UtshovAdhyaya 12
12.1
दृ॒शा॒नो रु॒क्म उ॒र्व्या व्य॑द्यौद् दु॒र्मर्ष॒मायु॑ः श्रि॒ये रु॑चा॒नः ।
अ॒ग्निर॒मृतो॑ अभव॒द्वयो॑भि॒र्यदे॑नं॒ द्यौरज॑नयत्सु॒रेता॑ः ॥१॥
Drishano rukma urvya vyadyaud durmarshamayuh shriye ruchanah
Agniramrito abhavadvayobhiryadenam dyaurajanayatsuretah
12.2
नक्तो॒षासा॒ सम॑नसा॒ विरू॑पे धा॒पये॑ते॒ शिशु॒मेक॑ᳪ समी॒ची ।
द्यावा॒क्षामा॑ रु॒क्मो अ॒न्तर्वि भा॑ति दे॒वा अ॒ग्निं धा॑रयन्द्रविणो॒दाः ॥२॥
Naktoshasa samanasa virupe dhapayete shishumekam samichi
Dyavakshama rukmo antarvi bhati deva agnim dharayandravinodah
12.3
विश्वा॑ रू॒पाणि॒ प्रति॑ मुञ्चते क॒विः प्रासा॑वीद्भ॒द्रं द्वि॒पदे॒ चतु॑ष्पदे ।
वि नाक॑मख्यत्सवि॒ता वरे॒ण्योऽनु॑ प्र॒याण॑मु॒षसो॒ वि रा॑जति ॥३॥
Vishva rupani prati munchate kavih prasavidbhadram dvipade chatushpade
Vi nakamakhyatsavita varenyonu prayanamushaso vi rajati
12.4
सु॒प॒र्णो॒ऽसि ग॒रुत्माँ॑स्त्रि॒वृत्ते॒ शिरो॑ गाय॒त्रं चक्षु॑र्बृहद्रथन्त॒रे पक्षौ ।
स्तोम॑ आ॒त्मा छन्दा॒ᳪस्यङ्गा॑नि॒ यजूँ॑ᳪषि॒ नाम॑ । साम॑ ते त॒नूर्वा॑मदे॒व्यं य॑ज्ञाय॒ज्ञियं॒ पुच्छं॒ धिष्ण्या॑ः श॒पाः ।
सु॒प॒र्णो॒ऽसि ग॒रुत्मा॒न्दिवं॑ गच्छ॒ स्व॑ः पत ॥४॥
Suparnosi garutmanstrivritte shiro gayatram chakshurbrihadrathantare pakshau
Stoma atma chhandansyangani yajunnshi nama, sama te tanurvamadevyam yagyayagyiyam puchchham dhishnyah shapah
Suparnosi garutmandivam gachchha svah pata
12.5
विष्णो॒ः क्रमो॑ऽसि सपत्न॒हा गा॑य॒त्रं छन्द॒ आ रो॑ह पृथि॒वीमनु॒ वि क्र॑मस्व॒
विष्णो॒ः क्रमो॑ऽस्यभिमाति॒हा त्रै॑ष्टुभं॒ छन्द॒ आ रो॑हा॒न्तरि॑क्ष॒मनु॒ वि क्र॑मस्व
विष्णो॒ः क्रमो॑ऽस्यरातीय॒तो ह॒न्ता जाग॑तं॒ छन्द॒ आ रो॑ह॒ दिव॒मनु॒ वि क्र॑मस्व
विष्णो॒ः क्रमो॑ऽसि शत्रूय॒तो ह॒न्ताऽऽनु॑ष्टुभं॒ छन्द॒ आ रो॑ह॒ दिशोऽनु॒ वि क्र॑मस्व ॥५॥
Vishnoh kramosi sapatnaha gayatram chhanda a roha prithivimanu vi kramasva
Vishnoh kramosyabhimatiha traishtubham chhanda a rohantarikshamanu vi kramasva
Vishnoh kramosyaratiyato hanta jagatam chhanda a roha divamanu vi kramasva
Vishnoh kramosi shatruyato hantanushtubham chhanda a roha dishonu vi kramasva
12.6
अक्र॑न्दद॒ग्नि स्त॒नय॑न्निव॒ द्यौ॒ः क्षामा॒ रेरि॑हद्वी॒रुध॑ः सम॒ञ्जन् ।
स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ॥६॥
Akrandadagni stanayanniva dyauh kshama rerihadvirudhah samanjan
Sadyo jagyano vi himiddho akhyada rodasi bhanuna bhatyantah
12.7
अग्ने॑ऽभ्यावर्तिन्न॒भि मा॒ नि व॑र्त॒स्वायु॑षा॒ वर्च॑सा प्र॒जया॒ धने॑न ।
स॒न्या मे॒धया॑ र॒य्या पोषे॑ण ॥७॥
Agnebhyavartinnabhi ma ni vartasvayusha varchasa prajaya dhanena
Sanya medhaya rayya poshena
12.8
अग्ने॑ अङ्गिरः श॒तं ते॑ सन्त्वा॒वृत॑ः स॒हस्रं॑ त उपा॒वृत॑ः ।
अधा॒ पोष॑स्य॒ पोषे॑ण॒ पुन॑र्नो न॒ष्टमा कृ॑धि॒ पुन॑र्नो र॒यिमा कृ॑धि ॥८॥
Agne angirah shatam te santvavritah sahasram ta upavritah
Adha poshasya poshena punarno nashtama kridhi punarno rayima kridhi
12.9
पुन॑रू॒र्जा नि व॑र्तस्व॒ पुन॑रग्न इ॒षाऽऽयु॑षा । पुन॑र्नः पा॒ह्यᳪह॑सः ॥९॥
Punarurja ni vartasva punaragna ishayusha, punarnah pahyanhasah
12.10
स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वप्स्न्या॑ वि॒श्वत॒स्परि॑ ॥१०॥
Saha rayya ni vartasvagne pinvasva dharaya, vishvapsnya vishvataspari
12.11
आ त्वा॑ऽहार्षम॒न्तर॑भूर्ध्रु॒वस्ति॒ष्ठावि॑चाचलिः । विश॑स्त्वा॒ सर्वा॑ वाञ्छन्तु॒ मा त्वद्रा॒ष्ट्रमधि॑भ्रशत् ॥११॥
A tvaharshamantarabhurdhruvastishthavichachalih, vishastva sarva vanchhantu ma tvadrashtramadhibhrashat
12.12
उदु॑त्त॒मं व॑रुण॒ पाश॑म॒स्मदवा॑ध॒मं वि म॑ध्य॒मᳪ श्र॑थाय ।
अथा॑ व॒यमा॑दित्य व्र॒ते तवाना॑गसो॒ अदि॑तये स्याम ॥१२॥
