Utshovসর্গ 99
99.1
রজন্যাং তু প্রভাতায়াং সমানীয় মহামুনীন্ ।
গীয়তামবিশঙ্কাভ্যাং রামঃ পুত্রাবুবাচ হ ।। ৭.৯৯.১ ॥
99.2
ততঃ সমুপবিষ্টেষু ব্রহ্মর্ষিষু মহাত্মসু ।
ভবিষ্যদুত্তরং কাব্যং জগতুস্তৌ কুশীলবৌ ।। ৭.৯৯.২ ॥
99.3
প্রবিষ্টায়াং তু সীতায়াং ভূতলং সত্যসম্পদা ।
তস্যাবসানে যজ্ঞস্য রামঃ পরমদুর্মনাঃ ।। ৭.৯৯.৩ ॥
99.4
অপশ্যমানো বৈদেহীং মেনে শূন্যমিদং জগৎ ।
শোকেন পরমায়স্তো ন শান্তিং মনসা ঽগমৎ ।। ৭.৯৯.৪ ॥
99.5
বিসৃজ্য পার্থিবান্সর্বানৃক্ষবানররাক্ষসান্ ।
জনৌঘং বিপ্রমুখ্যানাং বিত্তপূর্বং বিসৃজ্য চ ।। ৭.৯৯.৫ ॥
99.6
এবং সমাপ্য যজ্ঞং তু বিধিবত্স তু রাঘবঃ ।
ততো বিসৃজ্য তান্সর্বান্রামো রাজীবলোচনঃ ।। ৭.৯৯.৬ ॥
99.7
হৃদি কৃত্বা তদা সীতাময়োধ্যাং প্রবিবেশ হ ।
ইষ্টয়জ্ঞো নরপতিঃ পুত্রদ্বয়সমন্বিতঃ ।। ৭.৯৯.৭ ॥
99.8
ন সীতায়াঃ পরাং ভার্যাং বব্রে স রঘুনন্দনঃ ।
যজ্ঞে যজ্ঞে চ পত্ন্যর্থং জানকী কাঞ্চনী ভবৎ ।। ৭.৯৯.৮ ॥
99.9
দশবর্ষসহস্রাণি বাজিমেঘানথাকরোৎ ।
বাজপেয়ান্দশগুণাংস্তথা বহুসুবর্ণকান্ ।। ৭.৯৯.৯ ॥
99.10
অগ্নিষ্টোমাতিরাত্রাভ্যাং গোসবৈশ্চ মহাধনৈঃ ।
ঈজে ক্রতুভিরন্যৈশ্চ স শ্রীমানাপ্তদক্ষিণৈঃ ।। ৭.৯৯.১০ ॥
99.11
এবং স কালঃ সুমহান্রাজ্যস্থস্য মহাত্মনঃ ।
ধর্মে প্রয়তমানস্য ব্যতীয়াদ্রাঘবস্য তু ।। ৭.৯৯.১১ ॥
99.12
অনুরঞ্জন্তি রাজানমহন্যহনি রাঘবম্ ।
ঋক্ষবানররক্ষাংসি স্থিতা রামস্য শাসনে ।। ৭.৯৯.১২ ॥
99.13
কালে বর্ষতি পর্জন্যঃ সুভিক্ষং বিমলা দিশঃ ।
হৃষ্টপুষ্টজনাকীর্ণং পুরং জনপদাস্তথা ।। ৭.৯৯.১৩ ॥
99.14
নাকালে ম্রিয়তে কশ্চিন্ন ব্যাধিঃ প্রাণিনাং তথা ।
নানর্থো বিদ্যতে কশ্চিদ্রামে রাজ্যং প্রশাসতি ।। ৭.৯৯.১৪ ॥
99.15
অথ দীর্ঘস্য কালস্য রামমাতা যশস্বিনী ।
পুত্রপৌত্রৈঃ পরিবৃতা কালধর্মমুপাগমৎ ।। ৭.৯৯.১৫ ॥
99.16
অন্বিয়ায় সুমিত্রা চ কৈকেয়ী চ যশস্বিনী ।
ধর্মং কৃত্বা বহুবিধং ত্রিদিবে পর্যবস্থিতা ।। ৭.৯৯.১৬ ॥
99.17
সর্বাঃ প্রমুদিতাঃ স্বর্গে রাজ্ঞা দশরথেন চ ।
সমাগতা মহাভাগাঃ সর্বধর্মং চ লেভিরে ।। ৭.৯৯.১৭ ॥
99.18
তাসাং রামো মহাদানং কালে কালে প্রয়চ্ছতি ।
মাতঽণামবিশেষেণ ব্রাহ্মণেষু তপস্বিষু ।। ৭.৯৯.১৮ ॥
99.19
পিত্র্যাণি ব্রহ্মরত্নানি যজ্ঞান্পরমদুস্তরান্ ।
চকার রামো ধর্মাত্মা পিতঽন্দেবান্বিবর্ধয়ন্ ।। ৭.৯৯.১৯ ॥
99.20
এবং বর্ষসহস্রাণি বহূন্যথ যয়ুঃ সুখম্ ।
যজ্ঞৈর্বহুবিধং ধর্মং বর্ধয়ানস্য সর্বদা ।। ৭.৯৯.২০ ।।