সর্গ 86

86.1

তদা বৃত্রবধং সর্বমখিলেন স লক্ষ্মণঃ ।
কথয়িত্বা নরশ্রেষ্ঠঃ কথাশেষং প্রচক্রমে ।। ৭.৮৬.১ ॥

ততো হতে মহাবীর্যে বৃত্রে দেবভয়ঙ্করে ।
ব্রহ্মহত্যাবৃতঃ শক্রঃ সঞ্জ্ঞাং লেভে ন বৃত্রহা ।। ৭.৮৬.২ ॥

সো ঽন্তমাশ্রিত্য লোকানাং নষ্টসঞ্জ্ঞো বিচেতনঃ ।
কালং তত্রাবসত্কঞ্চিদ্বেষ্টমান ইবোরগঃ ।। ৭.৮৬.৩ ॥

অথ নষ্টে সহস্রাক্ষে উদ্বিগ্নমভবজ্জগৎ ।
ভূমিশ্চ ধ্বস্তসঙ্কাশা নিঃস্নেহা শুষ্ককাননা ।। ৭.৮৬.৪ ॥

নিঃস্রোতসশ্চ তে সর্বে তু হ্রদাশ্চ সরিতস্তথা ।
সঙ্ক্ষোভশ্চৈব সত্ত্বানামনাবৃষ্টিকৃতো ঽভবৎ ।। ৭.৮৬.৫ ॥

ক্ষীয়মাণে তু লোকে ঽস্মিন্সম্ভ্রান্তমনসঃ সুরাঃ ।
যদুক্তং বিষ্ণুনা পূর্বং তং যজ্ঞং সমুপানয়ন্ ।। ৭.৮৬.৬ ॥

ততঃ সর্বে সুরগণাঃ সোপাধ্যায়াঃ সহর্ষিভিঃ ।
তং দেশং সমুপাজগ্মুর্যত্রেন্দ্রো ভয়মোহিতঃ ।। ৭.৮৬.৭ ॥

তে তু দৃষ্ট্বা সহস্রাক্ষমাবৃতং ব্রহ্মহত্যয়া ।
তং পুরস্কৃত্য দেবেশমশ্বমেধমুপাক্রমন্ ।। ৭.৮৬.৮ ॥

ততো ঽশ্বমেধঃ সুমহান্মহেন্দ্রস্য মহাত্মনঃ ।
ববৃধে ব্রহ্মহত্যয়াঃ পাবনার্থং নরেশ্বর ।। ৭.৮৬.৯ ॥

ততো যজ্ঞে সমাপ্তে তু ব্রহ্মহত্যা মহাত্মনঃ ।
অভিগম্যাব্রবীদ্বাক্যং ক্ব মে স্থানং বিধাস্যথ ।। ৭.৮৬.১০ ॥

তে তামূচুস্তদা দেবাস্তুষ্টাঃ প্রীতিসমন্বিতাঃ ।
চতুর্ধা বিভজাত্মানমাত্মনৈব দুরাসদে ।। ৭.৮৬.১১ ॥

দেবানাং ভাষিতং শ্রুত্বা ব্রহ্মহত্যা মহাত্মনাম্ ।
সন্নিধৌ স্থানমন্যত্র বরয়ামাস দুর্বসা ।। ৭.৮৬.১২ ॥

একেনাংশেন বত্স্যামি পূর্ণোদাসু নদীষু বৈ ।
চতুরো বার্ষিকান্মাসান্দর্পঘ্নী কামবারিণী ।। ৭.৮৬.১৩ ॥

ভূম্যামহং সর্বকালমেকেনাংশেন সর্বদা ।
বসিষ্যামি ন সন্দেহঃ সত্যেনৈতদ্ব্রবীমি বঃ ।। ৭.৮৬.১৪ ॥

যো ঽয়মংশস্তৃতীয়ো মে স্ত্রীষু যৌবনশালিষু ।
ত্রিরাত্রং দর্পপূর্ণাসু বশিষ্যে দর্পঘাতিনী ।। ৭.৮৬.১৫ ॥

হন্তারো ব্রাহ্মণান্যে তু মৃষাপূর্বমদূষকান্ ।
তাংশ্চতুর্থেন ভাগেন সংশ্রয়িষ্যে সুরর্ষভাঃ ।। ৭.৮৬.১৬ ॥

প্রত্যূচুস্তাং ততো দেবা যথা বদসি দুর্বসে ।
তথা ভবতু তত্সর্বং সাধয়স্ব যদীপ্সিতম্ ।। ৭.৮৬.১৭ ॥

ততঃ প্রীত্যা ঽন্বিতা দেবাঃ সহস্রাক্ষং ববন্দিরে ।
বিজ্বরঃ স চ পূতাত্মা বাসবঃ সমপদ্যত ।। ৭.৮৬.১৮ ॥

প্রশান্তং চ জগত্সর্বং সহস্রাক্ষে প্রতিষ্ঠিতে ।
যজ্ঞং চাদ্ভুতসঙ্কাশং তদা শক্রো ঽভ্যপূজয়ৎ ।। ৭.৮৬.১৯ ॥

ঈদৃশো হ্যশ্বমেধস্য প্রসাদো রঘুনন্দন ।
যজস্ব সুমহাভাগ হয়মেধেন পার্থিব ।। ৭.৮৬.২০ ॥

ইতি লক্ষ্মণবাক্যমুত্তমং নৃপতিরতীব মনোহরং মহাত্মা ।
পরিতোষমবাপ হৃষ্টচেতা নিশময্যেন্দ্রসমানবিক্রমৌজাঃ ।। ৭.৮৬.২১ ।।