Uduttamam varuna pashamasmadavadhamam vi madhyamam shrathaya
Atha vayamaditya vrate tavanagaso aditaye syama
12.13
अग्रे॑ बृ॒हन्नु॒षसा॑मू॒र्ध्वो अ॑स्थान्निर्जग॒न्वान् तम॑सो॒ ज्योति॒षाऽऽगा॑त् ।
अ॒ग्निर्भा॒नुना॒ रुश॑ता॒ स्वङ्ग॒ आ जा॒तो विश्वा॒ सद्मा॑न्यप्राः ॥१३॥
Agre brihannushasamurdhvo asthannirjaganvan tamaso jyotishagat
Agnirbhanuna rushata svanga a jato vishva sadmanyaprah
12.14
ह॒ᳪसः शु॑चि॒षद्वसु॑रन्तरिक्ष॒सद्धोता॑ वेदि॒षदति॑थिर्दूरोण॒सत् ।
नृ॒षद्व॑र॒सदृ॑त॒सद् व्योम॒सद॒ब्जा गो॒जा ऋ॑त॒जा अ॑द्रि॒जा ऋ॒तं बृ॒हत् ॥१४॥
Hansah shuchishadvasurantarikshasaddhota vedishadatithirduronasat
Nrishadvarasadritasad vyomasadabja goja ritaja adrija ritam brihat
12.15
सीद॒ त्वं मा॒तुर॒स्या उ॒पस्थे॒ विश्वा॑न्यग्ने व॒युना॑नि वि॒द्वान् ।
मै॑नां॒ तप॑सा॒ मार्चिषा॒ऽभि शो॑चीर॒न्तर॑स्याᳪ शु॒क्रज्यो॑ति॒र्वि भा॑हि ॥१५॥
Sida tvam maturasya upasthe vishvanyagne vayunani vidvan
Mainam tapasa marchishabhi shochirantarasyam shukrajyotirvi bhahi
12.16
अ॒न्तर॑ग्ने रु॒चा त्वमु॒खायाः॒ सद॑ने॒ स्वे । तस्या॒स्त्वᳪ हर॑सा॒ तप॒ञ्जात॑वेदः शि॒वो भ॑व ॥१६॥
Antaragne rucha tvamukhayah sadane sve, tasyastvam harasa tapanjatavedah shivo bhava
12.17
शि॒वो भू॒त्वा मह्य॑मग्ने॒ अथो॑ सीद शि॒वस्त्वम् ।
शि॒वाः कृ॒त्वा दिश॒ः सर्वा॒ः स्वं योनि॑मि॒हास॑दः ॥१७॥
Shivo bhutva mahyamagne atho sida shivastvam
Shivah kritva dishah sarvah svam yonimihasadah
12.18
दि॒वस्परि॑ प्रथ॒मं ज॑ज्ञे अ॒ग्निर॒स्मद् द्वि॒तीयं॒ परि॑ जा॒तवे॑दाः ।
तृ॒तीय॑म॒प्सु नृ॒मणा॒ अज॑स्र॒मिन्धा॑न एनं जरते स्वा॒धीः ॥१८॥
Divaspari prathamam jagye agnirasmad dvitiyam pari jatavedah
Tritiyamapsu nrimana ajasramindhana enam jarate svadhih
12.19
वि॒द्मा ते॑ अग्ने त्रे॒धा त्र॒याणि॑ वि॒द्मा ते॒ धाम॒ विभृ॑ता पुरु॒त्रा ।
वि॒द्मा ते॒ नाम॑ पर॒मं गुहा॒ यद्वि॒द्मा तमुत्सं॒ यत॑ आज॒गन्थ॑ ॥१९॥
Vidma te agne tredha trayani vidma te dhama vibhrita purutra
Vidma te nama paramam guha yadvidma tamutsam yata ajagantha
12.20
स॒मु॒द्रे त्वा॑ नृ॒मणा॑ अ॒प्स्वन्तर्नृ॒चक्षा॑ ईधे दि॒वो अ॑ग्न॒ ऊध॑न् ।
तृ॒तीये॑ त्वा॒ रज॑सि तस्थि॒वाᳪस॑म॒पामु॒पस्थे॑ महि॒षा अ॑वर्धन् ॥२०॥
Samudre tva nrimana apsvantarnrichaksha idhe divo agna udhan
Tritiye tva rajasi tasthivansamapamupasthe mahisha avardhan
12.21
अक्र॑न्दद॒ग्नि स्त॒नय॑न्निव॒ द्यौः क्षामा॒ रेरि॑हद्वी॒रुध॑ः सम॒ञ्जन् ।
स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ॥२१॥
Akrandadagni stanayanniva dyauh kshama rerihadvirudhah samanjan
Sadyo jagyano vi himiddho akhyada rodasi bhanuna bhatyantah
12.22
श्री॒णामु॑दा॒रो ध॒रुणो॑ रयी॒णां म॑नी॒षाणां॒ प्रार्प॑ण॒ः सोम॑गोपाः ।
वसु॑ः सू॒नुः सह॑सो अ॒प्सु राजा॒ वि भा॒त्यग्र॑ उ॒षसा॑मिधा॒नः ॥२२॥
Shrinamudaro dharuno rayinam manishanam prarpanah somagopah
Vasuh sunuh sahaso apsu raja vi bhatyagra ushasamidhanah
12.23
विश्व॑स्य के॒तुर्भुव॑नस्य॒ गर्भ॒ आ रोद॑सी अपृणा॒ज्जाय॑मानः ।
वी॒डुं चि॒दद्रि॑मभिनत् परा॒यञ्जना॒ यद॒ग्निमय॑जन्त॒ पञ्च॑ ॥२३॥
Vishvasya keturbhuvanasya garbha a rodasi aprinajjayamanah
Vidum chidadrimabhinat parayanjana yadagnimayajanta pancha
12.24
उ॒शिक्पा॑व॒को अ॑र॒तिः सु॑मे॒धा मर्त्ये॑ष्व॒ग्निर॒मृतो॒ नि धा॑यि ।
इय॑र्ति धू॒मम॑रु॒षं भरि॑भ्र॒दुच्छु॒क्रेण॑ शो॒चिषा॒ द्यामिन॑क्षन् ॥२४॥
Ushikpavako aratih sumedha martyeshvagniramrito ni dhayi
Iyarti dhumamarusham bharibhraduchchhukrena shochisha dyaminakshan
12.25
दृ॒शा॒नो रु॒क्म उ॒र्व्या व्य॑द्यौद्दु॒र्मर्ष॒मायु॑ः श्रि॒ये रु॑चा॒नः ।
अ॒ग्निर॒मृतो॑ अभव॒द्वयो॑भि॒र्यदे॑नं द्यौरज॑नय॑त्सु॒रेता॑ः ॥२५॥
Drishano rukma urvya vyadyauddurmarshamayuh shriye ruchanah
