अ॒ग्निर्ज्योति॒र्ज्योति॑र॒ग्निः स्वाहा॑ । सूर्यो॒ ज्योति॒र्ज्योति॒ः सूर्य॒ः स्वाहा॑ ।
अ॒ग्निर्वर्चो॒ ज्योति॒र्वर्चः॒ स्वाहा॑ । सूर्यो॒ वर्चो॒ ज्योति॒र्वर्चः॒ स्वाहा॑ । ज्योति॒ः सूर्य॒ः सूर्यो॒ ज्योति॒ः स्वाहा॑ ॥९॥

Agnirjyotirjyotiragnih svaha, suryo jyotirjyotih suryah svaha
Agnirvarcho jyotirvarchah svaha, suryo varcho jyotirvarchah svaha, jyotih suryah suryo jyotih svaha

3.10

स॒जूर्दे॒वेन॑ सवि॒त्रा स॒जू रात्र्येन्द्र॑वत्या । जु॑षा॒णो अ॒ग्निर्वे॑तु॒ स्वाहा॑ ।
स॒जूर्दे॒वेन॑ सवि॒त्रा स॒जूरु॒षसेन्द्र॑वत्या ।जु॑षा॒णः सूर्यो॑ वेतु॒ स्वाहा॑ ॥१०॥

Sajurdevena savitra saju ratryendravatya, jushano agnirvetu svaha
Sajurdevena savitra sajurushasendravatya, jushanah suryo vetu svaha

3.11

उ॒प॒प्र॒यन्तो॑ अध्व॒रं मन्त्रं॑ वोचेमा॒ग्नये॑ । आ॒रे अ॒स्मे च॑ शृण्व॒ते ॥११॥

Upaprayanto adhvaram mantram vochemagnaye, are asme cha shrinvate

3.12

अ॒ग्निर्मू॒र्धा दि॒वः क॒कुत्पति॑ः पृथि॒व्या अ॒यम् । अ॒पाᳪरेता॑ᳪसि जिन्वति ॥१२॥

Agnirmurdha divah kakutpatih prithivya ayam, apanretansi jinvati

3.13

उ॒भा वा॑मिन्द्राग्नी आहु॒वध्या॑ उ॒भा राध॑सः स॒ह मा॑द॒यध्यै॑ ।
उ॒भा दा॒तारा॑वि॒षाᳪर॑यी॒णामु॒भा वाज॑स्य सा॒तये॑ हुवे वाम् ॥१३॥

Ubha vamindragni ahuvadhya ubha radhasah saha madayadhyai
Ubha dataravishanrayinamubha vajasya sataye huve vam

3.14

अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आरो॒हाथा॑ नो वर्धया र॒यिम् ॥१४॥

Ayam te yonirritviyo yato jato arochathah, tam janannagna arohatha no vardhaya rayim

3.15

अ॒यमि॒ह प्र॑थ॒मो धा॑यि धा॒तृभि॒र्होता॒ यजि॑ष्ठो अध्व॒रेष्वीड्य॑ः ।
यमप्न॑वानो॒ भृग॑वो विरुरु॒चुर्वने॑षु चि॒त्रं वि॒भ्वं॒ वि॒शेवि॑शे ॥१५॥

Ayamiha prathamo dhayi dhatribhirhota yajishtho adhvareshvidyah
Yamapnavano bhrigavo viruruchurvaneshu chitram vibhvam vishevishe

3.16

अ॒स्य प्र॒त्नामनु॒ द्युत॑ᳪशु॒क्रं दु॑दुह्रे॒ अह्र॑यः । पय॑ः सहस्र॒सामृषि॑म् ॥१६॥

Asya pratnamanu dyutanshukram duduhre ahrayah, payah sahasrasamrishim

3.17

त॑नू॒पा अ॑ग्नेऽसि त॒न्वं॒ मे पाह्यायु॒र्दा अ॑ग्ने॒ स्यायु॑र्मे देहि व॑र्चो॒दा अ॑ग्नेऽसि॒ वर्चो॑ मे देहि ।
अग्ने॒ यन्मे॑ त॒न्वा॒ ऊ॒नं तन्म॒ आपृ॑ण ॥१७॥

