ন ঊর্জে দধাতন । মহে রণায় চক্ষসে ॥১৪॥
36.15
যো বঃ শিবতমো রসস্তস্য ভাজয়তেহ নঃ । উশতীরিব মাতরঃ ॥১৫॥
36.16
তস্মা অরং গমাম বো যস্য ক্ষয়ায় জিন্বথ । আপো জনয়থা চ নঃ ॥১৬॥
36.17
দ্যৌঃ শান্তিরন্তরিক্ষং শান্তিঃ পৃথিবী শান্তিরাপঃ শান্তিরোষধয়ঃ শান্তিঃ ।
বনস্পতয়ঃ শান্তির্বিশ্বে দেবাঃ শান্তির্ব্রহ্ম শান্তিঃ সর্বং শান্তিঃ শান্তিরেব শান্তিঃ সা মা শান্তিরেধি ॥১৭॥
36.18
দৃতে দৃংহ মা মিত্রস্য মা চক্ষুষা সর্বাণি ভূতানি সমীক্ষন্তাম্ ।
মিত্রস্যাহং চক্ষুষা সর্বাণি ভূতানি সমীক্ষে ।
মিত্রস্য চক্ষুষা সমীক্ষামহে ॥১৮॥
36.19
দৃতে দৃংহ মা । জ্যোক্তে সন্দৃশি জীব্যাসং জ্যোক্তে সন্দৃশি জীব্যাসম্ ॥১৯॥
36.20
নমস্তে হরসে শোচিষে নমস্তে অস্ত্বর্চিষে ।
অন্যাঁস্তে অস্মত্তপন্তু হেতয়ঃ পাবকো অস্মভ্যং শিবো ভব ॥২০॥
36.21
নমস্তে অস্তু বিদ্যুতে নমস্তে স্তনয়িত্নবে । নমস্তে ভগবন্নস্তু যতঃ স্বঃ সমীহসে ॥২১॥
36.22
যতো-যতঃ সমীহসে ততো নো অভয়ং কুরু । শং নঃ কুরু প্রজাভ্যোঽভয়ং নঃ পশুভ্যঃ ॥২২॥
36.23
সুমিত্রিয়া ন আপ ওষধয়ঃ সন্তু দুর্মিত্রিয়াস্তস্মৈ সন্তু যোঽস্মান্ দ্বেষ্টি যং চ বয়ং দ্বিষ্মঃ ॥২৩॥
36.24
তচ্চক্ষুর্দেবহিতং পুরস্তাচ্ছুক্রমুচ্চরৎ । পশ্যেম শরদঃ শতং জীবেম শরদঃ শতং শৃণুয়াম শরদঃ শতং প্র ব্রবাম শরদঃ শতমদীনাঃ স্যাম শরদঃ শতং ভূয়শ্চ শরদঃ শতাৎ ॥২৪॥