অধ্যায় 32

32.1

তদেবাগ্নিস্তদাদিত্যস্তদ্বায়ুস্তদু চন্দ্রমাঃ ।
তদেব শুক্রং তদ্ব্রহ্ম তা আপঃ স প্রজাপতিঃ ॥১॥

সর্বে নিমেষা জজ্ঞিরে বিদ্যুতঃ পুরুষাদধি ।
নৈনমূর্ধ্বং ন তির্যঞ্চং ন মধ্যে পরি জগ্রভৎ ॥২॥

ন তস্য প্রতিমা অস্তি যস্য নাম মহদ্যশঃ ।
হিরণ্যগর্ভ ইত্যেষঃ মা মা হিংসীদিত্যেষা যস্মান্ন জাত ইত্যেষঃ ॥৩॥

এষো হ দেবঃ প্রদিশোঽনু সর্বাঃ পূর্বো হ জাতঃ স উ গর্ভে অন্তঃ ।
স এব জাতঃ স জনিষ্যমাণঃ প্রত্যঙ্ জনাস্তিষ্ঠতি সর্বতোমুখঃ ॥৪॥

যস্মাজ্জাতং ন পুরা কিং চনৈব য আবভূব ভুবনানি বিশ্বা ।
প্রজাপতিঃ প্রজয়া সংররাণস্ত্রীণি জ্যোতীংষি সচতে স ষোডশী ॥৫॥

যেন দ্যৌরুগ্রা পৃথিবী চ দৃঢা যেন স্ব স্তভিতং যেন নাকঃ ।
যো অন্তরিক্ষে রজসো বিমানঃ কস্মৈ দেবায় হবিষা বিধেম ॥৬॥

যং ক্রন্দসী অবসা তস্তভানে অভ্যৈক্ষেতাং মনসা রেজমানে ।
যত্রাধি সূর উদিতো বিভাতি কস্মৈ দেবায় হবিষা বিধেম ।
আপো হ যদ্বৃহতীর্যশ্চিদাপঃ ॥৭॥

বেনস্তত্পশ্যন্নিহিতং গুহা সদ্যত্র বিশ্বং ভবত্যেকনীডম্ ।
তস্মিন্নিদং সং চ বি চৈতি সর্বং স ওতঃ প্রোতশ্চ বিভূঃ প্রজাসু ॥৮॥

প্র তদ্বোচেদমৃতং নু বিদ্বান্ গন্ধর্বো ধাম বিভৃতং গুহা সৎ ।
ত্রীণি পদানি নিহিতা গুহাস্য যস্তানি বেদ স পিতুঃ পিতাঽসৎ ॥৯॥

স নো বন্ধুর্জনিতা স বিধাতা ধামানি বেদ ভুবনানি বিশ্বা ।
যত্র দেবা অমৃতমানশানাস্তৃতীয়ে ধামন্নধ্যৈরয়ন্ত ॥১০॥

পরীত্য ভূতানি পরীত্য লোকান্ পরীত্য সর্বাঃ প্রদিশো দিশশ্চ ।
উপস্থায় প্রথমজামৃতস্যাত্মনাঽঽত্মানমভি সং বিবেশ ॥১১॥

পরি দ্যাবাপৃথিবী সদ্য ইত্বা পরি লোকান্ পরি দিশঃ পরি স্বঃ ।
ঋতস্য তন্তুং বিততং বিচৃত্য তদপশ্যত্তদভবত্তদাসীৎ ॥১২॥

সদসস্পতিমদ্ভুতং প্রিয়মিন্দ্রস্য কাম্যম্ । সনিং মেধাময়াসিষংস্বাহা ॥১৩॥

যাং মেধাং দেবগণাঃ পিতরশ্চোপাসতে ।
তয়া মামদ্য মেধয়াঽগ্নে মেধাবিনং কুরু স্বাহা ॥১৪॥

মেধাং মে বরুণো দদাতু মেধামগ্নিঃ প্রজাপতিঃ ।
মেধামিন্দ্রশ্চ বায়ুশ্চ মেধাং ধাতা দদাতু মে স্বাহা ॥১৫॥

ইদং মে ব্রহ্ম চ ক্ষত্রং চোভে শ্রিয়মশ্নুতাম্ ।
ময়ি দেবা দধতু শ্রিয়মুত্তমাং তস্যৈ তে স্বাহা ॥১৬॥