অধ্যায় 34

34.1

অথ চতুস্ত্রিংশোঽধ্যায়ঃ।

দেব সবিতঃ প্রসুব যজ্ঞং প্রসুব যজ্ঞপতিং ভগায় ।
দিব্যো গন্ধর্বঃ কেতুপূঃ কেতং নঃ পুনাতু বাচস্পতির্বাচং নঃ স্বদতু ॥১॥

34.2

তত্সবিতুর্বরেণ্যং ভর্গো দেবস্য ধীমহি । ধিয়ো যো নঃ প্রচোদয়ৎ ॥২॥

34.3

বিশ্বানি দেব সবিতর্দুরিতানি পরা সুব । যদ্ভদ্রং তন্ন আ সুব ॥৩॥

34.4

বিভক্তারং হবামহে বসোশ্চিত্রস্য রাধসঃ । সবিতারং নৃচক্ষসম্ ॥৪॥

34.5

ব্রহ্মণে ব্রাহ্মণং ক্ষত্রায় রাজন্যং মরুদ্ভ্যো বৈশ্যং তপসে শূদ্রং তমসে তস্করং নারকায় বীরহণম্ ।
পাপ্মনে ক্লীবমাক্রয়ায়া অয়োগূং কামায় পুংশ্চলূমতিক্রুষ্টায় মাগধম্ ॥৫॥

34.6

নৃত্তায় সূতং গীতায় শৈলূষং ধর্মায় সভাচরং নরিষ্ঠায়ৈ ভীমলম্ ।
নর্মায় রেভং হসায় কারিমানন্দায় স্ত্রীষখং প্রমদে কুমারীপুত্রং মেধায়ৈ রথকারং ধৈর্যায় তক্ষাণম্ ॥৬॥

34.7

তপসে কৌলালং মায়ায়ৈ কর্মারং রূপায় মণিকারং শুভে বপং শরব্যায়া ইষুকারং হেত্যৈ ধনুষ্কারম্ ।
কর্মণে জ্যাকারং দিষ্টায় রজ্জুসর্জং মৃত্যবে মৃগয়ুমন্তকায় শ্বনিনম্ ॥৭॥

34.8

নদীভ্যঃ পৌঞ্জিষ্ঠমৃক্ষীকাভ্যো নৈষাদং পুরুষব্যাঘ্রায় দুর্মদং গন্ধর্বাপ্সরোভ্যো ব্রাত্যম্ ।
প্রয়ুগ্ভ্য উন্মত্তং সর্পদেবজনেভ্যোঽপ্রতিপদময়েভ্যঃ কিতবমীর্যতায়া অকিতবং পিশাচেভ্যো
বিদলকারীং যাতুধানেভ্যঃ কণ্টকীকারীম্ ॥৮॥

34.9

(১) ৮
সংধয়ে জারং গেহায়োপপতিমার্ত্যৈ পরিবিত্তং নিরৃত্যৈ পরিবিবিদানমরাধ্যা এদিধিষুঃ পতিং
নিষ্কৃত্যৈ পেশস্কারীং সংজ্ঞানায় স্মরকারীম্ । প্রকামোদ্যায়োপসদং বর্ণায়ানুরুধং বলায়োপদাম্ ॥১॥

34.10

উত্সাদেভ্যঃ কুব্জং প্রমুদে বামনং দ্বার্ভ্যঃ স্রামং স্বপ্নায়ান্ধমধর্মায় বধিরং পবিত্রায় ভিষজম্ ।
প্রজ্ঞানায় নক্ষত্রদর্শমাশিক্ষায়ৈ প্রশ্নিনমুপশিক্ষায়া অভিপ্রশ্নিনং মর্যাদায়ৈ প্রশ্নবিবাকম্ ॥২॥

34.11

অর্মেভ্যো হস্তিপং জবায়াশ্বপং পুষ্ট্যৈ গোপালং বীর্যায়াবিপালং তেজসেঽজপালমিরায়ৈ কীনাশম্ ।
কীলালায় সুরাকারং ভদ্রায় গৃহপং শ্রেয়সে বিত্তধমাধ্যক্ষ্যায়ানুক্ষত্তারম্ ॥৩॥

34.12

ভায়ৈ দার্বাহারং প্রভায়া অগ্ন্যেধং ব্রধ্নস্য বিষ্টপায়াভিষেক্তারং বর্ষিষ্ঠায় নাকায় পরিবেষ্টারম্ ।
দেবলোকায় পেশিতারং মনুষ্যলোকায় প্রকরিতারং সর্বেভ্যো লোকেভ্য উপসেক্তারমব ঋত্যৈ
বধায়োপমন্থিতারং মেধায় বাসঃপল্পূলীং প্রকামায় রজয়িত্রীম্ ॥৪॥

34.13

ঋতয়ে স্তেনহৃদয়ং বৈরহত্যায় পিশুনং বিবিক্ত্যৈ ক্ষত্তারমৌপদ্রষ্ট্র্যায়ানুক্ষত্তারং বালায়ানুচরং ভূম্নে পরিষ্কন্দম্ ।
প্রিয়ায় প্রিয়বাদিনমরিষ্ট্যা অশ্বসাদং স্বর্গায় লোকায় ভাগদুঘং বর্ষিষ্ঠায় নাকায় পরিবেষ্টারম্ ॥৫॥

