Utshovঅধ্যায় 10
10.1
অপো দেবা মধুমতীরগৃভ্ণন্নূর্জস্বতী রাজস্বশ্চিতানাঃ ।
যাভির্মিত্রাবরুণাবভ্যষিঞ্চন্যাভিরিন্দ্রমনয়ন্নত্যরাতীঃ ॥১॥
10.2
বৃষ্ণ ঊর্মিরসি রাষ্ট্রদা রাষ্ট্রং মে দেহি স্বাহা বৃষ্ণ ঊর্মিরসি রাষ্ট্রদা রাষ্ট্রমমুষ্মৈ দেহি
বৃষসেনোঽসি রাষ্ট্রদা রাষ্ট্রং মে দেহি স্বাহা বৃষসেনোঽসি রাষ্ট্রদা রাষ্ট্রমমুষ্মৈ দেহি ॥২॥
10.3
অর্থেত স্থ রাষ্ট্রদা রাষ্ট্রং মে দত্ত স্বাহা ঽর্থেত স্থ রাষ্ট্রদা রাষ্ট্রমমুষ্মৈ দত্তৌজস্বতী স্থ রাষ্ট্রদা রাষ্ট্রং মে দত্ত স্বাহৌজস্বতী স্থ রাষ্ট্রদা রাষ্ট্রমমুষ্মৈ দত্তাপঃ পরিবাহিণী স্থ রাষ্ট্রদা রাষ্ট্রং মে দত্ত স্বাহা ঽপঃ পরিবাহিণী স্থ রাষ্ট্রদা রাষ্ট্রমমুষ্মৈ দত্তাপাং পতিরসি রাষ্ট্রদা রাষ্ট্রং মে দেহি স্বাহা ঽপাং পতিরসি রাষ্ট্রদা রাষ্ট্রমমুষ্মৈ দেহ্যপাং গর্ভোঽসি রাষ্ট্রদা রাষ্ট্রং মে দেহি স্বাহা ঽপাং গর্ভো সি রাষ্ট্রদা রাষ্ট্রমমুষ্মৈ দেহি ॥৩॥
10.4
সূর্যত্বচস স্থ রাষ্ট্রদা রাষ্ট্রং মে দত্ত স্বাহা সূর্যত্বচস স্থ রাষ্ট্রদা রাষ্ট্রমমুষ্মৈ দত্ত সূর্যবর্চস স্থ রাষ্ট্রদা রাষ্ট্রং মে দত্ত স্বাহা সূর্যবর্চস স্থ রাষ্ট্রদা রাষ্ট্রমমুষ্মৈ দত্ত মান্দা স্থ রাষ্ট্রদা রাষ্ট্রং মে দত্ত স্বাহা মান্দা স্থ রাষ্ট্রদা রাষ্ট্রমমুষ্মৈ দত্ত ব্রজক্ষিত স্থ রাষ্ট্রদা রাষ্ট্রং মে দত্ত স্বাহা ব্রজক্ষিত স্থ রাষ্ট্রদা রাষ্ট্রমমুষ্মৈ দত্ত বাশা স্থ রাষ্ট্রদা রাষ্ট্রং মে দত্ত স্বাহা বাশা স্থ রাষ্ট্রদা রাষ্ট্রমমুষ্মৈ দত্ত শবিষ্ঠা স্থ রাষ্ট্রদা রাষ্ট্রং মে দত্ত স্বাহা শবিষ্ঠা স্থ রাষ্ট্রদা রাষ্ট্রমমুষ্মৈ দত্ত শক্বরী স্থ রাষ্ট্রদা রাষ্ট্রং মে দত্ত স্বাহা শক্বরী স্থ রাষ্ট্রদা রাষ্ট্রমমুষ্মৈ দত্ত জনভৃত স্থ রাষ্ট্রদা রাষ্ট্রং মে দত্ত স্বাহা জনভৃত স্থ রাষ্ট্রদা রাষ্ট্রমমুষ্মৈ দত্ত বিশ্বভৃত স্থ রাষ্ট্রদা রাষ্ট্রং মে দত্ত স্বাহা বিশ্বভৃত স্থ রাষ্ট্রদা রাষ্ট্রমমুষ্মৈ দত্তাপঃ স্বরাজ স্থ রাষ্ট্রদা রাষ্ট্রমমুষ্মৈ দত্ত । মধুমতীর্মধুমতীভিঃ পৃচ্যন্তাং মহি ক্ষত্রং ক্ষত্রিয়ায় বন্বানাংনাধৃষ্টাঃ সীদত সহৌজসো মহি ক্ষত্রং ক্ষত্রিয়ায় দধতীঃ ॥৪॥
