সর্গ 81

81.1

স মুহূর্তাদুপশ্রুত্য দেবর্ষিরমিতপ্রভঃ ।
স্বমাশ্রমং শিষ্যবৃতঃ ক্ষুধার্তঃ সন্ন্যবর্তত ।। ৭.৮১.১ ॥

সো ঽপশ্যদরজাং দীনাং রজসা সমভিপ্লুতাম্ ।
জ্যোত্স্নামিব গ্রহগ্রস্তাং প্রত্যূষে ন বিরাজতীম্ ।। ৭.৮১.২ ॥

তস্য রোষঃ সমভবত্ক্ষুধার্তস্য বিশেষতঃ ।
নির্দহন্নিব লোকাংস্ত্রীঞ্ছিষ্যাংশ্চৈতদুবাচ হ ।। ৭.৮১.৩ ॥

পশ্যধ্বং বিপরীতস্য দণ্ডস্যাবিজিতাত্মনঃ ।
বিপত্তিং ঘোরসঙ্কাশাং ক্রুদ্ধামগ্নিশিখামিব ।। ৭.৮১.৪ ॥

ক্ষয়ো ঽস্য দুর্মতেঃ প্রাপ্তঃ সানুগস্য দুরাত্মনঃ ।
যঃ প্রদীপ্তাং হুতাশস্য শিখাং বৈ স্প্রষ্টুমিচ্ছতি ।। ৭.৮১.৫ ॥

যস্মাত্স কৃতবান্পাপমীদৃশং ঘোরসংহিতম্ ।
তস্মাত্প্রাপ্স্যতি দুর্মেধাঃ ফলং পাপস্য কর্মণঃ ।। ৭.৮১.৬ ॥

সপ্তরাত্রেণ রাজাসৌ সভৃত্যবলবাহনঃ ।
পাপকর্মসমাচারো বধং প্রাপ্স্যতি দুর্মতিঃ ।। ৭.৮১.৭ ॥

সমন্তাদ্যোজনশতং বিষয়ং চাস্য দুর্মতেঃ ।
ধক্ষ্যতে পাংসুবর্ষেণ মহতা পাকশাসনঃ ।। ৭.৮১.৮ ॥

সর্বসত্বানি যানীহ স্থাবরাণি চরাণি চ ।
মহতা পাংসুবর্ষেণ বিলয়ং সর্বতো ঽগমন্ ।। ৭.৮১.৯ ॥

দণ্ডস্য বিষয়ো যাবত্তাবত্সর্বসমুচ্ছ্রয়ম্ ।
পাংসুবর্ষমিবালক্ষ্যং সপ্তরাত্রং ভবিষ্যতি ।। ৭.৮১.১০ ॥

ইত্যুক্ত্বা ক্রোধতাম্রাক্ষস্তদাশ্রমনিবাসিনম্ ।
জনং জনপদান্তেষু স্থীয়তামিতি চাব্রবীৎ ।। ৭.৮১.১১ ॥

শ্রুত্বা তূশনসো বাক্যং সো ঽ ঽশ্রমাবসথো জনঃ ।
নিষ্ক্রান্তো বিষয়াত্তস্মাত্স্থানং চক্রে ঽথ বাহ্যতঃ ।। ৭.৮১.১২ ॥

স তথোক্ত্বা মুনিজনমরজামিদমব্রবীৎ ।
ইহৈব বস দুর্মেধে আশ্রমে সুসমাহিতা ।। ৭.৮১.১৩ ॥

ইদং যোজনপর্যন্তং সরঃ সুরুচিরপ্রভম্ ।
অরজে বিজ্বরা ভুঙ্ক্ষ্ব কালশ্চাত্র প্রতীক্ষ্যতাম্ ।। ৭.৮১.১৪ ॥

ত্বত্সমীপে চ যে সত্ত্বা বাসমেষ্যন্তি তাং নিশাম্ ।
অবধ্যাঃ পাংসুবর্ষেণ তে ভবিষ্যন্তি নিত্যদা ।। ৭.৮১.১৫ ॥

শ্রুত্বা নিয়োগং ব্রহ্মর্ষেঃ সা ঽরজা ভার্গবী তদা ।
তথেতি পিতরং প্রাহ ভার্গবং ভৃশদুঃখিতা ।ইত্যুক্ত্বা ভার্গবো বাসমন্যত্র সমকারয়ৎ ।। ৭.৮১.১৬ ॥

তচ্চ রাজ্যং নরেন্দ্রস্য সভৃত্যবলবাহনম্ ।
সপ্তাহাদ্ভস্মসাদ্ভূতং যথোক্তং ব্রহ্মবাদিনা ।। ৭.৮১.১৭ ॥

তস্যাসৌ দণ্ডবিষয়ো বিন্ধ্যশৈবলয়োর্নৃপ ।
শপ্তো ব্রহ্মর্ষিণা তেন বৈধর্ম্যে সহিতে কৃতে ।। ৭.৮১.১৮ ॥

ততঃ প্রভৃতি কাকুত্স্থ দণ্ডকারণ্যমুচ্যতে ।
তপস্বিনঃ স্থিতা হ্যত্র জনস্থানমতো ঽভবৎ ।। ৭.৮১.১৯ ॥

এতত্তে সর্বমাখ্যাতং যন্মাং পৃচ্ছসি রাঘব ।
সন্ধ্যামুপাসিতুং বীর সময়ো হ্যতিবর্ততে ।। ৭.৮১.২০ ॥

এতে মহর্ষয়ঃ সর্বে পূর্ণকুম্ভাঃ সমন্ততঃ ।
কৃতোদকা নরব্যাঘ্র আদিত্যং পর্যুপাসতে ।। ৭.৮১.২১ ॥

স তৈর্ব্রাহ্মণমভ্যস্তং সহিতৈর্ব্রহ্মবিত্তমৈঃ ।
রবিরস্তং গতো রাম গচ্ছোদকমুপস্পৃশ ।। ৭.৮১.২২ ।।