অধ্যায় 35

35.1

অথ পঞ্চত্রিংশোঽধ্যায়ঃ।

সহস্রশীর্ষা পুরুষঃ সহস্রাক্ষঃ সহস্রপাৎ ।
স ভূমিং সর্বত স্পৃত্বাত্যতিষ্ঠদ্দশাঙ্গুলম্ ॥১॥

35.2

পুরুষ এবেদং সর্বং যদ্ভূতং যচ্চ ভাব্যম্ ।
উতামৃতত্বস্যেশানো যদন্নেনাতিরোহতি ॥২॥

35.3

এতাবানস্য মহিমাতো জ্যায়াংশ্চ পূরুষঃ ।
পাদোঽস্য বিশ্বা ভূতানি ত্রিপাদস্যামৃতং দিবি ॥৩॥

35.4

ত্রিপাদূর্ধ্ব উদৈত্পুরুষঃ পাদোঽস্যেহাভবত্পুনঃ ।
ততো বিষ্বঙ্ ব্যক্রামত্সাশনানশনে অভি ॥৪॥

35.5

ততো বিরালজায়ত বিরাজো অধি পূরুষঃ ।
স জাতো অত্যরিচ্যত পশ্চাদ্ভূমিমথো পুরঃ ॥৫॥

35.6

তস্মাদ্যজ্ঞাত্সর্বহুতঃ সম্ভৃতং পৃষদাজ্যম্ ।
পশূংস্তাংশ্চক্রে বায়ব্যানারণ্যা গ্রাম্যাশ্চ যে ॥৬॥

35.7

তস্মাদ্যজ্ঞাত্সর্বহুত ঋচঃ সামানি জজ্ঞিরে ।
ছন্দাংসি জজ্ঞিরে তস্মাদ্যজুস্তস্মাদজায়ত ॥৭॥

35.8

তস্মাদশ্বা অজায়ন্ত যে কে চোভয়াদতঃ ।
গাবো হ জজ্ঞিরে তস্মাত্তস্মাজ্জাতা অজাবয়ঃ ॥৮॥

35.9

তং যজ্ঞং বর্হিষি প্রৌক্ষন্পুরুষং জাতমগ্রতঃ ।
তেন দেবা অয়জন্ত সাধ্যা ঋষয়শ্চ যে ॥৯॥

35.10

যত্পুরুষং ব্যদধুঃ কতিধা ব্যকল্পয়ন্ ।
মুখং কিমস্যাসীত্কিং বাহূ কিমূরূ পাদা উচ্যেতে ॥১০॥

35.11

ব্রাহ্মণোঽস্য মুখমাসীদ্বাহূ রাজন্যঃ কৃতঃ ।
ঊরূ তদস্য যদ্বৈশ্যঃ পদ্ভ্যাং শূদ্রো অজায়ত ॥১১॥

35.12

চন্দ্রমা মনসো জাতশ্চক্ষোঃ সূর্যো অজায়ত ।
শ্রোত্রাদ্বায়ুশ্চ প্রাণশ্চ মুখাদগ্নিরজায়ত ॥১২॥

35.13

নাভ্যা আসীদন্তরিক্ষং শীর্ষ্ণো দ্যৌঃ সমবর্তত ।
পদ্ভ্যাং ভূমির্দিশঃ শ্রোত্রাত্তথা লোকাঁ২ অকল্পয়ন্ ॥১৩॥

35.14

১৩ (১৯৪৩)
যত্পুরুষেণ হবিষা দেবা যজ্ঞমতন্বত ।
বসন্তোঽস্যাসীদাজ্যং গ্রীষ্ম ইধ্মঃ শরদ্ধবিঃ ॥১৪॥

35.15

সপ্তাস্যাসন্পরিধয়স্ত্রিঃ সপ্ত সমিধঃ কৃতাঃ ।
দেবা যদ্যজ্ঞং তন্বানা অবধ্নন্পুরুষং পশুম্ ॥১৫॥

35.16

যজ্ঞেন যজ্ঞময়জন্ত দেবাস্তানি ধর্মাণি প্রথমান্যাসন্ ।
তে হ নাকং মহিমানঃ সচন্ত যত্র পূর্বে সাধ্যাঃ সন্তি দেবাঃ ॥১৬॥

35.17

(১) ১৬
অদ্ভ্যঃ সংভৃতঃ পৃথিব্যৈ রসাচ্চ বিশ্বকর্মণঃ সমবর্ততাগ্রে ।
তস্য ত্বষ্টা বিদধদ্রূপমেতি তন্মর্ত্যস্য দেবত্বমাজানমগ্রে ॥১॥

35.18

বেদাহমেতং পুরুষং মহান্তমাদিত্যবর্ণং তমসঃ পরস্তাৎ ।
তমেব বিদিত্বাতি মৃত্যুমেতি নান্যঃ পন্থা বিদ্যতেঽয়নায় ॥২॥