Agniramrito abhavadvayobhiryadenam dyaurajanayatsuretah
12.26
यस्ते॑ अ॒द्य कृ॒णव॑द्भद्रशोचेऽपू॒पं दे॑व घृ॒तव॑न्तमग्ने ।
प्र तं न॑य प्रत॒रं वस्यो॒ अच्छा॒भि सु॒म्नं दे॒वभ॑क्तं यविष्ठ ॥२६॥
Yaste adya krinavadbhadrashochepupam deva ghritavantamagne
Pra tam naya prataram vasyo achchhabhi sumnam devabhaktam yavishtha
12.27
आ तं भ॑ज सौश्रव॒सेष्व॑ग्न उ॒क्थ उ॑क्थ॒ आ भ॑ज श॒स्यमा॑ने ।
प्रि॒यः सूर्ये॑ प्रि॒यो अ॒ग्ना भ॑वा॒त्युज्जा॒तेन॑ भि॒नद॒दुज्जनि॑त्वैः ॥२७॥
A tam bhaja saushravaseshvagna uktha uktha a bhaja shasyamane
Priyah surye priyo agna bhavatyujjatena bhinadadujjanitvaih
12.28
त्वाम॑ग्ने॒ यज॑माना॒ अनु॒ द्यून् विश्वा॒ वसु॑ दधिरे॒ वार्या॑णि ।
त्वया॑ स॒ह द्रवि॑णमि॒च्छमा॑ना व्र॒जं गोम॑न्तमु॒शिजो॒ वि व॑व्रुः ॥२८॥
Tvamagne yajamana anu dyun vishva vasu dadhire varyani
Tvaya saha dravinamichchhamana vrajam gomantamushijo vi vavruh
12.29
अस्ता॑व्य॒ग्निर्न॒राᳪ सु॒शेवो॑ वैश्वान॒र ऋषि॑भि॒ः सोम॑गोपाः ।
अ॒द्वे॒षे द्यावा॑पृथि॒वी हु॑वेम॒ देवा॑ ध॒त्त र॒यिम॒स्मे सु॒वीर॑म् ॥२९॥
Astavyagnirnaram sushevo vaishvanara rishibhih somagopah
Adveshe dyavaprithivi huvema deva dhatta rayimasme suviram
12.30
स॒मिधा॒ऽग्निं दु॑वस्यत घृ॒तैर्बो॑धय॒ताति॑थिम् । आऽस्मि॑न् हव्या जु॑होतन ॥३०॥
Samidhagnim duvasyata ghritairbodhayatatithim, asmin havya juhotana
12.31
उदु॑ त्वा॒ विश्वे॑ दे॒वा अग्ने॒ भर॑न्तु॒ चित्ति॑भिः । स नो॑ भव शि॒वस्त्वᳪ सु॒प्रती॑को वि॒भाव॑सुः ॥३१॥
Udu tva vishve deva agne bharantu chittibhih, sa no bhava shivastvam supratiko vibhavasuh
12.32
प्रेद॑ग्ने॒ ज्योति॑ष्मान् याहि शि॒वेभि॑र॒र्चिभि॒ष्ट्वम् ।
बृ॒हद्भि॑र्भा॒नुभि॒र्भास॒न्मा हि॑ᳪसीस्त॒न्वा॒ प्र॒जाः ॥३२॥
Predagne jyotishman yahi shivebhirarchibhishtvam
Brihadbhirbhanubhirbhasanma hinsistanva prajah
12.33
अक्र॑न्दद॒ग्नि स्त॒नय॑न्निव॒ द्यौः क्षामा॒ रेरि॑हद्वी॒रुध॑ः सम॒ञ्जन् ।
स॒द्यो ज॑ज्ञा॒नो वि हीमि॒द्धो अख्य॒दा रोद॑सी भा॒नुना॑ भात्य॒न्तः ॥३३॥
Akrandadagni stanayanniva dyauh kshama rerihadvirudhah samanjan
Sadyo jagyano vi himiddho akhyada rodasi bhanuna bhatyantah
12.34
प्र-प्रा॒यम॒ग्निर्भ॑र॒तस्य॑ शृण्वे॒ वि यत्सूर्यो॒ न रोच॑ते बृ॒हद्भाः ।
अ॒भि यः पू॒रुं पृत॑नासु त॒स्थौ दी॒दाय दैव्यो॒ अति॑थिः शि॒वो न॑ः ॥३४॥
Pra-prayamagnirbharatasya shrinve vi yatsuryo na rochate brihadbhah
Abhi yah purum pritanasu tasthau didaya daivyo atithih shivo nah
12.35
आपो॑ देवी॒ः प्रति॑ गृभ्णीत॒ भस्मै॒तत्स्यो॒ने कृ॑णुध्वᳪ सुर॒भा उ॑ लो॒के ।
तस्मै॑ नमन्तां॒ जन॑यः सु॒पत्नी॑र्मा॒तेव॑ पु॒त्रं बि॑भृता॒प्स्वे॒नत् ॥३५॥
Apo devih prati gribhnita bhasmaitatsyone krinudhvam surabha u loke
Tasmai namantam janayah supatnirmateva putram bibhritapsvenat
12.36
अ॒प्स्व॒ग्ने॒ सधि॒ष्टव॒ सौष॑धी॒रनु॑ रुध्यसे । गर्भे॒ सञ्जा॑यसे॒ पुन॑ः ॥३६॥
Apsvagne sadhishtava saushadhiranu rudhyase, garbhe sanjayase punah
12.37
गर्भो॑ अ॒स्योष॑धीनां॒ गर्भो॒ वन॒स्पती॑नाम् । गर्भो॒ विश्व॑स्य भू॒तस्याग्ने॒ गर्भो॑ अ॒पाम॑सि ॥३७॥
Garbho asyoshadhinam garbho vanaspatinam, garbho vishvasya bhutasyagne garbho apamasi
12.38
प्र॒सद्य॒ भस्म॑ना॒ योनि॑म॒पश्च॑ पृथि॒वीम॑ग्ने । स॒ᳪसृज्य॑ मा॒तृभि॒ष्ट्वं ज्योति॑ष्मा॒न् पुन॒रा ऽस॑दः ॥३८॥
Prasadya bhasmana yonimapashcha prithivimagne, sansrijya matribhishtvam jyotishman punara sadah
12.39
पुन॑रा॒सद्य॒ सद॑नम॒पश्च॑ पृथि॒वीम॑ग्ने । शेषे॑ मा॒तुर्यथो॒पस्थे॒ऽन्तर॑स्याᳪ शि॒वत॑मः ॥३९॥
Punarasadya sadanamapashcha prithivimagne, sheshe maturyathopasthentarasyam shivatamah
12.40
पुन॑रू॒र्जा नि व॑र्तस्व॒ पुन॑रग्न इ॒षाऽऽयु॑षा । पुन॑र्नः पा॒ह्यᳪह॑सः ॥४०॥
