অধ্যায় 14

14.1

অথ চতুর্দশোঽধ্যায়ঃ

ময়ি গৃহ্ণাম্যগ্রে অগ্নিং রায়স্পোষায় সুপ্রজাস্ত্বায় সুবীর্যায় । মামু দেবতাঃ সচন্তাম্ ॥১॥

14.2

অপাং পৃষ্ঠমসি যোনিরগ্নেঃ সমুদ্রমভিতঃ পিন্বমানম্ ।
বর্ধমানো মহাঁ৩ আ চ পুষ্করে দিবো মাত্রয়া বরিম্ণা প্রথস্ব ॥২॥

14.3

ব্রহ্ম জজ্ঞানং প্রথমং পুরস্তাদ্বি সীমতঃ সুরুচো বেন আবঃ ।
স বুধ্ন্যা উপমা অস্য বিষ্ঠাঃ সতশ্চ যোনিমসতশ্চ বিবঃ ॥৩॥

14.4

হিরণ্যগর্ভঃ সমবর্ততাগ্রে ভূতস্য জাতঃ পতিরেক আসীৎ ।
স দাধার পৃথিবীং দ্যামুতেমাং কস্মৈ দেবায় হবিষা বিধেম ॥৪॥

14.5

দ্রপ্সশ্চস্কন্দ পৃথিবীমনু দ্যামিমং চ যোনিমনু যশ্চ পূর্বঃ ।
সমানং যোনিমনু সঞ্চরন্তং দ্রপ্সং জুহোম্যনু সপ্ত হোত্রাঃ ॥৫॥

14.6

নমোঽস্তু সর্পেভ্যো যে কে চ পৃথিবীমনু । যে অন্তরিক্ষে যে দিবি তেভ্যঃ সর্পেভ্যো নমঃ ॥৬॥

14.7

যা ইষবো যাতুধানানাং যে বা বনস্পতীংরনু । যে বাবটেষু শেরতে তেভ্যঃ সর্পেভ্যো নমঃ ॥৭॥

14.8

যে বামী রোচনে দিবো যে বা সূর্যস্য রশ্মিষু । যেষামপ্সু সদস্কৃতং তেভ্যঃ সর্পেভ্যো নমঃ ॥৮॥

14.9

কৃণুষ্ব পাজঃ প্রসিতিং ন পৃথ্বীং যাহি রাজেবামবাঁ৩ ইভেন ।
তৃষ্বীমনু প্রসিতিং দ্রূণানোঽস্তাসি বিধ্য রক্ষসস্তপিষ্ঠৈঃ ॥৯॥

14.10

তব ভ্রমাস আশুয়া পতন্ত্যনু স্পৃশ ধৃষতা শোশুচানঃ ।
তপূংষ্যগ্নে জুহ্বা পতঙ্গানসদিতো বিসৃজ বিষ্বগুল্কাঃ ॥১০॥

14.11

প্রতি স্পশো বিসৃজ তূর্ণিতমো ভবা পায়ুর্বিশো অস্যা অদব্ধঃ ।
যো নো দূরে অঘশংসো যো অন্ত্যগ্নে মা কিষ্টে ব্যথিরাদধর্ষীৎ ॥১১॥

14.12

উদগ্নে তিষ্ঠ প্রত্যাতনুষ্ব ন্যমিত্রাঁ৩ ওষতাত্তিগ্মহেতে ।
যো নো অরাতিং সমিধান চক্রে নীচা তং ধক্ষ্যতসং ন শুষ্কম্ ॥১২॥

14.13

ঊর্ধ্বো ভব প্রতি বিধ্যাধ্যস্মদাবিষ্কৃণুষ্ব দৈব্যান্যগ্নে ।
অব স্থিরা তনুহি যাতুজূনাং জামিমজামিং প্রমৃণীহি শত্রূন্ ॥১৩॥

14.14

অগ্নেষ্ট্বা তেজসা সাদয়ামি ।অগ্নির্মূর্ধা দিবঃ ককুত্পতিঃ পৃথিব্যা অয়ম্ ।
অপাং রেতাংসি জিন্বতি । ইন্দ্রস্য ত্বৌজসা সাদয়ামি ॥১৪॥

14.15

ভুবো যজ্ঞস্য রজসশ্চ নেতা যত্রা নিয়ুদ্ভিঃ সচসে শিবাভিঃ ।
দিবি মূর্ধানং দধিষে স্বর্ষাং জিহ্বামগ্নে চকৃষে হব্যবাহম্ ॥১৫॥