35.19

প্রজাপতিশ্চরতি গর্ভে অন্তরজায়মানো বহুধা বি জায়তে ।
তস্য যোনিং পরি পশ্যন্তি ধীরাস্তস্মিন্হ তস্থুর্ভুবনানি বিশ্বা ॥৩॥

35.20

যো দেবেভ্য আতপতি যো দেবানাং পুরোহিতঃ ।
পূর্বো যো দেবেভ্যো জাতো নমো রুচায় ব্রাহ্ময়ে ॥৪॥

35.21

রুচং ব্রাহ্মং জনয়ন্তো দেবা অগ্রে তদব্রুবন্ ।
যস্ত্বৈবং ব্রাহ্মণো বিদ্যাত্তস্য দেবা অসন্বশে ॥৫॥

35.22

শ্রীশ্চ তে লক্ষ্মীশ্চ পত্ন্যা অহোরাত্রে পার্শ্বে নক্ষত্রাণি রূপমশ্বিনৌ ব্যাত্তম্ ।
ইষ্ণন্নিষাণামুং ম ইষাণ সর্বলোকং ম ইষাণ ॥৬॥

35.23

(২) ২২
তদেবাগ্নিস্তদাদিত্যস্তদ্বায়ুস্তদু চন্দ্রমাঃ ।
তদেব শুক্রং তদ্ ব্রহ্ম তদাপঃ তত্প্রজাপতিঃ ॥১॥

35.24

সর্বে নিমেষা জজ্ঞিরে বিদ্যুতঃ পুরুষাদধি ।
নৈনমূর্ধ্বং ন তির্যঞ্চং ন মধ্যে পরি জগ্রভৎ ॥২॥

35.25

ন তস্য প্রতিমা অস্তি যস্য নাম মহদ্যশঃ ।
হিরণ্যগর্ভ ইত্যেষঃ ॥৩॥

35.26

এষো হ দেবঃ প্রদিশোঽনু সর্বাঃ পূর্বো হ জাতঃ স উ গর্ভে অন্তঃ ।
স এব জাতঃ স জনিষ্যমাণঃ প্রত্যঙ্ জনাস্তিষ্ঠতি সর্বতোমুখঃ । যস্মান্ন জাত ইত্যেষঃ ॥৪॥

35.27

বেনস্তত্পশ্যন্নিহিতং গুহা সদ্যত্র বিশ্বং ভবত্যেকনীলম্ ।
তস্মিন্নিদং সং চ বি চৈতি সর্বং স ওতঃ প্রোতশ্চ বিভূঃ প্রজাসু ॥৫॥

35.28

প্র তদ্বোচেদমৃতং নু বিদ্বান্গন্ধর্বো ধাম বিভৃতং গুহা সৎ ।
ত্রীণি পদানি নিহিতা গুহাস্য যস্তানি বেদ স পিতুঃ পিতাসৎ ॥৬॥

35.29

২৮॥
স নো বন্ধুর্জনিতা স বিধাতা ধামানি বেদ ভুবনানি বিশ্বা ।
যত্র দেবা অমৃতমানশানাস্তৃতীয়ে ধামন্নধ্যরয়ন্ত ॥৭॥

35.30

পরীত্য ভূতানি পরীত্য লোকান্পরীত্য সর্বাঃ প্রদিশো দিশশ্চ ।
উপস্থায় প্রথমজামৃতস্যাত্মনাত্মানমভি সং বিবেশ ॥৮॥

35.31

পরি দ্যাবাপৃথিবী সদ্য ইত্বা পরি লোকান্পরি দিশঃ পরি স্বঃ ।
ঋতস্য তন্তুং বিততং বিচৃত্য তদপশ্যত্তদভবত্তদাসীৎ ॥৯॥

35.32

সদসস্পতিমদ্ভুতং প্রিয়মিন্দ্রস্য কাম্যম্ । সনিং মেধাময়াসিষং স্বাহা ॥১০॥

35.33

যাং মেধাং দেবগণাঃ পিতরশ্চোপাসতে । তয়া মামদ্য মেধয়াগ্নে মেধাবিনং কুরু স্বাহা ॥১১॥

35.34

ইদং মে ব্রহ্ম চ ক্ষত্রং চোভে শ্রিয়মশ্নুতাম্ ।
ময়ি দেবা দধতু শ্রিয়মুত্তমাং তস্যৈ তে স্বাহা ॥১২॥

35.35

(৩) ৩৪
অপেতো যন্তু পণয়োঽসুম্না দেবপীয়বঃ । অস্য লোকঃ সুতাবতঃ ॥১॥

35.36

দ্যুভিরহোভিরক্তুভির্ব্যক্তং যমো দদাত্ববসানমস্মৈ ।
সবিতা তে শরীরেভ্যঃ পৃথিব্যাঁ লোকমিচ্ছতু । তস্মৈ যুজ্যন্তামুস্রিয়াঃ ॥২॥

35.37

বায়ুঃ পুনাতু সবিতা পুনাত্বগ্নের্ভ্রাজসা সূর্যস্য বর্চসা । বি মুচ্যন্তামুস্রিয়াঃ ॥৩॥