Punarurja ni vartasva punaragna ishayusha, punarnah pahyanhasah
12.41
स॒ह र॒य्या नि व॑र्त॒स्वाग्ने॒ पिन्व॑स्व॒ धार॑या । वि॒श्वप्स्न्या॑ वि॒श्वत॒स्परि॑ ॥४१॥
Saha rayya ni vartasvagne pinvasva dharaya, vishvapsnya vishvataspari
12.42
बोधा॑ मे अ॒स्य वच॑सो यविष्ठ॒ मᳪहि॑ष्ठस्य॒ प्रभृ॑तस्य स्वधावः ।
पीय॑ति त्वो॒ अनु॑ त्वो गृणाति व॒न्दारु॑ष्टे त॒न्वं॒ वन्दे अग्ने ॥४२॥
Bodha me asya vachaso yavishtha manhishthasya prabhritasya svadhavah
Piyati tvo anu tvo grinati vandarushte tanvam vande agne
12.43
स बो॑धि सू॒रिर्म॒घवा॒ वसु॑पते॒ वसु॑दावन् । यु॒यो॒ध्यस्मद् द्वेषा॑ᳪसि वि॒श्वक॑र्मणे॒ स्वाहा॑ ॥४३॥
Sa bodhi surirmaghava vasupate vasudavan, yuyodhyasmad dveshansi vishvakarmane svaha
12.44
पुन॑स्त्वाऽऽदि॒त्या रु॒द्रा वस॑व॒ः समि॑न्धतां॒ पुन॑र्ब्र॒ह्माणो॑ वसुनीथ य॒ज्ञैः ।
घृ॒तेन॒ त्वं त॒न्वं॒ वर्धयस्व स॒त्याः स॑न्तु॒ यज॑मानस्य॒ कामा॑ः ॥४४॥
Punastvaditya rudra vasavah samindhatam punarbrahmano vasunitha yagyaih
Ghritena tvam tanvam vardhayasva satyah santu yajamanasya kamah
12.45
अपे॑त॒ वी॒त॒ वि च॑ सर्प॒तातो॒ येऽत्र॒ स्थ पु॑रा॒णा ये च॒ नूत॑नाः ।
अदा॑द्य॒मो॒ऽव॒सानं॑ पृथि॒व्या अक्र॑न्नि॒मं पि॒तरो॑ लो॒कम॑स्मै ॥४५॥
Apeta vita vi cha sarpatato yetra stha purana ye cha nutanah
Adadyamovasanam prithivya akrannimam pitaro lokamasmai
12.46
सं॒ज्ञान॑मसि काम॒धर॑णं॒ मयि॑ ते काम॒धर॑णं भूयात् ।
अ॒ग्नेर्भस्मा॑स्य॒ग्नेः पुरी॑षमसि॒ । चित॑ स्थ परि॒चित॑ ऊर्ध्व॒चित॑ः श्रयध्वम् ॥४६॥
Sangyanamasi kamadharanam mayi te kamadharanam bhuyat
Agnerbhasmasyagneh purishamasi, chita stha parichita urdhvachitah shrayadhvam
12.47
अ॒यᳪ सो अ॒ग्निर्यस्मि॒न्त्सोम॒मिन्द्र॑ः सु॒तं द॒धे ज॒ठरे॑ वावशा॒नः ।
स॒ह॒स्रियं॒ वाज॒मत्यं॒ न सप्ति॑ᳪ सस॒वान्त्सन्त्स्तू॑यसे जातवेदः ॥४७॥
Ayam so agniryasmintsomamindrah sutam dadhe jathare vavashanah
Sahasriyam vajamatyam na saptim sasavantsantstuyase jatavedah
12.48
अग्ने॒ यत्ते॑ दि॒वि वर्च॑ः पृथि॒व्यां यदोष॑धीष्व॒प्स्वा य॑जत्र ।
येना॒न्तरि॑क्षमु॒र्वा॑त॒तन्थ॑ त्वे॒षः स भा॒नुर॑र्ण॒वो नृ॒चक्षा॑ः ॥४८॥
Agne yatte divi varchah prithivyam yadoshadhishvapsva yajatra
Yenantarikshamurvatatantha tveshah sa bhanurarnavo nrichakshah
12.49
अग्ने॑ दि॒वो अर्ण॒मच्छा॑ जिगा॒स्यच्छा॑ दे॒वाँ२ ऊ॑चिषे॒ धिष्ण्या॒ ये ।
या रो॑च॒ने प॒रस्ता॒त् सूर्य॑स्य॒ याश्चा॒वस्ता॑दुप॒तिष्ठ॑न्त॒ आप॑ः ॥४९॥
Agne divo arnamachchha jigasyachchha devan2 uchishe dhishnya ye
Ya rochane parastat suryasya yashchavastadupatishthanta apah
12.50
पु॒री॒ष्या॒सो अ॒ग्नय॑ः प्राव॒णेभि॑ः स॒जोष॑सः । जु॒षन्तां॑ य॒ज्ञम॒द्रुहो॑ऽनमी॒वा इषो॑ म॒हीः ॥५०॥
Purishyaso agnayah pravanebhih sajoshasah, jushantam yagyamadruhonamiva isho mahih
12.51
इडा॑मग्ने पुरु॒दᳪस॑ᳪ स॒निं गोः श॑श्वत्त॒मᳪ हव॑मानाय साध ।
स्यान्न॑ः सू॒नुस्तन॑यो वि॒जावाग्ने॒ सा ते॑ सुम॒तिर्भू॑त्व॒स्मे ॥५१॥
Idamagne purudansam sanim goh shashvattamam havamanaya sadha
Syannah sunustanayo vijavagne sa te sumatirbhutvasme
12.52
अ॒यं ते॒ योनि॑रृ॒त्वियो॒ यतो॑ जा॒तो अरो॑चथाः । तं जा॒नन्न॑ग्न॒ आ रो॒हाथा॑ नो वर्धया र॒यिम् ॥५२॥
Ayam te yonirritviyo yato jato arochathah, tam janannagna a rohatha no vardhaya rayim
12.53
चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द प॑रि॒चिद॑सि॒ तया॑ दे॒वत॑याऽङ्गिर॒स्वद् ध्रु॒वा सी॑द ॥५३॥
Chidasi taya devatayangirasvad dhruva sida parichidasi taya devatayangirasvad dhruva sida
12.54
लो॒कं पृ॑ण छि॒द्रं पृ॒णाथो॑ सीद ध्रु॒वा त्वम् । इ॒न्द्रा॒ग्नी त्वा॒ बृह॒स्पति॑र॒स्मिन् योना॑वसीषदन् ॥५४॥