Tanupa agnesi tanvam me pahyayurda agne syayurme dehi varchoda agnesi varcho me dehi
Agne yanme tanva unam tanma aprina

3.18

इन्धा॑नास्त्वा श॒तᳪहिमा॑ द्यु॒मन्त॒ᳪसमि॑धीमहि । वय॑स्वन्तो वय॒स्कृत॒ सह॑स्वन्तः सह॒स्कृत॑म् ।
अग्ने॑ सपत्न॒दम्भ॑न॒मद॑ब्धासो॒ अदा॑भ्यम् । चित्रा॑वसो स्व॒स्ति ते॑ पा॒रम॑शीय ॥१८॥

Indhanastva shatanhima dyumantansamidhimahi, vayasvanto vayaskrita sahasvantah sahaskritam
Agne sapatnadambhanamadabdhaso adabhyam, chitravaso svasti te paramashiya

3.19

सं त्वम॑ग्ने॒ सूर्य॑स्य॒ वर्च॑सागथा॒ः समृषी॑णाᳪ स्तु॒तेन॑ ।
सं प्रि॒येण॒ धाम्ना॒ सम॒हमायु॑षा॒ सं वर्च॑सा॒ सं प्र॒जया॒ सᳪ रा॒यस्पोषे॑ण ग्मिषीय ॥१९॥

Sam tvamagne suryasya varchasagathah samrishinam stutena
Sam priyena dhamna samahamayusha sam varchasa sam prajaya sam rayasposhena gmishiya

3.20

अन्ध॒ स्थान्धो॑ वो भक्षीय॒ मह॑ स्थ॒ महो॑ वो भक्षी॒योर्ज॒ स्थोर्जं॑ वो भक्षीय रा॒यस्पोष॑ स्थ रा॒यस्पोषं॑ वो भक्षीय ॥२०॥

Andha sthandho vo bhakshiya maha stha maho vo bhakshiyorja sthorjam vo bhakshiya rayasposha stha rayasposham vo bhakshiya

3.21

रेव॑ती॒ रम॑ध्वम॒स्मिन्योना॑व॒स्मिन् गो॒ष्ठेऽस्मिंल्लो॒के॒ऽस्मिन्क्षये॑ । इहै॒व स्त॒ माप॑गात ॥२१॥

Revati ramadhvamasminyonavasmin goshthesminllokesminkshaye, ihaiva sta mapagata

3.22

स॒ᳪहि॒तासि॑ विश्वरू॒प्यू॒र्जा मावि॑श गौप॒त्येन॑ । उप॑ त्वाग्ने दि॒वेदि॑वे॒ दोषा॑वस्तर्द्धि॒या व॒यम् ।
नमो॒ भर॑न्त॒ एम॑सि ॥२२॥

Sanhitasi vishvarupyurja mavisha gaupatyena, upa tvagne divedive doshavastarddhiya vayam
Namo bharanta emasi

3.23

राज॑न्तमध्व॒राणां॑ गो॒पामृ॒तस्य॒ दीदि॑विम् । वर्ध॑मान॒ᳪ स्वे दमे॑ ॥२३॥

Rajantamadhvaranam gopamritasya didivim, vardhamanam sve dame

3.24

स न॑ः पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये॑ ॥२४॥

Sa nah piteva sunavegne supayano bhava, sachasva nah svastaye

3.25

अग्ने॒ त्वं नो॒ अन्त॑म उ॒त त्रा॒ता शि॒वो भ॑वा वरू॒थ्य॒ः ।
वसु॑र॒ग्निर्वसुश्र॑वा॒ अच्छा॑ नक्षि द्यु॒मत्त॑मᳪ र॒यिं दा॑ः ॥२५॥

