Adhyaya 11

11.1

यु॒ञ्जा॒नः प्र॑थ॒मं मन॑स्त॒त्त्वाय॑ सवि॒ता धिय॑ः । अ॒ग्नेर्ज्योति॑र्नि॒चाय्य॑ पृथि॒व्या अध्याऽभ॑रत् ॥१॥

Yunjanah prathamam manastattvaya savita dhiyah, agnerjyotirnichayya prithivya adhyabharat

11.2

यु॒क्तेन॒ मन॑सा व॒यं दे॒वस्य॑ सवि॒तुः स॒वे । स्व॒र्ग्या॒य॒ शक्त्या॑ ॥२॥

Yuktena manasa vayam devasya savituh save, svargyaya shaktya

11.3

यु॒क्त्वाय॑ सवि॒ता दे॒वान्त्स्व॑र्य॒तो धि॒या दिव॑म् । बृ॒हज्ज्योति॑ः करिष्य॒तः स॑वि॒ता प्र सु॑वाति॒ तान् ॥३॥

Yuktvaya savita devantsvaryato dhiya divam, brihajjyotih karishyatah savita pra suvati tan

11.4

यु॒ञ्जते॒ मन॑ उ॒त यु॑ञ्जते॒ धियो॒ विप्रा॒ विप्र॑स्य बृह॒तो वि॑प॒श्चित॑ः ।
वि होत्रा॑ दधे वयुना॒विदेक॒ इन्म॒ही दे॒वस्य॑ सवि॒तुः परि॑ष्टुतिः ॥४॥

Yunjate mana uta yunjate dhiyo vipra viprasya brihato vipashchitah
Vi hotra dadhe vayunavideka inmahi devasya savituh parishtutih

11.5

यु॒जे वां॒ ब्रह्म॑ पू॒र्व्यं नमो॑भि॒र्वि श्लोक॑ एतु प॒थ्ये॒व सू॒रेः ।
शृ॒ण्वन्तु॒ विश्वे॑ अ॒मृत॑स्य पु॒त्रा आ ये धामा॑नि दि॒व्यानि॑ त॒स्थुः ॥५॥

Yuje vam brahma purvyam namobhirvi shloka etu pathyeva sureh
Shrinvantu vishve amritasya putra a ye dhamani divyani tasthuh

11.6

यस्य॑ प्र॒याण॒मन्व॒न्य इद्य॒युर्दे॒वा दे॒वस्य॑ महि॒मान॒मोज॑सा ।
यः पार्थि॑वानि विम॒मे स एत॑शो॒ रजा॑ᳪसि दे॒वः स॑वि॒ता म॑हित्व॒ना ॥६॥

Yasya prayanamanvanya idyayurdeva devasya mahimanamojasa
Yah parthivani vimame sa etasho rajansi devah savita mahitvana

11.7

देव॑ सवित॒ः प्र सु॑व य॒ज्ञं प्र सु॑व य॒ज्ञप॑तिं॒ भगा॑य ।
दि॒व्यो ग॑न्ध॒र्वः के॑त॒पूः केतं॑ नः पुनातु वा॒चस्पति॒र्वाचं॑ नः स्वदतु ॥७॥

Deva savitah pra suva yagyam pra suva yagyapatim bhagaya
Divyo gandharvah ketapuh ketam nah punatu vachaspatirvacham nah svadatu

11.8

इ॒मं नो॑ देव सवितर्य॒ज्ञं प्र ण॑य देवा॒व्य॒ᳪ सखि॒विद॑ᳪ सत्रा॒जितं॑ धन॒जित॑ᳪ स्व॒र्जित॑म् ।
ऋ॒चा स्तोम॒ᳪ सम॑र्धय गाय॒त्रेण॑ रथन्त॒रं बृ॒हद्गा॑य॒त्रव॑र्तनि॒ स्वाहा॑ ॥८॥

Imam no deva savitaryagyam pra naya devavyam sakhividam satrajitam dhanajitam svarjitam
Richa stomam samardhaya gayatrena rathantaram brihadgayatravartani svaha

दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
आ द॑दे गाय॒त्रेण॒ छन्द॑साऽङ्गिर॒स्वत्पृ॑थि॒व्याः स॒धस्था॑द॒ग्निं पु॑री॒ष्य॒मङ्गिर॒स्वदा भ॑र॒ त्रैष्टु॑भेन॒ छन्द॑साऽङ्गिर॒स्वत् ॥९॥