14.16

(১) ১৫ (৭৬৪)
ধ্রুবাসি ধরুণাস্তৃতা বিশ্বকর্মণা ।
মা ত্বা সমুদ্র উদ্বধীন্মা সুপর্ণোব্যথমানাং পৃথিবীং দৃংহ ॥১॥

14.17

প্রজাপতিষ্ট্বা সাদয়ত্বপাং পৃষ্ঠে সমুদ্রস্যেমন্ । ব্যচস্বতীং প্রথস্বতীং প্রথস্ব পৃথিব্যসি ॥২॥

14.18

ভূরসি ভূমিরস্যদিতিরসি বিশ্বধায়া বিশ্বস্য ভুবনস্য ধর্ত্রী ।
পৃথিবীং যচ্ছ পৃথিবীং দৃংহ পৃথিবীং মা হিংসীঃ ॥৩॥

14.19

বিশ্বস্মৈ প্রাণায়াপানায় ব্যানায়োদানায় প্রতিষ্ঠায়ৈ চরিত্রায় ।
অগ্নিষ্ট্বাভিপাতু মহ্যা স্বস্ত্যা ছর্দিষা শংতমেন তয়া দেবতয়াঙ্গিরস্বদ্ ধ্রুবা সীদ ॥৪॥

14.20

কাণ্ডাত্কাণ্ডাত্প্ররোহন্তী পরুষঃ পরুষস্পরি । এবা নো দূর্বে প্র তনু সহস্রেণ শতেন চ ॥৫॥

14.21

যা শতেন প্রতনোষি সহস্রেণ বিরোহসি । তস্যাস্তে দেবীষ্টকে বিধেম হবিষা বয়ম্ ॥৬॥

14.22

যাস্তে অগ্নে সূর্যে রুচো দিবমাতন্বন্তি রশ্মিভিঃ ।
তাভির্নো অদ্য সর্বাভী রুচে জনায় নস্কৃধি ॥৭॥

14.23

যা বো দেবাঃ সূর্যে রুচো গোষ্বশ্বেষু যা রুচঃ ।
ইন্দ্রাগ্নী তাভিঃ সর্বাভী রুচং নো ধত্ত বৃহস্পতে ॥৮॥

14.24

বিরাড্জ্যোতিরধারয়ত্স্বরাড্জ্যোতিরধারয়ৎ ।
প্রজাপতিষ্ট্বা সাদয়তু পৃষ্ঠে পৃথিব্যা জ্যোতিষ্মতীম্ ॥৯॥

14.25

বিশ্বস্মৈ প্রাণায়াপানায় ব্যানায় বিশ্বং জ্যোতির্যচ্ছ ।
অগ্নিষ্টেঽধিপতিস্তয়া দেবতয়াঙ্গিরস্বদ্ ধ্রুবা সীদ ॥১০॥

মধুশ্চ মাধবশ্চ বাসন্তিকা ঋতূ অগ্নেরন্তঃ শ্লেষোঽসি ।
কল্পেতাং দ্যাবাপৃথিবী কল্পন্তামাপ ওষধয়ঃ কল্পন্তামগ্নয়ঃ পৃথঙ্ মম জ্যৈষ্ঠ্যায় সব্রতাঃ ।
যে অগ্নয়ঃ সমনসোঽন্তরা দ্যাবাপৃথিবী ইমে । বাসন্তিকা ঋতূ অভিকল্পমানা ইন্দ্রমিব
দেবা অভিসংবিশন্তু তয়া দেবতয়াঙ্গিরস্বদ্ ধ্রুবে সীদতম্ ॥১১॥

14.27

অষালহাসি সহমানা সহস্বারাতীঃ সহস্ব পৃতনায়তঃ । সহস্রবীর্যাসি সা মা জিন্ব ॥১২॥

14.28

সহস্বেমা অভিমাতীঃ সহস্ব পৃতনায়তঃ । সহস্ব সর্বং পাপ্মানং সহমানাস্যোষধে ॥১৩॥

14.29

(২)২৮
মধু বাতা ঋতায়তে মধু ক্ষরন্তি সিন্ধবঃ । মাধ্বীর্নঃ সন্ত্বোষধীঃ ॥১॥

14.30

মধু নক্তমুতোষসো মধুমত্পার্থিবং রজঃ । মধু দ্যৌরস্তু নঃ পিতা ॥২॥

14.31

মধুমান্নো বনস্পতির্মধুমাঁ৩ অস্তু সূর্যঃ । মাধ্বীর্গাবো ভবন্তু নঃ ॥৩॥

14.32

৩১ (৭৮০)
অপাং গম্ভন্ত্সীদ মা ত্বা সূর্যোঽভিতাপ্সীন্মাগ্নির্বৈশ্বানরঃ ।
অচ্ছিন্নপত্রাঃ প্রজা অনুবীক্ষস্বানু ত্বা দিব্যা বৃষ্টিঃ সচতাম্ ॥৪॥

