Utshovসর্গ 76
76.1
তস্য তদ্বচনং শ্রুত্বা রামস্যাক্লিষ্টকর্মণঃ ।
অবাক্ছিরাস্তথাভূত্বা বাক্যমেতদুবাচ হ ।। ৭.৭৬.১ ॥
76.2
শূদ্রয়োন্যাং প্রসূতো ঽস্মি শম্বূকো নাম নামতঃ ।
দেবত্বং পার্থয়ে রাম সশরীরো মহায়শঃ ।। ৭.৭৬.২ ॥
76.3
ন মিথ্যা ঽহং বদে রাম দেবলোকজিগীষয়া ।
শূদ্রং মাং বিদ্ধি কাকুত্স্থ তপ উগ্রং সমাস্থিতম্ ।। ৭.৭৬.৩ ॥
76.4
ভাষতস্তস্য শূদ্রস্য খড্গং সুরুচিরপ্রভম্ ।
নিষ্কৃষ্য কোশাদ্বিমলং শিরশ্চিচ্ছেদ রাঘবঃ ।। ৭.৭৬.৪ ॥
76.5
তস্মিঞ্ছূদ্রে হতে দেবাঃ সেন্দ্রাঃ সাগ্নিপুরোগমাঃ ।
সাধু সাধ্বিতি কাকুত্স্থং প্রশশংসুর্মুহুর্মুহুঃ ।। ৭.৭৬.৫ ॥
76.6
পুষ্পবৃষ্টির্মহত্যাসীদ্দিব্যানাং সুসুগন্ধিনাম্ ।
পুষ্পাণাং বায়ুমুক্তানাং সর্বতঃ প্রপপাত হ ।। ৭.৭৬.৬ ॥
76.7
সুপ্রীতাশ্চাব্রুবন্রামং দেবাঃ সত্যপরাক্রমম্ ।
সুরকার্যমিদং সৌম্য সুকৃতং তে মহামতে ।। ৭.৭৬.৭ ॥
76.8
গৃহাণ চ বরং সৌম্য যত্ত্বমিচ্ছস্যরিন্দম ।
স্বর্গভাঙ্নহি শূদ্রো ঽয়ং ত্বত্কৃতে রঘুনন্দন ।। ৭.৭৬.৮ ॥
76.9
দেবানাং ভাষিতং শ্রুত্বা রাঘবঃ সুসমাহিতঃ ।
উবাচ প্রাঞ্জলির্বাক্যং সহস্রাক্ষং পুরন্দরম্ ।। ৭.৭৬.৯ ॥
76.10
যদি দেবাঃ প্রসন্না মে দ্বিজপুত্রঃ স জীবতু ।
দিশন্তু বরমেতং মে ইপ্সিতং পরমং মম ।। ৭.৭৬.১০ ॥
76.11
মমাপচারাদ্যাতো ঽসৌ ব্রাহ্মণস্যৈকপুত্রকঃ ।
অপ্রাপ্তকালঃ কালেন নীতো বৈবস্বতক্ষয়ম্ ।। ৭.৭৬.১১ ॥
76.12
তং জীবয়থ ভদ্রং বো নানৃতং কর্তুমর্হথ ।
দ্বিজস্য সংশ্রুতো ঽর্থো মে জীবয়িষ্যামি তে সুতম্ ।। ৭.৭৬.১২ ॥
76.13
রাঘবস্য তু তদ্বাক্যং শ্রুত্বা বিবুধসত্তমাঃ ।
প্রত্যুচূ রাঘবং প্রীতা দেবাঃ প্রীতিসমন্বিতম্ ।। ৭.৭৬.১৩ ॥
76.14
নির্বৃতো ভব কাকুত্স্থ সো ঽস্মিন্নহনি বালকঃ ।
জীবিতং প্রাপ্তবান্ভূয়ঃ সমেতশ্চাপি বন্ধুভিঃ ।। ৭.৭৬.১৪ ॥
76.15
যস্মিন্মুহূর্তে কাকুত্স্থ শূদ্রো ঽয়ং বিনিপাতিতঃ ।
তস্মিন্মুহূর্তে বালো ঽসৌ জীবেন সময়ুজ্যত ।। ৭.৭৬.১৫ ॥
76.16
স্বস্তি প্রাপ্নুহি ভদ্রং তে সাধু যাম নরর্ষভ ।
অগস্ত্যস্যাশ্রমপদং দ্রষ্টুমিচ্ছাম রাঘব ।। ৭.৭৬.১৬ ॥
76.17
তস্য দীক্ষা সমাপ্তা হি ব্রহ্মর্ষেঃ সুমহাদ্যুতেঃ ।
দ্বাদশং হি গতং বর্ষং জলশয্যাং সমাসতঃ ।। ৭.৭৬.১৭ ॥
76.18