Devasya tva savituh prasaveshvinorbahubhyam pushno hastabhyam
A dade gayatrena chhandasangirasvatprithivyah sadhasthadagnim purishyamangirasvada bhara traishtubhena chhandasangirasvat

11.10

अभ्रि॑रसि॒ नार्य॑सि॒ त्वया॑ व॒यम॒ग्निᳪ श॑केम॒ खनि॑तुᳪ स॒धस्थ॒ आ । जाग॑तेन॒ छन्द॑साऽङ्गिर॒स्वत् ॥१०॥

Abhrirasi naryasi tvaya vayamagnim shakema khanitum sadhastha a, jagatena chhandasangirasvat

11.11

हस्त॑ आ॒धाय॑ सवि॒ता बिभ्र॒दभ्रि॑ᳪ हिर॒ण्ययी॑म् । अ॒ग्नेर्ज्योति॑र्नि॒चाय्य॑ पृथि॒व्या अध्याऽभ॑र॒दानु॑ष्टुभेन॒ छन्द॑साऽङ्गिर॒स्वत् ॥११॥

Hasta adhaya savita bibhradabhrim hiranyayim, agnerjyotirnichayya prithivya adhyabharadanushtubhena chhandasangirasvat

11.12

प्रतू॑र्तं वाजि॒न्ना द्र॑व॒ वरि॑ष्ठा॒मनु॑ सं॒वत॑म् । दि॒वि ते॒ जन्म॑ पर॒मम॒न्तरि॑क्षे॒ तव॒ नाभि॑ः पृथि॒व्यामधि॒ योनि॒रित् ॥१२॥

Praturtam vajinna drava varishthamanu sanvatam, divi te janma paramamantarikshe tava nabhih prithivyamadhi yonirit

11.13

यु॒ञ्जाथा॒ᳪ रास॑भं यु॒वम॒स्मिन् यामे॑ वृषण्वसू । अ॒ग्निं भर॑न्तमस्म॒युम् ॥१३॥

Yunjatham rasabham yuvamasmin yame vrishanvasu, agnim bharantamasmayum

11.14

योगे॑-योगे त॒वस्त॑रं॒ वाजे॑-वाजे हवामहे । सखा॑य॒ इन्द्र॑मू॒तये॑ ॥१४॥

Yoge-yoge tavastaram vaje-vaje havamahe, sakhaya indramutaye

11.15

प्र॒तूर्व॒न्नेह्य॑व॒क्राम॒न्नश॑स्ती रु॒द्रस्य॒ गाण॑पत्यं मयो॒भूरेहि॑ । उ॒र्वन्तरि॑क्षं॒ वी॑हि स्व॒स्तिग॑व्यूति॒रभ॑यानि कृ॒ण्वन् पू॒ष्णा स॒युजा॑ स॒ह ॥१५॥

Praturvannehyavakramannashasti rudrasya ganapatyam mayobhurehi, urvantariksham vihi svastigavyutirabhayani krinvan pushna sayuja saha

11.16

पृ॒थि॒व्याः स॒धस्था॑द॒ग्निं पु॑री॒ष्य॒मङ्गिर॒स्वदा भ॑रा॒ग्निं पु॑री॒ष्य॒मङ्गिर॒स्वदच्छे॑मो॒ ऽग्निं पु॑री॒ष्य॒मङ्गिर॒स्वद्भ॑रिष्यामः ॥१६॥

Prithivyah sadhasthadagnim purishyamangirasvada bharagnim purishyamangirasvadachchhemo gnim purishyamangirasvadbharishyamah

11.17

अन्व॒ग्निरु॒षसा॒मग्र॑मख्य॒दन्वहा॑नि प्रथ॒मो जा॒तवे॑दाः ।
अनु॒ सूर्य॑स्य पुरु॒त्रा च॑ र॒श्मीननु॒ द्यावा॑पृथि॒वी आ त॑तन्थ ॥१७॥

Anvagnirushasamagramakhyadanvahani prathamo jatavedah
Anu suryasya purutra cha rashminanu dyavaprithivi a tatantha

11.18

आ॒गत्य॑ वा॒ज्यध्वा॑न॒ᳪ सर्वा॒ मृधो॒ वि धू॑नुते । अ॒ग्निᳪ स॒धस्थे॑ मह॒ति चक्षु॑षा॒ नि चि॑कीषते ॥१८॥

