Utshovসর্গ 96
96.1
তস্যাং রজন্যাং ব্যুষ্টায়াং যজ্ঞবাটগতো নৃপঃ ।
ঋষীন্সর্বান্মহাতেজাঃ শব্দাপয়তি রাঘবঃ ।। ৭.৯৬.১ ॥
96.2
বসিষ্ঠো বামদেবশ্চ জাবালিরথ কাশ্যপঃ ।
বিশ্বামিত্রো দীর্ঘতপা দুর্বাসাশ্চ মহাতপাঃ ।। ৭.৯৬.২ ॥
96.3
পুলস্ত্যো ঽপি তথা শক্তির্ভার্গবশ্চৈব বামনঃ ।
মার্কণ্ডেয়শ্চ দীর্ঘায়ুর্মৌদ্গল্যশ্চ মহায়শাঃ ।। ৭.৯৬.৩ ॥
96.4
গর্গশ্চ চ্যবনশ্চৈব শতানন্দশ্চ ধর্মবিৎ ।
ভরদ্বাজশ্চ তেজস্বী হ্যগ্নিপুত্রশ্চ সুপ্রভঃ ।। ৭.৯৬.৪ ॥
96.5
নারদঃ পর্বতশ্চৈব গৌতমশ্চ মহায়শাঃ ।
কাত্যায়নঃ সুয়জ্ঞশ্চ হ্যগস্ত্যস্তপসাং নিধিঃ ।। ৭.৯৬.৫ ॥
96.6
এতে চান্যে চ বহবো মুনয়ঃ সংশিতব্রতাঃ ।
কৌতূহলসমাবিষ্টাঃ সর্ব এব সমাগতাঃ ।। ৭.৯৬.৬ ॥
96.7
রাক্ষসাশ্চ মহাবীর্যা বানরাশ্চ মহাবলাঃ ।
সর্ব এব সমাজগ্মুর্মহাত্মানঃ কুতূহলাৎ ।। ৭.৯৬.৭ ॥
96.8
ক্ষত্রিয়া যে চ শূদ্রাশ্চ বৈশ্যাশ্চৈব সহস্রশঃ ।
নানাদেশগতাশ্চৈব ব্রাহ্মণাঃ সংশিতব্রতাঃ ।। ৭.৯৬.৮ ॥
96.9
জ্ঞাননিষ্ঠাঃ কর্মনিষ্ঠাঃ যোগনিষ্ঠাস্তথাপরে ।
সীতাশপথবীক্ষার্থং সর্ব এব সমাগতাঃ ।। ৭.৯৬.৯ ॥
96.10
তদা সমাগতং সর্বমশ্মভূতমিবাচলম্ ।
শ্রুত্বা মুনিবরস্তূর্ণং সসীতঃ সমুপাগমৎ ।। ৭.৯৬.১০ ॥
96.11
তমৃষিং পৃষ্ঠতঃ সীতা ত্বন্বগচ্ছদবাঙ্মুখী ।
কৃতাঞ্জলির্বাষ্পগলা কৃত্বা রামং মনোগতম্ ।। ৭.৯৬.১১ ॥
96.12
দৃষ্ট্বা শ্রুতিমিবায়ান্তীং ব্রহ্মাণমনুগামিনীম্ ।
বাল্মীকেঃ পৃষ্ঠতঃ সীতাং সাধুবাদো মহানভূৎ ।। ৭.৯৬.১২ ॥
96.13
ততো হলহলাশব্দঃ সর্বেষামেবমাবভৌ ।
দুঃখজন্মবিশালেন শোকেনাকুলিতাত্মনাম্ ।। ৭.৯৬.১৩ ॥
96.14
সাধু রামেতি কেচিত্তু সাধু সীতেতি চাপরে ।
উভাবেব চ তত্রান্যে প্রেক্ষকাঃ সম্প্রচুক্রুশুঃ ।। ৭.৯৬.১৪ ॥
96.15
ততো মধ্যে জনৌঘস্য প্রবিশ্য মুনিপুঙ্গবঃ ।
সীতাসহায়ো বাল্মীকিরিতি হোবাচ রাঘবম্ ।। ৭.৯৬.১৫ ॥
96.16
ইয়ং দাশরথে সীতা সুব্রতা ধর্মচারিণী ।
অপবাদৈঃ পরিত্যক্তা মমাশ্রমসমীপতঃ ।। ৭.৯৬.১৬ ॥
96.17
লোকাপবাদভীতস্য তব রাম মহাব্রত ।
প্রত্যয়ং দাস্যতে সীতা তদনুজ্ঞাতুমর্হসি ।। ৭.৯৬.১৭ ॥
96.18
ইমৌ তু জানকীপুত্রাবুভৌ চ যমজাতকৌ ।
সুতৌ তবৈব দুর্ধর্ষৌ সত্যমেতদ্ব্রবীমি তে ।। ৭.৯৬.১৮ ॥
96.19
প্রচেতসো ঽহং দশমঃ পুত্রো রাঘবনন্দন ।
ন স্মরাম্যনৃতং বাক্যমিমৌ তু তব পুত্রকৌ ।। ৭.৯৬.১৯ ॥
96.20
বহুবর্ষসহস্রাণি তপশ্চর্যা ময়া কৃতা ।
নোপাশ্নীয়াং ফলং তস্যা দুষ্টেয়ং যদি মৈথিলী ।। ৭.৯৬.২০ ॥
96.21
মনসা কর্মণা বাচা ভূতপূর্বং ন কিল্বিষম্ ।
তস্যাঃ ফলমুপাশ্নীয়ামপাপা মৈথিলী যদি ।। ৭.৯৬.২১ ॥
96.22
অহং পঞ্চসু ভূতেষু মনষ্ষষ্ঠেষু রাঘব ।
বিচিন্ত্য সীতাং শুদ্ধেতি জগ্রাহ বননির্ঝরে ।। ৭.৯৬.২২ ॥
96.23
ইয়ং শুদ্ধসমাচারা অপাপা পতিদেবতা ।
লোকাপবাদভীতস্য প্রত্যয়ং তব দাস্যতি ।। ৭.৯৬.২৩ ॥
96.24
তস্মাদিয়ং নরবরাত্মজ শুদ্ধভাবা দিব্যেন দৃষ্টিবিষয়েণ তদা প্রবিষ্টা ।
লোকাপবাদকলুষীকৃতচেতসা যা ত্যক্তা ত্বয়া প্রিয়তমা বিদিতা ঽপি শুদ্ধা ।। ৭.৯৬.২৪ ।।