সর্গ 79

79.1

তদদ্ভুততমং বাক্যং শ্রুত্বাগস্ত্যস্য রাঘবঃ ।
গৌরবাদ্বিস্ময়াচ্চৈব পুনঃ প্রষ্টুং প্রচক্রমে ।। ৭.৭৯.১ ॥

ভগবংস্তদ্বনং ঘোরং তপস্তপ্যতি যত্র সঃ ।
শ্বেতো বৈদর্ভকো রাজা কথং স্যাদমৃগদ্বিজম্ ।। ৭.৭৯.২ ॥

তদ্বনং স কথ রাজা শূন্যং মনুজবর্জিতম্ ।
তপশ্চর্তুং প্রবিষ্টঃ স শ্রোতুমিচ্ছামি তত্ত্বতঃ ।। ৭.৭৯.৩ ॥

রামস্য বচনং শ্রুত্বা কৌতূহলসমন্বিতম্ ।
বাক্যং পরমতেজস্বী বক্তুমেবোপচক্রমে ।। ৭.৭৯.৪ ॥

পুরা কৃতয়ুগে রাম মনুর্দণ্ডধরঃ প্রভুঃ ।
তস্য পুত্রো মহানাসীদিক্ষ্বাকুঃ কুলনন্দনঃ ।। ৭.৭৯.৫ ॥

তং পুত্রং পূর্বংকং রাজ্যে নিক্ষিপ্য ভুবি দুর্জয়ম্ ।
পৃথিব্যাং রাজবংশানাং ভব কর্তেত্যুবাচ হ ।। ৭.৭৯.৬ ॥

তথৈবেতি প্রতিজ্ঞাতং পিতুঃ পুত্রেণ রাঘব ।
ততঃ পরমসন্তুষ্টো মনুঃ পুত্রমুবাচ হ ।। ৭.৭৯.৭ ॥

প্রীতো ঽস্মি পরমোদার ত্বং কর্তা ঽসি ন সংশয়ঃ ।
দণ্ডেন চ প্রজা রক্ষ মা চ দণ্ডমকারণে ।। ৭.৭৯.৮ ॥

অপরাধিষু যো দণ্ডঃ পাত্যতে মানবেষু বৈ ।
স দণ্ডো বিধিবন্মুক্তঃ স্বর্গং নয়তি পার্থিবম্ ।। ৭.৭৯.৯ ॥

তস্মাদ্দণ্ডে মহাবাহো যত্নবান্ভব পুত্রক ।
ধর্মো হি পরমো লোকে কুর্বতস্তে ভবিষ্যতি ।। ৭.৭৯.১০ ॥

ইতি তং বহু সন্দিশ্য মনুঃ পুত্রং সমাধিনা ।
জগাম ত্রিদিবং হৃষ্টো ব্রহ্মলোকং সনাতনম্ ।। ৭.৭৯.১১ ॥

প্রয়াতে ত্রিদিবং তস্মিন্নিক্ষ্বাকুরমিতপ্রভঃ ।
জনয়িষ্যে কথং পুত্রানিতি চিন্তাপরো ঽভবৎ ।। ৭.৭৯.১২ ॥

কর্মভির্বহুরূপৈশ্চ তৈস্তৈর্মনুসুতস্সুতান্ ।
জনয়ামাস ধর্মাত্মা শতং দেবসুতোপমান্ ।। ৭.৭৯.১৩ ॥

তেষামবরজস্তাত সর্বেষাং রঘুনন্দন ।
মূঢশ্চাকৃতবিদ্যশ্চ ন শুশ্রূষতি পূর্বজান্ ।। ৭.৭৯.১৪ ॥

নাম তস্য চ দণ্ডেতি পিতা চক্রে ঽল্পমেধসঃ ।
অবশ্যং দণ্ডপতনং শরীরে ঽস্য ভবিষ্যতি ।। ৭.৭৯.১৫ ॥

অপশ্যমানস্তং দেশং ঘোরং পুত্রস্য রাঘব ।
বিন্ধ্যশৈবলয়োর্মধ্যে রাজ্যং প্রাদাদরিন্দম ।। ৭.৭৯.১৬ ॥

স দণ্ডস্তত্র রাজাভূদ্রম্যে পর্বতরোধসি ।
পুরং চাপ্রতিমং রাম ন্যবেশয়দনুত্তমম্ ।। ৭.৭৯.১৭ ॥

পুরস্য চাকরোন্নাম মধুমন্তমিতি প্রভো ।
পুরোহিতং তূশনসং বরয়ামাস সুব্রতম্ ।। ৭.৭৯.১৮ ॥

এবং স রাজা তদ্রাজ্যমকরোত্সপুরোহিতঃ ।
প্রহৃষ্টমনুজাকীর্ণং দেবরাজং যথা বৃষা ।। ৭.৭৯.১৯ ॥

ততঃ স রাজা মনুজেন্দ্রপুত্রঃ সার্ধং চ তেনোশনসা তদানীম্ ।
চকার রাজ্যং সুমহান্মহাত্মা শক্রো দিবীবোশনসা সমেতঃ ।। ৭.৭৯.২০ ।।