34.14

(২) ১৩
মন্যবেঽয়স্তাপং ক্রোধায় নিসরং যোগায় যোক্তারং শোকায়াভিসর্তারং ক্ষেমায় বিমোক্তারমুত্কূলনিকূলেভ্যস্ত্রিষ্ঠিনম্ ।
বপুষে মানস্কৃতং শীলায়াঞ্জনীকারীং নিরৃত্যৈ কোশকারীং যমায়াসূম্ ॥১॥

34.15

১৪ (১৯২২)
যমায় যমসূমথর্বভ্যোঽবতোকাং সংবত্সরায় পর্যায়িণীং পরিবত্সরায়াবিজাতামিদাবত্সরায়াতীত্বরীমিদ্বত্সরায়াতিষ্কদ্বরীম্ ।
বত্সরায় বিজর্জরাং সংবত্সরায় পলিক্নীমৃভুভ্যোঽজিনসংধং সাধ্যেভ্যশ্চর্মম্নম্ ॥২॥

34.16

সরোভ্যো ধৈবরমুপস্থাবরাভ্যো দাশং বৈশন্তাভ্যো বৈন্দং নড্বলাভ্যঃ শৌষ্কলম্ ।
পারায় মার্গারমবারায় কেবর্তং তীর্থেভ্য আন্দং বিষমেভ্যো মৈনালম্ ।
স্বনেভ্যঃ পর্ণকং গুহাভ্যঃ কিরাতং সানুভ্যো জম্ভকং পর্বতেভ্যঃ কিংপূরুষম্ ॥৩॥

34.17

বীভত্সায়ৈ পৌল্কসং বর্ণায় হিরণ্যকারং তুলায়ৈ বাণিজং পশ্চাদোষায় গ্লাবিনং বিশ্বেভ্যো ভূতেভ্যঃ সিধ্মলম্ ।
ভূত্যৈ জাগরণমভূত্যৈ স্বপনমার্ত্যৈ জনবাদিনং ব্যৃদ্ধ্যা অপগল্ভং সংশরায় প্রচ্ছিদম্ ॥৪॥

34.18

অক্ষরাজায় কিতবং কৃতায়াদিনবদর্শং ত্রেতায়ৈ কল্পিনং দ্বাপরায়াধিকল্পিনমাস্কন্দায়
সভাস্থাণুং মৃত্যবে গোব্যচ্ছমন্তকায় গোঘাতম্ । ক্ষুধে যো গাং বিকৃন্তন্তং ভিক্ষমাণ
উপতিষ্ঠতি দুষ্কৃতায় চরকাচার্যং পাপ্মনে সৈলগম্ ॥৫॥

34.19

(৩) ১৮
প্রতিশ্রুত্কায়া অর্তনং ঘোষায় ভষমন্তায় বহুবাদিনমনন্তায় মূকং শব্দায়ালম্বরাঘাতম্ ।
মহসে বীণাবাদং ক্রোশায় তূণবধ্মমবরস্পরায় শঙ্খধ্মং বনায় বনপমন্যতোঽরণ্যায় দাবপম্ ॥১॥

34.20

নর্মায় পুংশ্চলূং হসায় কারিং যাদসে শাবল্যাং গ্রামণ্যং গণকমভিক্রোশকং তান্মহসে ।
বীণাবাদং পাণিঘ্নং তূণবধ্মং তান্নৃত্তায়ানন্দায় তলবম্ ॥২॥

34.21

অগ্নয়ে পীবানং পৃথিব্যৈ পীঠসর্পিণং বায়বে চাণ্ডালমন্তরিক্ষায় বংশনর্তিনং দিবে খলতিং সূর্যায় হর্যক্ষম্ ।
নক্ষত্রেভ্যঃ কির্মিরং চন্দ্রমসে কিলাসমহ্নে শুক্লং পিঙ্গাক্ষং রাত্র্যৈ কৃষ্ণং পিঙ্গাক্ষম্ ॥৩॥

34.22

অথৈতানষ্টৌ বিরূপানা লভতেঽতিশুক্লং চাতিকৃষ্ণং চাতিদীর্ঘং চাতিহ্রস্বং চ ।
অতিস্থূলং চাতিকৃশং চাতিকুল্বং চাতিলোমশং চাশূদ্রা অব্রাহ্মণাস্তে প্রাজাপত্যাঃ ।
মাগধঃ পুংশ্চলী কিতবঃ ক্লীবঃ কিতবোঽশূদ্রা অব্রাহ্মণাস্তে প্রাজাপত্যাঃ ॥৪॥

34.23

(৪) ২২ (১৯৩০)
॥ইতি শুক্লয়জুঃকাণ্বসংহিতায়াং চতুস্ত্রিংশোঽধ্যায়ঃ ॥৩৪॥