অধ্যায় 11

11.1

যুঞ্জানঃ প্রথমং মনস্তত্ত্বায় সবিতা ধিয়ঃ । অগ্নের্জ্যোতির্নিচায্য পৃথিব্যা অধ্যাঽভরৎ ॥১॥

11.2

যুক্তেন মনসা বয়ং দেবস্য সবিতুঃ সবে । স্বর্গ্যায় শক্ত্যা ॥২॥

11.3

যুক্ত্বায় সবিতা দেবান্ত্স্বর্যতো ধিয়া দিবম্ । বৃহজ্জ্যোতিঃ করিষ্যতঃ সবিতা প্র সুবাতি তান্ ॥৩॥

11.4

যুঞ্জতে মন উত যুঞ্জতে ধিয়ো বিপ্রা বিপ্রস্য বৃহতো বিপশ্চিতঃ ।
বি হোত্রা দধে বয়ুনাবিদেক ইন্মহী দেবস্য সবিতুঃ পরিষ্টুতিঃ ॥৪॥

11.5

যুজে বাং ব্রহ্ম পূর্ব্যং নমোভির্বি শ্লোক এতু পথ্যেব সূরেঃ ।
শৃণ্বন্তু বিশ্বে অমৃতস্য পুত্রা আ যে ধামানি দিব্যানি তস্থুঃ ॥৫॥

11.6

যস্য প্রয়াণমন্বন্য ইদ্যয়ুর্দেবা দেবস্য মহিমানমোজসা ।
যঃ পার্থিবানি বিমমে স এতশো রজাংসি দেবঃ সবিতা মহিত্বনা ॥৬॥

11.7

দেব সবিতঃ প্র সুব যজ্ঞং প্র সুব যজ্ঞপতিং ভগায় ।
দিব্যো গন্ধর্বঃ কেতপূঃ কেতং নঃ পুনাতু বাচস্পতির্বাচং নঃ স্বদতু ॥৭॥

11.8

ইমং নো দেব সবিতর্যজ্ঞং প্র ণয় দেবাব্যং সখিবিদং সত্রাজিতং ধনজিতং স্বর্জিতম্ ।
ঋচা স্তোমং সমর্ধয় গায়ত্রেণ রথন্তরং বৃহদ্গায়ত্রবর্তনি স্বাহা ॥৮॥

11.9

দেবস্য ত্বা সবিতুঃ প্রসবেঽশ্বিনোর্বাহুভ্যাং পূষ্ণো হস্তাভ্যাম্ ।
আ দদে গায়ত্রেণ ছন্দসাঽঙ্গিরস্বত্পৃথিব্যাঃ সধস্থাদগ্নিং পুরীষ্যমঙ্গিরস্বদা ভর ত্রৈষ্টুভেন ছন্দসাঽঙ্গিরস্বৎ ॥৯॥

11.10

অভ্রিরসি নার্যসি ত্বয়া বয়মগ্নিং শকেম খনিতুং সধস্থ আ । জাগতেন ছন্দসাঽঙ্গিরস্বৎ ॥১০॥

11.11

হস্ত আধায় সবিতা বিভ্রদভ্রিং হিরণ্যয়ীম্ । অগ্নের্জ্যোতির্নিচায্য পৃথিব্যা অধ্যাঽভরদানুষ্টুভেন ছন্দসাঽঙ্গিরস্বৎ ॥১১॥

11.12

প্রতূর্তং বাজিন্না দ্রব বরিষ্ঠামনু সংবতম্ । দিবি তে জন্ম পরমমন্তরিক্ষে তব নাভিঃ পৃথিব্যামধি যোনিরিৎ ॥১২॥

11.13

যুঞ্জাথাং রাসভং যুবমস্মিন্ যামে বৃষণ্বসূ । অগ্নিং ভরন্তমস্ময়ুম্ ॥১৩॥

11.14

যোগে-যোগে তবস্তরং বাজে-বাজে হবামহে । সখায় ইন্দ্রমূতয়ে ॥১৪॥

11.15

প্রতূর্বন্নেহ্যবক্রামন্নশস্তী রুদ্রস্য গাণপত্যং ময়োভূরেহি । উর্বন্তরিক্ষং বীহি স্বস্তিগব্যূতিরভয়ানি কৃণ্বন্ পূষ্ণা সয়ুজা সহ ॥১৫॥

