UtshovAdhyaya 35
35.1
अपे॒तो य॑न्तु प॒णयोऽसु॑म्ना देवपी॒यव॑ः । अ॒स्य लो॒कः सु॒ताव॑तः ।
द्युभि॒रहो॑भिर॒क्तुभि॒र्व्य॒क्तं य॒मो द॑दात्वव॒सान॑मस्मै ॥१॥
Apeto yantu panayosumna devapiyavah, asya lokah sutavatah
Dyubhirahobhiraktubhirvyaktam yamo dadatvavasanamasmai
35.2
स॒वि॒ता ते॒ शरी॑रेभ्यः पृथि॒व्याँल्लो॒कमि॑च्छतु । तस्मै॑ युज्यन्तामु॒स्रिया॑ः ॥२॥
Savita te sharirebhyah prithivyanllokamichchhatu, tasmai yujyantamusriyah
35.3
वा॒युः पु॑नातु स॑वि॒ता पु॑नात्व॒ग्नेर्भ्राज॑सा॒ सूर्य॑स्य॒ वर्च॑सा । वि मु॑च्यन्तामु॒स्रिया॑ः ॥३॥
Vayuh punatu savita punatvagnerbhrajasa suryasya varchasa, vi muchyantamusriyah
35.4
अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता ।
गो॒भाज॒ इत्किला॑सथ॒ यत्स॒नव॑थ॒ पूरु॑षम् ॥४॥
Ashvatthe vo nishadanam parne vo vasatishkrita
Gobhaja itkilasatha yatsanavatha purusham
35.5
स॒वि॒ता ते॒ शरी॑राणि मा॒तुरु॒पस्थ॒ आ व॑पतु । तस्मै॑ पृथिवि॒ शं भ॑व ॥५॥
Savita te sharirani maturupastha a vapatu, tasmai prithivi sham bhava
35.6
प्र॒जाप॑तौ त्वा दे॒वता॑या॒मुपो॑दके लो॒के नि द॑धाम्यसौ । अप॑ न॒ः शोशु॑चद॒घम् ॥६॥
Prajapatau tva devatayamupodake loke ni dadhamyasau, apa nah shoshuchadagham
35.7
परं॑ मृत्यो॒ अनु॒ परे॑हि॒ पन्थां॒ यस्ते॑ अ॒न्य इत॑रो देव॒याना॑त् ।
चक्षु॑ष्मते शृण्व॒ते ते॑ ब्रवीमि॒ मा न॑ः प्र॒जाᳪ री॑रिषो॒ मोत वी॒रान् ॥७॥
Param mrityo anu parehi pantham yaste anya itaro devayanat
Chakshushmate shrinvate te bravimi ma nah prajam ririsho mota viran
35.8
शं वात॒ः शᳪ हि ते॒ घृणि॒ः शं ते॑ भव॒न्त्विष्ट॑काः ।
शं ते॑ भवन्त्व॒ग्नय॒ः पार्थि॑वासो॒ मा त्वा॒ऽभि शू॑शुचन् ॥८॥
Sham vatah sham hi te ghrinih sham te bhavantvishtakah
Sham te bhavantvagnayah parthivaso ma tvabhi shushuchan
35.9
कल्प॑न्तां ते॒ दिश॒स्तुभ्य॒माप॑ः शि॒वत॑मा॒स्तुभ्यं॑ भवन्तु॒ सिन्ध॑वः ।
अ॒न्तरि॑क्षᳪ शि॒वं तुभ्यं॒ कल्प॑न्तां ते॒ दिश॒ः सर्वा॑ः ॥९॥
Kalpantam te dishastubhyamapah shivatamastubhyam bhavantu sindhavah
Antariksham shivam tubhyam kalpantam te dishah sarvah
35.10
अश्म॑न्वती रीयते॒ सᳪ र॑भध्व॒मुत्ति॑ष्ठत॒ प्र त॑रता॒ सखा॑यः ।
अत्रा॑ जही॒मोऽशि॑वा॒ ये अस॑ञ्छि॒वान्व॒यमुत्त॑रेमा॒भि वाजा॑न् ॥१०॥
Ashmanvati riyate sam rabhadhvamuttishthata pra tarata sakhayah
Atra jahimoshiva ye asanchhivanvayamuttaremabhi vajan
35.11
अपा॒घमप॒ किल्वि॑ष॒मप॑ कृ॒त्यामपो॒ रप॑ः । अपा॑मार्ग॒ त्वम॒स्मदप॑ दु॒ःष्वप्न्य॑ᳪ सुव ॥११॥
Apaghamapa kilvishamapa krityamapo rapah, apamarga tvamasmadapa duhshvapnyam suva
35.12
