সর্গ 70

70.1

হতে তু লবণে দেবাঃ সেন্দ্রাঃ সাগ্নিপুরোগমাঃ ।
ঊচুঃ সুমধুরাং বাণীং শত্রুঘ্নং শত্রুতাপনম্ ।। ৭.৭০.১ ॥

দিষ্ট্যা তে বিজয়ো বত্স দিষ্ট্যা লবণরাক্ষসঃ ।
হতঃ পুরুষশার্দূল বরং বরয় সুব্রত ।। ৭.৭০.২ ॥

বরদাস্তু মহাবাহো সর্ব এব সমাগতাঃ ।
বিজয়াকাঙ্ক্ষিণস্তুভ্যমমোঘং দর্শনং হি নঃ ।। ৭.৭০.৩ ॥

দেবানাং ভাষিতং শ্রুত্বা শূরো মূর্ধ্নি কৃতাঞ্জলিঃ ।
প্রত্যুবাচ মহাবাহুঃ শত্রুঘ্নঃ প্রয়তাত্মবান্ ।। ৭.৭০.৪ ॥

ইয়ং মধুপুরী রস্যা মধুরা দেবনির্মিতা ।
নিবেশং প্রাপ্নুয়াচ্ছীঘ্রমেষ মে ঽস্তু বরঃ পরঃ ।। ৭.৭০.৫ ॥

তং দেবাঃ প্রীতমনসো বাঢমিত্যেব রাঘবম্ ।
ভবিষ্যতি পুরী রম্যা শূরসেনা ন সংশয়ঃ ।। ৭.৭০.৬ ॥

তে তথোক্ত্বা মহাত্মানো দিবমারুরুহুস্তদা ।
শত্রুঘ্নো ঽপি মহাতেজাস্তাং সেনাং সমুপানয়ৎ ।। ৭.৭০.৭ ॥

সা সেনা শীঘ্রমাগচ্ছচ্ছ্রুত্বা শত্রুঘ্নশাসনম্ ।
নিবেশনং চ শত্রুঘ্নঃ শ্রাবণেন সমারভৎ ।। ৭.৭০.৮ ॥

সা পুরা দিব্যসঙ্কাশা বর্ষে দ্বাদশমে শুভে ।
নিবিষ্টা শূরসেনানাং বিষয়শ্চাকুতোভয়ঃ ।। ৭.৭০.৯ ॥

ক্ষেত্রাণি সস্যয়ুক্তানি কালে বর্ষতি বাসবঃ ।
অরোগবীরপুরুষা শত্রুঘ্নভুজপালিতা ।। ৭.৭০.১০ ॥

অর্ধচন্দ্রপ্রতীকাশা যমুনাতীরশোভিতা ।
শোভিতা গৃহমুখ্যৈশ্চ চত্বরাপণবীথিকৈঃ ।চাতুর্বর্ণ্যসমায়ুক্তা নানাবাণিজ্যশোভিতা ।। ৭.৭০.১১ ॥

যচ্চ তেন পুরা শুভ্রং লবণেন কৃতং মহৎ ।
তচ্ছোভয়তি শত্রুঘ্নো নানাবর্ণোপশোভিতাম্ ।। ৭.৭০.১২ ॥

আরামৈশ্চ বিহারৈশ্চ শোভমানং সমন্ততঃ ।
শোভিতাং শোভনীয়ৈশ্চ তথা ঽন্যৈর্দৈবমানুষৈঃ ।। ৭.৭০.১৩ ॥

তাং পুরীং দিব্যসঙ্কাশাং নানাপণ্যোপশোভিতাম্ ।
নানাদেশাগতৈশ্চাপি বণিগ্ভিরুপশোভিতাম্ ।। ৭.৭০.১৪ ॥

তাং সমৃদ্ধাং সমৃদ্ধার্থঃ শত্রুঘ্নো ভরতানুজঃ ।
নিরীক্ষ্য পরমপ্রীতঃ পরং হর্ষমুপাগমৎ ।। ৭.৭০.১৫ ॥

তস্য বুদ্ধিঃ সমুত্পন্না নিবেশ্য মধুরাং পুরীম্ ।
রামপাদৌ নিরীক্ষে ঽহং বর্ষে দ্বাদশ আগতে ।। ৭.৭০.১৬ ॥

ততঃ স তামমরপুরোপমাং পুরীং নিবেশ্য বৈ বিবিধজনাভিসংবৃতাম্ ।
নরাধিপো রঘুপতিপাদদর্শনে দধে মতিং রঘুকুলবংশবর্ধনঃ ।। ৭.৭০.১৭ ।।