Utshovসর্গ 89
89.1
শ্রুত্বা কিম্পুরুষোত্পত্তিং লক্ষ্মণো ভরতস্তদা ।
আশ্চর্যমিতি চাব্রূতামুভৌ রামং জনেশ্বরম্ ।। ৭.৮৯.১ ॥
89.2
অথ রামঃ কথামেতাং ভূয় এব মহায়শাঃ ।
কথয়ামাস ধর্মাত্মা প্রজাপতিসুতস্য বৈ ।। ৭.৮৯.২ ॥
89.3
সর্বাস্তা বিদ্রুতা দৃষ্ট্বা কিন্নরীর্ঋষিসত্তমঃ ।
উবাচ রূপসম্পন্নাং তাং স্ত্রিয়ং প্রহসন্নিব ।। ৭.৮৯.৩ ॥
89.4
সোমস্যাহং সুদয়িতঃ সুতঃ সুরুচিরাননে ।
ভজস্ব মাং বরারোহে ভক্ত্যা স্নিগ্ধেন চক্ষুষা ।। ৭.৮৯.৪ ॥
89.5
তস্য তদ্বচনং শ্রুত্বা শূন্যে স্বজনবর্জিতে ।
ইলা সুরুচিরপ্রখ্যং প্রত্যুবাচ মহাগ্রহম্ ।। ৭.৮৯.৫ ॥
89.6
অহং কামচরী সৌম্য তবাস্মি বশবর্তিনী ।
প্রশাধি মাং সোমসুত যথেচ্ছসি তথা কুরু ।। ৭.৮৯.৬ ॥
89.7
তস্যাস্তদদ্ভুতপ্রখ্যং শ্রুত্বা হর্ষমুপাগতঃ ।
স বৈ কামী সহ তয়া রেমে চন্দ্রমসঃ সুতঃ ।। ৭.৮৯.৭ ॥
89.8
বুধস্য মাধবো মাসস্তামিলাং রুচিরাননাম্ ।
গতো রময়তো ঽত্যর্থং ক্ষণবত্তস্য কামিনঃ ।। ৭.৮৯.৮ ॥
89.9
অথ মাসে তু সম্পূর্ণে পূর্ণেন্দুসদৃশাননঃ ।
প্রজাপতিসুতঃ শ্রীমাঞ্ছয়নে প্রত্যবুধ্যত ।। ৭.৮৯.৯ ॥
89.10
সো ঽপশ্যত্সোমজং তত্র তপন্তং সলিলাশয়ে ।
ঊর্ধ্ববাহুং নিরালম্বং তং রাজা প্রত্যভাষত ।। ৭.৮৯.১০ ॥
89.11
ভগবন্পর্বতং দুর্গং প্রবিষ্টো ঽস্মি সহানুগঃ ।
ন চ পশ্যামি তত্সৈন্যং ক্ব নু তে মামকা গতাঃ ।। ৭.৮৯.১১ ॥
89.12
তচ্ছ্রুত্বা তস্য রাজর্ষের্নষ্টসঞ্জ্ঞস্য ভাষিতম্ ।
প্রত্যুবাচ শুভং বাক্যং সান্ত্বয়ন্পরয়া গিরা ।। ৭.৮৯.১২ ॥
89.13
অশ্মবর্ষেণ মহতা ভৃত্যাস্তে বিনিপাতিতাঃ ।
ত্বং চাশ্রমপদে সুপ্তো বাতবর্ষভয়ার্দিতঃ ।। ৭.৮৯.১৩ ॥
89.14
সমাশ্বসিহি ভদ্রং তে নির্ভয়ো বিগতজ্বরঃ ।
ফলমূলাশনো বীর নিবসেহ যথাসুখম্ ।। ৭.৮৯.১৪ ॥
89.15
স রাজা তেন বাক্যেন প্রত্যাশ্বস্তো মহামতিঃ ।
প্রত্যুবাচ ততো বাক্যং দীনো ভৃত্যক্ষয়াদ্ ভৃশম্ ।। ৭.৮৯.১৫ ॥
89.16
ত্যক্ষ্যাম্যহং স্বকং রাজ্যং নাহং ভৃত্যৈর্বিনাকৃতঃ ।
বর্তয়েয়ং ক্ষণং ব্রহ্মন্সমনুজ্ঞাতুমর্হসি ।। ৭.৮৯.১৬ ॥
89.17
সুতো ধর্মপরো ব্রহ্মঞ্জ্যেষ্ঠো মম মহায়শাঃ ।
শশবিন্দুরিতি খ্যাতঃ স মে রাজ্যং প্রপত্স্যতে ।। ৭.৮৯.১৭ ॥
89.18
ন হি শক্ষ্যাম্যহং হিত্বা ভৃত্যদারান্সুখান্বিতান্ ।
প্রতিবক্তুং মহাতেজঃ কিঞ্চিদপ্যশুভং বচঃ ।। ৭.৮৯.১৮ ॥
89.19
তথা ব্রুবতি রাজেন্দ্রে বুধঃ পরমমদ্ভুতম্ ।
সান্ত্বপূর্বমথোবাচ বাসস্ত ইহ রোচতাম্ ।। ৭.৮৯.১৯ ॥
89.20
ন সন্তাপস্ত্বয়া কার্যঃ কার্দমেয় মহাবল ।
সংবত্সরোষিতস্যেহ কারয়িষ্যামি তে হিতম্ ।। ৭.৮৯.২০ ॥
89.21
তস্য তদ্বচনং শ্রুত্বা বুধস্যাক্লিষ্টকর্মণঃ ।
বাসায় বিদধে বুদ্ধিং যদুক্তং ব্রহ্মবাদিনা ।। ৭.৮৯.২১ ॥
89.22
মাসং স স্ত্রী তদা ভূত্বা রময়ত্যনিশং শুদা ।
মাসং পুরুষভাবেন ধর্মবুদ্ধিং চকার সঃ ।। ৭.৮৯.২২ ॥
89.23
ততঃ সা নবমে মাসি ইলা সোমসুতাত্সুতম্ ।
জনয়ামাস সুশ্রোণী পুরূরবসমূর্জিতম্ ।। ৭.৮৯.২৩ ॥
89.24
জাতমাত্রং তু সুশ্রোণী পিতুর্হস্তে ন্যবেশয়ৎ ।
বুধস্য সমবর্ণভমিলা পুত্রং মহাবলম্ ।। ৭.৮৯.২৪ ॥
89.25
বুধস্তু পুরুষীভূতং স বৈ সংবত্সরান্তরম্ ।
কথাভী রময়ামাস ধর্ময়ুক্তাভিরাত্মবান্ ।। ৭.৮৯.২৫ ।।