সর্গ 82

82.1

ঋষের্বচনমাজ্ঞায় রামঃ সন্ধ্যামুপাসিতুম্ ।
উপাক্রমত্সরঃ পুণ্যমপ্সরোগণসেবিতম্ ।। ৭.৮২.১ ॥

তত্রোদকমুপস্পৃশ্য সন্ধ্যামন্বাস্য পশ্চিমাম্ ।
আশ্রমং প্রাবিশদ্রামঃ কুম্ভয়োনের্মহাত্মনঃ ।। ৭.৮২.২ ॥

তস্যাগস্ত্যো বহুগুণং কন্দমূলং তথৌষধিম্ ।
শাল্যাদীনি পবিত্রাণি ভোজনার্থমকল্পয়ৎ ।। ৭.৮২.৩ ॥

স ভুক্তবান্নরশ্রেষ্ঠস্তদন্নমমৃতোপমম্ ।
প্রীতশ্চ পরিতুষ্টশ্চ তাং রাত্রিং সমুপাবিশৎ ।। ৭.৮২.৪ ॥

প্রভাতে কাল্যমুত্থায় কৃত্বা ঽ ঽহ্নিকমরিন্দমঃ ।
ঋষিং সমুপচক্রাম গমনায় রঘূত্তমঃ ।। ৭.৮২.৫ ॥

অভিবাদ্যাব্রবীদ্রামো মহর্ষিং কুম্ভসম্ভবম্ ।
আপৃচ্ছে স্বাং পুরীং গন্তুং মামনুজ্ঞাতুমর্হসি ।। ৭.৮২.৬ ॥

ধন্যো ঽস্ম্যনুগৃহীতো ঽস্মি দর্শনেন মহাত্মনঃ ।
দ্রষ্টুং চৈবাগমিষ্যামি পাবনার্থমিহাত্মনঃ ।। ৭.৮২.৭ ॥

তথা বদতি কাকুত্স্থে বাক্যমদ্ভুতদর্শনম্ ।
উবাচ পরমপ্রীতো ধর্মনেত্রস্তপোধনঃ ।। ৭.৮২.৮ ॥

অত্যদ্ভুতমিদং বাক্যং তব রাম শুভাক্ষরম্ ।
পাবনঃ সর্বভূতানাং ত্বমেব রঘুনন্দন ।। ৭.৮২.৯ ॥

মুহূর্তমপি রাম ত্বাং যে চ পশ্যন্তি কেচন ।
পাবিতাঃ স্বর্গভূতাশ্চ পূজ্যাস্তে সর্বদৈবতৈঃ ।। ৭.৮২.১০ ॥

যে চ ত্বাং ঘোরচক্ষুর্ভিঃ পশ্যন্তি প্রাণিনো ভুবি ।
হতাস্তে যমদণ্ডেন সদ্যো নিরয়গামিনঃ ।। ৭.৮২.১১ ॥

ঈদৃশস্ত্বং রঘুশ্রেষ্ঠ পাবনঃ সর্বদেহিনাম্ ।
ভুবি ত্বাং কথয়ন্তো ঽপি সিদ্ধিমেষ্যন্তি রাঘব ।। ৭.৮২.১২ ॥

গচ্ছ চারিষ্টমব্যাগ্রঃ পন্থানমকুতোভয়ম্ ।
প্রশাধি রাজ্যং ধর্মেণ গতির্হি জগতো ভবান্ ।। ৭.৮২.১৩ ॥

এবমুক্তস্তু মুনিনা প্রাঞ্জলিঃ প্রগ্রহো নৃপঃ ।
অভ্যবাদয়ত প্রাজ্ঞস্তমৃষিং পুণ্যশালিনম্ ।। ৭.৮২.১৪ ॥

অভিবাদ্য মুনিশ্রেষ্ঠং তাংশ্চ সর্বাংস্তপোধনান্ ।
অধ্যারোহত্তদব্যগ্রঃ পুষ্পকং হেমভূষিতম্ ।। ৭.৮২.১৫ ॥

তং প্রয়ান্তং মুনিগণা হ্যাশীর্বাদৈঃ সমন্ততঃ ।
অপূজয়ন্মহেন্দ্রাভং সহস্রাক্ষমিবামরাঃ ।। ৭.৮২.১৬ ॥

স্বস্থঃ স দদৃশে রামঃ পুষ্পকে হেমভূষিতে ।
শশী মেঘসমীপস্থো যথা জলধরাগমে ।। ৭.৮২.১৭ ॥

ততো ঽর্ধদিবসে প্রাপ্তে পূজ্যমানস্ততস্ততঃ ।
অয়োধ্যাং প্রাপ্য কাকুত্স্থো মধ্যকক্ষ্যামবারুহৎ ।। ৭.৮২.১৮ ॥

ততো বিসৃজ্য রুচিরং পুষ্পকং কামগামি তৎ ।
বিসর্জয়িত্বা গচ্ছেতি স্বস্তি তে ঽস্ত্বিতি চ প্রভুঃ ।। ৭.৮২.১৯ ॥

কক্ষান্তরবিনিক্ষিপ্তং দ্বাস্স্থং রামো ঽব্রবীদ্বচঃ ।
লক্ষ্মণং ভরতং চৈব গত্বা তৌ লঘুবিক্রমৌ ।মমাগমনমাখ্যায় শব্দাপয়ত মা চিরম্ ।। ৭.৮২.২০ ।।