UtshovAdhyaya 32
32.1
तदे॒वाग्निस्तदा॑दि॒त्यस्तद्वा॒युस्तदु॑ च॒न्द्रमा॑ः ।
तदे॒व शु॒क्रं तद्ब्रह्म॒ ता आप॒ः स प्र॒जाप॑तिः ॥१॥
Tadevagnistadadityastadvayustadu chandramah
Tadeva shukram tadbrahma ta apah sa prajapatih
32.2
सर्वे॑ निमे॒षा ज॑ज्ञिरे वि॒द्युत॒ः पुरु॑षा॒दधि॑ ।
नै॑नमू॒र्ध्वं न ति॒र्यञ्चं॒ न मध्ये॒ परि॑ जग्रभत् ॥२॥
Sarve nimesha jagyire vidyutah purushadadhi
Nainamurdhvam na tiryancham na madhye pari jagrabhat
32.3
न तस्य॑ प्रति॒मा अ॑स्ति॒ यस्य॒ नाम॑ म॒हद्यश॑ः ।
हि॒र॒ण्य॒ग॒र्भ इत्ये॒षः मा मा॑ हिᳪसी॒दित्ये॒षा यस्मा॒न्न जा॒त इत्ये॒षः ॥३॥
Na tasya pratima asti yasya nama mahadyashah
Hiranyagarbha ityeshah ma ma hinsidityesha yasmanna jata ityeshah
32.4
ए॒षो ह॑ दे॒वः प्र॒दिशोऽनु॒ सर्वा॒ः पूर्वो॑ ह जा॒तः स उ॒ गर्भे॑ अ॒न्तः ।
स ए॒व जा॒तः स ज॑नि॒ष्यमा॑णः प्र॒त्यङ् जना॑स्तिष्ठति स॒र्वतो॑मुखः ॥४॥
Esho ha devah pradishonu sarvah purvo ha jatah sa u garbhe antah
Sa eva jatah sa janishyamanah pratyang janastishthati sarvatomukhah
32.5
यस्मा॑ज्जा॒तं न पु॒रा किं चनै॒व य आ॑ब॒भूव॒ भुव॑नानि॒ विश्वा॑ ।
प्र॒जाप॑तिः प्र॒जया॑ सᳪररा॒णस्त्रीणि॒ ज्योती॑ᳪषि सचते॒ स षो॑ड॒शी ॥५॥
Yasmajjatam na pura kim chanaiva ya ababhuva bhuvanani vishva
Prajapatih prajaya sanraranastrini jyotinshi sachate sa shodashi
32.6
येन॒ द्यौरु॒ग्रा पृ॑थि॒वी च॑ दृ॒ढा येन॒ स्व॒ स्तभि॒तं येन॒ नाक॑ः ।
यो अ॒न्तरि॑क्षे॒ रज॑सो वि॒मान॒ः कस्मै॑ दे॒वाय॑ ह॒विषा॑ विधेम ॥६॥
Yena dyaurugra prithivi cha dridha yena sva stabhitam yena nakah
Yo antarikshe rajaso vimanah kasmai devaya havisha vidhema
32.7
यं क्रन्द॑सी॒ अव॑सा तस्तभा॒ने अ॒भ्यैक्षे॑तां॒ मन॑सा॒ रेज॑माने ।
यत्राधि॒ सूर॒ उदि॑तो वि॒भाति॒ कस्मै॑ दे॒वाय॑ ह॒विषा॑ विधेम ।
आपो॑ ह॒ यद्बृ॑ह॒तीर्यश्चि॒दाप॑ः ॥७॥
Yam krandasi avasa tastabhane abhyaikshetam manasa rejamane
Yatradhi sura udito vibhati kasmai devaya havisha vidhema
Apo ha yadbrihatiryashchidapah
32.8
वे॒नस्तत्प॑श्य॒न्निहि॑तं॒ गुहा॒ सद्यत्र॒ विश्वं॒ भव॒त्येक॑नीडम् ।
तस्मि॑न्नि॒दᳪ सं च॒ वि चै॑ति॒ सर्व॒ᳪ स ओत॒ः प्रोत॑श्च वि॒भूः प्र॒जासु॑ ॥८॥
