Utshovঅধ্যায় 3
3.1
সমিধাঽগ্নিং দুবস্যত ঘৃতৈর্বোধয়তাতিথিম্ । আস্মিন্ হব্যা জুহোতন ॥১॥
3.2
সুসমিদ্ধায় শোচিষে ঘৃতং তীব্রং জুহোতন । অগ্নয়ে জাতবেদসে ॥২॥
3.3
তং ত্বা সমিদ্ভিরঙ্গিরো ঘৃতেন বর্ধয়ামসি । বৃহচ্ছোচা যবিষ্ঠ্য ॥৩॥
3.4
উপ ত্বাঽগ্নে হবিষ্মতীর্ঘৃতাচীর্যন্তু হর্যত । জুষস্ব সমিধো মম ॥৪॥
3.5
ভূর্ভুবঃ স্বর্দ্যৌরিব ভূম্না পৃথিবীব বরিম্ণা । তস্যাস্তে পৃথিবি দেবয়জনি পৃষ্ঠেঽগ্নিমন্নাদমন্নাদ্যায়াদধে ॥৫॥
3.6
আয়ং গৌঃ পৃশ্নিরক্রমীদসদন্ মাতরং পুরঃ । পিতরং চ প্রয়ন্ত্স্বঃ ॥৬॥
3.7
অন্তশ্চরতি রোচনাস্য প্রাণাদপানতী । ব্যখ্যন্ মহিষো দিবম্ ॥৭॥
3.8
ত্রিjশদ্ধাম বি রাজতি বাক্ পতঙ্গায় ধীয়তে । প্রতি বস্তোরহ দ্যুভিঃ ॥৮॥
3.9
অগ্নির্জ্যোতির্জ্যোতিরগ্নিঃ স্বাহা । সূর্যো জ্যোতির্জ্যোতিঃ সূর্যঃ স্বাহা ।
অগ্নির্বর্চো জ্যোতির্বর্চঃ স্বাহা । সূর্যো বর্চো জ্যোতির্বর্চঃ স্বাহা । জ্যোতিঃ সূর্যঃ সূর্যো জ্যোতিঃ স্বাহা ॥৯॥
3.10
সজূর্দেবেন সবিত্রা সজূ রাত্র্যেন্দ্রবত্যা । জুষাণো অগ্নির্বেতু স্বাহা ।
সজূর্দেবেন সবিত্রা সজূরুষসেন্দ্রবত্যা ।জুষাণঃ সূর্যো বেতু স্বাহা ॥১০॥
3.11
উপপ্রয়ন্তো অধ্বরং মন্ত্রং বোচেমাগ্নয়ে । আরে অস্মে চ শৃণ্বতে ॥১১॥
3.12
অগ্নির্মূর্ধা দিবঃ ককুত্পতিঃ পৃথিব্যা অয়ম্ । অপাংরেতাংসি জিন্বতি ॥১২॥
3.13
উভা বামিন্দ্রাগ্নী আহুবধ্যা উভা রাধসঃ সহ মাদয়ধ্যৈ ।
উভা দাতারাবিষাংরয়ীণামুভা বাজস্য সাতয়ে হুবে বাম্ ॥১৩॥
3.14
অয়ং তে যোনিরৃত্বিয়ো যতো জাতো অরোচথাঃ । তং জানন্নগ্ন আরোহাথা নো বর্ধয়া রয়িম্ ॥১৪॥
3.15
অয়মিহ প্রথমো ধায়ি ধাতৃভির্হোতা যজিষ্ঠো অধ্বরেষ্বীড্যঃ ।
যমপ্নবানো ভৃগবো বিরুরুচুর্বনেষু চিত্রং বিভ্বং বিশেবিশে ॥১৫॥
3.16
অস্য প্রত্নামনু দ্যুতংশুক্রং দুদুহ্রে অহ্রয়ঃ । পয়ঃ সহস্রসামৃষিম্ ॥১৬॥
3.17
তনূপা অগ্নেঽসি তন্বং মে পাহ্যায়ুর্দা অগ্নে স্যায়ুর্মে দেহি বর্চোদা অগ্নেঽসি বর্চো মে দেহি ।
অগ্নে যন্মে তন্বা ঊনং তন্ম আপৃণ ॥১৭॥
3.18
ইন্ধানাস্ত্বা শতংহিমা দ্যুমন্তংসমিধীমহি । বয়স্বন্তো বয়স্কৃত সহস্বন্তঃ সহস্কৃতম্ ।
অগ্নে সপত্নদম্ভনমদব্ধাসো অদাভ্যম্ । চিত্রাবসো স্বস্তি তে পারমশীয় ॥১৮॥
3.19
সং ত্বমগ্নে সূর্যস্য বর্চসাগথাঃ সমৃষীণাং স্তুতেন ।
সং প্রিয়েণ ধাম্না সমহমায়ুষা সং বর্চসা সং প্রজয়া সং রায়স্পোষেণ গ্মিষীয় ॥১৯॥
3.20
অন্ধ স্থান্ধো বো ভক্ষীয় মহ স্থ মহো বো ভক্ষীয়োর্জ স্থোর্জং বো ভক্ষীয় রায়স্পোষ স্থ রায়স্পোষং বো ভক্ষীয় ॥২০॥
