Utshovসর্গ 78
78.1
শ্রুত্বা তু ভাষিতং বাক্যং মম রাম শুভাক্ষরম্ ।
প্রাঞ্জলিঃ প্রত্যুবাচেদং স স্বর্গী রঘুনন্দন ।। ৭.৭৮.১ ॥
78.2
শৃণু ব্রহ্মন্পুরা বৃত্তং মমৈতত্সুখদুঃখয়োঃ ।
অনতিক্রমণীয়ং হি যথা পৃচ্ছসি মাং দ্বিজ ।। ৭.৭৮.২ ॥
78.3
পুরা বৈদর্ভকো রাজা পিতা মম মহায়শাঃ ।
সুদেব ইতি বিখ্যাতস্ত্রিষু লোকেষু বীর্যবান্ ।। ৭.৭৮.৩ ॥
78.4
তস্য পুত্রদ্বয়ং ব্রহ্মন্দ্বাভ্যাং স্ত্রীভ্যামজায়ত ।
অহং শ্বেত ইতি খ্যাতো যবীয়ান্সুরথো ঽভবৎ ।। ৭.৭৮.৪ ॥
78.5
ততঃ পিতরি স্বর্যাতে পৌরা মামভ্যষেচয়ন্ ।
তত্রাহং কৃতবান্রাজ্যং ধর্ম্যং চ সুসমাহিতঃ ।। ৭.৭৮.৫ ॥
78.6
এবং বর্ষসহস্রাণি সমতীতানি সুব্রত ।
রাজ্যং কারয়তো ব্রহ্মন্প্রজা ধর্মেণ রক্ষতঃ ।। ৭.৭৮.৬ ॥
78.7
সো ঽহং নিমিত্তে কস্মিংশ্চিদ্বিজ্ঞাতায়ুর্দ্বিজোত্তম ।
কালধর্মং হৃদি ন্যস্য ততো বনমুপাগমম্ ।। ৭.৭৮.৭ ॥
78.8
সো ঽহং বনমিদং দুর্গং মৃগপক্ষিবিবর্জিতম্ ।
তপশ্চর্তুং প্রবিষ্টো ঽস্মি সমীপে সরসঃ শুভে ।। ৭.৭৮.৮ ॥
78.9
ভ্রাতরং সুরথং রাজ্যে হ্যভিষিচ্য মহীপতিম্ ।
ইদং সরঃ সমাসাদ্য তপস্তপ্তং ময়া চিরম্ ।। ৭.৭৮.৯ ॥
78.10
সো ঽহং বর্ষসহস্রাণি তপস্ত্রীণি মহাবনে ।
তপ্ত্বা সুদুষ্করং প্রাপ্তো ব্রহ্মলোকমনুত্তমম্ ।। ৭.৭৮.১০ ॥
78.11
তস্য মে স্বর্গভূতস্য ক্ষুত্পিপাসে দ্বিজোত্তম ।
বাধেতে পরমোদার ততো ঽহং ব্যথিতেন্দ্রিয়ঃ ।গত্বা ত্রিভুবনশ্রেষ্ঠং পিতামহমুবাচ হ ।। ৭.৭৮.১১ ॥
78.12
ভগবন্ব্রহ্মলোকো ঽয়ং ক্ষুত্পিপাসাবিবর্জিতঃ ।
কস্যায়ং কর্মণঃ পাকঃ ক্ষুত্পিপাসানুগো হ্যহম্ ।। ৭.৭৮.১২ ॥
78.13
আহারঃ কশ্চ মে দেব তন্মে ব্রূহি পিতামহ ।
। ৭.৭৮.১৩ ॥
78.14
পিতামহস্তু মামাহ তবাহারঃ সুদেবজ ।
স্বাদূনি স্বানি মাংসানি তানি ভক্ষয় নিত্যশঃ ।। ৭.৭৮.১৪ ॥
78.15
স্বশরীরং ত্বয়া পুষ্টং কুর্বতা তপ উত্তমম্ ।
অনুপ্তং রোহতে শ্বেত ন কদাচিন্মহামতে ।। ৭.৭৮.১৫ ॥
78.16
