Utshovসর্গ 87
87.1
তচ্ছ্রুত্বা লক্ষ্মণেনোক্তং বাক্যং বাক্যবিশারদঃ ।
প্রত্যুবাচ মহাতেজাঃ প্রহসন্রাঘবো বচঃ ।। ৭.৮৭.১ ॥
87.2
এবমেব নরশ্রেষ্ঠ যথা বদসি লক্ষ্মণ ।
বৃত্রঘাতমশেষেণ বাজিমেধফলং চ যৎ ।। ৭.৮৭.২ ॥
87.3
শ্রূয়তে হি পুরা সৌম্য কর্দমস্য প্রজাপতেঃ ।
পুত্রো বাহ্লীশ্বরঃ শ্রীমানিলো নাম মহাশয়াঃ ।। ৭.৮৭.৩ ॥
87.4
স রাজা পৃথিবীং সর্বাং বশে কৃত্বা সুধার্মিকঃ ।
রাজ্যং চৈব নরব্যাঘ্র পুত্রবত্পর্যপালয়ৎ ।। ৭.৮৭.৪ ॥
87.5
সুরৈশ্চ পরমোদারৈর্দৈতেয়ৈশ্চ মহাধনৈঃ ।
নাগরাক্ষসগন্ধর্বৈর্যক্ষৈশ্চ সুমহাত্মভিঃ ।। ৭.৮৭.৫ ॥
87.6
পূজ্যতে নিত্যশঃ সৌম্য ভয়ার্তৈ রঘুনন্দন ।
অবিভ্যংশ্চ ত্রয়ো লোকাঃ সরোষস্য মহাত্মনঃ ।। ৭.৮৭.৬ ॥
87.7
স রাজা তাদৃশো হ্যাসীদ্ধর্মে বীর্যে চ নিষ্ঠিতঃ ।
বুদ্ধ্যা চ পরমোদারো বাহ্লীকেশো মহায়শাঃ ।। ৭.৮৭.৭ ॥
87.8
স প্রচক্রে মহাবাহুর্মৃগয়াং রুচিরে বনে ।
চৈত্রে মনোরমে মাসি সভৃত্যবলবাহনঃ ।। ৭.৮৭.৮ ॥
87.9
প্রজঘ্নে চ নৃপো ঽরণ্যে মৃগাঞ্ছতসহস্রশঃ ।
হত্বৈব তৃপ্তির্নাভূচ্চ রাজ্ঞস্তস্য মহাত্মনঃ ।। ৭.৮৭.৯ ॥
87.10
নানামৃগাণাময়ুতং বধ্যমানং মহাত্মনা ।
যত্র জাতো মাহাসেনস্তং দেশমুপচক্রমে ।। ৭.৮৭.১০ ॥
87.11
তস্মিন্প্রদেশে দেবেশ শৈলরাজসুতাং হরঃ ।
রময়ামাস দুর্ধর্ষঃ সর্বৈরনুচরৈঃ সহ ।। ৭.৮৭.১১ ॥
87.12
কৃত্বা স্ত্রীরূপমাত্মানমুমেশো গোপতিধ্বজঃ ।
দেব্যাঃ প্রিয়চিকীর্ষুঃ সংস্তস্মিন্পর্বতনির্ঝরে ।। ৭.৮৭.১২ ॥
87.13
যে তু তত্র বনোদ্দেশে সত্ত্বাঃ পুরুষবাদিনঃ ।
বৃক্ষাঃ পুরুষনামানস্তে ঽভবন্ স্ত্রীজনাস্তদা ।। ৭.৮৭.১৩ ॥
87.14
যচ্চ কিঞ্চন তত্সর্বং নারীসঞ্জ্ঞং বভূব হ ।
এতস্মিন্নন্তরে রাজা স ইলঃ কর্দমাত্মজঃ ।নিঘ্নন্মৃগসহস্রাণি তং দেশমুপচক্রমে ।। ৭.৮৭.১৪ ॥
87.15
স দৃষ্ট্বা স্ত্রীকৃতং সর্বং সব্যালমৃগপক্ষকম্ ।
