অধ্যায় 31

31.1

সহস্রশীর্ষা পুরুষঃ সহস্রাক্ষঃ সহস্রপাৎ ।
স ভূমিং সর্বত স্পৃত্বাঽত্যতিষ্ঠদ্দশাঙ্গুলম্ ॥১॥

পুরুষ এবেদং সর্বং যদ্ভূতং যচ্চ ভাব্যম্ ।
উতামৃতত্বস্যেশানো যদন্নেনাতিরোহতি ॥২॥

এতাবানস্য মহিমাতো জ্যায়াঁশ্চ পূরুষঃ ।
পাদোঽস্য বিশ্বা ভূতানি ত্রিপাদস্যামৃতং দিবি ॥৩॥

ত্রিপাদূর্ধ্ব উদৈত্পুরুষঃ পাদোঽস্যেহাভবৎ পুনঃ ।
ততো বিষ্বঙ্ ব্যক্রামত্সাশনানশনে অভি ॥৪॥

ততো বিরাডজায়ত বিরাজো অধি পূরুষঃ ।
স জাতো অত্যরিচ্যত পশ্চাদ্ভূমিমথো পুরঃ ॥৫॥

তস্মাদ্যজ্ঞাত্সর্বহুতঃ সম্ভৃতং পৃষদাজ্যম্ ।
পশূঁস্তাঁশ্চক্রে বায়ব্যানারণ্যা গ্রাম্যাশ্চ যে ॥৬॥

তস্মাদ্যজ্ঞাৎ সর্বহুত ঋচঃ সামানি জজ্ঞিরে ।
ছন্দাংসি জজ্ঞিরে তস্মাদ্যজুস্তস্মাদজায়ত ॥৭॥

তস্মাদশ্বা অজায়ন্ত যে কে চোভয়াদতঃ ।
গাবো হ জজ্ঞিরে তস্মাত্তস্মাজ্জাতা অজাবয়ঃ ॥৮॥

তং যজ্ঞং বর্হিষি প্রৌক্ষন্ পুরুষং জাতমগ্রতঃ ।
তেন দেবা অয়জন্ত সাধ্যা ঋষয়শ্চ যে ॥৯॥

যত্পুরুষং ব্যদধুঃ কতিধা ব্যকল্পয়ন্ ।
মুখং কিমস্যাসীৎ কিং বাহূ কিমূরূ পাদা উচ্যেতে ॥১০॥

ব্রাহ্মণোঽস্য মুখমাসীদ্বাহূ রাজন্যঃ কৃতঃ ।
ঊরূ তদস্য যদ্বৈশ্যঃ পদ্ভ্যাং শূদ্রো অজায়ত ॥১১॥

চন্দ্রমা মনসো জাতশ্চক্ষোঃ সূর্যো অজায়ত ।
শ্রোত্রাদ্বায়ুশ্চ প্রাণশ্চ মুখাদগ্নিরজায়ত ॥১২॥

নাভ্যা আসীদন্তরিক্ষং শীর্ষ্ণো দ্যৌঃ সমবর্তত ।
পদ্ভ্যাং ভূমির্দিশঃ শ্রোত্রাত্তথা লোকাঁ২ অকল্পয়ন্ ॥১৩॥

যত্পুরুষেণ হবিষা দেবা যজ্ঞমতন্বত ।
বসন্তোঽস্যাসীদাজ্যং গ্রীষ্ম ইধ্মঃ শরদ্ধবিঃ ॥১৪॥

সপ্তাস্যাসন্ পরিধয়স্ত্রিঃ সপ্ত সমিধঃ কৃতাঃ ।
দেবা যদ্যজ্ঞং তন্বানা অবধ্নন্ পুরুষং পশুম্ ॥১৫॥

যজ্ঞেন যজ্ঞময়জন্ত দেবাস্তানি ধর্মাণি প্রথমান্যাসন্ ।
তে হ নাকং মহিমানঃ সচন্ত যত্র পূর্বে সাধ্যাঃ সন্তি দেবাঃ ॥১৬॥

অদ্ভ্যঃ সম্ভৃতঃ পৃথিব্যৈ রসাচ্চ বিশ্বকর্মণঃ সমবর্ততাগ্রে ।
তস্য ত্বষ্টা বিদধদ্রূপমেতি তন্মর্ত্যস্য দেবত্বমাজানমগ্রে ॥১৭॥

বেদাহমেতং পুরুষং মহান্তমাদিত্যবর্ণং তমসঃ পরস্তাৎ ।
তমেব বিদিত্বাতি মৃত্যুমেতি নান্যঃ পন্থা বিদ্যতেঽয়নায় ॥১৮॥

প্রজাপতিশ্চরতি গর্ভে অন্তরজায়মানো বহুধা বি জায়তে ।
তস্য যোনিং পরি পশ্যন্তি ধীরাস্তস্মিন্ হ তস্থুর্ভুবনানি বিশ্বা ॥১৯॥

যো দেবেভ্য আতপতি যো দেবানাং পুরোহিতঃ ।
পূর্বো যো দেবেভ্যো জাতো নমো রুচায় ব্রাহ্ময়ে ॥২০॥

রুচং ব্রাহ্ম্যং জনয়ন্তো দেবা অগ্রে তদব্রুবন্ ।
যস্ত্বৈবং ব্রাহ্মণো বিদ্যাত্তস্য দেবা অসন্ বশে ॥২১॥

শ্রীশ্চ তে লক্ষ্মীশ্চ পত্ন্যাবহোরাত্রে পার্শ্বে নক্ষত্রাণি রূপমশ্বিনৌ ব্যাত্তম্ ।
ইষ্ণন্নিষাণামুং ম ইষাণ সর্বলোকং ম ইষাণ ॥২২॥