Venastatpashyannihitam guha sadyatra vishvam bhavatyekanidam
Tasminnidam sam cha vi chaiti sarvam sa otah protashcha vibhuh prajasu
32.9
प्र तद्वो॑चेद॒मृतं॒ नु वि॒द्वान् ग॑न्ध॒र्वो धाम॒ विभृ॑तं॒ गुहा॒ सत् ।
त्रीणि॑ प॒दानि॒ निहि॑ता॒ गुहा॑स्य॒ यस्तानि॒ वेद॒ स पि॒तुः पि॒ताऽस॑त् ॥९॥
Pra tadvochedamritam nu vidvan gandharvo dhama vibhritam guha sat
Trini padani nihita guhasya yastani veda sa pituh pitasat
32.10
स नो॒ बन्धु॑र्जनि॒ता स वि॑धा॒ता धामा॑नि वेद॒ भुव॑नानि॒ विश्वा॑ ।
यत्र॑ दे॒वा अ॒मृत॑मानशा॒नास्तृ॒तीये॒ धाम॑न्न॒ध्यैर॑यन्त ॥१०॥
Sa no bandhurjanita sa vidhata dhamani veda bhuvanani vishva
Yatra deva amritamanashanastritiye dhamannadhyairayanta
32.11
प॒रीत्य॑ भू॒तानि॑ प॒रीत्य॑ लो॒कान् प॒रीत्य॒ सर्वा॑ः प्र॒दिशो॒ दिश॑श्च ।
उ॒प॒स्थाय॑ प्रथम॒जामृ॒तस्या॒त्मना॒ऽऽत्मान॑म॒भि सं वि॑वेश ॥११॥
Paritya bhutani paritya lokan paritya sarvah pradisho dishashcha
Upasthaya prathamajamritasyatmanatmanamabhi sam vivesha
32.12
परि॒ द्यावा॑पृथि॒वी स॒द्य इ॒त्वा परि॑ लो॒कान् परि॒ दिश॒ः परि॒ स्व॒ः ।
ऋ॒तस्य॒ तन्तुं॒ वित॑तं वि॒चृत्य॒ तद॑पश्य॒त्तद॑भव॒त्तदा॑सीत् ॥१२॥
Pari dyavaprithivi sadya itva pari lokan pari dishah pari svah
Ritasya tantum vitatam vichritya tadapashyattadabhavattadasit
32.13
सद॑स॒स्पति॒मद्भु॑तं प्रि॒यमिन्द्र॑स्य॒ काम्य॑म् । स॒निं मे॒धाम॑यासिष॒ᳪस्वाहा॑ ॥१३॥
Sadasaspatimadbhutam priyamindrasya kamyam, sanim medhamayasishansvaha
32.14
यां मे॒धां दे॑वग॒णाः पि॒तर॑श्चो॒पास॑ते ।
तया॒ माम॒द्य मे॒धयाऽग्ने॑ मे॒धावि॑नं कुरु॒ स्वाहा॑ ॥१४॥
Yam medham devaganah pitarashchopasate
Taya mamadya medhayagne medhavinam kuru svaha
32.15
मे॒धां मे॒ वरु॑णो ददातु मे॒धाम॒ग्निः प्र॒जाप॑तिः ।
मे॒धामिन्द्र॑श्च वा॒युश्च॑ मे॒धां धा॒ता द॑दातु मे॒ स्वाहा॑ ॥१५॥
Medham me varuno dadatu medhamagnih prajapatih
Medhamindrashcha vayushcha medham dhata dadatu me svaha
32.16
इ॒दं मे॒ ब्रह्म॑ च क्ष॒त्रं चो॒भे श्रिय॑मश्नुताम् ।
मयि॑ दे॒वा द॑धतु॒ श्रिय॒मुत्त॑मां॒ तस्यै॑ ते॒ स्वाहा॑ ॥१६॥
Idam me brahma cha kshatram chobhe shriyamashnutam
Mayi deva dadhatu shriyamuttamam tasyai te svaha