সর্গ 80

80.1

এতদাখ্যায় রামায় মহর্ষিঃ কুম্ভসম্ভবঃ ।
অস্যামেবাপরং বাক্যং কথায়ামুপচক্রমে ।। ৭.৮০.১ ॥

ততঃ স দণ্ডঃ কাকুত্স্থ বহুবর্ষগণায়ুতম্ ।
অকরোত্তত্র দান্তাত্মা রাজ্যং নিহতকণ্টকম্ ।। ৭.৮০.২ ॥

অথ কালে তু কস্মিংশ্চিদ্রাজা ভার্গবমাশ্রমম্ ।
রমণীয়মুপাক্রামচ্চৈত্রে মাসি মনোরমে ।। ৭.৮০.৩ ॥

তত্র ভার্গবকন্যাং স রূপেণাপ্রতিমাং ভুবি ।
বিচরন্তীং বনোদ্দেশে দণ্ডো ঽপশ্যদনুত্তমাম্ ।। ৭.৮০.৪ ॥

স দৃষ্ট্বা তাং সুদুর্মেধা অনঙ্গশরপীডিতঃ ।
অভিগম্য সুসংবিগ্নাং কন্যাং বচনমব্রবীৎ ।। ৭.৮০.৫ ।।

কুতস্ত্বমসি সুশ্রোণি কস্য বা ঽসি সুতা শুভে ।
পীডিতো ঽহমনঙ্গেন গচ্ছামি ত্বাং শুভাননে ।। ৭.৮০.৬ ॥

তস্য ত্বেবং ব্রুবাণস্য মোহোন্মত্তস্য কামিনঃ ।
ভার্গবী প্রত্যুবাচেদং বচঃ সানুনয়ং নৃপম্ ।। ৭.৮০.৭ ॥

ভার্গবস্য সুতাং বিদ্ধি দেবস্যাক্লিষ্টকর্মণঃ ।
অরজাং নাম রাজেন্দ্র জ্যেষ্ঠামাশ্রমবাসিনীম্ ।। ৭.৮০.৮ ॥

মা মাং স্পৃশ বলাদ্রাজন্কন্যা পিতৃবশা হ্যহম্ ।
গুরুঃ পিতা মে রাজেন্দ্র ত্বং চ শিষ্যো মহাত্মনঃ ।ব্যসনং সুমহত্ক্রুদ্ধঃ স তে দদ্যান্মহাতপাঃ ।। ৭.৮০.৯ ॥

যদি বান্যন্ময়া কার্যং ধর্মদৃষ্টেন সত্পথা ।
বরয়স্ব নরশ্রেষ্ঠ পিতরং মে মহাদ্যুতিম্ ।। ৭.৮০.১০ ॥

অন্যথা তু ফলং তুভ্যং ভবেদ্ঘোরাভিসংহিতম্ ।
ক্রোধেন হি পিতা মে ঽসৌ ত্রৈলোক্যমপি নির্দহেৎ ।। ৭.৮০.১১ ॥

দাস্যতে চানবদ্যাঙ্গ তব মা যাচিতঃ পিতা ।
। ৭.৮০.১২ ॥

এবং ব্রুবাণামরজাং দণ্ডঃ কামবশং গতঃ ।
প্রত্যুবাচ মদোন্মত্তঃ শিরস্যাধায় চাঞ্জলিম্ ।। ৭.৮০.১৩ ॥

প্রসাদং কুরু সুশ্রোণি ন কালং ক্ষেপ্তুমর্হসি ।
ত্বত্কৃতে হি মম প্রাণা বিদীর্যন্তে বরাননে ।। ৭.৮০.১৪ ॥

ত্বাং প্রাপ্য মে বধো বা স্যাচ্ছাপো বা যদি দারুণঃ ।
ভক্তং ভজস্ব মাং ভীরু ভজমানং সুবিহ্বলম্ ।। ৭.৮০.১৫ ॥

এবমুক্ত্বা তু তাং কন্যাং দোর্ভ্যাং গৃহ্য বলাদ্বলী ।
বিস্ফুরন্তীং যথাকামং মৈথুনায়োপচক্রমে ।। ৭.৮০.১৬ ॥

এতমর্থং মহাঘোরং দণ্ডঃ কৃত্বা সুদারুণম্ ।
নগরং প্রয়য়াবাশু মধুমন্তমনুত্তমম্ ।। ৭.৮০.১৭ ॥

অরজা ঽপি রুদন্তী সা আশ্রমস্যাবিদূরতঃ ।
প্রতীক্ষন্তি সুসংত্রস্তা পিতরং দেবসন্নিভম্ ।। ৭.৮০.১৮ ।।