সর্গ 77

77.1

পুরা ত্রেতায়ুগে রাম বভূব বহুবিস্তরম্ ।
সমন্তাদ্যোজনশতং বিমৃগং পক্ষিবর্জিতম্ ।। ৭.৭৭.১ ॥

তস্মিন্নির্মানুষে ঽরণ্যে কুর্বাণস্তপ উত্তমম্ ।
অহমাক্রমিতুং সৌম্য তদরণ্যমুপাগমম্ ।। ৭.৭৭.২ ॥

তস্য রূপমরণ্যস্য নির্দেষ্টুং ন শশাক হ ।
ফলমূলৈঃ সুখাস্বাদৈর্বহুরূপৈশ্চ পাদপৈঃ ।। ৭.৭৭.৩ ॥

তস্যারণ্যস্য মধ্যে তু সরো যোজনমায়তম্ ।
হংসকারণ্ডবাকীর্ণং চক্রবাকোপশোভিতম্ ।। ৭.৭৭.৪ ॥

পদ্মোত্পলসমাকীর্ণং সমতিক্রান্তশৈবলম্ ।
তদাশ্চর্যমিবাত্যর্থং সুখাস্বাদমনুত্তমম্ ।। ৭.৭৭.৫ ॥

অরজস্কং তথা ঽক্ষোভ্যং শ্রীমত্পক্ষিগণায়ুতম্ ।
সমীপে তস্য সরসো মহদদ্ভুতমাশ্রমম্ ।। ৭.৭৭.৬ ॥

পুরাণং পুণ্যমত্যর্থং তপস্বিজনবর্জিতম্ ।
তত্রাহমবসং রাত্রিং নৈদাঘীং পুরুষর্ষভ ।। ৭.৭৭.৭ ॥

প্রভাতে কাল্যমুত্থায় সরস্তদুপচক্রমে ।
অথাপশ্যং শবং তত্র সুপুষ্টমজরং ক্বচিৎ ।। ৭.৭৭.৮ ॥

পঙ্কিভেদেন পুষ্টাঙ্গং সমাশ্রিতসরোবরম্ ।
তিষ্ঠন্তং পরয়া লক্ষ্ম্যা তস্মিংস্তোয়াশয়ে নৃপ ।। ৭.৭৭.৯ ॥

তমর্থং চিন্তয়ানো ঽহং মুহূর্তং তত্র রাঘব ।
উষিতো ঽস্মি সরস্তীরে কিন্ন্বিদং স্যাদিতি প্রভো ।। ৭.৭৭.১০ ॥

অথাপশ্যং মুহূর্তেন দিব্যমদ্ভুতদর্শনম্ ।
বিমানং পরমোদারং হংসয়ুক্তং মনোজবম্ ।। ৭.৭৭.১১ ॥

অত্যর্থং স্বর্গিণং ত বিমানে রঘুনন্দন ।
উপাস্তে ঽপ্সরসাং বীর সহস্রং দিব্যভূষণম্ ।। ৭.৭৭.১২ ॥

গায়ন্তি দিব্যগেয়ানি বাদয়ন্তি তথা ঽপরাঃ ।
ক্ষ্বেলয়ন্তি তথা চান্যা নৃত্যন্তি চ তথা ঽপরাঃ ।। ৭.৭৭.১৩ ॥

অপরাশ্চন্দ্ররশ্ম্যাভৈর্হেমদণ্ডৈশ্চ চামরৈঃ ।
দোধূয়ুর্বদনং তস্য পুণ্ডরীকনিভেক্ষণম্ ।। ৭.৭৭.১৪ ॥

ততঃ সিংহাসনং ত্যক্ত্বা মেরুকূটমিবাংশুমান্ ।
পশ্যতো মে তদা রাম বিমানাদবরুহ্য চ ।তং শবং ভক্ষয়ামাস স স্বর্গী রঘুনন্দন ।। ৭.৭৭.১৫ ॥

তথা ভুক্ত্বা যথাকামং মাংসং বহু সুপীবরম্ ।
অবতীর্য সরঃ স্বর্গী সংস্প্রষ্টুমুপচক্রমে ।। ৭.৭৭.১৬ ॥

উপস্পৃশ্য যথান্যায়ং স স্বর্গী রঘুপুঙ্গব ।
আরোঢুমুপচক্রাম বিমানবরমুত্তমম্ ।। ৭.৭৭.১৭ ॥

তমহং দেবসঙ্কাশমারোহন্তমুদীক্ষ্য বৈ ।
অথাহমব্রুবং বাক্যং স্বর্গিণং পুরুষর্ষভ ।। ৭.৭৭.১৮ ॥

কো ভবান্দেবসঙ্কাশ আহারশ্চ বিগর্হিতঃ ।
ত্বয়েদং ভুজ্যতে সৌম্য কিমর্থং বক্তুমর্হসি ।। ৭.৭৭.১৯ ॥

কস্য স্যাদীদৃশো ভাব আহারো দেবসম্মতঃ ।
আশ্চর্যং বর্ততে সৌম্য শ্রোতুমিচ্ছামি তত্ত্বতঃ ।। ৭.৭৭.২০ ॥

নাহমৌপয়িকং মন্যে তব ভক্ষ্যমিদং শবম্ ।
। ৭.৭৭.২১ ॥

ইত্যেবমুক্তঃ স নরেন্দ্র নাকী কৌতূহলাত্সূনৃতয়া গিরা চ ।
শ্রুত্বা চ বাক্যং মম সর্বমেতত্সর্বং তথা চাকথয়ন্মমেতি ।। ৭.৭৭.২২ ।।