Agne tvam no antama uta trata shivo bhava varuthyah
Vasuragnirvasushrava achchha nakshi dyumattamam rayim dah

3.26

तं त्वा॑ शोचिष्ठ दीदिवः सु॒म्नाय॑ नू॒नमी॑महे॒ सखि॑भ्यः ।
स नो॑ बोधि श्रु॒धी हव॑मुरु॒ष्या णो॑ अधाय॒तः सम॑स्मात् ॥२६॥

Tam tva shochishtha didivah sumnaya nunamimahe sakhibhyah
Sa no bodhi shrudhi havamurushya no adhayatah samasmat

3.27

इड॒ एह्यदि॑त॒ एहि॑ काम्या॒ एत॑ । मयि॑ वः काम॒धर॑णं भूयात् ॥२७॥

Ida ehyadita ehi kamya eta, mayi vah kamadharanam bhuyat

3.28

सो॒मान॒ᳪ स्वर॑णं कृणु॒हि ब्र॑ह्मणस्पते । क॒क्षीव॑न्तं॒ य औ॑शि॒जः ॥२८॥

Somanam svaranam krinuhi brahmanaspate, kakshivantam ya aushijah

3.29

यो रे॒वान्यो अ॑मीव॒हा व॑सु॒वित्पु॑ष्टि॒वर्द्ध॑नः । स न॑ः सिषक्तु॒ यस्तु॒रः ॥२९॥

Yo revanyo amivaha vasuvitpushtivarddhanah, sa nah sishaktu yasturah

3.30

मा न॒ः शᳪसो॒ अर॑रुषो धू॒र्तिः प्रण॒ङ मर्त्य॑स्य । रक्षा॑ णो ब्रह्मणस्पते ॥३०॥

Ma nah shanso ararusho dhurtih prananga martyasya, raksha no brahmanaspate

3.31

महि॑ त्री॒णामवो॑ऽस्तु द्यु॒क्षं मि॒त्रस्या॑र्य॒म्णः । दु॑रा॒धर्षं॒ वरु॑णस्य ॥३१॥

Mahi trinamavostu dyuksham mitrasyaryamnah, duradharsham varunasya

3.32

न॒हि तेषा॑म॒मा च॒न नाध्व॑सु वार॒णेषु॑ । ईशे॑ रि॒पुर॒घश॑ᳪसः ॥३२॥

Nahi teshamama chana nadhvasu varaneshu, ishe ripuraghashansah

3.33

ते हि पु॒त्रासो॒ अदि॑तेः॒ प्र जी॒वसे॒ मर्त्या॑य । ज्योति॒र्यच्छ॒न्त्यज॑स्रम् ॥३३॥

Te hi putraso aditeh pra jivase martyaya, jyotiryachchhantyajasram

3.34

क॒दा च॒न स्त॒रीर॑सि॒ नेन्द्र॑ सश्चसि दा॒शुषे॑ । उ॒पोपेन्नु म॑घव॒न् भूय॒ इन्नु ते॒ दानं॑ दे॒वस्य॑ पृच्यते ॥३४॥

Kada chana starirasi nendra sashchasi dashushe, upopennu maghavan bhuya innu te danam devasya prichyate

3.35

तत्स॑वि॒तुर्वरे॑ण्यं॒ भर्गो॑ दे॒वस्य॑ धीमहि । धियो॒ यो न॑ः प्रचो॒दया॑त् ॥३५॥

Tatsaviturvarenyam bhargo devasya dhimahi, dhiyo yo nah prachodayat

3.36

परि॑ ते दू॒डभो॒ रथो॒ऽस्माँ२ अ॑श्नोतु वि॒श्वत॑ः । येन॒ रक्ष॑सि दा॒शुष॑ः ॥३६॥

Pari te dudabho rathosman2 ashnotu vishvatah, yena rakshasi dashushah

3.37

भूर्भुव॒ः स्व॒ः सुप्र॒जाः प्र॒जाभि॑ः स्याᳪ सु॒वीरो॑ वी॒रैः सु॒पोष॒ः पोषै॑ः ।
नर्य॑ प्र॒जां मे॑ पाहि शᳪस्य॑ प॒शून्मे॑ पा॒ह्यथ॑र्य पि॒तुं मे॑ पाहि ॥३७॥