Agatya vajyadhvanam sarva mridho vi dhunute, agnim sadhasthe mahati chakshusha ni chikishate

11.19

आ॒क्रम्य॑ वाजिन् पृथि॒वीम॒ग्निमि॑च्छ रु॒चा त्वम् । भूम्या॑ वृ॒त्वाय॑ नो ब्रूहि॒ यत॒ः खने॑म॒ तं व॒यम् ॥१९॥

Akramya vajin prithivimagnimichchha rucha tvam, bhumya vritvaya no bruhi yatah khanema tam vayam

11.20

द्यौ॑स्ते पृ॒ष्ठं पृ॑थि॒वी स॒धस्थ॑मा॒त्माऽन्तरि॑क्षᳪ समु॒द्रो योनि॑ः ।
वि॒ख्याय॒ चक्षु॑षा॒ त्वम॒भि ति॑ष्ठ पृतन्य॒तः ॥२०॥

Dyauste prishtham prithivi sadhasthamatmantariksham samudro yonih
Vikhyaya chakshusha tvamabhi tishtha pritanyatah

11.21

उत्क्रा॑म मह॒ते सौ॑भगाया॒स्मादा॒स्थाना॑द् द्रविणो॒दा वा॑जिन् ।
व॒यᳪ स्या॑म सुम॒तौ पृ॑थि॒व्या अ॒ग्निं खन॑न्त उ॒पस्थे॑ अस्याः ॥२१॥

Utkrama mahate saubhagayasmadasthanad dravinoda vajin
Vayam syama sumatau prithivya agnim khananta upasthe asyah

11.22

उद॑क्रमीद् द्रविणो॒दा वा॒ज्य॒र्वाक॒ः सुलो॒कᳪ सुकृ॑तं पृथि॒व्याम् ।
तत॑ः खनेम सु॒प्रती॑कम॒ग्निᳪ स्वो॒ रुहा॑णा॒ अधि॒ नाक॑मुत्त॒मम् ॥२२॥

Udakramid dravinoda vajyarvakah sulokam sukritam prithivyam
Tatah khanema supratikamagnim svo ruhana adhi nakamuttamam

11.23

आ त्वा॑ जिघर्मि॒ मन॑सा घृ॒तेन॑ प्रतिक्षि॒यन्तं॒ भुव॑नानि॒ विश्वा॑ ।
पृ॒थुं ति॑र॒श्चा वय॑सा बृ॒हन्तं॒ व्यचि॑ष्ठ॒मन्नै॑ रभ॒सं दृशा॑नम् ॥२३॥

A tva jigharmi manasa ghritena pratikshiyantam bhuvanani vishva
Prithum tirashcha vayasa brihantam vyachishthamannai rabhasam drishanam

11.24

आ वि॒श्वत॑ः प्र॒त्यञ्चं॑ जिघर्म्यर॒क्षसा॒ मन॑सा॒ तज्जु॑षेत ।
मर्य॑श्री स्पृह॒यद्व॑र्णो अ॒ग्निर्नाभि॒मृशे॑ त॒न्वा जर्भु॑राणः ॥२४॥

A vishvatah pratyancham jigharmyarakshasa manasa tajjusheta
Maryashri sprihayadvarno agnirnabhimrishe tanva jarbhuranah

11.25

परि॒ वाज॑पतिः क॒विर॒ग्निर्ह॒व्यान्य॑क्रमीत् । दध॒द्रत्ना॑नि दा॒शुषे॑ ॥२५॥

Pari vajapatih kaviragnirhavyanyakramit, dadhadratnani dashushe

11.26

परि॑ त्वाऽग्ने॒ पुरं॑ व॒यं विप्र॑ᳪ सहस्य धीमहि । धृ॒षद्व॑र्णं दि॒वे-दि॑वे ह॒न्तारं॑ भङ्गु॒राव॑ताम् ॥२६॥

Pari tvagne puram vayam vipram sahasya dhimahi, dhrishadvarnam dive-dive hantaram bhanguravatam

11.27

त्वम॑ग्ने॒ द्युभि॒स्त्वमा॑शुशु॒क्षणि॒स्त्वम॒द्भ्यस्त्वमश्म॑न॒स्परि॑ ।
त्वं वने॑भ्य॒स्त्वमोष॑धीभ्य॒स्त्वं नृ॒णां नृ॑पते जायसे॒ शुचि॑ः ॥२७॥

