Utshovসর্গ 71
71.1
ততো দ্বাদশমে বর্ষে শত্রঘ্নো রামপালিতাম্ ।
অয়োধ্যাং চকমে গন্তুমল্পভৃত্যবলানুগঃ ।। ৭.৭১.১ ॥
71.2
ততো মন্ত্রিপুরোগাংশ্চ বলমুখ্যান্নিবর্ত্য চ ।
জগাম হয়মুখ্যৈশ্চ রথানাং চ শতেন সঃ ।। ৭.৭১.২ ॥
71.3
স গত্বা গণিতান্বাসান্সপ্তাষ্টৌ রঘুনন্দনঃ ।
বাল্মীক্যাশ্রমমাগত্য বাসং চক্রে মহায়শাঃ ।। ৭.৭১.৩ ॥
71.4
সো ঽভিবাদ্য ততঃ পাদৌ বাল্মীকেঃ পুরুষর্ষভঃ ।
পাদ্যমর্ধ্যং তথাতিথ্যং জগ্রাহ মুনিহস্ততঃ ।। ৭.৭১.৪ ॥
71.5
বহুরূপাঃ সুমধুরাঃ কথাস্তত্র সহস্রশঃ ।
কথয়ামাস স মুনিঃ শত্রুঘ্নায় মহাত্মনে ।। ৭.৭১.৫ ॥
71.6
উবাচ চ মুনির্বাক্যং লবণস্য বধাশ্রিতম্ ।
সুদুষ্করং কৃতং কর্ম লবণং নিঘ্নতা ত্বয়া ।। ৭.৭১.৬ ॥
71.7
বহবঃ পার্থিবাঃ সৌম্য হতাঃ সবলবাহনাঃ ।
লবণেন মহাবাহো যুধ্যমানা মহাবলাঃ ।। ৭.৭১.৭ ॥
71.8
স ত্বয়া নিহতঃ পাপো লীলয়া পুরুষর্ষভ ।
জগতশ্চ ভয়ং তত্র প্রশান্তং তব তেজসা ।। ৭.৭১.৮ ॥
71.9
রাবণস্য বধো ঘোরো যত্নেন মহতা কৃতঃ ।
ইদং তু সুমহত্কর্ম ত্বয়া কৃতময়ত্নতঃ ।। ৭.৭১.৯ ॥
71.10
প্রীতিশ্চাস্মিন্পরা জাতা দেবানাং লবণে হতে ।
ভূতানাং চৈব সর্বেষাং জগতশ্চ প্রিয়ং কৃতম্ ।। ৭.৭১.১০ ॥
71.11
তচ্চ যুদ্ধং ময়া দৃষ্টং যথাবত্পুরুষর্ষভ ।
সভায়াং বাসবস্যাথ উপবিষ্টেন রাঘব ।। ৭.৭১.১১ ॥
71.12
মমাপি পরমা প্রীতির্হৃদি শত্রুঘ্ন বর্ততে ।
উপাঘ্রাস্যামি তে মূর্ধ্নি স্নেহস্যৈষা পরা গতিঃ ।। ৭.৭১.১২ ॥
71.13
ইত্যুক্ত্বা মূর্ধ্নি শত্রুঘ্নমুপাঘ্রায় মহামুনিঃ ।
আতিথ্যমকরোত্তস্য যে চ তস্য পদানুগাঃ ।। ৭.৭১.১৩ ॥
71.14
স ভুক্তবান্নরশ্রেষ্ঠো গীতমাধুর্যমুত্তমম্ ।
শুশ্রাব রামচরিতং তস্মিন্কালে যথাকৃমম্ ।। ৭.৭১.১৪ ॥
71.15
তন্ত্রীলয়সমায়ুক্তং ত্রিস্থানকরণান্বিতম্ ।
সংস্কৃতং লক্ষণোপেতং সমতালসমন্বিতম্ ।শুশ্রাব রামচরিতং তস্মিন্কালে পুরা কৃতম্ ।। ৭.৭১.১৫ ॥
71.16
তান্যক্ষরাণি সত্যানি যথাবৃত্তানি পূর্বশঃ ।
শ্রুত্বা পুরুষশার্দূলো বিসঞ্জ্ঞো বাষ্পলোচনঃ ।। ৭.৭১.১৬ ॥
71.17
স মুহূর্তমিবাসঞ্জ্ঞো বিনিঃশ্বস্য মুহুর্মুহুঃ ।
তস্মিন্ গীতে যথাবৃত্তং বর্তমানমিবাশৃণোৎ ।। ৭.৭১.১৭ ॥
71.18
পদানুগাশ্চ যে রাজ্ঞস্তাং শ্রুত্বা গীতিসম্পদম্ ।
অবাঙ্মুখাশ্চ দীনাশ্চ হ্যাশ্চর্যমিতি চাব্রুবন্ ।। ৭.৭১.১৮ ॥
71.19
পরস্পরং চ যে তত্র সৈনিকাঃ সম্বভাষিরে ।
কিমিদং ক্ব চ বর্তামঃ কিমেতত্স্বপ্নদর্শনম্ ।। ৭.৭১.১৯ ॥
71.20
অর্থো যো নঃ পুরা দৃষ্টস্তমাশ্রমপদে পুনঃ ।
শৃণুমঃ কিমিদং স্বপ্নো গীতবন্ধং শ্রিয়ো ভবেৎ ।। ৭.৭১.২০ ॥
71.21
বিস্ময়ং তে পরং গত্বা শত্রুঘ্নমিদমব্রুবন্ ।
সাধু পৃচ্ছ নরশ্রেষ্ঠ বাল্মীকিং মুনিপুঙ্গবম্ ।। ৭.৭১.২১ ॥
71.22
শত্রুঘ্নস্ত্বব্রবীত্সর্বান্কৌতূহলসমন্বিতান্ ।
সৈনিকা ন ক্ষমো ঽস্মাকং পরিপ্রষ্টুমিহেদৃশঃ ।। ৭.৭১.২২ ॥
71.23
আশ্চর্যাণি বহূনীহ ভবন্ত্যস্যাশ্রমে মুনেঃ ।
ন তু কৌতূহলাদ্যুক্তমন্বেষ্টুং তং মহামুনিম্ ।। ৭.৭১.২৩ ॥
71.24
এবং তদ্বাক্যমুক্ত্বা চ সৈনিকান্রঘুনন্দনঃ ।
অভিবাদ্য মহর্ষিং তং স্বং নিবেশং যয়ৌ তদা ।। ৭.৭১.২৪ ।।