35.38

অশ্বত্থে বো নিষদনং পর্ণে বো বসতিষ্কৃতা । গোভাজ ইত্কিলাসথ যত্সনবথ পূরুষম্ ॥৪॥

35.39

সবিতা তে শরীরাণি মাতুরুপস্থ আ বপতু । তস্মৈ পৃথিবি শং ভব ।
প্রজাপতৌ ত্বা দেবতায়ামুপোদকে লোকে নি দধাম্যসৌ ॥৫॥

35.40

পরং মৃত্যো অনু পরেহি পন্থাঁ যস্তে অন্য ইতরো দেবয়ানাৎ ।
চক্ষুষ্মতে শৃণ্বতে তে ব্রবীমি মা নঃ প্রজাং রীরিষো মোত বীরান্ ॥৬॥

35.41

শং বাতঃ শং হি তে ঘৃণিঃ শং তে ভবন্ত্বিষ্টকাঃ ।
শং তে ভবন্ত্বগ্নয়ঃ পার্থিবাসো মা ত্বাভি শূশুচন্ ॥৭॥

35.42

কল্পন্তাং তে দিশস্তুভ্যমাপঃ শিবতমাস্তুভ্যং ভবন্তু সিন্ধবঃ ।
অন্তরিক্ষং শিবং তুভ্যং কল্পন্তাং তে দিশঃ সর্বাঃ ॥৮॥

35.43

৪২ (১৯৭২)
অশ্মন্বতী রীয়তে সং রভধ্বমুত্তিষ্ঠত প্র তরতা সখায়ঃ ।
অত্র জহীমোঽশিবা যে অসঞ্ছিবান্বয়মুত্তরেমাভি বাজান্ ॥৯॥

35.44

অপাঘমপ কিল্বিষমপ কৃত্যামপো রপঃ ।
অপামার্গ ত্বমস্মদপ দুঃষ্বপ্ন্যং সুব ॥১০॥

35.45

সুমিত্রিয়া ন আপ ওষধয়ঃ সন্তু দুর্মিত্রিয়াস্তস্মৈ সন্তু ।
যোঽস্মান্দ্বেষ্টি যং চ বয়ং দ্বিষ্মঃ ॥১১॥

35.46

অনড্বাহমন্বারভামহে স্বস্তয়ে ।
স ন ইন্দ্র ইব দেবেভ্যো বহ্নিঃ সংতরণো ভব ॥১২॥

35.47

উদ্বয়ং তমসস্পরি স্বঃ পশ্যন্ত উত্তরম্ ।
দেবং দেবত্রা সূর্যমগন্ম জ্যোতিরুত্তমম্ ॥১৩॥

35.48

অগ্ন আয়ূংষি পবস আ সুবোর্জমিষং চ নঃ ।
আরে বাধস্ব দুচ্ছুনাম্ ॥১৪॥

35.49

আয়ুষ্মানগ্নে হবিষা বৃধানো ঘৃতপ্রতীকো ঘৃতয়োনিরেধি ।
ঘৃতং পীত্বা মধু চারু গব্যং পিতেব পুত্রমভি রক্ষতাদিমান্ত্স্বাহা ॥১৫॥

35.50

ইমং জীবেভ্যঃ পরিধিং দধামি মৈষাং নু গাদপরো অর্থমেতম্ ।
শতং জীবন্তু শরদঃ পুরূচীরন্তর্মৃত্যুং দধতাং পর্বতেন ॥১৬॥

35.51

পরীমে গামনেষত পর্যগ্নিমহৃষত । দেবেষ্বক্রত শ্রবঃ ক ইমাঁ২ আ দধর্ষতি ॥১৭॥

35.52

ক্রব্যাদমগ্নিং প্র হিণোমি দূরং যমরাজ্যং গচ্ছতু রিপ্রবাহঃ ।
ইহৈবায়মিতরো জাতবেদা দেবেভ্যো হব্যং বহতু প্রজানন্ ॥১৮॥

35.53

বহ বপাং জাতবেদঃ পিতৃভ্যো যত্রৈনান্বেত্থ নিহিতান্পরাকে ।
মেদসঃ কুল্যা উপ তান্ত্স্রবন্তু সত্যা এষামাশিষঃ সন্তু কামাঃ স্বাহা ॥১৯॥

35.54

স্যোনা পৃথিবি নো ভবানৃক্ষরা নিবেশনী ।
যচ্ছা নঃ শর্ম সপ্রথাঃ । অপ নঃ শোশুচদধম্ ॥২০॥

35.55

অস্মাত্ত্বমধি জাতোঽসি ত্বদয়ং জায়তাং পুনঃ । অসৌ স্বর্গায় লোকায় স্বাহা ।
অপ নঃ শোশুচদঘম্ ॥২১॥

35.56

(৪) ৫৫ (১৯৮৫)
॥ইতি শুক্লয়জুঃকাণ্বসংহিতায়াং পঞ্চত্রিংশোঽধ্যায়ঃ ॥৩॥