Utshovসর্গ 90
90.1
তথোক্তবতি রামে তু তস্য জন্ম তদদ্ভুতম্ ।
উবাচ লক্ষ্মণো ভূয়ো ভরতশ্চ মহায়শাঃ ।। ৭.৯০.১ ॥
90.2
ইলা সা সোমপুত্রস্য সংবত্সরমথোষিতা ।
অকরোত্কিং নরশ্রেষ্ঠ তত্ত্বং শংসিতুমর্হসি ।। ৭.৯০.২ ॥
90.3
তয়োস্তদ্বাক্যমাধুর্যং নিশম্য পরিপৃচ্ছতোঃ ।
রামঃ পুনরুবাচেমাং প্রজাপতিসুতে কথাম্ ।। ৭.৯০.৩ ॥
90.4
পুরুষত্বং গতে শূরে বুধঃ পরমবুদ্ধিমান্ ।
সংবর্তং পরমোদারমাজুহাব মহায়শাঃ ।। ৭.৯০.৪ ॥
90.5
চ্যবনং ভৃগুপুত্রং চ মুনিং চারিষ্টনেমিনম্ ।
প্রমোদনং মোদকরং ততো দুর্বাসসং মুনিম্ ।। ৭.৯০.৫ ॥
90.6
এতান্সর্বান্সমানীয় বাক্যজ্ঞস্তত্ত্বদর্শনঃ ।
উবাচ সর্বান্সুহৃদো ধৈর্যেণ সুসমাহিতান্ ।। ৭.৯০.৬ ॥
90.7
অয়ং রাজা মহাবাহুঃ কর্দমস্য ইলঃ সুতঃ ।
জানীতৈনং যথাভূতং শ্রেয়ো হ্যত্র বিধীয়তাম্ ।। ৭.৯০.৭ ॥
90.8
তেষাং সংবদতামেব তমাশ্রমমুপাগমৎ ।
কর্দমস্তু মহাতেজা দ্বিজৈঃ সহ মহাত্মভিঃ ।। ৭.৯০.৮ ॥
90.9
পুলস্ত্যশ্চ ক্রতুশ্চৈব বষট্কারস্তথৈব চ ।
ওঙ্কারশ্চ মহাতেজাস্তমাশ্রমমুপাগমৎ ।। ৭.৯০.৯ ॥
90.10
তে সর্বে হৃষ্টমনসঃ পরস্পরসমাগমে ।
হিতৈষিণো বাল্হিপতেঃ পৃথগ্বাক্যান্যথাব্রুবন্ ।। ৭.৯০.১০ ॥
90.11
কর্দমস্ত্বব্রবীদ্বাক্যং সুতার্থং পরমং হিতম্ ।
দ্বিজাঃ শৃণুত মদ্বাক্যং যচ্ছ্রেয়ঃ পার্থিবস্য হি ।। ৭.৯০.১১ ॥
90.12
নান্যং পশ্যামি ভৈষজ্যমন্তরা বৃষভধ্বজম্ ।
নাশ্বমেধাত্পরো যজ্ঞঃ প্রিয়শ্চৈব মহাত্মনঃ ।তস্মাদ্যজামহে সর্বে পার্থিবার্থে দুরাসদম্ ।। ৭.৯০.১২ ॥
90.13
কর্দমেনৈবমুক্তাস্তু সর্ব এব দ্বিজর্ষভাঃ ।
রোচয়ন্তি স্ম তং যজ্ঞং রুদ্রস্যারাধনং প্রতি ।। ৭.৯০.১৩ ॥
90.14
সংবর্তস্য তু রাজর্ষেঃ শিষ্যঃ পুরপুরঞ্জয়ঃ ।
মরুত্ত ইতি বিখ্যাতস্তং যজ্ঞং সমুপাহরৎ ।। ৭.৯০.১৪ ॥
90.15
ততো যজ্ঞো মহানাসীদ্বুধাশ্রমসমীপতঃ ।
রুদ্রশ্চ পরমং তোষমাজগাম মহায়শাঃ ।। ৭.৯০.১৫ ॥
90.16
অথ যজ্ঞে সমাপ্তে তু প্রীতঃ পরময়া মুদা ।
উমাপতির্দ্বিজান্সর্বানুবাচ ইলসন্নিধৌ ।। ৭.৯০.১৬ ॥
90.17
প্রীতো ঽস্মি হয়মেধেন ভক্ত্যা চ দ্বিজসত্তমাঃ ।
অস্য বাহ্লিপতেশ্চৈব কিং করোমি প্রিয়ং শুভম্ ।। ৭.৯০.১৭ ॥
90.18
তথা বদতি দেবেশে দ্বিজাস্তে সুসমাহিতাঃ ।
প্রসাদয়ন্তি দেবেশং যথা স্যাত্পুরুষস্ত্বিলা ।। ৭.৯০.১৮ ॥
90.19
ততঃ প্রীতো মহাদেবঃ পুরুষত্বং দদৌ পুনঃ ।
ইলায়ৈ সুমহাতেজা দত্ত্বা চান্তরধীয়ত ।। ৭.৯০.১৯ ॥
90.20
নিবৃত্তে হয়মেধে চ গতশ্চাদর্শনং হরঃ ।
যথাগতং দ্বিজাঃ সর্বে হ্যগচ্ছন্দীর্ঘদর্শিনঃ ।। ৭.৯০.২০ ॥
90.21
রাজা তু বাহ্লিমুত্সৃজ্য মধ্যদেশে হ্যনুত্তমম্ ।
নিবেশয়ামাস পুরং প্রতিষ্ঠানং যশস্করম্ ।। ৭.৯০.২১ ॥
90.22
শশবিন্দুশ্চ রাজর্ষির্বাহ্লিং পুরপুরঞ্জয়ঃ ।
প্রতিষ্ঠানে ইলো রাজা প্রজাপতিসুতো বলী ।। ৭.৯০.২২ ॥
90.23
স কালে প্রাপ্তবাঁল্লোকমিলো ব্রাহ্মমনুত্তমম্ ।
ঐলঃ পুরূরবা রাজা প্রতিষ্ঠানমবাপ্তবান্ ।। ৭.৯০.২৩ ॥
90.24
ঈদৃশো হ্যশ্বমেধস্য প্রভাবঃ পুরুষর্ষভৌ ।
স্ত্রীভূতঃ পৌরুষং লেভে যচ্চান্যদপি দুর্লভম্ ।। ৭.৯০.২৪ ।।