Bhurbhuvah svah suprajah prajabhih syam suviro viraih suposhah poshaih
Narya prajam me pahi shansya pashunme pahyatharya pitum me pahi

3.38

आ ग॑न्म वि॒श्ववे॑दसम॒स्मभ्यं॑ वसु॒वित्त॑मम् । अग्ने॑ सम्राड॒भि द्यु॒म्नम॒भि सह॒ आ य॑च्छस्व ॥३८॥

A ganma vishvavedasamasmabhyam vasuvittamam, agne samradabhi dyumnamabhi saha a yachchhasva

3.39

अ॒यम॒ग्निर्गृ॒हप॑ति॒र्गार्ह॑पत्यः प्र॒जाया॑ वसु॒वित्त॑मः । अग्ने॑ गृहपते॒ऽभि द्यु॒म्नम॒भि सह॒ आ य॑च्छस्व ॥३९॥

Ayamagnirgrihapatirgarhapatyah prajaya vasuvittamah, agne grihapatebhi dyumnamabhi saha a yachchhasva

3.40

अ॒यम॒ग्निः पु॑री॒ष्यो॒ रयि॒मान् पु॑ष्टि॒वर्ध॑नः । अग्ने॑ पुरीष्या॒भि द्यु॒म्नम॒भि सह॒ आ य॑च्छस्व ॥४०॥

Ayamagnih purishyo rayiman pushtivardhanah, agne purishyabhi dyumnamabhi saha a yachchhasva

3.41

गृहा॒ मा बि॑भीत॒ मा वे॑पध्व॒मूर्जं॑ बिभ्रत॒ एम॑सि । ऊर्जं॒ बिभ्र॑द्वः सु॒मना॑ः सुमे॒धा गृ॒हानैमि॒ मन॑सा॒ मोद॑मानः ॥४१॥

Griha ma bibhita ma vepadhvamurjam bibhrata emasi, urjam bibhradvah sumanah sumedha grihanaimi manasa modamanah

3.42

येषा॑म॒ध्येति॑ प्र॒वस॒न्येषु॑ सौमन॒सो ब॒हुः । गृ॒हानुप॑ह्वयामहे॒ ते नो॑ जानन्तु जान॒तः ॥४२॥

Yeshamadhyeti pravasanyeshu saumanaso bahuh, grihanupahvayamahe te no janantu janatah

3.43

उप॑हूता इ॒ह गाव॒ उप॑हूता अजा॒वय॑ः । अथो॒ अन्न॑स्य की॒लाल॒ उप॑हूतो गृ॒हेषु॑ नः । क्षेमा॑य व॒ः शान्त्यै॒ प्रप॑द्ये शि॒वᳪ श॒ग्मᳪ शं॒योः शं॒योः ॥४३॥

Upahuta iha gava upahuta ajavayah, atho annasya kilala upahuto griheshu nah, kshemaya vah shantyai prapadye shivam shagmam shanyoh shanyoh

3.44

प्र॒घा॒सिनो॑ हवामहे म॒रुत॑श्च रि॒शाद॑सः । क॒र॒म्भेण॑ स॒जोष॑सः ॥४४॥

Praghasino havamahe marutashcha rishadasah, karambhena sajoshasah

3.45

यद्ग्रामे॒ यदर॑ण्ये॒ यत्स॒भायां॒ यदि॑न्द्रि॑ये । यदेन॑श्चकृ॒मा व॒यमि॒दं तदव॑यजामहे॒ स्वाहा॑ ॥४५॥

Yadgrame yadaranye yatsabhayam yadindriye, yadenashchakrima vayamidam tadavayajamahe svaha

