Utshovসর্গ 74
74.1
তথা তু করুণং তস্য দ্বিজস্য পরিদেবনম্ ।
শুশ্রাব রাঘবঃ সর্বং দুঃখশোকসমন্বিতম্ ।। ৭.৭৪.১ ॥
74.2
স দুঃখেন চ সন্তপ্তো মন্ত্রিণস্তানুপাহ্বয়ৎ ।
বসিষ্ঠং বামদেবং চ ভ্রাতরৌ সহ নৈগমান্ ।। ৭.৭৪.২ ॥
74.3
ততো দ্বিজা বসিষ্ঠেন সার্ধমষ্টৌ প্রবেশিতাঃ ।
রাজানং দেবসঙ্কাশং বর্ধস্বেতি ততো ঽব্রুবন্ ।। ৭.৭৪.৩ ॥
74.4
মার্কণ্ডেয়ো ঽথ মৌদ্গল্যো বামদেবশ্চ কাশ্যপঃ ।
কাত্যায়নো ঽথ জাবালির্গৌতমো নারদস্তথা ।এতে দ্বিজর্ষভাঃ সর্বে আসনেষূপবেশিতাঃ ।। ৭.৭৪.৪ ॥
74.5
মহর্ষীন্সমনুপ্রাপ্তানভিবাদ্য কৃতাঞ্জলিঃ ।
মন্ত্রিণো নৈগমাংশ্চৈব যথার্হমনুকূলতঃ ।। ৭.৭৪.৫ ॥
74.6
তেষাং সমুপবিষ্টানাং সর্বেষাং দীপ্ততেজসাম্ ।
রাঘবঃ সর্বমাচষ্টে দ্বিজো ঽয়মুপরোধতে ।। ৭.৭৪.৬ ॥
74.7
তস্য তদ্বচনং শ্রুত্বা রাজ্ঞো দীনস্য নারদঃ ।
প্রত্যুবাচ শুভং বাক্যমৃষীণাং সন্নিধৌ নৃপম্ ।। ৭.৭৪.৭ ॥
74.8
শৃণু রাজন্যথাকালে প্রাপ্তো বালস্য সঙ্ক্ষয়ঃ ।
শ্রুত্বা কর্তব্যতাং রাজন্কুরুষ্বরঘুনন্দন ।। ৭.৭৪.৮ ॥
74.9
পুরা কৃতয়ুগে রাজন্ব্রাহ্মণা বৈ তপস্বিনঃ ।
অব্রাহ্মণস্তদা রাজন্ন তপস্বী কথঞ্চন ।। ৭.৭৪.৯ ॥
74.10
তস্মিন্যুগে প্রজ্বলিতে ব্রহ্মভূতে ত্বনাবৃতে ।
অমৃত্যবস্তদা সর্বে জজ্ঞিরে দীর্ঘদর্শিনঃ ।। ৭.৭৪.১০ ॥
74.11
ততস্ত্রেতায়ুগং নাম মানবানাং বপুষ্মতাম্ ।
ক্ষত্রিয়াস্তত্র জায়ন্তে পূর্ণেন তপসা ঽন্বিতাঃ ।। ৭.৭৪.১১ ॥
74.12
বীর্যেণ তপসা চৈব তে ঽধিকাঃ পূর্বজন্মনি ।
মানবা যে মহাত্মানস্ত্বত্র ত্রেতায়ুগে যুগে ।। ৭.৭৪.১২ ॥
74.13
ব্রহ্মক্ষত্রং চ তত্সর্বং যত্পূর্বমপরং চ যৎ ।
যুগয়োরুভয়োরাসীত্সমবীর্যসমন্বিতম্ ।। ৭.৭৪.১৩ ॥
74.14
অপশ্যংস্তু ন তে সর্বে বিশেষমধিকং ততঃ ।
স্থাপনং চক্রিরে তত্র চাতুর্বর্ণ্যস্য সম্মতম্ ।। ৭.৭৪.১৪ ॥
74.15
তস্মিন্যুগে প্রজ্বলিতে ধর্মভূতে হ্যনাবৃতে ।
অধর্মঃ পাদমেকং তু পাতয়ত্পৃথিবীতলে ।। ৭.৭৪.১৫ ॥
74.16
অধর্মেণ হি সংয়ুক্তস্তেজো মন্দং ভবিষ্যতি ।
। ৭.৭৪.১৬ ॥
74.17
আমিষং যচ্চ পূর্বেষাং রাজসং চ মলং ভৃশম্ ।