কাকুত্স্থ তদ্গমিষ্যামো মুনিং সমভিনন্দিতুম্ ।
ত্বং চাপ্যাগচ্ছ ভদ্রং তে দ্রষ্টুং তমৃষিসত্তমম্ ।। ৭.৭৬.১৮ ॥
76.19
স তথেতি প্রতিজ্ঞায় দেবানাং রঘুনন্দনঃ ।
আরুরোহ বিমানং তং পুষ্পকং হেমভূষিতম্ ।। ৭.৭৬.১৯ ॥
76.20
ততো দেবাঃ প্রয়াতাস্তে বিমানৈর্বহুবিস্তরৈঃ ।
রামো ঽপ্যনুজগামাশু কুম্ভয়োনেস্তপোবনম্ ।। ৭.৭৬.২০ ॥
76.21
দৃষ্ট্বা তু দেবান্সম্প্রাপ্তানগস্ত্যস্তপসাং নিধিঃ ।
অর্চয়ামাস ধর্মাত্মা সর্বাংস্তানবিশেষতঃ ।। ৭.৭৬.২১ ॥
76.22
প্রতিগৃহ্য ততঃ পূজাং সম্পূজ্য চ মহামুনিম্ ।
জগ্মুস্তে ত্রিদশা হৃষ্টা নাকপৃষ্ঠং সহানুগৈঃ ।। ৭.৭৬.২২ ॥
76.23
গতেষু তেষু কাকুত্স্থঃ পুষ্পকাদবরুহ্য চ ।
ততো ঽভিবাদয়ামাস হ্যগস্ত্যমৃষিসত্তমম্ ।। ৭.৭৬.২৩ ॥
76.24
সো ঽভিবাদ্য মহাত্মানং জ্বলন্তমিব তেজসা ।
আতিথ্যং পরমং প্রাপ্য নিষসাদ নরাধিপঃ ।। ৭.৭৬.২৪ ॥
76.25
তমুবাচ মহাতেজাঃ কুম্ভয়োনির্মহাতপাঃ ।
স্বাগতং তে নরশ্রেষ্ঠ দিষ্ট্যা প্রাপ্তো ঽসি রাঘব ।। ৭.৭৬.২৫ ॥
76.26
ত্বং মে বহুমতো রাম গুণৈর্বহুভিরুত্তমৈঃ ।
অতিথিঃ পূজনীয়শ্চ মম নিত্যং হৃদি স্থিতঃ ।। ৭.৭৬.২৬ ॥
76.27
সুরা হি কথয়ন্তি ত্বামাগতং শূদ্রঘাতিনম্ ।
ব্রাহ্মণস্য তু ধর্মেণ ত্বয়া জীবাপিতঃ সুতঃ ।। ৭.৭৬.২৭ ॥
76.28
উষ্যতাং চেহ রজনী সকাশে মম রাঘব ।
প্রভাতে পুষ্পকেণ ত্বং গন্তা ঽসি পুরমেব হি ।। ৭.৭৬.২৮ ॥
76.29
ত্বং হি নারায়ণঃ শ্রীমাংস্ত্বয়ি সর্বং প্রতিষ্ঠিতম্ ।
ত্বং প্রভুঃ সর্বদেবানাং পুরুষস্ত্বং সনাতনঃ ।। ৭.৭৬.২৯ ॥
76.30
ইদং চাভরণং সৌম্য নির্মিতং বিশ্বকর্মণা ।
দিব্যং দিব্যেন বপুষা দীপ্যমানং স্বতেজসা ।প্রতিগৃহ্ণীষ্ব কাকুত্স্থ মত্প্রিয়ং কুরু রাঘব ।। ৭.৭৬.৩০ ॥
76.31
দত্তস্য হি পুনর্দানে সুমহত্ফলমুচ্যতে ।
ভরণে হি ভবান্ শক্তঃ সেন্দ্রাণাং মরুতামপি ।। ৭.৭৬.৩১ ॥
76.32
ত্বং হি শক্তস্তারয়িতুং সেন্দ্রানপি দিবৌকসঃ ।
তস্মাত্প্রদাস্যে বিধিবত্তত্প্রতীচ্ছ নরাধিপ ।। ৭.৭৬.৩২ ॥
76.33
দিব্যমাভরণং চিত্রং প্রদীপ্তমিব ভাস্করম্ ।
। ৭.৭৬.৩৩ ॥
76.34
অথোবাচ মহাত্মানমিক্ষ্বাকূণাং মহারথঃ ।
রামো মতিমতাং শ্রেষ্ঠঃ ক্ষত্রধর্মমনুস্মরন্ ।। ৭.৭৬.৩৪ ॥
76.35
প্রতিগ্রহো ঽয়ং ভগবন্ব্রাহ্মণস্যাবিগর্হিতঃ ।