Lokam prina chhidram prinatho sida dhruva tvam, indragni tva brihaspatirasmin yonavasishadan
12.55
ता अ॑स्य॒ सूद॑दोहस॒ः सोम॑ श्रीणन्ति॒ पृश्न॑यः । जन्म॑न्दे॒वानां॒ विश॑स्त्रि॒ष्वा रो॑च॒ने दि॒वः ॥५५॥
Ta asya sudadohasah soma shrinanti prishnayah, janmandevanam vishastrishva rochane divah
12.56
इन्द्रं॒ विश्वा॑ अवीवृधन्त्समु॒द्रव्य॑चसं॒ गिर॑ः । र॒थीत॑मᳪ र॒थीनां॒ वाजा॑ना॒ᳪ सत्प॑तिं॒ पति॑म् ॥४६॥
Indram vishva avivridhantsamudravyachasam girah, rathitamam rathinam vajanam satpatim patim
12.57
समि॑तᳪ सं क॑ल्पेथा॒ᳪ संप्रि॑यौ रोचि॒ष्णू सु॑मन॒स्यमा॑नौ । इष॒मूर्ज॑म॒भि सं॒वसा॑नौ ॥५७॥
Samitam sam kalpetham sampriyau rochishnu sumanasyamanau, ishamurjamabhi sanvasanau
12.58
सं वां॒ मना॑ᳪसि॒ सं व्र॒ता समु॑ चि॒त्तान्याक॑रम् ।
अग्ने॑ पुरीष्याधि॒पा भ॑व॒ त्वं न॒ इष॒मूर्जं॒ यज॑मानाय धेहि ॥५८॥
Sam vam manansi sam vrata samu chittanyakaram
Agne purishyadhipa bhava tvam na ishamurjam yajamanaya dhehi
12.59
अग्ने॒ त्वं पु॑री॒ष्यो॒ रयि॒मान् पु॑ष्टि॒माँ२ अ॑सि । शि॒वाः कृ॒त्वा दिश॒ः सर्वा॒ः स्वं योनि॑मि॒हाऽस॑दः ॥५९॥
Agne tvam purishyo rayiman pushtiman2 asi, shivah kritva dishah sarvah svam yonimihasadah
12.60
भव॑तं न॒ः सम॑नसौ॒ सचे॑तसावरे॒पसौ॑ ।
मा य॒ज्ञᳪ हि॑ᳪसिष्टं॒ मा य॒ज्ञप॑तिं जातवेदसौ शि॒वौ भ॑वतम॒द्य न॑ः ॥६०॥
Bhavatam nah samanasau sachetasavarepasau
Ma yagyam hinsishtam ma yagyapatim jatavedasau shivau bhavatamadya nah
12.61
मा॒तेव॑ पु॒त्रं पृ॑थि॒वी पु॑री॒ष्य॒म॒ग्निᳪ स्वे योना॑वभारु॒खा ।
तां विश्वै॑र्दे॒वैरृ॒तुभि॑ः संविदा॒नः प्र॒जाप॑तिर्वि॒श्वक॑र्मा॒ वि मु॑ञ्चतु ॥६१॥
Mateva putram prithivi purishyamagnim sve yonavabharukha
Tam vishvairdevairritubhih sanvidanah prajapatirvishvakarma vi munchatu
12.62
असु॑न्वन्त॒मय॑जमानमिच्छ स्ते॒नस्ये॒त्यामन्वि॑हि॒ तस्क॑रस्य ।
अ॒न्यम॒स्मदि॑च्छ॒ सा त॑ इ॒त्या नमो॑ देवि निरृते॒ तुभ्य॑मस्तु ॥६२॥
Asunvantamayajamanamichchha stenasyetyamanvihi taskarasya
Anyamasmadichchha sa ta itya namo devi nirrite tubhyamastu
12.63
नम॒ः सु ते॑ निरृते तिग्मतेजोऽय॒स्मयं॒ वि चृ॑ता ब॒न्धमे॒तम् ।
य॒मेन॒ त्वं य॒म्या सं॑विदा॒नोत्त॒मे ना॒के अधि॑ रोहयैनम् ॥६३॥
Namah su te nirrite tigmatejoyasmayam vi chrita bandhametam
Yamena tvam yamya sanvidanottame nake adhi rohayainam
12.64
यस्या॑स्ते घोर आ॒सञ्जु॒होम्ये॒षां ब॒न्धाना॑मव॒सर्ज॑नाय ।
यां त्वा॒ जनो॒ भूमि॒रिति॑ प्र॒मन्द॑ते॒ निरृ॑तिं त्वा॒ऽहं परि॑वेद वि॒श्वत॑ः ॥६४॥
Yasyaste ghora asanjuhomyesham bandhanamavasarjanaya
Yam tva jano bhumiriti pramandate nirritim tvaham pariveda vishvatah
12.65
यं ते॑ दे॒वी निरृ॑तिराब॒बन्ध॒ पाशं॑ ग्री॒वास्व॑विचृ॒त्यम् ।
तं ते॒ वि ष्या॒म्यायु॑षो॒ न मध्या॒दथै॒तं पि॒तुम॑द्धि॒ प्रसू॑तः । नमो॒ भूत्यै॒ येदं च॒कार॑ ॥६५॥
Yam te devi nirritirababandha pasham grivasvavichrityam
Tam te vi shyamyayusho na madhyadathaitam pitumaddhi prasutah, namo bhutyai yedam chakara
12.66
नि॒वेश॑नः स॒ङ्गम॑नो॒ वसू॑नां॒ विश्वा॑ रू॒पाऽभि च॑ष्टे॒ शची॑भिः ।
दे॒व इ॑व सवि॒ता स॒त्यध॒र्मेन्द्रो॒ न त॑स्थौ सम॒रे प॑थी॒नाम् ॥६६॥
Niveshanah sangamano vasunam vishva rupabhi chashte shachibhih
Deva iva savita satyadharmendro na tasthau samare pathinam
12.67
सीरा॑ युञ्जन्ति क॒वयो॑ यु॒गा वि त॑न्वते॒ पृथ॑क् । धीरा॑ दे॒वेषु॑ सुम्न॒या ॥६७॥
Sira yunjanti kavayo yuga vi tanvate prithak, dhira deveshu sumnaya
12.68
यु॒नक्त॒ सीरा॒ वि यु॒गा त॑नुध्वं कृ॒ते योनौ॑ वपते॒ह बीज॑म् ।
गि॒रा च॑ श्रु॒ष्टिः सभ॑रा॒ अस॑न्नो॒ नेदी॑य॒ इत्सृ॒ण्य॒ः प॒क्वमेया॑त् ॥६८॥
Yunakta sira vi yuga tanudhvam krite yonau vapateha bijam
Gira cha shrushtih sabhara asanno nediya itsrinyah pakvameyat
12.69
