সর্গ 85

85.1

লক্ষ্মণস্য তু তদ্বাক্যং শ্রুত্বা শত্রুনিবর্হণঃ ।
বৃত্রঘাতমশেষেণ কথয়েত্যাহ সুব্রত ।। ৭.৮৫.১ ॥

রাঘবেণৈবমুক্তস্তু সুমিত্রানন্দবর্ধনঃ ।
ভূয় এব কথাং দিব্যাং কথয়ামাস সুব্রতঃ ।। ৭.৮৫.২ ॥

সহস্রাক্ষবচঃ শ্রুত্বা সর্বেষাং চ দিবৌকসাম্ ।
বিষ্ণুর্দেবানুবাচেদং সর্বানিন্দ্রপুরোগমান্ ।। ৭.৮৫.৩ ॥

পূর্বং সৌহৃদবদ্ধো ঽস্মি বৃত্রস্য হ মহাত্মনঃ ।
তেন যুষ্মত্প্রিয়ার্থং হি নাহং হন্মি মহাসুরম্ ।। ৭.৮৫.৪ ॥

অবশ্যং করণীয়ং চ ভবতাং সুখমুত্তমম্ ।
তস্মাদুপায়মাখ্যাস্যে যেন বৃত্রো নিহন্যতে ।। ৭.৮৫.৫ ॥

ত্রিধাভূতং করিষ্যামি হ্যাত্মানং সুরসত্তমাঃ ।
তেন বৃত্রং সহস্রাক্ষো বধিষ্যতি ন সংশয়ঃ ।। ৭.৮৫.৬ ॥

একাংশো বাসবং যাতু দ্বিতীয়ো বজ্রমেব তু ।
তৃতীয়ো ভূতলং শক্রস্তদা বৃত্রং বধিষ্যতি ।। ৭.৮৫.৭ ॥

তথা ব্রুবতি দেবেশে দেবা বাক্যমথাব্রুবন্ ।
এবমেতন্ন সন্দেহো যথা বদসি দৈত্যহন্ ।। ৭.৮৫.৮ ॥

ভদ্রং তে ঽস্তু গমিষ্যামো বৃত্রাসুরবধৈষিণঃ ।
ভজস্ব পরমোদার বাসবং স্বেন তেজসা ।। ৭.৮৫.৯ ॥

ততঃ সর্বে মহাত্মানঃ সহস্রাক্ষপুরোগমাঃ ।
তদারণ্যমুপাক্রামন্যত্র বৃত্রো মহাসুরঃ ।। ৭.৮৫.১০ ॥

তে পশ্যংস্তেজসা ভূতং তপ্যন্তমসুরোত্তমম্ ।
পিবন্তমিব লোকাংস্ত্রীন্নির্দহন্তমিবাম্বরম্ ।। ৭.৮৫.১১ ॥

দৃষ্ট্বৈব চাসুরশ্রেষ্ঠং দেবাস্ত্রাসমুপাগমন্ ।
কথমেনং বধিষ্যামঃ কথং ন স্যাত্পরাজয়ঃ ।। ৭.৮৫.১২ ॥

তেষাং চিন্তয়তাং তত্র সহস্রাক্ষঃ পুরন্দরঃ ।
বজ্রং প্রগৃহ্য পাণিভ্যাং প্রাহিণোদ্বৃত্রমূর্ধনি ।। ৭.৮৫.১৩ ॥

কালাগ্নিনেব ঘোরেণ তপ্তেনৈব মহার্চিষা ।
পততা বৃত্রশিরসা জগত্ত্রাসমুপাগমৎ ।। ৭.৮৫.১৪ ॥

অসম্ভাব্যং বধং তস্য বৃত্রস্য বিবুধাধিপঃ ।
চিন্তয়ানো জগামাশু লোকস্যান্তং মহায়শাঃ ।। ৭.৮৫.১৫ ॥

তমিন্দ্রং ব্রহ্মহত্যা ঽ ঽশু গচ্ছন্তমনুগচ্ছতি ।
অপতচ্চাস্য গাত্রেষু তমিন্দ্রং দুঃখমাবিশৎ ।। ৭.৮৫.১৬ ॥

হতারয়ঃ প্রনষ্টেন্দ্রা দেবাঃ সাগ্নিপুরোগমাঃ ।
বিষ্ণুং ত্রিভুবনেশানং মুহুর্মুহুরপূজয়ন্ ।। ৭.৮৫.১৭ ॥

ত্বং গতিঃ পরমেশান পূর্বজো জগতঃ পিতা ।
রক্ষার্থং সর্বভূতানাং বিষ্ণুত্বমুপজগ্মিবান্ ।। ৭.৮৫.১৮ ॥

হতশ্চায়ং ত্বয়া বৃত্রো ব্রহ্মহত্যা চ বাসবম্ ।
বাধতে সুরশার্দূল মোক্ষং তস্যা বিনির্দিশ ।। ৭.৮৫.১৯ ॥

তেষাং তদ্বচনং শ্রুত্বা দেবানাং বিষ্ণুরব্রবীৎ ।
মামেব যজতাং শক্রঃ পাবয়িষ্যামি বজ্রিণম্ ।। ৭.৮৫.২০ ॥

পুণ্যেন হয়মেধেন মামিষ্ট্বা পাকশাসনঃ ।
পুনরেষ্যতি দেবানামিন্দ্রত্বমকুতোভয়ম্ ।। ৭.৮৫.২১ ॥

এবং সন্দিশ্য তাং বাণীং দেবানামমৃতোপমাম্ ।
জগাম বিষ্ণুর্দেবেশঃ স্তূয়মানস্ত্রিবিষ্টপম্ ।। ৭.৮৫.২২ ।।