তৃপ্তির্ন তে ঽস্তি সূক্ষ্মা ঽপি বনে সত্বনিষেবিতে ।
পুরা তু ভিক্ষমাণায় ভিক্ষা বৈ যতয়ে নৃপ ।ন হি দত্তা ত্বয়েন্দ্রাভ যস্মাদতিথয়ে ঽপি বৈ ।। ৭.৭৮.১৬ ।।
78.17
দত্তং ন তে ঽস্তি সূক্ষ্মো ঽপি তপ এব নিষেবসে ।
তেন স্বর্গগতো বত্স বাধ্যসে ক্ষুত্পিপাসয়া ।। ৭.৭৮.১৭ ॥
78.18
স ত্বং সুপুষ্টমাহারৈঃ স্বশরীরমনুত্তমম্ ।
ভক্ষয়িত্বামৃতরসং তেন তৃপ্তির্ভবিষ্যতি ।। ৭.৭৮.১৮ ॥
78.19
যদা তু তদ্বনং শ্বেত অগস্ত্যঃ সুমহানৃষিঃ ।
আগমিষ্যতি দুর্ধর্ষস্তদা কৃচ্ছ্রাদ্বিমোক্ষ্যতে ।। ৭.৭৮.১৯ ॥
78.20
স হি তারয়িতুং সৌম্য শক্তঃ সুরগণানপি ।
কিং পুনস্ত্বাং মহাবাহো ক্ষুত্পিপাসাবশং গতম্ ।। ৭.৭৮.২০ ॥
78.21
সো ঽহং ভগবতঃ শ্রুত্বা দেবদেবস্য নিশ্চয়ম্ ।
আহারং গর্হিতং স্বশরীরং দ্বিজোত্তম ।। ৭.৭৮.২১ ॥
78.22
বহূন্বর্ষগণান্ব্রহ্মন্ভুজ্যমানমিদং ময়া ।
ক্ষয়ং নাভ্যেতি ব্রহ্মর্ষে তৃপ্তিশ্চাপি মমোত্তমা ।। ৭.৭৮.২২ ॥
78.23
তস্য মে কৃচ্ছ্রভূতস্য কৃচ্ছ্রাদস্মাদ্বিমোচয় ।
অন্যেষাং ন গতির্হ্যত্র কুম্ভয়োনিমৃতে দ্বিজম্ ।। ৭.৭৮.২৩ ॥
78.24
ইদমাভরণং সৌম্য তারণার্থং দ্বিজোত্তম ।
প্রতিগৃহ্ণীষ্ব ভদ্রং তে প্রসাদং কর্তুমর্হসি ।। ৭.৭৮.২৪ ॥
78.25
ইদং তাবত্সুবর্ণং চ ধনং বস্ত্রাণি চ দ্বিজ ।
ভক্ষ্যং ভোজ্যং চ ব্রহ্মর্ষে দদাত্যাভরণানি চ ।। ৭.৭৮.২৫ ॥
78.26
সর্বান্কামান্প্রয়চ্ছামি ভোগাংশ্চ মুনিপুঙ্গব ।
তারণে ভগবন্মহ্যং প্রসাদং কর্তুমর্হসি ।। ৭.৭৮.২৬ ॥
78.27
তস্যাহং স্বর্গিণো বাক্যং শ্রুত্বা দুঃখসমন্বিতম্ ।
তারণায়োপজগ্রাহ তদাভরণমুত্তমম্ ।। ৭.৭৮.২৭ ॥
78.28
ময়া প্রতিগৃহীতে তু তস্মিন্নাভরণে শুভে ।
মানুষঃ পূর্বকো দেহো রাজর্ষের্বিননাশ হ ।। ৭.৭৮.২৮ ॥
78.29
প্রনষ্টে তু শরীরে ঽসৌ রাজর্ষিঃ পরয়া মুদা ।
তৃপ্তঃ প্রমুদিতো রাজা জগাম ত্রিদিবং সুখম্ ।। ৭.৭৮.২৯ ॥
78.30
তেনেদং শক্রতুল্যেন দিব্যমাভরণং মম ।
তস্মিন্নিমিত্তে কাকুত্স্থ দত্তমদ্ভুতদর্শনম্ ।। ৭.৭৮.৩০ ।।