14.33

৩২॥
ত্রীন্ত্সমুদ্রান্ত্সমসৃপৎ স্বর্গানপাং পতির্বৃষভ ইষ্টকানাম্ ।
পুরীষং বসানঃ সুকৃতস্য লোকে তত্র গচ্ছ যত্র পূর্বে পরেতাঃ ॥৫॥

14.34

মহী দ্যৌঃ পৃথিবী চ ন ইমং যজ্ঞং মিমিক্ষতাম্ । পিপৃতাং নো ভরীমভিঃ ॥৬॥

14.35

বিষ্ণোঃ কর্মাণি পশ্যত যতো ব্রতানি পস্পশে । ইন্দ্রস্য যুজ্যঃ সখা ॥৭॥

14.36

ধ্রুবাসি ধরুণেতো জজ্ঞে প্রথমমেভ্যো যোনিভ্যো অধি জাতবেদাঃ ।
স গায়ত্র্যা ত্রিষ্টুভানুষ্টুভা চ দেবেভ্যো হব্যং বহতু প্রজানন্ ॥৮॥

14.37

ইষে রায়ে রমস্ব সহসে দ্যুম্ন ঊর্জে অপত্যায় ।
সম্রালসি স্বরালসি সারস্বতৌ ত্বোত্সৌ প্রাবতাম্ ॥৯॥

14.38

অগ্নে যুক্ষ্বা হি যে তবাশ্বাসো দেব সাধবঃ । অরং বহন্তি মন্যবে ॥১০॥

14.39

যুক্ষ্বা হি দেবহূতমাঁ৩ অশ্বাঁ৩ অগ্নে রথীরিব । নি হোতা পূর্ব্যঃ সদঃ ॥১১॥

14.40

(৩) ৩৯
সম্যক্ স্রবন্তি সরিতো ন ধেনা অন্তর্হৃদা মনসা পূয়মানাঃ ।
ঘৃতস্য ধারা অভি চাকশীমি হিরণ্যয়ো বেতসো মধ্যে অগ্নেঃ ॥১॥

14.41

ঋচে ত্বা রুচে ত্বা ভাসে ত্বা জ্যোতিষে ত্বা ।
অভূদিদং বিশ্বস্য ভুবনস্য বাজিনমগ্নের্বৈশ্বানরস্য চ ॥২॥

14.42

অগ্নির্জ্যোতিষা জ্যোতিষ্মান্ রুক্মো বর্চসা বর্চস্বান্ । সহস্রদা অসি সহস্রায় ত্বা ॥৩॥

14.43

আদিত্যং গর্ভং পয়সা সমঙ্ধি সহস্রস্য প্রতিমাং বিশ্বরূপম্ ।
পরি বৃঙ্ধি হরসা মাভিমংস্থাঃ শতায়ুষং কৃণুহি চীয়মানঃ ॥৪॥

14.44

বাতস্য জূতিং বরুণস্য নাভিমশ্বং জজ্ঞানং সরিরস্য মধ্যে ।
শিশুং নদীনাং হরিমদ্রিবুধ্নমগ্নে মা হিংসীঃ পরমে ব্যোমন্ ॥৫॥

14.45

অজস্রমিন্দুমরুষং ভুরণ্যুমগ্নিমীলে পূর্বচিত্তিং নমোভিঃ ।
স পর্বভিরৃতুশঃ কল্পমানো গাং মা হিংসীরদিতিং বিরাজম্ ॥৬॥

14.46

বরূত্রীং ত্বষ্টুর্বরুণস্য নাভিমবিং জজ্ঞানাং রজসঃ পরস্মাৎ ।
মহীং সাহস্রীমসুরস্য মায়ামগ্নে মা হিংসীঃ পরমে ব্যোমন্ ॥৭॥

14.47

যো অগ্নিরগ্নেরধ্যজায়ত শোকাত্পৃথিব্যা উত বা দিবস্পরি ।
যেন প্রজা বিশ্বকর্মা জজান তমগ্নে হেলঃ পরি তে বৃণক্তু ॥৮॥