शु॒नᳪ सु फाला॒ वि कृ॑षन्तु॒ भूमि॑ᳪ शु॒नं की॒नाशा॑ अ॒भि य॑न्तु वा॒हैः ।
शुना॑सीरा ह॒विषा॒ तोश॑माना सुपिप्प॒ला ओष॑धीः कर्तना॒स्मै ॥६९॥
Shunam su phala vi krishantu bhumim shunam kinasha abhi yantu vahaih
Shunasira havisha toshamana supippala oshadhih kartanasmai
12.70
घृ॒तेन॒ सीता॒ मधु॑ना॒ सम॑ज्यतां॒ विश्वै॑र्दे॒वैरनु॑मता म॒रुद्भि॑ः ।
ऊर्ज॑स्वती॒ पय॑सा॒ पिन्व॑माना॒स्मान्त्सी॑ते॒ पय॑सा॒ऽभ्या व॑वृत्स्व ॥७०॥
Ghritena sita madhuna samajyatam vishvairdevairanumata marudbhih
Urjasvati payasa pinvamanasmantsite payasabhya vavritsva
12.71
लाङ्ग॑लं॒ पवी॑रवत्सु॒शेव॑ᳪ सोम॒पित्स॑रु । तदुद्व॑पति॒ गामविं॑ प्रफ॒र्व्यं॒ च॒ पीव॑रीं प्र॒स्थाव॑द्रथ॒वाह॑णम् ॥७१॥
Langalam paviravatsushevam somapitsaru, tadudvapati gamavim prapharvyam cha pivarim prasthavadrathavahanam
12.72
कामं॑ कामदुघे धुक्ष्व मि॒त्राय॒ वरु॑णाय च । इन्द्रा॑या॒श्विभ्यां॑ पू॒ष्णे प्र॒जाभ्य॒ ओष॑धीभ्यः ॥७२॥
Kamam kamadughe dhukshva mitraya varunaya cha, indrayashvibhyam pushne prajabhya oshadhibhyah
12.73
वि मु॑च्यध्वमघ्न्या देवयाना॒ अग॑न्म॒ तम॑सस्पा॒रम॒स्य |ज्योति॑रापाम ॥७३॥
Vi muchyadhvamaghnya devayana aganma tamasasparamasya, jyotirapama
12.74
स॒जूरब्दो॒ अय॑वोभिः स॒जूरु॒षा अरु॑णीभिः | स॒जोष॑साव॒श्विना॒ दᳪसो॑भिः स॒जूः सूर॒ एत॑शेन स॒जूर्वै॑श्वान॒र इड॑या घृ॒तेन॒ स्वाहा॑ ॥७४॥
Sajurabdo ayavobhih sajurusha arunibhih, sajoshasavashvina dansobhih sajuh sura etashena sajurvaishvanara idaya ghritena svaha
12.75
या ओष॑धी॒ः पूर्वा॑ जा॒ता दे॒वेभ्य॑स्त्रियु॒गं पु॒रा । मनै॒ नु ब॒भ्रूणा॑म॒हᳪ श॒तं धामा॑नि स॒प्त च॑ ॥७५॥
Ya oshadhih purva jata devebhyastriyugam pura, manai nu babhrunamaham shatam dhamani sapta cha
12.76
श॒तं वो॑ अम्ब॒ धामा॑नि स॒हस्र॑मु॒त वो॒ रुह॑ः । अधा॑ शतक्रत्वो यू॒यमि॒मं मे॑ अग॒दं कृ॑त ॥७६॥
Shatam vo amba dhamani sahasramuta vo ruhah, adha shatakratvo yuyamimam me agadam krita
12.77
ओष॑धी॒ः प्रति॑ मोदध्वं॒ पुष्प॑वतीः प्र॒सूव॑रीः । अश्वा॑ इव स॒जित्व॑रीर्वी॒रुध॑ः पारयि॒ष्ण्व॒ः ॥७७॥
Oshadhih prati modadhvam pushpavatih prasuvarih, ashva iva sajitvarirvirudhah parayishnvah
12.78
ओष॑धी॒रिति॑ मातर॒स्तद्वो॑ देवी॒रुप॑ ब्रुवे । स॒नेय॒मश्वं॒ गां वास॑ आ॒त्मानं॒ तव॑ पूरुष ॥७८॥
Oshadhiriti matarastadvo devirupa bruve, saneyamashvam gam vasa atmanam tava purusha
12.79
अ॒श्व॒त्थे वो॑ नि॒षद॑नं प॒र्णे वो॑ वस॒तिष्कृ॒ता । गो॒भाज॒ इत्किला॑सथ॒ यत्स॒नव॑थ॒ पूरु॑षम् ॥७९॥
Ashvatthe vo nishadanam parne vo vasatishkrita, gobhaja itkilasatha yatsanavatha purusham
12.80
यत्रौ॑षधीः स॒मग्म॑त॒ राजा॑न॒ः समि॑ताविव । विप्र॒ः स उ॑च्यते भि॒षग्र॑क्षो॒हामी॑व॒चात॑नः ॥८०॥
Yatraushadhih samagmata rajanah samitaviva, viprah sa uchyate bhishagrakshohamivachatanah
12.81
अ॒श्वा॒व॒तीᳪ सो॑माव॒तीमू॒र्जय॑न्ती॒मुदो॑जसम् । आऽवि॑त्सि॒ सर्वा॒ ओष॑धीर॒स्मा अ॑रि॒ष्टता॑तये ॥८१॥
Ashvavatim somavatimurjayantimudojasam, avitsi sarva oshadhirasma arishtatataye
12.82
उच्छुष्मा॒ ओष॑धीनां॒ गावो॑ गो॒ष्ठादि॑वेरते ।
धन॑ᳪ सनि॒ष्यन्ती॑नामा॒त्मानं॒ तव॑ पूरुष ॥८२॥
Uchchhushma oshadhinam gavo goshthadiverate
Dhanam sanishyantinamatmanam tava purusha
12.83
इ॒ष्कृ॑ति॒र्नाम॑ वो मा॒ताऽथो॑ यू॒यᳪ स्थ॒ निष्कृ॑तीः । सी॒राः प॑त॒त्रिणी॑ स्थन॒ यदा॒मय॑ति॒ निष्कृ॑थ ॥८३॥
Ishkritirnama vo matatho yuyam stha nishkritih, sirah patatrini sthana yadamayati nishkritha
12.84
अति॒ विश्वा॑ः परि॒ष्ठा स्ते॒न इ॑व व्र॒जम॑क्रमुः । ओष॑धी॒ः प्राचु॑च्यवु॒र्यत्किं च॑ त॒न्वो रप॑ः ॥८४॥
Ati vishvah parishtha stena iva vrajamakramuh, oshadhih prachuchyavuryatkim cha tanvo rapah
12.85