Tvamagne dyubhistvamashushukshanistvamadbhyastvamashmanaspari
Tvam vanebhyastvamoshadhibhyastvam nrinam nripate jayase shuchih

11.28

दे॒वस्य॑ त्वा सवि॒तुः प्र॑स॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् ।
पृ॒थि॒व्याः स॒धस्था॑द॒ग्निं पु॑री॒ष्य॒मङ्गिर॒स्वत्ख॑नामि ।
ज्योति॑ष्मन्तं त्वाऽग्ने सु॒प्रती॑क॒मज॑स्रेण भा॒नुना॒ दीद्य॑तम् ।
शि॒वं प्र॒जाभ्योऽहि॑ᳪसन्तं पृथि॒व्याः स॒धस्था॑द॒ग्निं पु॑री॒ष्य॒मङ्गिर॒स्वत्ख॑नामः ॥२८॥

Devasya tva savituh prasaveshvinorbahubhyam pushno hastabhyam
Prithivyah sadhasthadagnim purishyamangirasvatkhanami
Jyotishmantam tvagne supratikamajasrena bhanuna didyatam
Shivam prajabhyohinsantam prithivyah sadhasthadagnim purishyamangirasvatkhanamah

11.29

अ॒पां पृ॒ष्ठम॑सि॒ योनि॑र॒ग्नेः स॑मु॒द्रम॒भित॒ः पिन्व॑मानम् ।
वर्ध॑मानो म॒हाँ२ आ च॒ पुष्क॑रे दि॒वो मात्र॑या वरि॒म्णा प्र॑थस्व ॥२९॥

Apam prishthamasi yoniragneh samudramabhitah pinvamanam
Vardhamano mahan2 a cha pushkare divo matraya varimna prathasva

11.30

शर्म॑ च स्थो॒ वर्म॑ च॒ स्थोऽछि॑द्रे बहु॒ले उ॒भे ।
व्यच॑स्वती॒ सं व॑साथां भृ॒तम॒ग्निं पु॑री॒ष्य॒म् ॥३०॥

Sharma cha stho varma cha sthochhidre bahule ubhe
Vyachasvati sam vasatham bhritamagnim purishyam

11.31

सं व॑साथाᳪ स्व॒र्विदा॑ स॒मीची॒ उर॑सा॒ त्मना॑ ।
अ॒ग्निम॒न्तर्भ॑रि॒ष्यन्ती॒ ज्योति॑ष्मन्त॒मज॑स्र॒मित् ॥३१॥

Sam vasatham svarvida samichi urasa tmana
Agnimantarbharishyanti jyotishmantamajasramit

11.32

पु॒री॒ष्यो॒ऽसि वि॒श्वभ॑रा॒ अथ॑र्वा त्वा प्रथ॒मो निर॑मन्थदग्ने ।
त्वाम॑ग्ने॒ पुष्क॑रा॒दध्यथ॑र्वा॒ निर॑मन्थत । मू॒र्ध्नो विश्व॑स्य वा॒घत॑ः ॥३२॥

Purishyosi vishvabhara atharva tva prathamo niramanthadagne
Tvamagne pushkaradadhyatharva niramanthata, murdhno vishvasya vaghatah

11.33

तमु॑ त्वा द॒ध्यङ्ङृषि॑ः पु॒त्र ई॑धे॒ अथ॑र्वणः । वृ॑त्र॒हणं॑ पुरन्द॒रम् ॥३३॥

Tamu tva dadhyanngrishih putra idhe atharvanah, vritrahanam purandaram

11.34

तमु॑ त्वा पा॒थ्यो वृषा॒ समी॑धे दस्यु॒हन्त॑मम् । ध॒न॒ञ्ज॒यᳪ रणे॑-रणे ॥३४॥

Tamu tva pathyo vrisha samidhe dasyuhantamam, dhananjayam rane-rane

11.35

सीद॑ होत॒ः स्व उ॑ लो॒के चि॑कि॒त्वान्सा॒दया॑ य॒ज्ञᳪ सु॑कृ॒तस्य॒ योनौ॑ ।
दे॒वा॒वीर्दे॒वान्ह॒विषा॑ यजा॒स्यग्ने॑ बृ॒हद्यज॑माने॒ वयो॑ धाः ॥३५॥