10.5
সোমস্য ত্বিষিরসি তবেব মে ত্বিষির্ভূয়াৎ । অগ্নয়ে স্বাহা সোমায় স্বাহা সবিত্রে স্বাহা সরস্বত্যৈ স্বাহা
পূষ্ণে স্বাহা বৃহস্পতয়ে স্বাহেন্দ্রায় স্বাহা ঘোষায় স্বাহা শ্লোকায় স্বাহা
ঽংশায় স্বাহা ভগায় স্বাহা ঽর্যম্ণে স্বাহা ॥৫॥
10.6
পবিত্রে স্থো বৈষ্ণব্যৌ সবিতুর্বঃ প্রসব উত্পুনাম্যচ্ছিদ্রেণ পবিত্রেণ সূর্যস্য রশ্মিভিঃ ।
অনিভৃষ্টমসি বাচো বন্ধুস্তপোজাঃ সোমস্য দাত্রমসি স্বাহা রাজস্বঃ ॥৬॥
10.7
সধমাদো দ্যুম্নিনীরাপ এতা অনাধৃষ্টা অপস্যো বসানাঃ ।
পস্ত্যাসু চক্রে বরুণঃ সধস্থমপাং শিশুর্মাতৃতমাস্বন্তঃ ॥৭॥
10.8
ক্ষত্রস্যোল্বমসি ক্ষত্রস্য জরায্বসি ক্ষত্রস্য যোনিরসি ক্ষত্রস্য নাভিরসীন্দ্রস্য বার্ত্রঘ্নমসি মিত্রস্যাসি বরুণস্যাসি
ত্বয়াঽয়ং বৃত্রং বধেৎ । দৃবাঽসি রুজাঽসি ক্ষুমাঽসি । পাতৈনং প্রাঞ্চং পাতৈনং প্রত্যঞ্চং পাতৈনং তির্যঞ্চং দিগ্ভ্যঃ পাত ॥৮॥
10.9
আবির্ময়া আবিত্তো অগ্নির্গৃহপতিরাবিত্ত ইন্দ্রো বৃদ্ধশ্রবা আবিত্তৌ মিত্রাবরুণৌ ধৃতব্রতাবাবিত্তঃ পূষা বিশ্ববেদা
আবিত্তে দ্যাবাপৃথিবী বিশ্বশম্ভুবাবাবিত্তাদিতিরুরুশর্মা ॥৯॥
10.10
অবেষ্টা দন্দশূকাঃ প্রাচীমা রোহ গায়ত্রী ত্বাঽবতু রথন্তরং সাম ত্রিবৃত্স্তোমো বসন্ত ঋতুর্ব্রহ্ম দ্রবিণম্ ॥১০॥
10.11
দক্ষিণামা রোহ ত্রিষ্টুপ্ ত্বাঽবতু বৃহত্সাম পঞ্চদশ স্তোমো গ্রীষ্ম ঋতুঃ ক্ষত্রং দ্রবিণম্ ॥১১॥
10.12
প্রতীচীমা রোহ জগতী ত্বাঽবতু বৈরূপং সাম সপ্তদশ স্তোমো বর্ষা ঋতুর্বিড্ দ্রবিণম্ ॥১২॥
10.13
উদীচীমা রোহানুষ্টুপ্ ত্বাঽবতু বৈরাজং সামৈকবিংশ স্তোমঃ শরদৃতুঃ ফলং দ্রবিণম্ ॥১৩॥