11.16

পৃথিব্যাঃ সধস্থাদগ্নিং পুরীষ্যমঙ্গিরস্বদা ভরাগ্নিং পুরীষ্যমঙ্গিরস্বদচ্ছেমো ঽগ্নিং পুরীষ্যমঙ্গিরস্বদ্ভরিষ্যামঃ ॥১৬॥

11.17

অন্বগ্নিরুষসামগ্রমখ্যদন্বহানি প্রথমো জাতবেদাঃ ।
অনু সূর্যস্য পুরুত্রা চ রশ্মীননু দ্যাবাপৃথিবী আ ততন্থ ॥১৭॥

11.18

আগত্য বাজ্যধ্বানং সর্বা মৃধো বি ধূনুতে । অগ্নিং সধস্থে মহতি চক্ষুষা নি চিকীষতে ॥১৮॥

11.19

আক্রম্য বাজিন্ পৃথিবীমগ্নিমিচ্ছ রুচা ত্বম্ । ভূম্যা বৃত্বায় নো ব্রূহি যতঃ খনেম তং বয়ম্ ॥১৯॥

11.20

দ্যৌস্তে পৃষ্ঠং পৃথিবী সধস্থমাত্মাঽন্তরিক্ষং সমুদ্রো যোনিঃ ।
বিখ্যায় চক্ষুষা ত্বমভি তিষ্ঠ পৃতন্যতঃ ॥২০॥

11.21

উত্ক্রাম মহতে সৌভগায়াস্মাদাস্থানাদ্ দ্রবিণোদা বাজিন্ ।
বয়ং স্যাম সুমতৌ পৃথিব্যা অগ্নিং খনন্ত উপস্থে অস্যাঃ ॥২১॥

11.22

উদক্রমীদ্ দ্রবিণোদা বাজ্যর্বাকঃ সুলোকং সুকৃতং পৃথিব্যাম্ ।
ততঃ খনেম সুপ্রতীকমগ্নিং স্বো রুহাণা অধি নাকমুত্তমম্ ॥২২॥

11.23

আ ত্বা জিঘর্মি মনসা ঘৃতেন প্রতিক্ষিয়ন্তং ভুবনানি বিশ্বা ।
পৃথুং তিরশ্চা বয়সা বৃহন্তং ব্যচিষ্ঠমন্নৈ রভসং দৃশানম্ ॥২৩॥

11.24

আ বিশ্বতঃ প্রত্যঞ্চং জিঘর্ম্যরক্ষসা মনসা তজ্জুষেত ।
মর্যশ্রী স্পৃহয়দ্বর্ণো অগ্নির্নাভিমৃশে তন্বা জর্ভুরাণঃ ॥২৪॥

11.25

পরি বাজপতিঃ কবিরগ্নির্হব্যান্যক্রমীৎ । দধদ্রত্নানি দাশুষে ॥২৫॥

11.26

পরি ত্বাঽগ্নে পুরং বয়ং বিপ্রং সহস্য ধীমহি । ধৃষদ্বর্ণং দিবে-দিবে হন্তারং ভঙ্গুরাবতাম্ ॥২৬॥

11.27

ত্বমগ্নে দ্যুভিস্ত্বমাশুশুক্ষণিস্ত্বমদ্ভ্যস্ত্বমশ্মনস্পরি ।
ত্বং বনেভ্যস্ত্বমোষধীভ্যস্ত্বং নৃণাং নৃপতে জায়সে শুচিঃ ॥২৭॥