Sida hotah sva u loke chikitvansadaya yagyam sukritasya yonau
Devavirdevanhavisha yajasyagne brihadyajamane vayo dhah

11.36

नि होता॑ होतृ॒षद॑ने॒ विदा॑नस्त्वे॒षो दी॑दि॒वाँ२ अ॑सदत्सु॒दक्ष॑ः ।
अद॑ब्धव्रतप्रमति॒र्वसि॑ष्ठः सहस्रम्भ॒रः शुचि॑जिह्वो अ॒ग्निः ॥३६॥

Ni hota hotrishadane vidanastvesho didivan2 asadatsudakshah
Adabdhavratapramatirvasishthah sahasrambharah shuchijihvo agnih

11.37

सᳪ सी॑दस्व म॒हाँ२ अ॑सि॒ शोच॑स्व देव॒वीत॑मः ।
वि धू॒मम॑ग्ने अरु॒षं मि॑येध्य सृ॒ज प्र॑शस्त दर्श॒तम् ॥३७॥

Sam sidasva mahan2 asi shochasva devavitamah
Vi dhumamagne arusham miyedhya srija prashasta darshatam

11.38

अ॒पो दे॒वीरुप॑ सृज॒ मधु॑मतीरय॒क्ष्माय॑ प्र॒जाभ्य॑ः ।
तासा॑मा॒स्थाना॒दुज्जि॑हता॒मोष॑धयः सुपिप्प॒लाः ॥३८॥

Apo devirupa srija madhumatirayakshmaya prajabhyah
Tasamasthanadujjihatamoshadhayah supippalah

11.39

सं ते॑ वा॒युर्मा॑त॒रिश्वा॑ दधातूत्ता॒नाया॒ हृद॑यं॒ यद्विक॑स्तम् ।
यो दे॒वानां॒ चर॑सि प्रा॒णथे॑न॒ कस्मै॑ देव॒ वष॑डस्तु॒ तुभ्य॑म् ॥३९॥

Sam te vayurmatarishva dadhatuttanaya hridayam yadvikastam
Yo devanam charasi pranathena kasmai deva vashadastu tubhyam

11.40

सुजा॑तो॒ ज्योति॑षा स॒ह शर्म॒ वरू॑थ॒माऽस॑द॒त्स्व॑ः ।
वासो॑ अग्ने वि॒श्वरू॑प॒ᳪ सं व्य॑यस्व विभावसो ॥४०॥

Sujato jyotisha saha sharma varuthamasadatsvah
Vaso agne vishvarupam sam vyayasva vibhavaso

11.41

उदु॑ तिष्ठ स्वध्व॒रावा॑ नो दे॒व्या धि॒या । दृ॒शे च॑ भा॒सा बृ॑ह॒ता सु॑शु॒क्वनि॒राग्ने॑ याहि सुश॒स्तिभि॑ः ॥४१॥

Udu tishtha svadhvarava no devya dhiya, drishe cha bhasa brihata sushukvaniragne yahi sushastibhih

11.42

ऊ॒र्ध्व ऊ॒ षु ण॑ ऊ॒तये॒ तिष्ठा॑ दे॒वो न स॑वि॒ता । ऊ॒र्ध्वो वाज॑स्य॒ सनि॑ता॒ यद॒ञ्जिभि॑र्वा॒घद्भि॑र्वि॒ह्वया॑महे ॥४२॥

Urdhva u shu na utaye tishtha devo na savita, urdhvo vajasya sanita yadanjibhirvaghadbhirvihvayamahe

11.43

स जा॒तो गर्भो॑ असि॒ रोद॑स्योरग्ने॒ चारु॒र्विभृ॑त॒ ओष॑धीषु ।
चि॒त्रः शिशु॒ः परि॒ तमा॑ᳪस्य॒क्तून्प्र मा॒तृभ्यो॒ अधि॒ कनि॑क्रद॒द्गाः ॥४३॥

Sa jato garbho asi rodasyoragne charurvibhrita oshadhishu
Chitrah shishuh pari tamansyaktunpra matribhyo adhi kanikradadgah