আত্মনং স্ত্রীকৃতং চৈব সানুগং রঘুনন্দন ।। ৭.৮৭.১৫ ॥
87.16
তস্য দুঃখং মহচ্চাসীদ্দৃষ্ট্বা ঽ ঽত্মানং তথাগতম্ ।
উমাপতেশ্চ তত্কর্ম জ্ঞাত্বা ত্রাসমুপাগমৎ ।। ৭.৮৭.১৬ ॥
87.17
ততো দেবং মহাত্মানং শিতিকণ্ঠং কপর্দিনম্ ।
জগাম শরণং রাজা সভৃত্যবলবাহনঃ ।। ৭.৮৭.১৭ ॥
87.18
ততঃ প্রহস্য বরদঃ সহ দেব্যা মহেশ্বরঃ ।
প্রজাপতিসুতং বাক্যমুবাচ বরদঃ স্বয়ম্ ।। ৭.৮৭.১৮ ॥
87.19
উত্তিষ্ঠোত্তিষ্ঠ রাজর্ষে কার্দমেয় মহাবল ।
পুরুষত্বমৃতে সৌম্য বরং বরয় সুব্রত ।। ৭.৮৭.১৯ ॥
87.20
ততঃ স রাজা দুঃখার্তঃ প্রত্যাখ্যাতো মহাত্মনা ।
ন চ জগ্রাহ স্ত্রীভূতো বরমন্যং সুরোত্তমাৎ ।। ৭.৮৭.২০ ॥
87.21
ততঃ শোকেন মহতা শৈলরাজসুতাং নৃপঃ ।
প্রণিপত্য হ্যুমাং দেবীং সর্বেণৈবান্তরাত্মনা ।। ৭.৮৭.২১ ॥
87.22
ঈশে বরাণাং বরদে লোকানামসি ভামিনী ।
অমোঘদর্শনে দেবী ভজ সৌম্যেন চক্ষুষা ।। ৭.৮৭.২২ ॥
87.23
হৃদ্গতং তস্য রাজর্ষের্বিজ্ঞায় হরসন্নিধৌ ।
প্রত্যুবাচ শুভং বাক্যং দেবী রুদ্রস্য সংমতা ।। ৭.৮৭.২৩ ॥
87.24
অর্ধস্য দেবো বরদো বরার্ধস্য তব হ্যহম্ ।
তস্মাদর্ধং গৃহাণ ত্বং স্ত্রীপুংসোর্যাবদিচ্ছসি ।। ৭.৮৭.২৪ ॥
87.25
তদদ্ভুততরং শ্রুত্বা দেব্যা বরমনুত্তমম্ ।
সম্প্রহৃষ্টমনা ভূত্বা রাজা বাক্যমথাব্রবীৎ ।। ৭.৮৭.২৫ ॥
87.26
যদি দেবি প্রসন্না মে রূপেণাপ্রতিমা ভুবি ।
মাসং স্ত্রীত্বমুপাসিত্বা মাসং স্যাং পুরুষঃ পুনঃ ।। ৭.৮৭.২৬ ॥
87.27
ঈপ্সিতং তস্য বিজ্ঞায় দেবী সুরুচিরাননা ।
প্রত্যুবাচ শুভং বাক্যমেবমেব ভবিষ্যতি ।। ৭.৮৭.২৭ ॥
87.28
রাজন্পুরুষভূতস্ত্বং স্ত্রীভাবং ন স্মরিষ্যসি ।
স্ত্রীভূতশ্চ পরং মাসং ন স্মরিষ্যসি পৌরুষম্ ।। ৭.৮৭.২৮ ॥
87.29
এবং স রাজা পুরুষো মাসং ভূত্বাথ কার্দমিঃ ।
ত্রৈলোক্যসুন্দরী নারী মাসমেকমিলা ঽভবৎ ।। ৭.৮৭.২৯ ।।