সর্গ 73

73.1

প্রস্থাপ্য তু স শত্রুঘ্নং ভ্রাতৃভ্যাং সহ রাঘবঃ ।
প্রমুমোদ সুখী রাজ্যং ধর্মেণ পরিপালয়ন্ ।। ৭.৭৩.১ ॥

ততঃ কতিপয়াহঃসু বৃদ্ধো জানপদো দ্বিজঃ ।
মৃতং বালমুপাদায় রাজদ্বারমুপাগমৎ ।। ৭.৭৩.২ ॥

রুদন্বহুবিধা বাচঃ স্নেহদুঃখসমন্বিতাঃ ।
অসকৃত্পুত্র পুত্রেতি বাক্যমেতদুবাচ হ ।। ৭.৭৩.৩ ॥

কিং নু মে দুষ্কৃতং কর্ম পুরা দেহান্তরে কৃতম্ ।
যদহং পুত্রমেকং ত্বাং পশ্যামি নিধনং গতম্ ।। ৭.৭৩.৪ ॥

অপ্রাপ্তয়ৌবনং বালং পঞ্চবর্ষসহস্রকম্ ।
অকালে কালমাপন্নং মম দুঃখায় পুত্রক ।। ৭.৭৩.৫ ॥

অল্পৈরহোভির্নিধনং গমিষ্যামি ন সংশয়ঃ ।
অহং চ জননী চৈব তব শোকেন পুত্রক ।। ৭.৭৩.৬ ॥

ন স্মরাম্যনৃতং হ্যুক্তং ন চ হিংসাং স্মরাম্যহম্ ।
সর্বেষাং প্রাণিনাং পাপং কৃতং নৈব স্মরাম্যহম্ ।। ৭.৭৩.৭ ॥

কেনাদ্য দুষ্কৃতেনায়ং বাল এব মমাত্মজঃ ।
অকৃত্বা পিতৃকার্যাণি গতো বৈবস্বতক্ষয়ম্ ।। ৭.৭৩.৮ ॥

নেদৃশং দৃষ্টপূর্বং মে শ্রুতং বা ঘোরদর্শনম্ ।
মৃত্যুরপ্রাপ্তকালানাং রামস্য বিষয়ে যথা ।। ৭.৭৩.৯ ॥

রামস্য দুষ্কৃতং কিঞ্চিন্মহদস্তি ন সংশয়ঃ ।
যথা হি বিষয়স্থানাং বালানাং মৃত্যুরাগতঃ ।। ৭.৭৩.১০ ॥

নহ্যন্যবিষয়স্থানাং বালানাং মৃত্যুতো ভয়ম্ ।
ত্বং রাজঞ্জীবয়স্বৈনং বালং মৃত্যুবশং গতম্ ।। ৭.৭৩.১১ ॥

রাজদ্বারি মরিষ্যামি পত্ন্যা সার্ধমনাথবৎ ।
ব্রহ্মহত্যাং ততো রাম সমুপেত্য সুখী ভব ।। ৭.৭৩.১২ ॥

ভ্রাতৃভিঃ সহিতো রাজন্দীর্ঘমায়ুরবাপ্স্যসি ।
উষিতাঃ স্ম সুখং রাজ্যে তবাস্মিন্সুমহাবল ।। ৭.৭৩.১৩ ॥

ইদং তু পতিতং তস্মাত্তব রাম বশে স্থিতাঃ ।
কালস্য বশমাপন্নাঃ স্বল্পং হি নহি নঃ সুখম্ ।। ৭.৭৩.১৪ ॥

সম্প্রত্যনাথো বিষয় ইক্ষ্বাকূণাং মহাত্মনাম্ ।
রামং নাথমিহাসাদ্য বালান্তকরণং ধ্রুবম্ ।। ৭.৭৩.১৫ ॥

রাজদোষৈর্বিপদ্যন্তে প্রজা হ্যবিধিপালিতাঃ ।
অসদ্বৃত্তে তু নৃপতাবকালে ম্রিয়তে জনঃ ।। ৭.৭৩.১৬ ॥

যদ্বা পুরেষ্বয়ুক্তানি জনা জনপদেষু চ ।
কুর্বতে ন চ রক্ষা ঽস্তি তদা কালকৃতং ভয়ম্ ।। ৭.৭৩.১৭ ॥

সুব্যক্তং রাজদোষো হি ভবিষ্যতি ন সংশয়ঃ ।
পুরে জনপদে চাপি ততো বালবধো হ্যয়ম্ ।। ৭.৭৩.১৮ ॥

এবং বহুবিধৈর্বাক্যৈরুপরুধ্য মুহুর্মুহুঃ ।
রাজানং দুঃখসন্তপ্তঃ সুতং তমুপগূহতে ।। ৭.৭৩.১৯ ।।