11.44

स्थि॒रो भ॑व वी॒ड्व॒ङ्ग आ॒शुर्भ॑व वा॒ज्य॒र्वन् । पृ॒थुर्भ॑व सु॒षद॒स्त्वम॒ग्नेः पु॑रीष॒वाह॑णः ॥४४॥

Sthiro bhava vidvanga ashurbhava vajyarvan, prithurbhava sushadastvamagneh purishavahanah

11.45

शि॒वो भ॑व प्र॒जाभ्यो॒ मानु॑षीभ्य॒स्त्वम॑ङ्गिरः ।
मा द्यावा॑पृथि॒वी अ॒भि शो॑ची॒र्माऽन्तरि॑क्षं॒ मा वन॒स्पती॑न् ॥४५॥

Shivo bhava prajabhyo manushibhyastvamangirah
Ma dyavaprithivi abhi shochirmantariksham ma vanaspatin

11.46

प्रै॑तु वा॒जी कनि॑क्रद॒न्नान॑द॒द्रास॑भ॒ः पत्वा॑ । भर॑न्न॒ग्निं पु॑री॒ष्यं मा पा॒द्यायु॑षः पु॒रा ।
वृषा॒ग्निं वृष॑णं॒ भर॑न्न॒पां गर्भ॑ᳪ समु॒द्रिय॑म् । अग्न॒ आ या॑हि वी॒तये॑ ॥४६॥

Praitu vaji kanikradannanadadrasabhah patva, bharannagnim purishyam ma padyayushah pura
Vrishagnim vrishanam bharannapam garbham samudriyam, agna a yahi vitaye

11.47

ऋ॒तᳪ स॒त्यमृ॒तᳪ स॒त्यम॒ग्निं पु॑री॒ष्य॒मङ्गिर॒स्वद्भ॑रामः ।
ओष॑धय॒ः प्रति॑ मोदध्वम॒ग्निमे॒तᳪ शि॒वमा॒यन्त॑म॒भ्यत्र॑ यु॒ष्माः ।
व्यस्य॒न् विश्वा॒ अनि॑रा॒ अमी॑वा नि॒षीद॑न्नो॒ अप॑ दुर्म॒तिं ज॑हि ॥४७॥

Ritam satyamritam satyamagnim purishyamangirasvadbharamah
Oshadhayah prati modadhvamagnimetam shivamayantamabhyatra yushmah
Vyasyan vishva anira amiva nishidanno apa durmatim jahi

11.48

ओष॑धय॒ः प्रति॑ गृभ्णीत॒ पुष्प॑वतीः सुपिप्प॒लाः । अ॒यं वो॒ गर्भ॑ ऋ॒त्विय॑ः प्र॒त्नᳪ स॒धस्थ॒माऽस॑दत् ॥४८॥

Oshadhayah prati gribhnita pushpavatih supippalah, ayam vo garbha ritviyah pratnam sadhasthamasadat

11.49

वि पाज॑सा पृ॒थुना॒ शोशु॑चानो॒ बाध॑स्व द्वि॒षो र॒क्षसो॒ अमी॑वाः ।
सु॒शर्म॑णो बृह॒तः शर्म॑णि स्याम॒ग्नेर॒हᳪ सु॒हव॑स्य॒ प्रणी॑तौ ॥४९॥

Vi pajasa prithuna shoshuchano badhasva dvisho rakshaso amivah
Susharmano brihatah sharmani syamagneraham suhavasya pranitau

11.50

आपो॒ हि ष्ठा म॑यो॒भुव॒स्ता न॑ ऊ॒र्जे द॑धातन । म॒हे रणा॑य॒ चक्ष॑से ॥५०॥

Apo hi shtha mayobhuvasta na urje dadhatana, mahe ranaya chakshase

11.51

यो व॑ः शि॒वत॑मो॒ रस॒स्तस्य॑ भाजयते॒ह न॑ः । उ॒श॒तीरि॑व मा॒तर॑ः ॥५१॥

Yo vah shivatamo rasastasya bhajayateha nah, ushatiriva matarah

11.52

तस्मा॒ अरं॑ गमाम वो॒ यस्य॒ क्षया॑य॒ जिन्व॑थ । आपो॑ ज॒नय॑था च नः ॥५२॥

Tasma aram gamama vo yasya kshayaya jinvatha, apo janayatha cha nah

11.53

मि॒त्रः स॒ᳪसृज्य॑ पृथि॒वीं भूमिं॑ च॒ ज्योति॑षा स॒ह ।
सुजा॑तं जा॒तवे॑दसमय॒क्ष्माय॑ त्वा॒ सᳪ सृ॑जामि प्र॒जाभ्य॑ः ॥५३॥