3.46

मो षू ण॑ इ॒न्द्रात्र॑ पृ॒त्सु दे॒वैरस्ति॒ हि ष्मा॑ ते शुष्मिन्नव॒याः ।
म॒हश्चि॒द्यस्य॑ मी॒ढुषो॑ य॒व्या ह॒विष्म॑तो म॒रुतो॒ वन्द॑ते॒ गीः ॥४६॥

Mo shu na indratra pritsu devairasti hi shma te shushminnavayah
Mahashchidyasya midhusho yavya havishmato maruto vandate gih

3.47

अक्र॒न् कर्म॑ कर्म॒कृत॑ः स॒ह वा॒चा म॑यो॒भुवा॑ । दे॒वेभ्य॒ः कर्म॑ कृ॒त्वास्तं॒ प्रेत॑ सचाभुवः ॥४७॥

Akran karma karmakritah saha vacha mayobhuva, devebhyah karma kritvastam preta sachabhuvah

3.48

अव॑भृथ निचुम्पुण निचे॒रुर॑सि निचुम्पु॒णः ।
अव॑ दे॒वैर्दे॒वकृ॑त॒मेनो॑ऽयासिष॒मव॒ मर्त्यै॒र्मर्त्य॑कृतं पुरु॒राव्णो॑ देव रि॒षस्पा॑हि ॥४८॥

Avabhritha nichumpuna nicherurasi nichumpunah
Ava devairdevakritamenoyasishamava martyairmartyakritam pururavno deva rishaspahi

3.49

पू॒र्णा द॑र्वि॒ परा॑ पत॒ सुपू॑र्णा॒ पुन॒रा प॑त । व॒स्नेव॒ विक्री॑णावहा॒ इष॒मूर्ज॑ᳪ शतक्रतो ॥४९॥

Purna darvi para pata supurna punara pata, vasneva vikrinavaha ishamurjam shatakrato

3.50

दे॒हि मे॒ ददा॑मि ते॒ नि मे॑ धेहि॒ नि त दधे । नि॒हारं॑ च॒ हरा॑सि मे नि॒हारं॒ नि ह॑राणि ते॒ स्वाहा॑ ॥५०॥

Dehi me dadami te ni me dhehi ni ta dadhe, niharam cha harasi me niharam ni harani te svaha

3.51

अक्ष॒न्नमी॑मदन्त॒ ह्यव॑ प्रि॒या अ॑धूषत ।
अस्तो॑षत॒ स्वभा॑नवो॒ विप्रा॒ निवि॑ष्ठया म॒ती योजा॒ न्वि॒न्द्र ते॒ हरी॑ ॥५१॥

Akshannamimadanta hyava priya adhushata
Astoshata svabhanavo vipra nivishthaya mati yoja nvindra te hari

3.52

सु॒स॒न्दृशं॑ त्वा व॒यं मघ॑वन्वन्दिषी॒महि॑ ।
प्र नू॒नं पू॒र्णब॑न्धुर स्तु॒तो या॑सि॒ वशाँ॒२ अनु॒ योजा॒ न्वि॒न्द्र ते॒ हरी॑ ॥५२॥

Susandrisham tva vayam maghavanvandishimahi
Pra nunam purnabandhura stuto yasi vashan2 anu yoja nvindra te hari

