UtshovSarga 96
96.1
तस्यां रजन्यां व्युष्टायां यज्ञवाटगतो नृपः ।
ऋषीन्सर्वान्महातेजाः शब्दापयति राघवः ।। ७.९६.१ ॥
Tasyam rajanyam vyushtayam yagyavatagato nripah
Rishinsarvanmahatejah shabdapayati raghavah
96.2
वसिष्ठो वामदेवश्च जाबालिरथ काश्यपः ।
विश्वामित्रो दीर्घतपा दुर्वासाश्च महातपाः ।। ७.९६.२ ॥
Vasishtho vamadevashcha jabaliratha kashyapah
Vishvamitro dirghatapa durvasashcha mahatapah
96.3
पुलस्त्यो ऽपि तथा शक्तिर्भार्गवश्चैव वामनः ।
मार्कण्डेयश्च दीर्घायुर्मौद्गल्यश्च महायशाः ।। ७.९६.३ ॥
Pulastyo pi tatha shaktirbhargavashchaiva vamanah
Markandeyashcha dirghayurmaudgalyashcha mahayashah
96.4
गर्गश्च च्यवनश्चैव शतानन्दश्च धर्मवित् ।
भरद्वाजश्च तेजस्वी ह्यग्निपुत्रश्च सुप्रभः ।। ७.९६.४ ॥
Gargashcha chyavanashchaiva shatanandashcha dharmavit
Bharadvajashcha tejasvi hyagniputrashcha suprabhah
96.5
नारदः पर्वतश्चैव गौतमश्च महायशाः ।
कात्यायनः सुयज्ञश्च ह्यगस्त्यस्तपसां निधिः ।। ७.९६.५ ॥
Naradah parvatashchaiva gautamashcha mahayashah
Katyayanah suyagyashcha hyagastyastapasam nidhih
96.6
एते चान्ये च बहवो मुनयः संशितव्रताः ।
कौतूहलसमाविष्टाः सर्व एव समागताः ।। ७.९६.६ ॥
Ete chanye cha bahavo munayah sanshitavratah
Kautuhalasamavishtah sarva eva samagatah
96.7
राक्षसाश्च महावीर्या वानराश्च महाबलाः ।
सर्व एव समाजग्मुर्महात्मानः कुतूहलात् ।। ७.९६.७ ॥
Rakshasashcha mahavirya vanarashcha mahabalah
Sarva eva samajagmurmahatmanah kutuhalat
96.8
क्षत्रिया ये च शूद्राश्च वैश्याश्चैव सहस्रशः ।
नानादेशगताश्चैव ब्राह्मणाः संशितव्रताः ।। ७.९६.८ ॥
Kshatriya ye cha shudrashcha vaishyashchaiva sahasrashah
Nanadeshagatashchaiva brahmanah sanshitavratah
96.9
ज्ञाननिष्ठाः कर्मनिष्ठाः योगनिष्ठास्तथापरे ।
सीताशपथवीक्षार्थं सर्व एव समागताः ।। ७.९६.९ ॥
Gyananishthah karmanishthah yoganishthastathapare
Sitashapathavikshartham sarva eva samagatah
96.10
तदा समागतं सर्वमश्मभूतमिवाचलम् ।
श्रुत्वा मुनिवरस्तूर्णं ससीतः समुपागमत् ।। ७.९६.१० ॥
Tada samagatam sarvamashmabhutamivachalam
Shrutva munivarasturnam sasitah samupagamat
96.11
तमृषिं पृष्ठतः सीता त्वन्वगच्छदवाङ्मुखी ।
कृताञ्जलिर्बाष्पगला कृत्वा रामं मनोगतम् ।। ७.९६.११ ॥
Tamrishim prishthatah sita tvanvagachchhadavanmukhi
Kritanjalirbashpagala kritva ramam manogatam
96.12
दृष्ट्वा श्रुतिमिवायान्तीं ब्रह्माणमनुगामिनीम् ।
वाल्मीकेः पृष्ठतः सीतां साधुवादो महानभूत् ।। ७.९६.१२ ॥
Drishtva shrutimivayantim brahmanamanugaminim
Valmikeh prishthatah sitam sadhuvado mahanabhut
