Utshovসর্গ 98
98.1
রসাতলং প্রবিষ্টায়াং বৈদেহ্যাং সর্ববানরাঃ ।
চুক্রুশুঃ সাধু সাধ্বীতি মুনয়ো রামসন্নিধৌ ।। ৭.৯৮.১ ॥
98.2
দণ্ডকাষ্ঠমবষ্টভ্য বাষ্পব্যাকুলিতেক্ষণঃ ।
অবাক্ছিরা দীনমনা রামো হ্যাসীত্সুদুঃখিতঃ ।। ৭.৯৮.২ ॥
98.3
স রুদিত্বা চিরং কালং বহুশো বাষ্পমুত্সৃজন্ ।
ক্রোধশোকসমাবিষ্টো রামো বচনমব্রবীৎ ।। ৭.৯৮.৩ ॥
98.4
অভূতপূর্বং শোকং মে মনঃ স্প্রষ্টুমিবেচ্ছতি ।
পশ্যতো মে যথা নষ্টা সীতা শ্রীরিব রূপিণী ।। ৭.৯৮.৪ ॥
98.5
সা ঽদর্শনং পুরা সীতা লঙ্কাপারে মহোদধেঃ ।
ততশ্চাপি ময়ানীতা কিং পুনর্বসুধাতলাৎ ।। ৭.৯৮.৫ ॥
98.6
বসুধে দেবি ভবতি সীতা নির্যাত্যতাং মম ।
দর্শয়িষ্যামি বা রোষং যথা মামবগচ্ছসি ।। ৭.৯৮.৬ ॥
98.7
কামং শ্বশ্রূর্মমৈব ত্বং ত্বত্সকাশাদ্ধি মৈথিলী ।
কর্ষতা হলহস্তেন জনকেনোদ্ধৃতা পুরা ।। ৭.৯৮.৭ ॥
98.8
তস্মান্নির্যাত্যতাং সীতা বিবরং বা প্রয়চ্ছ মে ।
পাতালে নাকপৃষ্ঠে বা বসেয়ং সহিতস্তয়া ।। ৭.৯৮.৮ ॥
98.9
আনয় ত্বং হি তাং সীতাং মত্তো ঽহং মৈথিলীকৃতে ।
ন মে দাস্যসি চেত্সীতাং যথারূপাং মহীতলে ।। ৭.৯৮.৯ ॥
98.10
সপর্বতবনাং কৃত্স্নাং বিধমিষ্যামি তে স্থিতম্ ।
নাশয়িষ্যাম্যহং ভূমিং সর্বমাপো ভবত্বিহ ।। ৭.৯৮.১০ ॥
98.11
এবং ব্রুবাণে কাকুত্স্থে ক্রোধশোকসমন্বিতে ।
ব্রহ্মা সুরগণৈঃ সার্ধমুবাচ রঘুনন্দনম্ ।। ৭.৯৮.১১ ॥
98.12
রাম রাম ন সন্তাপং কর্তুমর্হসি সুব্রত ।
স্মর ত্বং পূর্বকং ভাবং মন্ত্রং চামিত্রকর্শন ।। ৭.৯৮.১২ ॥
98.13
ন খলু ত্বাং মহাবাহো স্মারয়েয়মনুত্তমম্ ।
ইমং মুহূর্তং দুর্ধর্ষ স্মর ত্বং জন্ম বৈষ্ণবম্ ।। ৭.৯৮.১৩ ॥
98.14
সীতা হি বিমলা সাধ্বী তব পূর্বপরায়ণা ।
নাগলোকং সুখং প্রায়াত্ত্বদাশ্রয়তপোবলাৎ ।। ৭.৯৮.১৪ ॥
98.15
স্বর্গে তে সঙ্গমো ভূয়ো ভবিষ্যতি ন সংশয়ঃ ।
অস্যাস্তু পরিষন্মধ্যে যদ্ব্রবীমি নিবোধ তৎ ।। ৭.৯৮.১৫ ॥
98.16
এতদেব হি কাব্যং তে কাব্যানামুত্তমং শ্রুতম্ ।
সর্বং বিস্তরতো রাম ব্যাখ্যাস্যতি ন সংশয়ঃ ।। ৭.৯৮.১৬ ॥
98.17
জন্মপ্রভৃতি তে বীর সুখদুঃখোপসেবনম্ ।
ভবিষ্যদুত্তরং চেহ সর্বং বাল্মীকিনা কৃতম্ ।। ৭.৯৮.১৭ ॥
98.18
আদিকাব্যমিদং রাম ত্বয়ি সর্বং প্রতিষ্ঠিতম্ ।
নহ্যন্যো ঽর্হতি কাব্যানাং যশোভাগ্রাঘবাদৃতে ।। ৭.৯৮.১৮ ॥
98.19
শ্রুতং তে পূর্বমেতদ্ধি ময়া সর্বং সুরৈঃ সহ ।
দিব্যমদ্ভুতরূপং চ সত্যবাক্যমনাবৃতম্ ।। ৭.৯৮.১৯ ॥
98.20
স ত্বং পুরুষশার্দূল ধর্মেণ সুসমাহিতঃ ।
শেষং ভবিষ্যং কাকুত্স্থ কাব্যং রামায়ণং শৃণু ।। ৭.৯৮.২০ ॥
98.21
উত্তরং নাম কাব্যস্য শেষমত্র মহায়শঃ ।
তচ্ছৃণুষ্ব মহাতেজ ঋষিভিঃ সার্ধমুত্তমম্ ।। ৭.৯৮.২১ ॥
98.22
ন খল্বন্যেন কাকুত্স্থ শ্রোতব্যমিদমুত্তমম্ ।
পরমম্ ঋষিণা বীর ত্বয়ৈব রঘুনন্দন ।। ৭.৯৮.২২ ॥
98.23
এতাবদুক্ত্বা বচনং ব্রহ্মা ত্রিভুবনেশ্বরঃ ।
জগাম ত্রিদিবং দেবো দেবৈঃ সহ সবান্ধবৈঃ ।। ৭.৯৮.২৩ ॥
98.24
যে চ তত্র মহাত্মান ঋষয়ো ব্রাহ্মলৌকিকাঃ ।
ব্রহ্মণা সমনুজ্ঞাতা ন্যবর্তন্ত মহৌজসঃ ।উত্তরং শ্রোতুমনসো ভবিষ্যং যচ্চ রাঘবে ।। ৭.৯৮.২৪ ॥
98.25
ততো রামঃ শুভাং বাণীং দেবদেবস্য ভাষিতাম্ ।
শ্রুত্বা পরমতেজস্বী বাল্মীকিমিদমব্রবীৎ ।। ৭.৯৮.২৫ ॥
98.26
ভগবন্ শ্রোতুমনস ঋষয়ো ব্রাহ্মলৌকিকাঃ ।
ভবিষ্যদুত্তরং যন্মে শ্বোভূতে সম্প্রবর্ততাম্ ।। ৭.৯৮.২৬ ॥
98.27
এবং বিনিশ্চয়ং কৃত্বা সম্প্রগৃহ্য কুশীলবৌ ।
তং জনৌঘং বিসৃজ্যাথ পর্ণশালামুপাগমৎ ।তামেব শোচতঃ সীতাং সা ব্যতীয়ায় শর্বরী ।। ৭.৯৮.২৭ ।।