Mitrah sansrijya prithivim bhumim cha jyotisha saha
Sujatam jatavedasamayakshmaya tva sam srijami prajabhyah

11.54

रु॒द्राः स॒ᳪसृज्य॑ पृथि॒वीं बृ॒हज्ज्योति॒ः समी॑धिरे । तेषां॑ भा॒नुरज॑स्र॒ इच्छु॒क्रो दे॒वेषु॑ रोचते ॥५४॥

Rudrah sansrijya prithivim brihajjyotih samidhire, tesham bhanurajasra ichchhukro deveshu rochate

11.55

सᳪसृ॑ष्टा॒ वसु॑भी रुद्रै॒र्धीरै॑ः कर्म॒ण्या मृद॑म् । हस्ता॑भ्यां मृ॒द्वीं कृ॒त्वा सि॑नीवा॒ली कृ॑णोतु॒ ताम् ॥५५॥

Sansrishta vasubhi rudrairdhiraih karmanya mridam, hastabhyam mridvim kritva sinivali krinotu tam

11.56

सि॒नी॒वा॒ली सु॑कप॒र्दा सु॑कुरी॒रा स्वौ॑प॒शा । सा तुभ्य॑मदिते म॒ह्योखां द॑धातु॒ हस्त॑योः ॥५६॥

Sinivali sukaparda sukurira svaupasha, sa tubhyamadite mahyokham dadhatu hastayoh

11.57

उ॒खां कृ॑णोतु॒ शक्त्या॑ बा॒हुभ्या॒मदि॑तिर्धि॒या । मा॒ता पु॒त्रं यथो॒पस्थे॒ साऽग्निं बि॑भर्तु॒ गर्भ॒ आ । म॒खस्य॒ शिरो॑ऽसि ॥५७॥

Ukham krinotu shaktya bahubhyamaditirdhiya, mata putram yathopasthe sagnim bibhartu garbha a, makhasya shirosi

11.58

वस॑वस्त्वा कृण्वन्तु गाय॒त्रेण॒ छन्द॑साऽङ्गिर॒स्वद्ध्रु॒वाऽसि॑ पृथि॒व्य॒सि धा॒रया॒ मयि॑ प्र॒जाᳪ रा॒यस्पोषं॑ गौप॒त्यᳪ सु॒वीर्य॑ᳪ सजा॒तान्यज॑मानाय रु॒द्रास्त्वा॑ कृण्वन्तु॒ त्रैष्टु॑भेन॒ छन्द॑साऽङ्गिर॒स्वद्ध्रु॒वाऽस्य॒न्तरि॑क्षमसि धा॒रया॒ मयि॑ प्र॒जाᳪ रा॒यस्पोषं॑ गौप॒त्यᳪ सु॒वीर्य॑ᳪ सजा॒तान्यज॑मानायादि॒त्यास्त्वा॑ कृण्वन्तु॒ जाग॑तेन॒ छन्द॑साऽङ्गिर॒स्वद्ध्रु॒वासि द्यौर॑सि धा॒रया॒ मयि॑ प्र॒जाᳪ रा॒यस्पोषं॑ गौप॒त्यᳪ सु॒वीर्य॑ᳪ
सजा॒तान्यज॑मानाय॒ विश्वे॑ त्वा दे॒वा वै॑श्वान॒राः कृ॑ण्व॒न्त्वानु॑ष्टुभेन॒ छन्द॑साऽङ्गिर॒स्वद्ध्रु॒वाऽसि॒ दिशो॑ऽसि धा॒रया॒ मयि॑ प्र॒जाᳪ रा॒यस्पोषं॑ गौप॒त्यᳪ सु॒वीर्य॑ᳪ सजा॒तान्यज॑मानाय ॥५८॥

Vasavastva krinvantu gayatrena chhandasangirasvaddhruvasi prithivyasi dharaya mayi prajam rayasposham gaupatyam suviryam sajatanyajamanaya rudrastva krinvantu traishtubhena chhandasangirasvaddhruvasyantarikshamasi dharaya mayi prajam rayasposham gaupatyam suviryam sajatanyajamanayadityastva krinvantu jagatena chhandasangirasvaddhruvasi dyaurasi dharaya mayi prajam rayasposham gaupatyam suviryam
Sajatanyajamanaya vishve tva deva vaishvanarah krinvantvanushtubhena chhandasangirasvaddhruvasi dishosi dharaya mayi prajam rayasposham gaupatyam suviryam sajatanyajamanaya