10.14
ঊর্ধ্বামা রোহ পঙ্ক্তিস্ত্বাঽবতু শাক্বররৈবতে সামনী ত্রিণবত্রয়স্ত্রিংশৌ স্তোমৌ হেমন্তশিশিরাবৃতূ বর্চো দ্রবিণং
প্রত্যস্তং নমুচেঃ শিরঃ ॥১৪॥
10.15
সোমস্য ত্বিষিরসি তবেব মে ত্বিষির্ভূয়াৎ । মৃত্যোঃ পাহ্যোজোঽসি সহোঽস্যমৃতমসি ॥১৫॥
10.16
হিরণ্যরূপা উষসো বিরোক উভাবিন্দ্রা উদিথঃ সূর্যশ্চ ।
আ রোহতং বরুণ মিত্র গর্ত্তং ততশ্চক্ষাথামদিতিং দিতিং চ মিত্রোঽসি বরুণোঽসি ॥১৬॥
10.17
সোমস্য ত্বা দ্যুম্নেনাভি ষিঞ্চাম্যগ্নের্ভ্রাজসা সূর্যস্য বর্চসেন্দ্রস্যেন্দ্রিয়েণ ।
ক্ষত্রাণাং ক্ষত্রপতিরেধ্যতি দিদ্যূন্ পাহি ॥১৭॥
10.18
ইমং দেবা অসপত্নং সুবধ্বং মহতে ক্ষত্রায় মহতে জ্যৈষ্ঠ্যায় মহতে জানরাজ্যায়েন্দ্রস্যেন্দ্রিয়ায় ।
ইমমমুষ্য পুত্রমমুষ্যৈ পুত্রমস্যৈ বিশ এষ বোঽমী রাজা সোমোঽস্মাকং ব্রাহ্মণানাংরাজা ॥১৮॥
10.19
প্র পর্বতস্য বৃষভস্য পৃষ্ঠান্নাবশ্চরন্তি স্বসিচ ইয়ানাঃ ।
তা আঽববৃত্রন্নধরাগুদক্তা অহিং বুধ্ন্যমনু রীয়মাণাঃ ।
বিষ্ণোর্বিক্রমণমসি বিষ্ণোর্বিক্রান্তমসি বিষ্ণোঃ ক্রান্তমসি ॥১৯॥
10.20
প্রজাপতে ন ত্বদেতান্যন্যো বিশ্বা রূপাণি পরি তা বভূব । যত্কামাস্তে জুহুমস্তন্নো অস্ত্বয়মমুষ্য পিতাসাবস্য পিতা বয়ং স্যাম পতয়ো রয়ীণাং স্বাহা ।
রুদ্র যত্তে ক্রিবি পরং নাম তস্মিন্হুতমস্যমেষ্টমসি স্বাহা ॥২০॥
10.21
ইন্দ্রস্য বজ্রোঽসি মিত্রাবরুণয়োস্ত্বা প্রশাস্ত্রোঃ প্রশিষা যুনজ্মি ।
অব্যথায়ৈ ত্বা স্বধায়ৈ ত্বাঽরিষ্টো অর্জুনো মরুতাং প্রসবেন জয়াপাম মনসা সমিন্দ্রিয়েণ ॥২১॥
10.22
মা ত ইন্দ্র তে বয়ং তুরাষাডয়ুক্তাসো অব্রহ্মতা বিদসাম ।
তিষ্ঠা রথমধি যং বজ্রহস্তা রশ্মীন্ দেব যুবসে স্বশ্বান্ ॥২২॥
10.23
অগ্নয়ে গৃহপতয়ে স্বাহা সোমায় বনস্পতয়ে স্বাহা
মরুতামোজসে স্বাহেন্দ্রস্যেন্দ্রিয়ায় স্বাহা । পৃথিবি মাতর্মা মা হিংসীর্মো অহং ত্বাম্ ॥২৩॥