3.21
রেবতী রমধ্বমস্মিন্যোনাবস্মিন্ গোষ্ঠেঽস্মিংল্লোকেঽস্মিন্ক্ষয়ে । ইহৈব স্ত মাপগাত ॥২১॥
3.22
সংহিতাসি বিশ্বরূপ্যূর্জা মাবিশ গৌপত্যেন । উপ ত্বাগ্নে দিবেদিবে দোষাবস্তর্দ্ধিয়া বয়ম্ ।
নমো ভরন্ত এমসি ॥২২॥
3.23
রাজন্তমধ্বরাণাং গোপামৃতস্য দীদিবিম্ । বর্ধমানং স্বে দমে ॥২৩॥
3.24
স নঃ পিতেব সূনবেঽগ্নে সূপায়নো ভব । সচস্বা নঃ স্বস্তয়ে ॥২৪॥
3.25
অগ্নে ত্বং নো অন্তম উত ত্রাতা শিবো ভবা বরূথ্যঃ ।
বসুরগ্নির্বসুশ্রবা অচ্ছা নক্ষি দ্যুমত্তমং রয়িং দাঃ ॥২৫॥
3.26
তং ত্বা শোচিষ্ঠ দীদিবঃ সুম্নায় নূনমীমহে সখিভ্যঃ ।
স নো বোধি শ্রুধী হবমুরুষ্যা ণো অধায়তঃ সমস্মাৎ ॥২৬॥
3.27
ইড এহ্যদিত এহি কাম্যা এত । ময়ি বঃ কামধরণং ভূয়াৎ ॥২৭॥
3.28
সোমানং স্বরণং কৃণুহি ব্রহ্মণস্পতে । কক্ষীবন্তং য ঔশিজঃ ॥২৮॥
3.29
যো রেবান্যো অমীবহা বসুবিত্পুষ্টিবর্দ্ধনঃ । স নঃ সিষক্তু যস্তুরঃ ॥২৯॥
3.30
মা নঃ শংসো অররুষো ধূর্তিঃ প্রণঙ মর্ত্যস্য । রক্ষা ণো ব্রহ্মণস্পতে ॥৩০॥
3.31
মহি ত্রীণামবোঽস্তু দ্যুক্ষং মিত্রস্যার্যম্ণঃ । দুরাধর্ষং বরুণস্য ॥৩১॥
3.32
নহি তেষামমা চন নাধ্বসু বারণেষু । ঈশে রিপুরঘশংসঃ ॥৩২॥
3.33
তে হি পুত্রাসো অদিতেঃ প্র জীবসে মর্ত্যায় । জ্যোতির্যচ্ছন্ত্যজস্রম্ ॥৩৩॥
3.34
কদা চন স্তরীরসি নেন্দ্র সশ্চসি দাশুষে । উপোপেন্নু মঘবন্ ভূয় ইন্নু তে দানং দেবস্য পৃচ্যতে ॥৩৪॥
3.35
তত্সবিতুর্বরেণ্যং ভর্গো দেবস্য ধীমহি । ধিয়ো যো নঃ প্রচোদয়াৎ ॥৩৫॥
3.36
পরি তে দূডভো রথোঽস্মাঁ২ অশ্নোতু বিশ্বতঃ । যেন রক্ষসি দাশুষঃ ॥৩৬॥
3.37
ভূর্ভুবঃ স্বঃ সুপ্রজাঃ প্রজাভিঃ স্যাং সুবীরো বীরৈঃ সুপোষঃ পোষৈঃ ।
নর্য প্রজাং মে পাহি শংস্য পশূন্মে পাহ্যথর্য পিতুং মে পাহি ॥৩৭॥
3.38
আ গন্ম বিশ্ববেদসমস্মভ্যং বসুবিত্তমম্ । অগ্নে সম্রাডভি দ্যুম্নমভি সহ আ যচ্ছস্ব ॥৩৮॥
3.39
অয়মগ্নির্গৃহপতির্গার্হপত্যঃ প্রজায়া বসুবিত্তমঃ । অগ্নে গৃহপতেঽভি দ্যুম্নমভি সহ আ যচ্ছস্ব ॥৩৯॥
3.40
অয়মগ্নিঃ পুরীষ্যো রয়িমান্ পুষ্টিবর্ধনঃ । অগ্নে পুরীষ্যাভি দ্যুম্নমভি সহ আ যচ্ছস্ব ॥৪০॥
3.41
গৃহা মা বিভীত মা বেপধ্বমূর্জং বিভ্রত এমসি । ঊর্জং বিভ্রদ্বঃ সুমনাঃ সুমেধা গৃহানৈমি মনসা মোদমানঃ ॥৪১॥
3.42
যেষামধ্যেতি প্রবসন্যেষু সৌমনসো বহুঃ । গৃহানুপহ্বয়ামহে তে নো জানন্তু জানতঃ ॥৪২॥
3.43
উপহূতা ইহ গাব উপহূতা অজাবয়ঃ । অথো অন্নস্য কীলাল উপহূতো গৃহেষু নঃ । ক্ষেমায় বঃ শান্ত্যৈ প্রপদ্যে শিবং শগ্মং শংয়োঃ শংয়োঃ ॥৪৩॥