यदि॒मा वा॒जय॑न्न॒हमोष॑धी॒र्हस्त॑ आद॒धे । आ॒त्मा यक्ष्म॑स्य नश्यति पु॒रा जी॑व॒गृभो॑ यथा ॥८५॥
Yadima vajayannahamoshadhirhasta adadhe, atma yakshmasya nashyati pura jivagribho yatha
12.86
यस्यौ॑षधीः प्र॒सर्प॒थाङ्ग॑मङ्गं॒ परु॑ष्परुः । ततो॒ यक्ष्मं॒ वि बा॑धध्व उ॒ग्रो म॑ध्यम॒शीरि॑व ॥८६॥
Yasyaushadhih prasarpathangamangam parushparuh, tato yakshmam vi badhadhva ugro madhyamashiriva
12.87
सा॒कं य॑क्ष्म॒ प्र प॑त॒ चाषे॑ण किकिदी॒विना॑ । सा॒कं वात॑स्य॒ ध्राज्या॑ सा॒कं न॑श्य नि॒हाक॑या ॥८७॥
Sakam yakshma pra pata chashena kikidivina, sakam vatasya dhrajya sakam nashya nihakaya
12.88
अ॒न्या वो॑ अ॒न्याम॑वत्व॒न्यान्यस्या॒ उपा॑वत । ताः सर्वा॑ः संविदा॒ना इ॒दं मे॒ प्राव॑ता॒ वच॑ः ॥८८॥
Anya vo anyamavatvanyanyasya upavata, tah sarvah sanvidana idam me pravata vachah
12.89
याः फ॒लिनी॒र्या अ॑फ॒ला अ॑पु॒ष्पा याश्च॑ पु॒ष्पिणी॑ः । बृह॒स्पति॑प्रसूता॒स्ता नो॑ मुञ्च॒न्त्वᳪह॑सः ॥८९॥
Yah phalinirya aphala apushpa yashcha pushpinih, brihaspatiprasutasta no munchantvanhasah
12.90
मु॒ञ्चन्तु॑ मा शप॒थ्यादथो॑ वरु॒ण्या॒दु॒त । अथो॑ य॒मस्य॒ पड्वी॑शा॒त्सर्व॑स्माद्देवकिल्बि॒षात् ॥९०॥
Munchantu ma shapathyadatho varunyaduta, atho yamasya padvishatsarvasmaddevakilbishat
12.91
अ॒व॒पत॑न्तीरवदन्दि॒व ओष॑धय॒स्परि॑ । यं जी॒वम॒श्नवा॑महै॒ न स रि॑ष्याति॒ पूरु॑षः ॥९१॥
Avapatantiravadandiva oshadhayaspari, yam jivamashnavamahai na sa rishyati purushah
12.92
या ओष॑धी॒ः सोम॑राज्ञीर्ब॒ह्वीः श॒तवि॑चक्षणाः । तासा॑मसि॒ त्वमु॑त्त॒मारं॒ कामा॑य॒ शᳪ हृ॒दे ॥९२॥
Ya oshadhih somaragyirbahvih shatavichakshanah, tasamasi tvamuttamaram kamaya sham hride
12.93
या ओष॑धी॒ः सोम॑राज्ञी॒र्विष्ठि॑ताः पृथि॒वीमनु॑ । बृह॒स्पति॑प्रसूता अस्यै॒ संद॑त्त वी॒र्य॒म् ॥९३॥
Ya oshadhih somaragyirvishthitah prithivimanu, brihaspatiprasuta asyai sandatta viryam
12.94
याश्चे॒दमु॑पशृ॒ण्वन्ति॒ याश्च॑ दू॒रं परा॑गताः । सर्वा॑ः सं॒गत्य॑ वीरुधोऽस्यै॒ संद॑त्त वी॒र्य॒म् ॥९४॥
Yashchedamupashrinvanti yashcha duram paragatah, sarvah sangatya virudhosyai sandatta viryam
12.95
मा वो॑ रिषत् खनि॒ता यस्मै॑ चा॒हं खना॑मि वः । द्वि॒पाच्चतु॑ष्पाद॒स्माक॒ᳪ सर्व॑मस्त्वनातु॒रम् ॥९५॥
Ma vo rishat khanita yasmai chaham khanami vah, dvipachchatushpadasmakam sarvamastvanaturam
12.96
ओष॑धय॒ः सम॑वदन्त॒ सोमे॑न स॒ह राज्ञा॑ । यस्मै॑ कृ॒णोति॑ ब्राह्म॒णस्तᳪ रा॑जन् पारयामसि ॥९६॥
Oshadhayah samavadanta somena saha ragya, yasmai krinoti brahmanastam rajan parayamasi
12.97
ना॒श॒यि॒त्री ब॒लास॒स्यार्श॑स उप॒चिता॑मसि । अथो॑ श॒तस्य॒ यक्ष्मा॑णां पाका॒रोर॑सि॒ नाश॑नी ॥९७॥
Nashayitri balasasyarshasa upachitamasi, atho shatasya yakshmanam pakarorasi nashani
12.98
त्वां ग॑न्ध॒र्वा अ॑खनँ॒स्त्वामिन्द्र॒स्त्वां बृह॒स्पति॑ः । त्वामो॑षधे॒ सोमो॒ राजा॑ वि॒द्वान् यक्ष्मा॑दमुच्यत ॥९८॥
Tvam gandharva akhananstvamindrastvam brihaspatih, tvamoshadhe somo raja vidvan yakshmadamuchyata
12.99
सह॑स्व मे॒ अरा॑ती॒ः सह॑स्व पृतनाय॒तः । सह॑स्व॒ सर्वं॑ पा॒प्मान॒ᳪ सह॑मानास्योषधे ॥९९॥
Sahasva me aratih sahasva pritanayatah, sahasva sarvam papmanam sahamanasyoshadhe
12.100
दी॒र्घायु॑स्त ओषधे खनि॒ता यस्मै॑ च त्वा॒ खना॑म्य॒हम् । अथो॒ त्वं दी॒र्घायु॑र्भू॒त्वा श॒तव॑ल्शा॒ विरो॑हतात् ॥१००॥
Dirghayusta oshadhe khanita yasmai cha tva khanamyaham, atho tvam dirghayurbhutva shatavalsha virohatat
12.101
त्वमु॑त्त॒मास्यो॑षधे॒ तव॑ वृ॒क्षा उप॑स्तयः । उप॑स्तिरस्तु॒ सोऽस्माकं॒ यो अ॒स्माँ२ अ॑भि॒दास॑ति ॥१०१॥
Tvamuttamasyoshadhe tava vriksha upastayah, upastirastu sosmakam yo asman2 abhidasati
12.102
मा मा॑ हिᳪसीज्जनि॒ता यः पृ॑थि॒व्या यो वा॒ दिव॑ᳪ स॒त्यध॑र्मा॒ व्यान॑ट् ।