14.48

৮৭ (৭৯৬)
চিত্রং দেবানামুদগাদনীকং চক্ষুর্মিত্রস্য বরুণস্যাগ্নেঃ ।
আপ্রা দ্যাবাপৃথিবী অন্তরিক্ষং সূর্য আত্মা জগতস্তস্থুষশ্চ ॥৯॥

14.49

(৪) ৪৮
ইমং মা হিংসীর্দ্বিপাদং পশুং সহস্রাক্ষ মেধায় চীয়মানঃ ।
ময়ুং পশুং মেধমগ্নে জুষস্ব তেন চিন্বানস্তন্বো নিষীদ ।
ময়ুং তে শুগৃচ্ছতু যং দ্বিষ্মস্তং তে শুগৃচ্ছতু ॥১॥

14.50

ইমং মা হিংসীরেকশফং পশুং কনিক্রদং বাজিনং বাজিনেষু ।
গৌরমারণ্যমনু তে দিশামি তেন চিন্বানস্তন্বো নিষীদ ।
গৌরং তে শুগৃচ্ছতু যং দ্বিষ্মস্তং তে শুগৃচ্ছতু ॥২॥

14.51

ইমং সাহস্রং শতধারমুত্সং ব্যচ্যমানং সরিরস্য মধ্যে ।
ঘৃতং দুহানামদিতিং জনায়াগ্নে মা হিংসীঃ পরমে ব্যোমন্ ।
গবয়মারণ্যমনু তে দিশামি তেন চিন্বানস্তন্বো নিষীদ ।
গবয়ং তে শুগৃচ্ছতু যং দ্বিষ্মস্তং তে শুগৃচ্ছতু ॥৩॥

14.52

ইমমূর্ণায়ুং বরুণস্য নাভিং ত্বচং পশূনাং দ্বিপদাং চতুষ্পদাম্ ।
ত্বষ্টুঃ প্রজানাং প্রথমং জনিত্রমগ্নে মা হিংসীঃ পরমে ব্যোমন্ ।
উষ্ট্রমারণ্যমনু তে দিশামি তেন চিন্বানস্তন্বো নিষীদ ।
উষ্ট্রং তে শুগৃচ্ছতু যং দ্বিষ্মস্তং তে শুগৃচ্ছতু ॥৪॥

14.53

অজো হ্যগ্নেরজনিষ্ট শোকাত্সো অপশ্যজ্জনিতারমগ্রে ।
তেন দেবা দেবতামগ্রমায়ংস্তেন রোহমায়ন্নুপ মেধ্যাসঃ ।
শরভমারণ্যমনু তে দিশামি তেন চিন্বানস্তন্বো নিষীদ ।
শরভং তে শুগৃচ্ছতু যং দ্বিষ্মস্তং তে শুগৃচ্ছতু ॥৫॥

14.54

ত্বং যবিষ্ঠ দাশুষো নৄং পাহি শৃণুধী গিরঃ । রক্ষা তোকমুত ত্মনা ॥৬॥

14.55

(৫) ৫৪ (৮০৩)
অপাং ত্বেমন্ত্সাদয়াম্যপাং ত্বোদ্মন্ত্সাদয়াম্যপাং ত্বা ভস্মন্ত্সাদয়ামি ।
অপাং ত্বা জ্যোতিষি সাদয়াম্যপাং ত্বায়নে সাদয়ামি ।
অর্ণবে ত্বা সদনে সাদয়ামি সমুদ্রে ত্বা সদনে সাদয়ামি সরিরে ত্বা সদনে সাদয়ামি ।
অপাং ত্বা ক্ষয়ে সাদয়াম্যপাং ত্বা সধিষি সাদয়ামি ।
অপাং ত্বা সদনে সাদয়াম্যপাং ত্বা সধস্থে সাদয়াম্যপাং ত্বা যোনৌ সাদয়ামি ।
অপাং ত্বা পুরীষে সাদয়াম্যপাং ত্বা পাথসি সাদয়ামি ।
গায়ত্রেণ ত্বা ছন্দসা সাদয়ামি ত্রৈষ্টুভেন ত্বা ছন্দসা সাদয়ামি জাগতেন ত্বা ছন্দসা সাদয়ামি ।
আনুষ্টুভেন ত্বা ছন্দসা সাদয়ামি পাঙ্ক্তেন ত্বা ছন্দসা সাদয়ামি ॥১॥