অনৃতং নাম তদ্ভূতং পাদেন পৃথিবীতলে ।। ৭.৭৪.১৭ ॥
74.18
অনৃতং পাতয়িত্বা তু পাদমেকমধর্মতঃ ।
ততঃ প্রাদুষ্কৃতং পূর্বমায়ুষঃ পরিনিষ্ঠিতম্ ।। ৭.৭৪.১৮ ॥
74.19
পতিতে ত্বনৃতে তস্মিন্নধর্মে চ মহীতলে ।
শুভান্যেবাচরঁল্লোকঃ সত্যধর্মপরায়ণঃ ।। ৭.৭৪.১৯ ॥
74.20
ত্রেতায়ুগে চ বর্তন্তে ব্রাহ্মণাঃ ক্ষত্রিয়াশ্চ যে ।
তপো ঽতপ্যন্ত তে সর্বে শুশ্রূষামপরে জনাঃ ।। ৭.৭৪.২০ ॥
74.21
স ধর্মঃ পরমস্তেষাং বৈশ্যশূদ্রং সমাগমৎ ।
পূজাং চ সর্ববর্ণানাং শূদ্রাশ্চক্রুর্বিশেষতঃ ।। ৭.৭৪.২১ ॥
74.22
এতস্মিন্নন্তরে তেষামধর্মে চানৃতে চ হ ।
ততঃ পূর্বে ভৃশং হ্রাসমগমন্নৃপসত্তম ।। ৭.৭৪.২২ ॥
74.23
ততঃ পাদমধর্মস্স দ্বিতীয়মবতারয়ৎ ।
ততো দ্বাপরসঞ্জ্ঞা ঽস্য যুগস্য সমজায়ত ।। ৭.৭৪.২৩ ॥
74.24
তস্মিন্দ্বাপরসঞ্জ্ঞে তু বর্তমানে যুগক্ষয়ে ।
অধর্মশ্চানৃতং চৈব ববৃধে পুরুষর্ষভ ।। ৭.৭৪.২৪ ॥
74.25
তস্মিন্দ্বাপরসঙ্খ্যাতে তপো বৈশ্যান্সমাবিশৎ ।
ত্রিভ্যো যুগেভ্যস্ত্রীন্বর্ণান্ক্রমাদ্বৈ তপ আবিশৎ ।। ৭.৭৪.২৫ ॥
74.26
ত্রিভ্যো যুগেভ্যস্ত্রীন্বর্ণান্ধর্মশ্চ পরিনিষ্ঠিতঃ ।
ন শুদ্ধো লভতে ধর্মং যুগতস্তু নরর্ষভ ।হীনবর্ণো নৃপশ্রেষ্ঠ তপ্যতে সুমহত্তপঃ ।। ৭.৭৪.২৬ ॥
74.27
ভবিষ্যচ্ছূদ্রয়োন্যাং বৈ তপশ্চর্যা কলৌ যুগে ।
অধর্মঃ পরমো রাজন্দ্বাপরে শূদ্রজন্মনঃ ।। ৭.৭৪.২৭ ॥
74.28
স বৈ বিষয়পর্যন্তে তব রাজন্মহাতপাঃ ।
অদ্য তপ্যতি দুর্বুদ্ধিস্তেন বালবধো হ্যয়ম্ ।। ৭.৭৪.২৮ ॥
74.29
যো হ্যধর্মমকার্যং বা বিষয়ে পার্থিবস্য তু ।
করোতি চাশ্রীমূলং তত্পুরে বা দুর্মতির্নরঃ ।ক্ষিপ্রং চ নরকং যাতি স চ রাজা ন সংশয়ঃ ।। ৭.৭৪.২৯ ॥
74.30
অধীতস্য চ তপ্তস্য কর্মণঃ সুকৃতস্য চ ।
ষষ্ঠং ভজতি ভাগং তু প্রজা ধর্মেণ পালয়ন্ ।। ৭.৭৪.৩০ ॥
74.31
ষঙ্ভাগস্য ন ভোক্তা ঽসৌ রক্ষতে ন প্রজাঃ কথম্ ।
। ৭.৭৪.৩১ ॥
74.32
স ত্বং পুরুষশার্দূল মার্গস্ব বিষয়ং স্বকম্ ।
দুষ্কৃতং যত্র পশ্যেথাস্তত্র যত্নং সমাচর ।। ৭.৭৪.৩২ ॥
74.33
এবং চেদ্ধর্মবৃদ্ধিশ্চ নৃণাং চায়ুর্বিবর্ধনম্ ।
ভবিষ্যতি নরশ্রেষ্ঠ বালস্যাস্য চ জীবিতম্ ।। ৭.৭৪.৩৩ ।।