96.13
ततो हलहलाशब्दः सर्वेषामेवमाबभौ ।
दुःखजन्मविशालेन शोकेनाकुलितात्मनाम् ।। ७.९६.१३ ॥
Tato halahalashabdah sarveshamevamababhau
Duhkhajanmavishalena shokenakulitatmanam
96.14
साधु रामेति केचित्तु साधु सीतेति चापरे ।
उभावेव च तत्रान्ये प्रेक्षकाः सम्प्रचुक्रुशुः ।। ७.९६.१४ ॥
Sadhu rameti kechittu sadhu siteti chapare
Ubhaveva cha tatranye prekshakah samprachukrushuh
96.15
ततो मध्ये जनौघस्य प्रविश्य मुनिपुङ्गवः ।
सीतासहायो वाल्मीकिरिति होवाच राघवम् ।। ७.९६.१५ ॥
Tato madhye janaughasya pravishya munipungavah
Sitasahayo valmikiriti hovacha raghavam
96.16
इयं दाशरथे सीता सुव्रता धर्मचारिणी ।
अपवादैः परित्यक्ता ममाश्रमसमीपतः ।। ७.९६.१६ ॥
Iyam dasharathe sita suvrata dharmacharini
Apavadaih parityakta mamashramasamipatah
96.17
लोकापवादभीतस्य तव राम महाव्रत ।
प्रत्ययं दास्यते सीता तदनुज्ञातुमर्हसि ।। ७.९६.१७ ॥
Lokapavadabhitasya tava rama mahavrata
Pratyayam dasyate sita tadanugyatumarhasi
96.18
इमौ तु जानकीपुत्रावुभौ च यमजातकौ ।
सुतौ तवैव दुर्धर्षौ सत्यमेतद्ब्रवीमि ते ।। ७.९६.१८ ॥
Imau tu janakiputravubhau cha yamajatakau
Sutau tavaiva durdharshau satyametadbravimi te
96.19
प्रचेतसो ऽहं दशमः पुत्रो राघवनन्दन ।
न स्मराम्यनृतं वाक्यमिमौ तु तव पुत्रकौ ।। ७.९६.१९ ॥
Prachetaso ham dashamah putro raghavanandana
Na smaramyanritam vakyamimau tu tava putrakau
96.20
बहुवर्षसहस्राणि तपश्चर्या मया कृता ।
नोपाश्नीयां फलं तस्या दुष्टेयं यदि मैथिली ।। ७.९६.२० ॥
Bahuvarshasahasrani tapashcharya maya krita
Nopashniyam phalam tasya dushteyam yadi maithili
96.21
मनसा कर्मणा वाचा भूतपूर्वं न किल्बिषम् ।
तस्याः फलमुपाश्नीयामपापा मैथिली यदि ।। ७.९६.२१ ॥
Manasa karmana vacha bhutapurvam na kilbisham
Tasyah phalamupashniyamapapa maithili yadi
96.22
अहं पञ्चसु भूतेषु मनष्षष्ठेषु राघव ।
विचिन्त्य सीतां शुद्धेति जग्राह वननिर्झरे ।। ७.९६.२२ ॥
Aham panchasu bhuteshu manashshashtheshu raghava
Vichintya sitam shuddheti jagraha vananirjhare
96.23
इयं शुद्धसमाचारा अपापा पतिदेवता ।
लोकापवादभीतस्य प्रत्ययं तव दास्यति ।। ७.९६.२३ ॥
Iyam shuddhasamachara apapa patidevata
Lokapavadabhitasya pratyayam tava dasyati
96.24
तस्मादियं नरवरात्मज शुद्धभावा दिव्येन दृष्टिविषयेण तदा प्रविष्टा ।
लोकापवादकलुषीकृतचेतसा या त्यक्ता त्वया प्रियतमा विदिता ऽपि शुद्धा ।। ७.९६.२४ ।।
Tasmadiyam naravaratmaja shuddhabhava divyena drishtivishayena tada pravishta
Lokapavadakalushikritachetasa ya tyakta tvaya priyatama vidita pi shuddha