3.44
প্রঘাসিনো হবামহে মরুতশ্চ রিশাদসঃ । করম্ভেণ সজোষসঃ ॥৪৪॥
3.45
যদ্গ্রামে যদরণ্যে যত্সভায়াং যদিন্দ্রিয়ে । যদেনশ্চকৃমা বয়মিদং তদবয়জামহে স্বাহা ॥৪৫॥
3.46
মো ষূ ণ ইন্দ্রাত্র পৃত্সু দেবৈরস্তি হি ষ্মা তে শুষ্মিন্নবয়াঃ ।
মহশ্চিদ্যস্য মীঢুষো যব্যা হবিষ্মতো মরুতো বন্দতে গীঃ ॥৪৬॥
3.47
অক্রন্ কর্ম কর্মকৃতঃ সহ বাচা ময়োভুবা । দেবেভ্যঃ কর্ম কৃত্বাস্তং প্রেত সচাভুবঃ ॥৪৭॥
3.48
অবভৃথ নিচুম্পুণ নিচেরুরসি নিচুম্পুণঃ ।
অব দেবৈর্দেবকৃতমেনোঽয়াসিষমব মর্ত্যৈর্মর্ত্যকৃতং পুরুরাব্ণো দেব রিষস্পাহি ॥৪৮॥
3.49
পূর্ণা দর্বি পরা পত সুপূর্ণা পুনরা পত । বস্নেব বিক্রীণাবহা ইষমূর্জং শতক্রতো ॥৪৯॥
3.50
দেহি মে দদামি তে নি মে ধেহি নি ত দধে । নিহারং চ হরাসি মে নিহারং নি হরাণি তে স্বাহা ॥৫০॥
3.51
অক্ষন্নমীমদন্ত হ্যব প্রিয়া অধূষত ।
অস্তোষত স্বভানবো বিপ্রা নিবিষ্ঠয়া মতী যোজা ন্বিন্দ্র তে হরী ॥৫১॥
3.52
সুসন্দৃশং ত্বা বয়ং মঘবন্বন্দিষীমহি ।
প্র নূনং পূর্ণবন্ধুর স্তুতো যাসি বশাঁ২ অনু যোজা ন্বিন্দ্র তে হরী ॥৫২॥
3.53
মনো ন্বাহ্বামহে নারাশjসেন স্তোমেন । পিতৄণাং চ মন্মভিঃ ॥৫৩॥
3.54
আ ন এতু মনঃ পুনঃ ক্রত্বে দক্ষায় জীবসে । জ্যোক্ চ সূর্যং দৃশে ॥৫৪॥
3.55
পুনর্নঃ পিতরো মনো দদাতু দৈব্যো জনঃ । জীবং ব্রাতং সচেমহি ॥৫৫॥
3.56
বয়ং সোম ব্রতে তব মনস্তনূষু বিভ্রতঃ । প্রজাবন্তঃ সচেমহি ॥৫৬॥
3.57
এষ তে রুদ্র ভাগঃ সহ স্বস্রাম্বিকয়া তং জুষস্ব স্বাহৈষ তে রুদ্র ভাগ আখুস্তে পশুঃ ॥৫৭॥
3.58
অব রুদ্রমদীমহ্যব দেবং ত্র্যম্বকম্ । যথা নো বস্যসস্করদ্যথা নঃ শ্রেয়সস্করদ্যথা নো ব্যবসায়য়াৎ ॥৫৮॥
3.59
ভেষজমসি ভেষজং গবেঽশ্বায় পুরুষায় ভেষজম্ । সুখং মেষায় মেষ্যৈ ॥৫৯॥
3.60
ত্র্যম্বকং যজামহে সুগন্ধিং পুষ্টিবর্ধনম্ । উর্বারুকমিব বন্ধনান্মৃত্যোর্মুক্ষীয় মামৃতাৎ ।
ত্র্যম্বকং যজামহে সুগন্ধিং পতিবেদনম্ । উর্বারুকমিব বন্ধনাদিতো মুক্ষীয় মামুতঃ ॥৬০॥
3.61
এতত্তে রুদ্রাবসং তেন পরো মূজবতোঽতীহি ।
অবততধন্বা পিনাকাবসঃ কৃত্তিবাসা অহিংসন্নঃ শিবোঽতীহি ॥৬১॥
3.62
ত্র্যায়ুষং জমদগ্নেঃ কশ্যপস্য ত্র্যায়ুষম্ । যদ্দেবেষু ত্র্যায়ুষং তন্নো অস্তু ত্র্যায়ুষম্ ॥৬২॥
3.63
শিবো নামাসি স্বধিতিস্তে পিতা নমস্তে অস্তু মা মা হিংসীঃ ।
নি বর্তয়াম্যায়ুষেঽন্নাদ্যায় প্রজননায় রায়স্পোষায় সুপ্রজাস্ত্বায় সুবীর্যায় ॥৬৩॥