দেবস্য ত্বা সবিতুঃ প্রসবেঽশ্বিনোর্বাহুভ্যাং পূষ্ণো হস্তাভ্যাম্ ।
পৃথিব্যাঃ সধস্থাদগ্নিং পুরীষ্যমঙ্গিরস্বত্খনামি ।
জ্যোতিষ্মন্তং ত্বাঽগ্নে সুপ্রতীকমজস্রেণ ভানুনা দীদ্যতম্ ।
শিবং প্রজাভ্যোঽহিংসন্তং পৃথিব্যাঃ সধস্থাদগ্নিং পুরীষ্যমঙ্গিরস্বত্খনামঃ ॥২৮॥

11.29

অপাং পৃষ্ঠমসি যোনিরগ্নেঃ সমুদ্রমভিতঃ পিন্বমানম্ ।
বর্ধমানো মহাঁ২ আ চ পুষ্করে দিবো মাত্রয়া বরিম্ণা প্রথস্ব ॥২৯॥

11.30

শর্ম চ স্থো বর্ম চ স্থোঽছিদ্রে বহুলে উভে ।
ব্যচস্বতী সং বসাথাং ভৃতমগ্নিং পুরীষ্যম্ ॥৩০॥

11.31

সং বসাথাং স্বর্বিদা সমীচী উরসা ত্মনা ।
অগ্নিমন্তর্ভরিষ্যন্তী জ্যোতিষ্মন্তমজস্রমিৎ ॥৩১॥

11.32

পুরীষ্যোঽসি বিশ্বভরা অথর্বা ত্বা প্রথমো নিরমন্থদগ্নে ।
ত্বামগ্নে পুষ্করাদধ্যথর্বা নিরমন্থত । মূর্ধ্নো বিশ্বস্য বাঘতঃ ॥৩২॥

11.33

তমু ত্বা দধ্যঙ্ঙৃষিঃ পুত্র ঈধে অথর্বণঃ । বৃত্রহণং পুরন্দরম্ ॥৩৩॥

11.34

তমু ত্বা পাথ্যো বৃষা সমীধে দস্যুহন্তমম্ । ধনঞ্জয়ং রণে-রণে ॥৩৪॥

11.35

সীদ হোতঃ স্ব উ লোকে চিকিত্বান্সাদয়া যজ্ঞং সুকৃতস্য যোনৌ ।
দেবাবীর্দেবান্হবিষা যজাস্যগ্নে বৃহদ্যজমানে বয়ো ধাঃ ॥৩৫॥

11.36

নি হোতা হোতৃষদনে বিদানস্ত্বেষো দীদিবাঁ২ অসদত্সুদক্ষঃ ।
অদব্ধব্রতপ্রমতির্বসিষ্ঠঃ সহস্রম্ভরঃ শুচিজিহ্বো অগ্নিঃ ॥৩৬॥

11.37

সং সীদস্ব মহাঁ২ অসি শোচস্ব দেববীতমঃ ।
বি ধূমমগ্নে অরুষং মিয়েধ্য সৃজ প্রশস্ত দর্শতম্ ॥৩৭॥

11.38

অপো দেবীরুপ সৃজ মধুমতীরয়ক্ষ্মায় প্রজাভ্যঃ ।
তাসামাস্থানাদুজ্জিহতামোষধয়ঃ সুপিপ্পলাঃ ॥৩৮॥

11.39

সং তে বায়ুর্মাতরিশ্বা দধাতূত্তানায়া হৃদয়ং যদ্বিকস্তম্ ।
যো দেবানাং চরসি প্রাণথেন কস্মৈ দেব বষডস্তু তুভ্যম্ ॥৩৯॥

11.40

সুজাতো জ্যোতিষা সহ শর্ম বরূথমাঽসদত্স্বঃ ।
বাসো অগ্নে বিশ্বরূপং সং ব্যয়স্ব বিভাবসো ॥৪০॥

11.41

উদু তিষ্ঠ স্বধ্বরাবা নো দেব্যা ধিয়া । দৃশে চ ভাসা বৃহতা সুশুক্বনিরাগ্নে যাহি সুশস্তিভিঃ ॥৪১॥

