সর্গ 84

84.1

তথোক্তবতি রামে তু ভরতে চ মহাত্মনি ।
লক্ষ্মণো ঽথ শুভং বাক্যমুবাচ রঘুনন্দনম্ ।। ৭.৮৪.১ ॥

অশ্বমেধো মহায়জ্ঞঃ পাবনঃ সর্বপাপ্মনাম্ ।
পাবনস্তব দুর্ধর্ষো রোচতাং রঘুনন্দন ।। ৭.৮৪.২ ॥

শ্রূয়তে হি পুরাবৃত্তং বাসবে সুমহাত্মনি ।
ব্রহ্মহত্যাবৃতঃ শক্রো হয়মেধেন পাবিতঃ ।। ৭.৮৪.৩ ॥

পুরা কিল মহাবাহো দেবাসুরসমাগমে ।
বৃত্রো নাম মহানাসীদ্দৈতেয়ো লোকসম্মতঃ ।। ৭.৮৪.৪ ॥

বিস্তীর্ণো যোজনশতমুচ্ছ্রিতস্ত্রিগুণং ততঃ ।
অনুরাগেণ লোকাংস্ত্রীন্স্নেহাত্পশ্যতি সর্বতঃ ।। ৭.৮৪.৫ ॥

ধর্মজ্ঞশ্চ কৃতজ্ঞশ্চ বুদ্ধ্যা চ পরিনিষ্ঠিতঃ ।
শশাস পৃথিবীং স্ফীতাং ধর্মেণ সুসমাহিতঃ ।। ৭.৮৪.৬ ॥

তস্মিন্প্রশাসতি তদা সর্বকামদুঘা মহী ।
রসবন্তি প্রভূনানি মূলানি চ ফলানি চ ।। ৭.৮৪.৭ ॥

অকৃষ্টপচ্যা পৃথিবী সুসম্পন্না মহাত্মনঃ ।
স রাজ্যং তাদৃশং ভুঙ্ক্তে স্ফীতমদ্ভুতদর্শনম্ ।। ৭.৮৪.৮ ॥

তস্য বুদ্ধিঃ সমুপ্তন্না তপঃ কুর্যামনুত্তমম্ ।
তপো হি পরমং শ্রেয়ঃ সম্মোহমিতরত্সুখম্ ।। ৭.৮৪.৯ ॥

স নিক্ষিপ্য সুতং জ্যেষ্ঠং পৌরেষু মধুরেশ্বরম্ ।
তপ উগ্রং সমাতিষ্ঠত্তাপয়ন্সর্বদেবতাঃ ।। ৭.৮৪.১০ ॥

তপস্তপ্যতি বৃত্রে তু বাসবঃ পরমার্তবৎ ।
বিষ্ণুং সমুপসঙ্ক্রম্য বাক্যমেতদুবাচ হ ।। ৭.৮৪.১১ ॥

তপস্যতা মহাবাহো লোকাঃ বৃত্রেণ নির্জিতাঃ ।
বলবান্স হি ধর্মাত্মা নৈনং শক্ষ্যামি শাসিতুম্ ।। ৭.৮৪.১২ ॥

যদ্যসৌ তপ আতিষ্ঠেদ্ভূয় এবাসুরেশ্বর ।
যাবল্লোকা ধরিষ্যন্তি তাবদস্য বশানুগাঃ ।। ৭.৮৪.১৩ ॥

তং চৈনং পরমোদারমুপেক্ষসি মহাবলম্ ।
ক্ষণং হি ন ভবেদ্বৃত্রঃ ক্রুদ্ধে ত্বয়ি সুরেশ্বর ।। ৭.৮৪.১৪ ॥

যদা হি প্রীতিসংয়োগং ত্বয়া বিষ্ণো সমাগতঃ ।
তদাপ্রভৃতি লোকানাং নাথত্বমুপলব্ধবান্ ।। ৭.৮৪.১৫ ॥

স ত্বং প্রসাদং লোকানাং কুরুষ্ব সুসমাহিতঃ ।
ত্বত্কৃতেন হি সর্বং স্যাপ্রশান্তমরুজং জগৎ ।। ৭.৮৪.১৬ ॥

ইমে হি সর্বে বিষ্ণো ত্বাং নিরীক্ষন্তে দিবৌকসঃ ।
বৃত্রঘাতেন মহতা তেষাং সাহ্যং কুরুষ্ব হ ।। ৭.৮৪.১৭ ॥

ত্বয়া হি নিত্যশঃ সাহ্যং কৃতমেষাং মহাত্মনাম্ ।
অসহ্যমিদমন্যেষামগতীনাং গতির্ভবান্ ।। ৭.৮৪.১৮ ।।