গৃহ্ণীয়াং ক্ষত্রিয়ো ঽহং বৈ কথং ব্রাহ্মণপুঙ্গব ।। ৭.৭৬.৩৫ ॥
76.36
ব্রাহ্মণেন বিশেষেণ দত্তং তদ্বক্তুমর্হসি ।
এবমুক্তস্তু রামেণ প্রত্যুবাচ মহানৃষিঃ ।। ৭.৭৬.৩৬ ॥
76.37
আসন্কৃতয়ুগে রাম ব্রহ্মভূতে পুরায়ুগে ।
অপার্থিবাঃ প্রজাঃ সর্বাঃ সুরাণাং তু শতক্রতুঃ ।। ৭.৭৬.৩৭ ॥
76.38
তাঃ প্রজা দেবদেবেশং রাজার্থং সমুপাদ্রবন্ ।
সুরাণাং স্থাপিতো রাজা ত্বয়া দেব শতক্রতুঃ ।। ৭.৭৬.৩৮ ॥
76.39
প্রয়চ্ছ নো হি লোকেশ পার্থিবং নরপুঙ্গবম্ ।
যস্মৈ পূজাং প্রয়ুঞ্জানা ধূতপাপাশ্চরেমহি ।ন বসামো বিনা রাজ্ঞা এষ নো নিশ্চয়ঃ পরঃ ।। ৭.৭৬.৩৯ ॥
76.40
প্রজানাং বচনং শ্রুত্বা নিশ্চয়িত্বা ঽর্থমুত্তমম্ ।
। ৭.৭৬.৪০ ॥
76.41
ততো ব্রহ্মা সুরশ্রেষ্ঠো লোকপালান্সবাসবান্ ।
সমাহূয়াব্রবীত্সর্বাংস্তেজোভাগান্প্রয়চ্ছত ।। ৭.৭৬.৪১ ॥
76.42
ততো দদুর্লোকপালাঃ সর্বে ভাগান্স্বতেজসঃ ।
অক্ষুপচ্চ ততো ব্রহ্মা যতো জাতঃ ক্ষুপো নৃপঃ ।। ৭.৭৬.৪২ ॥
76.43
তং ব্রহ্মা লোকপালানাং সহাংশৈঃ সময়োজয়ৎ ।
ততো দদৌ নৃপং তাসাং প্রজানামীশ্বরং ক্ষুপম্ ।। ৭.৭৬.৪৩ ॥
76.44
তত্রৈন্দ্রেণ চ ভাগেন মহীমাজ্ঞাপয়ন্নৃপঃ ।
বারুণেন তু ভাগেন বপুঃ পুষ্যতি পার্থিবঃ ।। ৭.৭৬.৪৪ ॥
76.45
কৌবেরেণ তু ভাগেন বিত্তমাসাং দদৌ তদা ।
যস্তু যাম্যো ঽভবদ্ভাগস্তেন শাস্তি স্ম স প্রজাঃ ।। ৭.৭৬.৪৫ ॥
76.46
তত্রৈন্দ্রেণ নরশ্রেষ্ঠ ভাগেন রঘুনন্দন ।
প্রতিগৃহ্ণীষ্ব ভদ্রং তে তারণার্থং মম প্রভো ।। ৭.৭৬.৪৬ ॥
76.47
তস্য তদ্বচনং শ্রুত্বা ঋষেঃ পরমধার্মিকম্ ।
তদ্রামঃ প্রতিজগ্রাহ মুনেরাভরণং বরম্ ।। ৭.৭৬.৪৭ ॥
76.48
প্রতিগৃহ্য ততো রামস্তদাভরণমুত্তমম্ ।
আগমং তস্য দীপ্তস্য প্রষ্টুমেবোপচক্রমে ।। ৭.৭৬.৪৮ ॥
76.49
অত্যদ্ভুতমিদং দিব্যং বপুষা যুক্তমুত্তমম্ ।
কথং বা ভগবতা প্রাপ্তং কুতো বা কেন বা হৃতম্ ।। ৭.৭৬.৪৯ ॥
76.50
কুতূহলিতয়া ব্রহ্মন্পৃচ্ছামি ত্বাং মহায়শঃ ।
আশ্চর্যাণাং বহূনাং হি নিধিঃ পরমকো ভবান্ ।। ৭.৭৬.৫০ ॥
76.51
এবং ব্রুবতি কাকুত্স্থে মুনির্বাক্যমথাব্রবীৎ ।
শৃণু রাম যথাবৃত্তং পুরা ত্রেতায়ুগে যুগে ।। ৭.৭৬.৫১ ॥
76.52
রমণীয়প্রদেশে ঽস্মিন্ বনে যদ্দৃষ্টবানহম্ ।
আশ্চর্যং মে মহাবাহো দানমাশ্রিত্য কেবলম্ ।। ৭.৭৬.৫২ ।।