Utshovসর্গ 97
97.1
বাল্মীকিনৈবমুক্তস্তু রাঘবঃ প্রত্যভাষত ।
প্রাঞ্জলির্জগতো মধ্যে দৃষ্ট্বা তাং বরবর্ণিনীম্ ।। ৭.৯৭.১ ॥
97.2
এবমেতন্মহাভাগ যথা বদসি ধর্মবিৎ ।
প্রত্যয়স্তু মম ব্রহ্মংস্তব বাক্যৈরকল্মষৈঃ ।। ৭.৯৭.২ ॥
97.3
প্রত্যয়স্তু পুরা বৃত্তো বৈদেহ্যাঃ সুরসন্নিধৌ ।
শপথস্তু কৃতস্তত্র তেন বেশ্ম প্রবেশিতা ।লোকাপবাদো বলবান্যেন ত্যক্তা হি মৈথিলী ।। ৭.৯৭.৩ ॥
97.4
সেয়ং লোকভয়াদ্ব্রহ্মন্নপাপেত্যভিজানতা ।
পরিত্যক্তা ময়া সীতা তদ্ভাবন্ক্ষন্তুমর্হতি ।। ৭.৯৭.৪ ॥
97.5
জানামি চেমৌ পুত্রৌ মে যমজাতৌ কুশীলবৌ ।
শুদ্ধায়াং জগতো মধ্যে মৈথিল্যাং প্রীতিরস্তু মে ।। ৭.৯৭.৫ ॥
97.6
অভিপ্রায়ং তু বিজ্ঞায় রামস্য সুরসত্তমাঃ ।
সীতায়াঃ শপথে তস্মিন্ মহেন্দ্রাদ্যা মহৌজসঃ ।। ৭.৯৭.৬ ॥
97.7
পিতামহং পুরস্কৃত্য সর্ব এব সমাগতাঃ ।
। ৭.৯৭.৭ ॥
97.8
আদিত্যা বসবো রুদ্রা হ্যশ্বিনৌ সমরুদ্গণাঃ ।
গন্ধর্বাপ্সরসশ্চৈব সর্ব এব সমাগতাঃ ।। ৭.৯৭.৮ ॥
97.9
সাধ্যাশ্চ বিশ্বেদেবাশ্চ সর্বে চ পরমর্ষয়ঃ ।
নাগাঃ সুপর্ণাঃ সিদ্ধাশ্চ তে সর্বে হৃষ্টমানসাঃ ।সীতাশপথসম্ভ্রান্তাঃ সর্ব এব সমাগতাঃ ।। ৭.৯৭.৯ ॥
97.10
দৃষ্ট্বা দেবানৃষীংশ্চৈব রাঘবঃ পুনরব্রবীৎ ।
প্রত্যয়ো মে নরশ্রেষ্ঠা ঋষিবাক্যৈরকল্মষৈঃ ।। ৭.৯৭.১০ ॥
97.11
শুদ্ধায়াং জগতো মধ্যে বৈদেহ্যাং প্রীতিরস্তু মে ।
। ৭.৯৭.১১ ॥
97.12
ততো বায়ুঃ শুভঃ পুণ্যো দিব্যগন্ধো মনোরমঃ ।
তজ্জনৌঘং সুরশ্রেষ্ঠো হ্লাদয়ামাস সর্বতঃ ।। ৭.৯৭.১২ ॥
97.13
তদদ্ভুতমিবাচিন্ত্যং নিরৈক্ষন্ত সমাগতাঃ ।
মানবাঃ সর্বরাষ্ট্রেভ্যঃ পূর্বং কৃতয়ুগে যথা ।। ৭.৯৭.১৩ ॥
97.14
সর্বান্সমাগতান্দৃষ্ট্বা সীতা কাষায়বাসিনী ।
অব্রবীত্প্রাঞ্জলির্বাক্যমধোদৃষ্টিরবাঙ্মুখী ।। ৭.৯৭.১৪ ॥
97.15
যথা ঽহং রাঘবাদন্যং মনসাপি ন চিন্তয়ে ।
তথা মে মাধবী দেবী বিবরং দাতুমর্হতি ।। ৭.৯৭.১৫ ॥
97.16
মনসা কর্মণা বাচা যথা রামং সমর্চয়ে ।
তথা মে মাধবী দেবী বিবরং দাতুমর্হতি ।। ৭.৯৭.১৬ ॥
97.17
যথৈতত্সত্যমুক্তং মে বেদ্মি রামাত্পরং ন চ ।
তথা মে মাধবী দেবী বিবরং দাতুমর্হতি ।। ৭.৯৭.১৭ ॥
97.18
তথা শপন্ত্যাং বৈদেহ্যাং প্রাদুরাসীত্তদদ্ভুতম্ ।
ভূতলাদুত্থিতং দিব্যং সিংহাসনমনুত্তমম্ ।। ৭.৯৭.১৮ ॥
97.19
ধ্রিয়মাণং শিরোভিস্তু নাগৈরমিতবিক্রমৈঃ ।
দিব্যং দিব্যেন বপুষা দিব্যরত্নবিভূষিতৈঃ ।। ৭.৯৭.১৯ ॥
97.20
তস্মিংস্তু ধরণী দেবী বাহুভ্যাং গৃহ্য মৈথিলীম্ ।
স্বাগতেনাভিনন্দ্যৈনামাসনে চোপবেশয়ৎ ।। ৭.৯৭.২০ ॥
97.21
তামাসনগতাং দৃষ্ট্বা প্রবিশন্তীং রসাতলম্ ।
পুষ্পবৃষ্টিরবিচ্ছিন্না দিব্যা সীতামবাকিরৎ ।। ৭.৯৭.২১ ॥
97.22
সাধুকারশ্চ সুমহান্দেবানাং সহসোত্থিতঃ ।
সাধু সাধ্বিতি বৈ সীতে যস্যাস্তে শীলমীদৃশম্ ।। ৭.৯৭.২২ ॥
97.23
এবং বহুবিধা বাচো হ্যন্তরিক্ষগতাঃ সুরাঃ ।
ব্যাজহ্রুর্হৃষ্টমনসো দৃষ্ট্বা সীতাপ্রবেশনম্ ।। ৭.৯৭.২৩ ॥
97.24
যজ্ঞবাটগতাশ্চাপি মুনয়ঃ সর্ব এব তে ।
রাজানশ্চ নরব্যাঘ্রা বিস্ময়ান্নোপরেমিরে ।। ৭.৯৭.২৪ ॥
97.25
অন্তরিক্ষে চ ভূমৌ চ সর্বে স্থাবরজঙ্গমাঃ ।
দানবাশ্চ মহাকায়াঃ পাতালে পন্নগাধিপাঃ ।। ৭.৯৭.২৫ ॥
97.26
কেচিদ্বিনেদুঃ সংহৃষ্টাঃ কেচিদ্ধ্যানপরায়ণাঃ ।
কেচিদ্রামং নিরীক্ষন্তে কেচিত্সীতামচেতনাঃ ।। ৭.৯৭.২৬ ॥
97.27
সীতাপ্রবেশনং দৃষ্ট্বা তেষামাসীত্সমাগমঃ ।
তন্মুহূর্তমিবাত্যর্থং সমং সম্মোহিতং জগৎ ।। ৭.৯৭.২৭ ।।