সর্গ 93

93.1

বর্তমানে তথাভূতে যজ্ঞে চ পরমাদ্ভুতে ।
সশিষ্য আজগামাশু বাল্মীকির্মুনিপুঙ্গবঃ ।। ৭.৯৩.১ ॥

স দৃষ্ট্বা দিব্যসঙ্কাশং যজ্ঞমদ্ভুতদর্শনম্ ।
একান্তে ঋষিবাটানাং চকার উটজাঞ্ছুভান্ ।। ৭.৯৩.২ ॥

শকটাংশ্চ বহূন্পূর্ণান্ফলমূলৈশ্চ শোভনান্ ।
বাল্মীকিবাটে রুচিরে স্থাপয়ন্নবিদূরতঃ ।। ৭.৯৩.৩ ॥

আসীত্সুপূজিতো রাজ্ঞা মুনিভিশ্চ মহাত্মভিঃ ।
বাল্মীকিঃ সুমহাতেজা ন্যবসত্পরমাত্মবান্ ।। ৭.৯৩.৪ ॥

স শিষ্যাবব্রবীদ্ধৃষ্টৌ যুবাং গত্বা সমাহিতৌ ।
কৃত্স্নং রামায়ণং কাব্যং গায়েথাং পরয়া মুদা ।। ৭.৯৩.৫ ॥

ঋষিবাটেষু পুণ্যেষু ব্রাহ্মণাবসথেষু চ ।
রথ্যাসু রাজমার্গেষু পার্থিবানাং গৃহেষু চ ।। ৭.৯৩.৬ ॥

রামস্য ভবনদ্বারি যত্র কর্ম চ কুর্বতে ।
ঋত্বিজামগ্রতশ্চৈব তত্র গেয়ং বিশেষতঃ ।। ৭.৯৩.৭ ॥

ইমানি চ ফলান্যত্র স্বাদূনি বিবিধানি চ ।
জাতানি পর্বতাগ্রেষু চাস্বাদ্যাস্বাদ্য গায়তাম্ ।। ৭.৯৩.৮ ॥

ন যাস্যথঃ শ্রমং বত্সৌ ভক্ষয়িত্বা ফলানি বৈ ।
মূলানি চ সুমৃষ্টানি নগরাদ্বহিরাস্যথঃ ।। ৭.৯৩.৯ ॥

যদি শব্দাপয়েদ্রামঃ শ্রবণায় মহীপতিঃ ।
ঋষীণামুপবিষ্টানাং ততো গেয়ং প্রবর্ততাম্ ।। ৭.৯৩.১০ ॥

দিবসে বিংশতিঃ সর্গা গেয়া মধুরয়া গিরা ।
প্রমাণৈর্বহুভিস্তত্র যথোদ্দিষ্টা ময়া পুরা ।। ৭.৯৩.১১ ॥

লোভশ্চাপি ন কর্তব্যঃ স্বল্পো ঽপি ধনকাঙ্ক্ষয়া ।
কিং ধনেনাশ্রমস্থানাং ফলমূলোপজীবিনা ।। ৭.৯৩.১২ ॥

যদি পৃচ্ছেত্স কাকুত্স্থো যুবাং কস্যেতি দারকৌ ।
আবাং বাল্মীকিশিষ্যৌ স্বো ব্রূতমেবং নরাধিপম্ ।। ৭.৯৩.১৩ ॥

ইমাস্তন্ত্রীঃ সুমধুরাঃ স্থানং বা ঽপূর্বদর্শনম্ ।
মূর্চ্ছয়িত্বা সুমধুরং গায়তাং বিগতজ্বরৌ ।। ৭.৯৩.১৪ ॥

আদিপ্রভৃতি গেয়ং স্যান্ন চাবজ্ঞায় পার্থিবম্ ।
পিতা হি সর্বভূতানাং রাজা ভবিতি ধর্মতঃ ।। ৭.৯৩.১৫ ॥

তদ্যুবাং হৃষ্টমনসৌ শ্বঃ প্রভাতে সমাস্থিতৌ ।
গায়েথাং মধুরং গেয়ং তন্ত্রীলয়সমন্বিতম্ ।। ৭.৯৩.১৬ ॥

ইতি সন্দিশ্য বহুশো মুনিঃ প্রাচেতসস্তদা ।
বাল্মীকিঃ পরমোদারস্তূষ্ণীমাসীন্মহায়শাঃ ।। ৭.৯৩.১৭ ॥

সন্দিষ্টৌ মুনিনা তেন তাবুভৌ মৈথিলীসুতৌ ।
তথৈব করবাবেতি নির্জগ্মতুররিন্দমৌ ।। ৭.৯৩.১৮ ॥

তামদ্ভুতাং তৌ হৃদয়ে কুমারৌ নিবেশ্য বাণীমৃষিভাষিতাং তদা ।
সমুত্সুকৌ তৌ সমমূষতুর্নিশাং যথা ঽশ্বিনৌ ভার্গবনীতিসংহিতাম্ ।। ৭.৯৩.১৯ ।।