Utshovসর্গ 72
72.1
তং শয়ানং নরব্যাঘ্রং নিদ্রা নাভ্যাগমত্তদা ।
চিন্তয়ন্তমনেকার্থং রামগীতমনুত্তমম্ ।। ৭.৭২.১ ॥
72.2
তস্য শব্দং সুমধুরং তন্ত্রীলয়সমন্বিতম্ ।
শ্রুত্বা রাত্রির্জগামাশু শত্রুঘ্নস্য মহাত্মনঃ ।। ৭.৭২.২ ॥
72.3
তস্যাং নিশায়াং ব্যুষ্টায়াং কৃত্বা পৌর্বাহ্ণিকং ক্রমম্ ।
উবাচ প্রাঞ্জলির্বাক্যং শত্রুঘ্নো মুনিপুঙ্গবম্ ।। ৭.৭২.৩ ॥
72.4
ভগবন্দ্রষ্টুমিচ্ছামি রাঘবং রঘুনন্দনম্ ।
ত্বয়া ঽনুজ্ঞাতুমিচ্ছামি সহৈভিঃ সংশিতব্রতৈঃ ।। ৭.৭২.৪ ॥
72.5
ইত্যেবংবাদিনং তং তু শত্রুঘ্নং শত্রুতাপনম্ ।
বাল্মীকিঃ সম্পরিষ্বজ্য বিসসর্জ চ রাঘবম্ ।। ৭.৭২.৫ ॥
72.6
সো ঽভিবাদ্য মুনিশ্রেষ্ঠং রথমারুহ্য সুপ্রভম্ ।
অয়োধ্যামগমত্তূর্ণং রাঘবোত্সুকদর্শনঃ ।। ৭.৭২.৬ ॥
72.7
স প্রবিষ্টঃ পুরীং রম্যাং শ্রীমানিক্ষ্বাকুনন্দনঃ ।
প্রবিবেশ মহাবাহুর্যত্র রামো মহাদ্যুতিঃ ।। ৭.৭২.৭ ॥
72.8
স রামং মন্ত্রিমধ্যস্থং পূর্ণচন্দ্রনিভাননম্ ।
পশ্যন্নমরমধ্যস্থং সহস্রনয়নং যথা ।। ৭.৭২.৮ ॥
72.9
সো ঽভিবাদ্য মহাত্মানং জ্বলন্তমিব তেজসা ।
উবাচ প্রাঞ্জলির্বাক্যং রামং সত্যপরাক্রমম্ ।। ৭.৭২.৯ ॥
72.10
যদাজ্ঞপ্তং মহারাজ সর্বং তত্কৃতবানহম্ ।
হতঃ স লবণঃ পাপঃ পুরী চাস্য নিবেশিতা ।। ৭.৭২.১০ ॥
72.11
দ্বাদশৈতে গতা বর্ষাস্ত্বাং বিনা রঘুনন্দন ।
নোত্সহেয়মহং বস্তুং ত্বয়া বিরহিতো নৃপ ।। ৭.৭২.১১ ॥
72.12
স মে প্রসাদং কাকুত্স্থ কুরুষ্বামিতবিক্রম ।
মাতৃহীনো যথা বত্সো ন চিরং প্রবসাম্যহম্ ।। ৭.৭২.১২ ॥
72.13
এবং ব্রুবাণং শত্রুঘ্নং পরিষ্বজ্যেদমব্রবীৎ ।
মা বিষাদং কৃথাঃ শূর নৈতত্ক্ষত্রিয়চেষ্টিতম্ ।। ৭.৭২.১৩ ॥
72.14
নাবসীদন্তি রাজানো বিপ্রবাসেষু রাঘব ।
প্রজা নঃ পরিপাল্যা হি ক্ষত্রধর্মেণ রাঘব ।। ৭.৭২.১৪ ॥
72.15
কালে কালে তু মাং বীর অয়োধ্যামবলোকিতুম্ ।
আগচ্ছ ত্বং নরশ্রেষ্ঠ গন্তাসি চ পুরং তব ।। ৭.৭২.১৫ ॥
72.16
মমাপি ত্বং সুদয়িতঃ প্রাণৈরপি ন সংশয়ঃ ।
অবশ্যং করণীয়ং চ রাজ্যস্য পরিপালনম্ ।। ৭.৭২.১৬ ॥
72.17
তস্মাত্ত্বং বস কাকুত্স্থ সপ্তরাত্রমিহাবস ।
ঊর্ধ্বং গন্তাসি মধুরাং সভৃত্যবলবাহনঃ ।। ৭.৭২.১৭ ॥
72.18
রামস্যৈতদ্বচঃ শ্রুত্বা ধর্ময়ুক্তং মনোগতম্ ।
শত্রুঘ্নো দীনয়া বাচা বাঢমিত্যেব চাব্রবীৎ ।। ৭.৭২.১৮ ॥
72.19
সপ্তরাত্রং চ কাকুত্স্থো রাঘবস্য যথাজ্ঞয়া ।
উষ্য তত্র মহেষ্বাসো গমনায়োপচক্রমে ।। ৭.৭২.১৯ ॥
72.20
আমন্ত্র্য তু মহাত্মানং রামং সত্যপরাক্রমম্ ।
ভরতং লক্ষ্মণং চৈব মহারথমুপারুহৎ ।। ৭.৭২.২০ ॥
72.21
দূরমাভ্যামনুগতো লক্ষ্মণেন মহাত্মনা ।
ভরতেন চ শত্রুঘ্নো জগামাশু পুরং ততঃ ।। ৭.৭২.২১ ।।