সর্গ 92

92.1

তত্সর্বমখিলেনাশু প্রস্থাপ্য ভরতাগ্রজঃ ।
হয়ং লক্ষণসম্পন্নং কৃষ্ণসারং মুমোচ হ ।। ৭.৯২.১ ॥

ঋত্বিগ্ভির্লক্ষ্মণং সার্ধমশ্বতন্ত্রে নিয়োজ্য চ ।
ততো ঽভ্যগচ্ছত্কাকুত্স্থঃ সহ সৈন্যেন নৈমিশম্ ।। ৭.৯২.২ ॥

যজ্ঞবাটং মহাবাহুর্দৃষ্ট্বা পরমমদ্ভুতম্ ।
প্রবর্ষমতুলং লেভে শ্রীমানিতি বচো ঽব্রবীৎ ।। ৭.৯২.৩ ॥

নৈমিষে বসতস্তস্য সর্ব এব নরাধিপাঃ ।
আনিন্যুরুপহারাংশ্চ তান্রামঃ প্রত্যপূজয়ৎ ।। ৭.৯২.৪ ॥

উপকার্যা মহার্হাশ্চ পার্থিবানাং মহাত্মনাম্ ।
সানুগানাং নরশ্রেষ্ঠো ব্যাদিদেশ মহামতিঃ ।। ৭.৯২.৫ ॥

অন্নপানানি বস্ত্রাণি সানুগানাং মহাত্মনাম্ ।
ভরতঃ সন্দদাবাশু শত্রুঘ্নসহিতস্তদা ।। ৭.৯২.৬ ॥

বানরাশ্চ মহাত্মানঃ সুগ্রীবসহিতাস্তদা ।
বিপ্রাণাং প্রণতাঃ সর্বে চক্রিরে পরিবেষণম্ ।। ৭.৯২.৭ ॥

বিভীষণশ্চ রক্ষোভির্বহুভিঃ স্রগ্বিভির্বৃতঃ ।
ঋষীণামুগ্রতপসাং পূজাং চক্রে মহাত্মনাম্ ।। ৭.৯২.৮ ॥

এবং সুবিহিতো যজ্ঞো হয়মেধো ঽভ্যবর্তত ।
লক্ষ্মণেনাগুপ্তা চ হয়চর্যা প্রবর্তত ।ঈদৃশং রাজসিংহস্য যজ্ঞপ্রবরমুত্তমম্ ।। ৭.৯২.৯ ॥

নান্যঃ শব্দো ঽভবত্তত্র হয়মেধে মহাত্মনঃ ।
ছন্দতো দেহি বিস্রব্ধো যাবত্তুষ্যন্তি যাচকাঃ ।। ৭.৯২.১০ ॥

তাবত্সর্বাণি দত্তানি ক্রতুমধ্যে মহাত্মনঃ ।
বিবিধানি চ গৌডানি খাণ্ডবানি তথৈব চ ।। ৭.৯২.১১ ॥

ন নিস্সৃতং ভতত্যোষ্ঠাদ্বচনং যাবদর্থিনাম্ ।
তাবদ্বানররক্ষোভির্দত্তমেবাভ্যদৃশ্যত ।। ৭.৯২.১২ ॥

ন কশ্চিন্মলিনস্তত্র দীনো বা ঽপ্যথ কৃর্শতঃ ।
তস্মিন্যজ্ঞবরে রাজ্ঞো হৃষ্টপুষ্টজনাবৃতে ।। ৭.৯২.১৩ ॥

যে চ তত্র মহাত্মানো মুনয়শ্চিরজীবিনঃ ।
নাস্মরংস্তাদৃশং যজ্ঞং নাপ্যাসীৎ স কদাচন ।। ৭.৯২.১৪ ॥

যঃ কৃত্যবান্সুবর্ণেন সুবর্ণং লভতে স্ম সঃ ।
বিত্তার্থী লভতে বিত্তং রত্নার্থী রত্নমেব চ ।। ৭.৯২.১৫ ॥

রজতানাং সুবর্ণানামশ্মনামথ বাসসাম্ ।
অনিশং দীয়মানানাং রাশিঃ সমুপদৃশ্যতে ।। ৭.৯২.১৬ ॥

ন শক্রস্য ধনেশস্য যমস্য বরুণস্য বা ।
ঈদৃশো দৃষ্টপূর্বো ন এবমূচুস্তপোধনাঃ ।। ৭.৯২.১৭ ॥

সর্বত্র বানরাস্তস্থুঃ সর্বত্রৈব চ রাক্ষসাঃ ।
বাসোধনান্নমর্থিভ্যঃ পূর্ণহস্তা দদুর্ভৃশম্ ।। ৭.৯২.১৮ ॥

ঈদৃশো রাজসিংহস্য যজ্ঞঃ সর্বগুণান্বিতঃ ।
সংবত্সরমথো সাগ্রং বর্ততে ন চ হীয়তে ।। ৭.৯২.১৯ ।।