10.24
হংসঃ শুচিষদ্বসুরন্তরিক্ষসদ্ধোতা বেদিষদতিথির্দুরোণসৎ ।
নৃষদ্বরসদৃতসদ্ব্যোমসদব্জা গোজা ঋতজা অদ্রিজা ঋতং বৃহৎ ॥২৪॥
10.25
ইয়দস্যায়ুরস্যায়ুর্ময়ি ধেহি যুঙ্ঙসি বর্চোঽসি বর্চো ময়ি ধেহ্যূর্গস্যূর্জং ময়ি ধেহি ।।
ইন্দ্রস্য বাং বীর্যকৃতো বাহূ অভ্যুপাবহরামি ॥২৫॥
10.26
স্যোনাঽসি সুষদাঽসি ক্ষত্রস্য যোনিরসি ।
স্যোনামা সীদ সুষদামা সীদ ক্ষত্রস্য যোনিমা সীদ ॥২৬॥
10.27
নি ষসাদ ঘৃতব্রতো বরুণঃ পস্ত্যাস্বা । সাম্রাজ্যায় সুক্রতুঃ ॥২৭॥
10.28
অভিভূরস্যেতাস্তে পঞ্চ দিশঃ কল্পন্তাং ব্রহ্মঁস্ত্বং ব্রহ্মাঽসি সবিতাঽসি সত্যপ্রসবো বরুণোঽসি সত্যৌজা ইন্দ্রোঽসি বিশৌজা রুদ্রোঽসি সুশেবঃ ।
বহুকার শ্রেয়স্কর ভূয়স্করেন্দ্রস্য বজ্রোঽসি তেন মে রধ্য ॥২৮॥
10.29
অগ্নিঃ পৃথুর্ধর্মণস্পতির্জুষাণো অগ্নিঃ পৃথুর্ধর্মণস্পতিরাজ্যস্য বেতু স্বাহা
স্বাহাকৃতাঃ সূর্যস্য রশ্মিভির্যতধ্বং সজাতানাং মধ্যমেষ্ঠ্যায় ॥২৯॥
10.30
সবিত্রা প্রসবিত্রা সরস্বত্যা বাচা ত্বষ্ট্রা রূপৈঃ পূষ্ণা পশুভিরিন্দ্রেণাস্মে বৃহস্পতিনা ব্রহ্মণা বরুণেনৌজসাঽগ্নিনা তেজসা সোমেন রাজ্ঞা বিষ্ণুনা দশম্যা দেবতয়া প্রসূতঃ প্র সর্পামি ॥৩০॥
10.31
অশ্বিভ্যাং পচ্যস্ব সরস্বত্যৈ পচ্যস্বেন্দ্রায় সুত্রাম্ণে পচ্যস্ব ।
বায়ুঃ পূতঃ পবিত্রেণ প্রত্যঙ্ক্সোমো অতিস্রুতঃ । ইন্দ্রস্য যুজ্যঃ সখা ॥৩১॥
10.32
কুবিদঙ্গ যবমন্তো যবং চিদ্যথা দান্ত্যনুপূর্বং বিয়ূয় ।
ইহেহৈষাং কৃণুহি ভোজনানি যে বর্হিষো নম উক্তিং যজন্তি ।
উপয়ামগৃহীতোঽস্যশ্বিভ্যাং ত্বা সরস্বত্যৈ ত্বেন্দ্রায় ত্বা সুত্রাম্ণে ॥৩২॥
10.33
যুবং সুরামমশ্বিনা নমুচাবাসুরে সচা । বিপিপানা শুভস্পতী ইন্দ্রং কর্মস্বাবতম্ ॥৩৩॥
10.34
পুত্রমিব পিতরাবশ্বিনোভেন্দ্রাবথুঃ কাব্যৈর্দংসনাভিঃ ।
যত্সুরামং ব্যপিবঃ শচীভিঃ সরস্বতী ত্বা মঘবন্নভিষ্ণক্ ॥৩৪॥