सु॒मि॒त्रि॒या न॒ आप॒ ओष॑धयः सन्तु दुर्मित्रि॒यास्तस्मै॑ सन्तु॒ योऽस्मान्द्वेष्टि॒ यं च॑ व॒यं द्वि॒ष्मः ॥१२॥
Sumitriya na apa oshadhayah santu durmitriyastasmai santu yosmandveshti yam cha vayam dvishmah
35.13
अ॒न॒ड्वाह॑म॒न्वार॑भामहे॒ सौर॑भेयᳪ स्व॒स्तये॑ । स न॒ इन्द्र॑ इव दे॒वेभ्यो॒ वह्नि॑ः स॒न्तार॑णो भव ॥१३॥
Anadvahamanvarabhamahe saurabheyam svastaye, sa na indra iva devebhyo vahnih santarano bhava
35.14
उद्व॒यं तम॑स॒स्परि॒ स्वः पश्य॑न्त॒ उत्त॑रम् ।
दे॒वं दे॑व॒त्रा सूर्य॒मग॑न्म॒ ज्योति॑रुत्त॒मम् ॥१४॥
Udvayam tamasaspari svah pashyanta uttaram
Devam devatra suryamaganma jyotiruttamam
35.15
इ॒मं जी॒वेभ्य॑ः परि॒धिं द॑धामि॒ मैषां॒ नु गा॒दप॑रो॒ अर्थ॑मे॒तम् ।
श॒तं जी॑वन्तु श॒रद॑ः पुरू॒चीर॒न्तर्मृ॒त्युं द॑धतां॒ पर्व॑तेन ॥१५॥
Imam jivebhyah paridhim dadhami maisham nu gadaparo arthametam
Shatam jivantu sharadah puruchirantarmrityum dadhatam parvatena
35.16
अग्न॒ आयू॑ᳪषि पवस्व॒ आ सु॒वोर्ज॒मिषं॑ च नः । आ॒रे बा॑धस्व दु॒च्छुना॑म् ॥१६॥
Agna ayunshi pavasva a suvorjamisham cha nah, are badhasva duchchhunam
35.17
आयु॑ष्मानग्ने ह॒विषा॑ वृधा॒नो घृ॒तप्र॑तीको घृ॒तयो॑निरेधि ।
घृ॒तं पी॒त्वा मधु॒ चारु॒ गव्यं॑ पि॒तेव॑ पु॒त्रम॒भि र॑क्षतादि॒मान्त्स्वाहा॑ ॥१७॥
Ayushmanagne havisha vridhano ghritapratiko ghritayoniredhi
Ghritam pitva madhu charu gavyam piteva putramabhi rakshatadimantsvaha
35.18
परी॒मे गाम॑नेषत॒ पर्य॒ग्निम॑हृषत । दे॒वेष्व॑क्रत॒ श्रव॒ः क इ॒माँ२ आ द॑धर्षति ॥१८॥
Parime gamaneshata paryagnimahrishata, deveshvakrata shravah ka iman2 a dadharshati
35.19
क्र॒व्याद॑म॒ग्निं प्र हि॑णोमि दू॒रं य॑म॒राज्यं॑ गच्छतु रिप्रवा॒हः ।
इहै॒वायमित॑रो जा॒तवे॑दा दे॒वेभ्यो॑ ह॒व्यं व॑हतु प्रजा॒नन् ॥१९॥
Kravyadamagnim pra hinomi duram yamarajyam gachchhatu ripravahah
Ihaivayamitaro jataveda devebhyo havyam vahatu prajanan
35.20
वह॑ व॒पां जा॑तवेदः पि॒तृभ्यो॒ यत्रै॑ना॒न्वेत्थ॒ निहि॑तान् परा॒के ।
मेद॑सः कु॒ल्या उप॒ तान्त्स्र॑वन्तु स॒त्या ए॑षामा॒शिष॒ः सं न॑मन्ता॒ᳪ स्वाहा॑ ॥२०॥
Vaha vapam jatavedah pitribhyo yatrainanvettha nihitan parake
Medasah kulya upa tantsravantu satya eshamashishah sam namantam svaha
35.21
स्यो॒ना पृ॑थिवि नो भवानृक्ष॒रा नि॒वेश॑नी । यच्छा॑ न॒ः शर्म॑ स॒प्रथा॑ः ।
अप॑ न॒ः शोशु॑चद॒घम् ॥२१॥
Syona prithivi no bhavanrikshara niveshani, yachchha nah sharma saprathah
Apa nah shoshuchadagham
35.22
अ॒स्मात्त्वमधि॑ जा॒तो॒ऽसि॒ त्वद॒यं जा॑यतां॒ पुन॑ः । अ॒सौ स्व॒र्गाय॑ लो॒काय॒ स्वाहा॑ ॥२२॥
Asmattvamadhi jatosi tvadayam jayatam punah, asau svargaya lokaya svaha