Utshovসর্গ 88
88.1
তাং কথামিলসম্বদ্ধাং রামেণ সমুদীরিতাম্ ।
লক্ষ্মণো ভরতশ্চৈব শ্রুত্বা পরমবিস্মিতৌ ।। ৭.৮৮.১ ॥
88.2
তৌ রামং প্রাঞ্জলী ভূত্বা তস্য রাজ্ঞো মহাত্মনঃ ।
বিস্তরং তস্য ভাবস্য তদা পপ্রচ্ছতুঃ পুনঃ ।। ৭.৮৮.২ ॥
88.3
কথং স রাজা স্ত্রীভূতো বর্তয়ামাস দুর্গতিঃ ।
পুরুষঃ স যদা ভূতঃ কাং বৃত্তিং বর্তয়ত্যসৌ ।। ৭.৮৮.৩ ॥
88.4
তয়োস্তদ্ভাষিতং শ্রুত্বা কৌতূহলসমন্বিতম্ ।
কথয়ামাস কাকুত্স্থস্তস্য রাজ্ঞো যথাগতম্ ।। ৭.৮৮.৪ ॥
88.5
তমেব প্রথমং মাসং স্ত্রীভূতা লোকসুন্দরী ।
তাভিঃ পরিবৃতা স্ত্রীভির্যে চ পূর্বপদানুগাঃ ।। ৭.৮৮.৫ ॥
88.6
তত্কাননং বিগাহ্বাশু বিজহ্রে লোকসুন্দরী ।
দ্রুমগুল্মলতাকীর্ণং পদ্ভ্যাং পদ্মদলেক্ষণা ।। ৭.৮৮.৬ ॥
88.7
বাহনানি চ সর্বাণি সা ত্যক্ত্বা বৈ সমন্ততঃ ।
পর্বতাভোগবিবরে তস্মিন্রেমে ইলা তদা ।। ৭.৮৮.৭ ॥
88.8
অথ তস্মিন্বনোদ্দেশে পর্বতস্যাবিদূরতঃ ।
সরঃ সুরুচিরপ্রখ্যং নানাপক্ষিগণৈর্যুতম্ ।। ৭.৮৮.৮ ॥
88.9
দদর্শ সা ত্বিলা তস্মিন্বুধং সোমসুতং তদা ।
জ্বলন্তং স্বেন বপুষা পূর্ণসোমমিবোদিতম্ ।। ৭.৮৮.৯ ॥
88.10
তপন্তং চ তপস্তীব্রমম্ভোমধ্যে দুরাসদম্ ।
যশস্করং কামকরং কারুণ্যে পর্যবস্থিতম্ ।। ৭.৮৮.১০ ॥
88.11
সা তং জলাশয়ং সর্বং ক্ষোভয়ামাস বিস্মিতা ।
সহগৈঃ পূর্বপুরুষৈঃ স্ত্রীভূতৈ রঘুনন্দন ।। ৭.৮৮.১১ ॥
88.12
বুধস্তু তাং সমীক্ষ্যৈব কামবাণবশং গতঃ ।
নোপলেভে তদা ঽ ঽত্মানং সঞ্চচাল তদা ঽ ঽম্ভসি ।। ৭.৮৮.১২ ॥
88.13
ইলাং নিরীক্ষমাণস্তু ত্রৈলোক্যাভ্যধিকাং শুভাম্ ।
চিন্তাং সমভ্যতিক্রামৎ কা ন্বিয়ং দেবতাধিকা ।। ৭.৮৮.১৩ ॥
88.14
ন দেবীষু ন নাগীষু নাসুরীষ্বপ্সরঃসু চ ।
দৃষ্টপূর্বা ময়া কাচিদ্রূপেণানেন শোভিতা ।। ৭.৮৮.১৪ ॥
88.15
সদৃশীয়ং মম ভবেদ্যদি নান্যপরিগ্রহঃ ।
ইতি বুদ্ধিং সমাস্থায় জলাত্কূলমুপাগমৎ ।। ৭.৮৮.১৫ ॥
88.16
আশ্রমং সমুপাগম্য ততস্তাঃ প্রমদোত্তমাঃ ।
শব্দাপয়ত ধর্মাত্মা তাশ্চৈনং চ ববন্দিরে ।। ৭.৮৮.১৬ ॥
88.17
স তাঃ পপ্রচ্ছ ধর্মাত্মা কস্যৈষা লোকসুন্দরী ।
কিমর্থমাগতা চৈব সর্বমাখ্যাত মা চিরম্ ।। ৭.৮৮.১৭ ॥
88.18
শুভং তু তস্য তদ্বাক্যং মধুরং মধুরাক্ষরম্ ।
শ্রুত্বা স্ত্রিয়শ্চ তাঃ সর্বা ঊচুর্মধুরয়া গিরা ।। ৭.৮৮.১৮ ॥
88.19
অস্মাকমেষা সুশ্রোণী প্রভুত্বে বর্ততে সদা ।
অপতিঃ কাননান্তেষু সহাস্মাভিশ্চরত্যসৌ ।। ৭.৮৮.১৯ ॥
88.20
তদ্বাক্যমব্যক্তপদং তাসাং স্ত্রীণাং নিশম্য চ ।
বিদ্যামাবর্তনীং পুণ্যামাবর্তয়ত স দ্বিজঃ ।। ৭.৮৮.২০ ॥
88.21
সো ঽর্থং বিদিত্বা সকলং তস্য রাজ্ঞো যথাগতম্ ।
সর্বা এব স্ত্রিয়স্তাশ্চ বভাষে মুনিপুঙ্গবঃ ।। ৭.৮৮.২১ ॥
88.22
অত্র কিম্পুরুষীর্ভূত্বা শৈলরোধসি বত্স্যথ ।
আবাসস্তু গিরাবস্মিঞ্ছীঘ্রমেব বিধীয়তাম্ ।। ৭.৮৮.২২ ॥
88.23
মূলপত্রফলৈঃ সর্বা বর্তয়িষ্যথ নিত্যদা ।
স্ত্রিয়ঃ কিম্পুরুষান্নাম ভর্তঽন্সমুপলপ্স্যথ ।। ৭.৮৮.২৩ ॥
88.24
তাঃ শ্রুত্বা সোমপুত্রস্য বাচং কিম্পুরুষীকৃতাঃ ।
উপাসাঞ্চক্রিরে শৈলং বধ্বস্তা বহুলাস্তদা ।। ৭.৮৮.২৪ ।।