সর্গ 83

83.1

তচ্ছ্রুত্বা ভাষিতং তস্য রামস্যাক্লিষ্ট কর্মণঃ ।
দ্বাস্স্থঃ কুমারাবাহূয় রাঘবায় ন্যবেদয়ৎ ।। ৭.৮৩.১ ॥

দৃষ্ট্বা তু রাঘবঃ প্রাপ্তৌ প্রিয়ৌ ভরতলক্ষ্মণৌ ।
পরিষ্বজ্য তদা রামো বাক্যমেতদুবাচ হ ।। ৭.৮৩.২ ॥

কৃতং ময়া যথা তথ্যং দ্বিজকার্যমনুত্তমম্ ।
ধর্মসেতুমথো ভূয়ঃ কর্তুমিচ্ছামি রাঘবৌ ।। ৭.৮৩.৩ ॥

অক্ষয্যশ্চাব্যয়শ্চৈব ধর্মসেতুর্মতো মম ।
ধর্মপ্রসাধকং হ্যেতৎ সর্বপাপপ্রণাশনম্ ।। ৭.৮৩.৪ ॥

যুবাভ্যামাত্মভূতাভ্যাং রাজসূয়মনুত্তমম্ ।
সহিতো যষ্টুমিচ্ছামি তত্র ধর্মো হি শাশ্বতঃ ।। ৭.৮৩.৫ ॥

ইষ্ট্বা তু রাজসূয়েন মিত্রঃ শত্রুনিবর্হণঃ ।
সুহুতেন সুয়জ্ঞেন বরুণত্বমুপাগমৎ ।। ৭.৮৩.৬ ॥

সোমশ্চ রাজসূয়েন ইষ্ট্বা ধর্মেণ ধর্মবিৎ ।
প্রাপ্তশ্চ সর্বলোকেষু কীর্তিস্থানং চ শাশ্বতম্ ।। ৭.৮৩.৭ ॥

অস্মিন্নহনি যচ্ছ্রেয়শ্চিন্ত্যতাং তন্ময়া সহ ।
হিতং চায়তিয়ুক্তং চ প্রয়তৌ কর্তুমর্হথঃ ।। ৭.৮৩.৮ ॥

শ্রুত্বা তু রাঘবস্যৈতদ্বাক্যং বাক্যবিশারদঃ ।
ভরতঃ প্রাঞ্জলির্ভূত্বা বাক্যমেতদুবাচ হ ।। ৭.৮৩.৯ ॥

ত্বয়ি ধর্মঃ পরঃ সাধো ত্বয়ি সর্বা বসুন্ধরা ।
প্রতিষ্ঠিতা মহাবাহো যশশ্চামিতবিক্রম ।। ৭.৮৩.১০ ॥

মহীপালাশ্চ সর্বে ত্বাং প্রজাপতিমিবামরাঃ ।
নিরীক্ষন্তে মহাত্মানং লোকানাথং যথা বয়ম্ ।। ৭.৮৩.১১ ॥

পুত্রাশ্চ পিতৃবদ্রাজন্পশ্যন্তি ত্বাং মহাবল ।
পৃথিব্যা গতিভূতো ঽসি প্রাণিনামপি রাঘব ।। ৭.৮৩.১২ ॥

স ত্বমেবংবিধং যজ্ঞমাহর্তাসি কথং নৃপ ।
পৃথিব্যাং রাজবংশানাং বিনাশো যত্র দৃশ্যতে ।। ৭.৮৩.১৩ ॥

পৃথিব্যাং যে চ পুরুষা রাজন্পৌরুষমাগতাঃ ।
সর্বেষাং ভবিতা তত্র সঙ্ক্ষয়ঃ সর্বকোপজঃ ।। ৭.৮৩.১৪ ॥

স ত্বং পুরুষশার্দূল গুণৈরতুলবিক্রম ।
পৃথিবীং নার্হসে হন্তুং বশে হি তব বর্ততে ।। ৭.৮৩.১৫ ॥

ভরতস্য তু তদ্বাক্যং শ্রুত্বা ঽমৃতময়ং তদা ।
প্রহর্ষমতুলং লেভে রামঃ সত্যপরাক্রমঃ ।। ৭.৮৩.১৬ ॥

উবাচ চ শুভং বাক্যং কৈকেয্যানন্দবর্ধনম্ ।
প্রীতো ঽস্মি পরিতুষ্টো ঽস্মি তবাদ্য বচনে ঽনঘ ।। ৭.৮৩.১৭ ॥

ইদং বচনমক্লীবং ত্বয়া ধর্মসমাহিতম্ ।
ব্যাহৃতং পুরুষব্যাঘ্র পৃথিব্যাঃ পরিপালনম্ ।। ৭.৮৩.১৮ ॥

এষ্যদস্মদভিপ্রায়াদ্রাজসূয়াত্ক্রতূত্তমাৎ ।
নিবর্তয়ামি ধর্মজ্ঞ তব সুব্যাহৃতেন চ ।। ৭.৮৩.১৯ ॥

লোকপীডাকরং কর্ম ন কর্তব্যং বিচক্ষণৈঃ ।
বালানাং তু শুভং বাক্যং গ্রাহ্য লক্ষ্মণপূর্বজ ।তস্মাচ্ছৃণোমি তে বাক্যং সাধু যুক্তং মহামতে ।। ৭.৮৩.২০ ।।