11.59

अदि॑त्यै॒ रास्ना॒स्यदि॑तिष्टे॒ बिलं॑ गृभ्णातु । कृ॒त्वाय॒ सा म॒हीमु॒खां मृ॒न्मयीं॒ योनि॑म॒ग्नये॑ ।
पु॒त्रेभ्य॒ः प्राय॑च्छ॒ददि॑तिः श्र॒पया॒निति॑ ॥५९॥

Adityai rasnasyaditishte bilam gribhnatu, kritvaya sa mahimukham mrinmayim yonimagnaye
Putrebhyah prayachchhadaditih shrapayaniti

11.60

वस॑वस्त्वा धूपयन्तु गाय॒त्रेण॒ छन्द॑साऽङ्गिर॒स्वद्रुद्रास्त्वा॑ धूपयन्तु त्रैष्टुभेन॒ छन्द॑साऽङ्गिर॒स्वदादि॒त्यास्त्वा॑ धूपयन्तु॒ जाग॑तेन॒ छन्द॑साऽङ्गिर॒स्वद्विश्वे॑ त्वा दे॒वा वै॑श्वान॒रा धू॑पय॒न्त्वानु॑ष्टुभेन॒ छन्द॑साऽङ्गिर॒स्वदिन्द्र॑स्त्वा धूपयतु॒ वरु॑णस्त्वा धूपयतु॒ विष्णु॑स्त्वा
धूपयतु ॥६०॥

Vasavastva dhupayantu gayatrena chhandasangirasvadrudrastva dhupayantu traishtubhena chhandasangirasvadadityastva dhupayantu jagatena chhandasangirasvadvishve tva deva vaishvanara dhupayantvanushtubhena chhandasangirasvadindrastva dhupayatu varunastva dhupayatu vishnustva
Dhupayatu

11.61

अदि॑तिष्ट्वा दे॒वी वि॒श्वदे॑व्यावती पृथि॒व्याः स॒धस्थे॑ अङ्गिर॒स्वत् ख॑नत्ववट
दे॒वानां॑ त्वा॒ पत्नी॑र्दे॒वीर्वि॒श्वदे॑व्यावतीः पृथि॒व्याः स॒धस्थे॑ अङ्गिर॒स्वद्द॑धतूखे
धि॒षणा॑स्त्वा दे॒वीर्वि॒श्वदे॑व्यावतीः पृथि॒व्याः स॒धस्थे॑ अङ्गिर॒स्वद॒भी॒न्धतामुखे॒
वरू॑त्रीष्ट्वा दे॒वीर्वि॒श्वदे॑व्यावतीः पृथि॒व्याः स॒धस्थे॑ अङ्गिर॒स्वच्छ्र॑पयन्तूखे॒
ग्नास्त्वा॑ दे॒वीर्वि॒श्वदे॑व्यावतीः पृथि॒व्याः स॒धस्थे॑ अङ्गिर॒स्वत्प॑चन्तूखे॒
जन॑य॒स्त्वाच्छि॑न्नपत्रा दे॒वीर्वि॒श्वदे॑व्यावतीः पृथि॒व्याः स॒धस्थे॑ अङ्गिर॒स्वत्प॑चन्तूखे ॥६१॥

Aditishtva devi vishvadevyavati prithivyah sadhasthe angirasvat khanatvavata
Devanam tva patnirdevirvishvadevyavatih prithivyah sadhasthe angirasvaddadhatukhe
Dhishanastva devirvishvadevyavatih prithivyah sadhasthe angirasvadabhindhatamukhe
Varutrishtva devirvishvadevyavatih prithivyah sadhasthe angirasvachchhrapayantukhe
Gnastva devirvishvadevyavatih prithivyah sadhasthe angirasvatpachantukhe
Janayastvachchhinnapatra devirvishvadevyavatih prithivyah sadhasthe angirasvatpachantukhe

Contains text from DharmicData, made available under the Open Database License (ODbL). Simple meanings are written by AI and can contain mistakes.