3.53

मनो॒ न्वाह्वा॑महे नाराश॒jसेन॒ स्तोमे॑न । पि॑तॄ॒णां च॒ मन्म॑भिः ॥५३॥

Mano nvahvamahe narashajsena stomena, pitrinam cha manmabhih

3.54

आ न॑ एतु॒ मन॒ः पुन॒ः क्रत्वे॒ दक्षा॑य जी॒वसे॑ । ज्योक् च॒ सूर्यं॑ दृ॒शे ॥५४॥

A na etu manah punah kratve dakshaya jivase, jyok cha suryam drishe

3.55

पुन॑र्नः पितरो॒ मनो॒ ददा॑तु दैव्यो॒ जन॑ः । जी॒वं व्रात॑ᳪ सचेमहि ॥५५॥

Punarnah pitaro mano dadatu daivyo janah, jivam vratam sachemahi

3.56

व॒यᳪ सो॑म व्र॒ते तव॒ मन॑स्त॒नूषु॒ बिभ्र॑तः । प्र॒जाव॑न्तः सचेमहि ॥५६॥

Vayam soma vrate tava manastanushu bibhratah, prajavantah sachemahi

3.57

ए॒ष ते॑ रुद्र भा॒गः स॒ह स्वस्राम्बि॑कया॒ तं जु॑षस्व॒ स्वाहै॒ष ते॑ रुद्र भा॒ग आ॒खुस्ते॑ प॒शुः ॥५७॥

Esha te rudra bhagah saha svasrambikaya tam jushasva svahaisha te rudra bhaga akhuste pashuh

3.58

अव॑ रु॒द्रम॑दीम॒ह्यव॑ दे॒वं त्र्य॑म्बकम् । यथा॑ नो॒ वस्य॑स॒स्कर॒द्यथा॑ न॒ः श्रेय॑स॒स्कर॒द्यथा॑ नो व्यवसा॒यया॑त् ॥५८॥

Ava rudramadimahyava devam tryambakam, yatha no vasyasaskaradyatha nah shreyasaskaradyatha no vyavasayayat

3.59

भे॒ष॒जम॑सि भेष॒जं गवेऽश्वा॑य॒ पुरु॑षाय भेष॒जम् । सु॒खं मे॒षाय॑ मेष्यै ॥५९॥

Bheshajamasi bheshajam gaveshvaya purushaya bheshajam, sukham meshaya meshyai

3.60

त्र्य॑म्बकं यजामहे सुग॒न्धिं पु॑ष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त् ।
त्र्य॑म्बकं यजामहे सुग॒न्धिं प॑ति॒वेद॑नम् । उ॒र्वा॒रु॒कमि॑व॒ बन्ध॑नादि॒तो मु॑क्षीय॒ मामुत॑ः ॥६०॥

Tryambakam yajamahe sugandhim pushtivardhanam, urvarukamiva bandhananmrityormukshiya mamritat
Tryambakam yajamahe sugandhim pativedanam, urvarukamiva bandhanadito mukshiya mamutah

3.61

ए॒तत्ते॑ रुद्राव॒सं तेन॑ प॒रो मूज॑व॒तोऽती॑हि ।
अव॑ततधन्वा॒ पिना॑कावस॒ः कृत्ति॑वासा॒ अहि॑ᳪसन्नः शि॒वोऽती॑हि ॥६१॥

Etatte rudravasam tena paro mujavatotihi
Avatatadhanva pinakavasah krittivasa ahinsannah shivotihi

3.62

त्र्या॑यु॒षं ज॒मद॑ग्नेः क॒श्यप॑स्य त्र्यायु॒षम् । यद्दे॒वेषु॑ त्र्यायु॒षं तन्नो॑ अस्तु त्र्यायु॒षम् ॥६२॥

Tryayusham jamadagneh kashyapasya tryayusham, yaddeveshu tryayusham tanno astu tryayusham

3.63

शि॒वो नामा॑सि॒ स्वधि॑तिस्ते पि॒ता नम॑स्ते अस्तु॒ मा मा॑ हिᳪसीः ।
नि व॑र्तयाम्यायु॑षे॒ऽन्नाद्या॑य॒ प्रजन॑नाय रा॒यस्पोषा॑य सुप्रजा॒स्त्वाय॑ सु॒वीर्या॑य ॥६३॥

Shivo namasi svadhitiste pita namaste astu ma ma hinsih
Ni vartayamyayushennadyaya prajananaya rayasposhaya suprajastvaya suviryaya

Contains text from DharmicData, made available under the Open Database License (ODbL). Simple meanings are written by AI and can contain mistakes.