সর্গ 75

75.1

নারদস্য তু তদ্বাক্যং শ্রুত্বা ঽমৃতময়ং তদা ।
প্রহর্ষমতুলং লেভে লক্ষ্মণং চেদমব্রবীৎ ।। ৭.৭৫.১ ॥

গচ্ছ সৌম্য দ্বিজশ্রেষ্ঠং সমাশ্বাসয় সুব্রতম্ ।
বালস্য তু শরীরং তত্তৈলদ্রোণ্যাং নিধাপয় ।। ৭.৭৫.২ ॥

গন্ধৈশ্চ পরমোদারৈস্তৈলৈশ্চাপি সুগন্ধিভিঃ ।
যথা ন ক্ষীয়তে বালস্তথা সৌম্য বিধীয়তাম্ ।। ৭.৭৫.৩ ॥

যথা শরীরো বালস্য গুপ্তঃ সন্ শিষ্টকর্মণঃ ।
বিপত্তিঃ পরিভেদো বা ন ভবেচ্চ তথা কুরু ।। ৭.৭৫.৪ ॥

এবমাদিশ্য কাকুত্স্থো লক্ষ্মণং শুভলক্ষণম্ ।
মনসা পুষ্পকং দধ্যাবাগচ্ছেতি মহায়শাঃ ।। ৭.৭৫.৫ ॥

ইঙ্গিতং স তু বিজ্ঞায় পুষ্পকো হেমভূষিতঃ ।
আজগাম মুহূর্তেন সমীপে রাঘবস্য বৈ ।। ৭.৭৫.৬ ॥

সো ঽব্রবীত্প্রণতো ভূত্বা অয়মস্মি নরাধিপ ।
বশ্যস্তব মহাবাহো কিঙ্করঃ সমুপস্থিতঃ ।। ৭.৭৫.৭ ॥

ভাষিতং রুচিরং শ্রুত্বা পুষ্পকস্য নরাধিপঃ ।
অভিবাদ্য মহর্ষীংস্তান্ বিমানং সো ঽধ্যরোহত ।। ৭.৭৫.৮ ॥

ধনুর্গৃহীত্বা তূণী চ খড্গং চ রুচিরপ্রভম্ ।
নিক্ষিপ্য নগরে বীরৌ সৌমিত্রিভরতাবুভৌ ।। ৭.৭৫.৯ ॥

প্রায়াত্প্রতীচীং হরিতং বিচিন্বংশ্চ ততস্ততঃ ।
উত্তরামগমচ্ছ্রীমান্দিশং হিমবতা বৃতাম্ ।। ৭.৭৫.১০ ॥

অপশ্যমানস্তত্রাপি স্বল্পমপ্যথ দুষ্কৃতম্ ।
পূর্বামপি দিশং সর্বামথো ঽপশ্যন্নরাধিপঃ ।। ৭.৭৫.১১ ॥

প্রবিশুদ্ধসমাচারামাদর্শতলনির্মলাম্ ।
পুষ্পকস্থো মহাবাহুস্তদাপশ্যন্নরাধিপঃ ।। ৭.৭৫.১২ ॥

দক্ষিণাং দিশমাক্রামত্ততো রাজর্ষিনন্দনঃ ।
শৈবলস্যোত্তরে পার্শ্বে দদর্শ সুমহত্সরঃ ।। ৭.৭৫.১৩ ॥

তস্মিন্সরসি তপ্যন্তং তাপসং সুমহত্তপঃ ।
দদর্শ রাঘবঃ শ্রীমাঁল্লম্বমানমধোমুখম্ ।। ৭.৭৫.১৪ ॥

রাঘবস্তমুপাগম্য তপ্যন্তং তপ উত্তমম্ ।
উবাচ স তদা বাক্যং ধন্যস্ত্বমসি সুব্রত ।। ৭.৭৫.১৫ ॥

কস্যাং যোন্যাং তপোবৃদ্ধ বর্তসে দৃঢবিক্রম ।
কৌতূহলাত্ত্বাং পৃচ্ছামি রামো দাশরথির্হ্যহম্ ।। ৭.৭৫.১৬ ॥

কো ঽর্থো মনীষিতস্তুভ্যং স্বর্গলাভঃ পরো ঽথবা ।
বরাশ্রয়ো যদর্থং ত্বং তপস্যসি সুদুষ্করম্ ।যমাশ্রিত্য তপস্তপ্তং শ্রোতুমিচ্ছামি তাপস ।। ৭.৭৫.১৭ ॥

ব্রাহ্মণো বা ঽসি ভদ্রং তে ক্ষত্রিয়ো বা ঽসি দুর্জয়ঃ ।
বৈশ্যস্তৃতীয়বর্ণো বা শূদ্রো বা সত্যবাগ্ভব ।। ৭.৭৫.১৮ ।।

ইত্যেবমুক্তঃ স নরাধিপেন হ্যবাক্ছিরা দাশরথায় তস্মৈ ।
উবাচ জাতিং নৃপপুঙ্গবায় যত্কারণে চৈব তপঃপ্রয়ত্নঃ ।। ৭.৭৫.১৯ ।।