11.42

ঊর্ধ্ব ঊ ষু ণ ঊতয়ে তিষ্ঠা দেবো ন সবিতা । ঊর্ধ্বো বাজস্য সনিতা যদঞ্জিভির্বাঘদ্ভির্বিহ্বয়ামহে ॥৪২॥

11.43

স জাতো গর্ভো অসি রোদস্যোরগ্নে চারুর্বিভৃত ওষধীষু ।
চিত্রঃ শিশুঃ পরি তমাংস্যক্তূন্প্র মাতৃভ্যো অধি কনিক্রদদ্গাঃ ॥৪৩॥

11.44

স্থিরো ভব বীড্বঙ্গ আশুর্ভব বাজ্যর্বন্ । পৃথুর্ভব সুষদস্ত্বমগ্নেঃ পুরীষবাহণঃ ॥৪৪॥

11.45

শিবো ভব প্রজাভ্যো মানুষীভ্যস্ত্বমঙ্গিরঃ ।
মা দ্যাবাপৃথিবী অভি শোচীর্মাঽন্তরিক্ষং মা বনস্পতীন্ ॥৪৫॥

11.46

প্রৈতু বাজী কনিক্রদন্নানদদ্রাসভঃ পত্বা । ভরন্নগ্নিং পুরীষ্যং মা পাদ্যায়ুষঃ পুরা ।
বৃষাগ্নিং বৃষণং ভরন্নপাং গর্ভং সমুদ্রিয়ম্ । অগ্ন আ যাহি বীতয়ে ॥৪৬॥

11.47

ঋতং সত্যমৃতং সত্যমগ্নিং পুরীষ্যমঙ্গিরস্বদ্ভরামঃ ।
ওষধয়ঃ প্রতি মোদধ্বমগ্নিমেতং শিবমায়ন্তমভ্যত্র যুষ্মাঃ ।
ব্যস্যন্ বিশ্বা অনিরা অমীবা নিষীদন্নো অপ দুর্মতিং জহি ॥৪৭॥

11.48

ওষধয়ঃ প্রতি গৃভ্ণীত পুষ্পবতীঃ সুপিপ্পলাঃ । অয়ং বো গর্ভ ঋত্বিয়ঃ প্রত্নং সধস্থমাঽসদৎ ॥৪৮॥

11.49

বি পাজসা পৃথুনা শোশুচানো বাধস্ব দ্বিষো রক্ষসো অমীবাঃ ।
সুশর্মণো বৃহতঃ শর্মণি স্যামগ্নেরহং সুহবস্য প্রণীতৌ ॥৪৯॥

11.50

আপো হি ষ্ঠা ময়োভুবস্তা ন ঊর্জে দধাতন । মহে রণায় চক্ষসে ॥৫০॥

11.51

যো বঃ শিবতমো রসস্তস্য ভাজয়তেহ নঃ । উশতীরিব মাতরঃ ॥৫১॥

11.52

তস্মা অরং গমাম বো যস্য ক্ষয়ায় জিন্বথ । আপো জনয়থা চ নঃ ॥৫২॥

11.53

মিত্রঃ সংসৃজ্য পৃথিবীং ভূমিং চ জ্যোতিষা সহ ।
সুজাতং জাতবেদসময়ক্ষ্মায় ত্বা সং সৃজামি প্রজাভ্যঃ ॥৫৩॥

11.54

রুদ্রাঃ সংসৃজ্য পৃথিবীং বৃহজ্জ্যোতিঃ সমীধিরে । তেষাং ভানুরজস্র ইচ্ছুক্রো দেবেষু রোচতে ॥৫৪॥

11.55

সংসৃষ্টা বসুভী রুদ্রৈর্ধীরৈঃ কর্মণ্যা মৃদম্ । হস্তাভ্যাং মৃদ্বীং কৃত্বা সিনীবালী কৃণোতু তাম্ ॥৫৫॥

11.56

সিনীবালী সুকপর্দা সুকুরীরা স্বৌপশা । সা তুভ্যমদিতে মহ্যোখাং দধাতু হস্তয়োঃ ॥৫৬॥

11.57

উখাং কৃণোতু শক্ত্যা বাহুভ্যামদিতির্ধিয়া । মাতা পুত্রং যথোপস্থে সাঽগ্নিং বিভর্তু গর্ভ আ । মখস্য শিরোঽসি ॥৫৭॥