यश्चा॒पश्च॒न्द्राः प्र॑थ॒मो ज॒जान॒ कस्मै॑ दे॒वाय॑ ह॒विषा॑ विधेम ॥१०२॥
Ma ma hinsijjanita yah prithivya yo va divam satyadharma vyanat
Yashchapashchandrah prathamo jajana kasmai devaya havisha vidhema
12.103
अ॒भ्या व॑र्तस्व पृथिवि य॒ज्ञेन॒ पय॑सा स॒ह । व॒पां ते॑ अ॒ग्निरि॑षि॒तो अ॑रोहत् ॥१०३॥
Abhya vartasva prithivi yagyena payasa saha, vapam te agnirishito arohat
12.104
अग्ने॒ यत्ते॑ शु॒क्रं यच्च॒न्द्रं यत्पू॒तं यच्च॑ य॒ज्ञिय॑म् ।
तद्दे॒वेभ्यो॑ भरामसि ॥१०४॥
Agne yatte shukram yachchandram yatputam yachcha yagyiyam
Taddevebhyo bharamasi
12.105
इष॒मूर्ज॑म॒हमि॒त आद॑मृ॒तस्य॒ योनिं॑ महि॒षस्य॒ धारा॑म् ।
आ मा॒ गोषु॑ विश॒त्वा त॒नूषु॒ जहा॑मि से॒दिमनि॑रा॒ममी॑वाम् ॥१०५॥
Ishamurjamahamita adamritasya yonim mahishasya dharam
A ma goshu vishatva tanushu jahami sedimaniramamivam
12.106
अग्ने॒ तव॒ श्रवो॒ वयो॒ महि॑ भ्राजन्ते अ॒र्चयो॑ विभावसो ।
बृह॑द्भानो॒ शव॑सा॒ वाज॑मु॒क्थ्यं दधा॑सि दा॒शुषे॑ कवे ॥१०६॥
Agne tava shravo vayo mahi bhrajante archayo vibhavaso
Brihadbhano shavasa vajamukthyam dadhasi dashushe kave
12.107
पा॒व॒कव॑र्चाः शु॒क्रव॑र्चा॒ अनू॑नवर्चा॒ उदि॑यर्षि भा॒नुना॑ ।
पु॒त्रो मा॒तरा॑ वि॒चर॒न्नुपा॑वसि पृ॒णक्षि॒ रोद॑सी उ॒भे ॥१०७॥
Pavakavarchah shukravarcha anunavarcha udiyarshi bhanuna
Putro matara vicharannupavasi prinakshi rodasi ubhe
12.108
ऊर्जो॑ नपाज्जातवेदः सुश॒स्तिभि॒र्मन्द॑स्व धी॒तिभि॑र्हि॒तः ।
त्वे इष॒ः सन्द॑धु॒र्भूरि॑वर्पसश्चि॒त्रोत॑यो वा॒मजा॑ताः ॥१०८॥
Urjo napajjatavedah sushastibhirmandasva dhitibhirhitah
Tve ishah sandadhurbhurivarpasashchitrotayo vamajatah
12.109
इ॒र॒ज्यन्न॑ग्ने प्रथयस्व ज॒न्तुभि॑र॒स्मे रायो॑ अमर्त्य ।
स द॑र्श॒तस्य॒ वपु॑षो॒ वि रा॑जसि पृ॒णक्षि॑ सान॒सिं क्रतु॑म् ॥१०९॥
Irajyannagne prathayasva jantubhirasme rayo amartya
Sa darshatasya vapusho vi rajasi prinakshi sanasim kratum
12.110
इ॒ष्क॒र्तार॑मध्व॒रस्य॒ प्रचे॑तसं॒ क्षय॑न्त॒ᳪ राध॑सो म॒हः ।
रा॒तिं वा॒मस्य॑ सु॒भगां॑ म॒हीमिषं॒ दधा॑सि सान॒सिᳪ र॒यिम् ॥११०॥
Ishkartaramadhvarasya prachetasam kshayantam radhaso mahah
Ratim vamasya subhagam mahimisham dadhasi sanasim rayim
12.111
ऋ॒तावा॑नं महि॒षं वि॒श्वद॑र्शतम॒ग्निᳪ सु॒म्नाय॑ दधिरे पु॒रो जना॑ः ।
श्रुत्क॑र्णᳪ स॒प्रथ॑स्तमं त्वा गि॒रा दै॑व्यं॒ मानु॑षा यु॒गा ॥१११॥
Ritavanam mahisham vishvadarshatamagnim sumnaya dadhire puro janah
Shrutkarnam saprathastamam tva gira daivyam manusha yuga
12.112
आ प्या॑यस्व॒ समे॑तु ते वि॒श्वत॑ः सोम॒ वृष्ण्य॑म् । भवा॒ वाज॑स्य सङ्ग॒थे ॥११२॥
A pyayasva sametu te vishvatah soma vrishnyam, bhava vajasya sangathe
12.113
सं ते॒ पया॑ᳪसि॒ समु॑ यन्तु॒ वाजा॒ः सं वृष्ण्या॑न्यभिमाति॒षाह॑ः ।
आ॒प्याय॑मानो अ॒मृता॑य सोम दि॒वि श्रवा॑ᳪस्युत्त॒मानि॑ धिष्व ॥११३॥
Sam te payansi samu yantu vajah sam vrishnyanyabhimatishahah
Apyayamano amritaya soma divi shravansyuttamani dhishva
12.114
आ प्या॑यस्व मदिन्तम॒ सोम॒ विश्वे॑भिर॒ᳪशुभि॑ः । भवा॑ नः स॒प्रथ॑स्तम॒ः सखा॑ वृ॒धे ॥११४॥
A pyayasva madintama soma vishvebhiranshubhih, bhava nah saprathastamah sakha vridhe
12.115
आ ते॑ व॒त्सो मनो॑ यमत्पर॒माच्चि॑त्स॒धस्था॑त् । अग्ने॒ त्वाङ्का॑मया गि॒रा ॥११५॥
A te vatso mano yamatparamachchitsadhasthat, agne tvankamaya gira
12.116
तुभ्यं॒ ता अ॑ङ्गिरस्तम॒ विश्वा॑ः सुक्षि॒तय॒ः पृथ॑क् । अग्ने॒ कामा॑य येमिरे ॥११६॥
Tubhyam ta angirastama vishvah sukshitayah prithak, agne kamaya yemire
12.117
अ॒ग्निः प्रि॒येषु॒ धाम॑सु॒ कामो॑ भू॒तस्य॒ भव्य॑स्य । स॒म्राडेको॒ वि रा॑जति ॥११७॥
Agnih priyeshu dhamasu kamo bhutasya bhavyasya, samradeko vi rajati