11.58

বসবস্ত্বা কৃণ্বন্তু গায়ত্রেণ ছন্দসাঽঙ্গিরস্বদ্ধ্রুবাঽসি পৃথিব্যসি ধারয়া ময়ি প্রজাং রায়স্পোষং গৌপত্যং সুবীর্যং সজাতান্যজমানায় রুদ্রাস্ত্বা কৃণ্বন্তু ত্রৈষ্টুভেন ছন্দসাঽঙ্গিরস্বদ্ধ্রুবাঽস্যন্তরিক্ষমসি ধারয়া ময়ি প্রজাং রায়স্পোষং গৌপত্যং সুবীর্যং সজাতান্যজমানায়াদিত্যাস্ত্বা কৃণ্বন্তু জাগতেন ছন্দসাঽঙ্গিরস্বদ্ধ্রুবাসি দ্যৌরসি ধারয়া ময়ি প্রজাং রায়স্পোষং গৌপত্যং সুবীর্যং
সজাতান্যজমানায় বিশ্বে ত্বা দেবা বৈশ্বানরাঃ কৃণ্বন্ত্বানুষ্টুভেন ছন্দসাঽঙ্গিরস্বদ্ধ্রুবাঽসি দিশোঽসি ধারয়া ময়ি প্রজাং রায়স্পোষং গৌপত্যং সুবীর্যং সজাতান্যজমানায় ॥৫৮॥

11.59

অদিত্যৈ রাস্নাস্যদিতিষ্টে বিলং গৃভ্ণাতু । কৃত্বায় সা মহীমুখাং মৃন্ময়ীং যোনিমগ্নয়ে ।
পুত্রেভ্যঃ প্রায়চ্ছদদিতিঃ শ্রপয়ানিতি ॥৫৯॥

11.60

বসবস্ত্বা ধূপয়ন্তু গায়ত্রেণ ছন্দসাঽঙ্গিরস্বদ্রুদ্রাস্ত্বা ধূপয়ন্তু ত্রৈষ্টুভেন ছন্দসাঽঙ্গিরস্বদাদিত্যাস্ত্বা ধূপয়ন্তু জাগতেন ছন্দসাঽঙ্গিরস্বদ্বিশ্বে ত্বা দেবা বৈশ্বানরা ধূপয়ন্ত্বানুষ্টুভেন ছন্দসাঽঙ্গিরস্বদিন্দ্রস্ত্বা ধূপয়তু বরুণস্ত্বা ধূপয়তু বিষ্ণুস্ত্বা
ধূপয়তু ॥৬০॥

11.61

অদিতিষ্ট্বা দেবী বিশ্বদেব্যাবতী পৃথিব্যাঃ সধস্থে অঙ্গিরস্বৎ খনত্ববট
দেবানাং ত্বা পত্নীর্দেবীর্বিশ্বদেব্যাবতীঃ পৃথিব্যাঃ সধস্থে অঙ্গিরস্বদ্দধতূখে
ধিষণাস্ত্বা দেবীর্বিশ্বদেব্যাবতীঃ পৃথিব্যাঃ সধস্থে অঙ্গিরস্বদভীন্ধতামুখে
বরূত্রীষ্ট্বা দেবীর্বিশ্বদেব্যাবতীঃ পৃথিব্যাঃ সধস্থে অঙ্গিরস্বচ্ছ্রপয়ন্তূখে
গ্নাস্ত্বা দেবীর্বিশ্বদেব্যাবতীঃ পৃথিব্যাঃ সধস্থে অঙ্গিরস্বত্পচন্তূখে
জনয়স্ত্বাচ্ছিন্নপত্রা দেবীর্বিশ্বদেব্যাবতীঃ পৃথিব্যাঃ সধস্থে অঙ্গিরস্বত্পচন্তূখে ॥৬১॥