UtshovSarga 70
70.1
हते तु लवणे देवाः सेन्द्राः साग्निपुरोगमाः ।
ऊचुः सुमधुरां वाणीं शत्रुघ्नं शत्रुतापनम् ।। ७.७०.१ ॥
Hate tu lavane devah sendrah sagnipurogamah
Uchuh sumadhuram vanim shatrughnam shatrutapanam
70.2
दिष्ट्या ते विजयो वत्स दिष्ट्या लवणराक्षसः ।
हतः पुरुषशार्दूल वरं वरय सुव्रत ।। ७.७०.२ ॥
Dishtya te vijayo vatsa dishtya lavanarakshasah
Hatah purushashardula varam varaya suvrata
70.3
वरदास्तु महाबाहो सर्व एव समागताः ।
विजयाकाङ्क्षिणस्तुभ्यममोघं दर्शनं हि नः ।। ७.७०.३ ॥
Varadastu mahabaho sarva eva samagatah
Vijayakankshinastubhyamamogham darshanam hi nah
70.4
देवानां भाषितं श्रुत्वा शूरो मूर्ध्नि कृताञ्जलिः ।
प्रत्युवाच महाबाहुः शत्रुघ्नः प्रयतात्मवान् ।। ७.७०.४ ॥
Devanam bhashitam shrutva shuro murdhni kritanjalih
Pratyuvacha mahabahuh shatrughnah prayatatmavan
70.5
इयं मधुपुरी रस्या मधुरा देवनिर्मिता ।
निवेशं प्राप्नुयाच्छीघ्रमेष मे ऽस्तु वरः परः ।। ७.७०.५ ॥
Iyam madhupuri rasya madhura devanirmita
Nivesham prapnuyachchhighramesha me stu varah parah
70.6
तं देवाः प्रीतमनसो बाढमित्येव राघवम् ।
भविष्यति पुरी रम्या शूरसेना न संशयः ।। ७.७०.६ ॥
Tam devah pritamanaso badhamityeva raghavam
Bhavishyati puri ramya shurasena na sanshayah
70.7
ते तथोक्त्वा महात्मानो दिवमारुरुहुस्तदा ।
शत्रुघ्नो ऽपि महातेजास्तां सेनां समुपानयत् ।। ७.७०.७ ॥
Te tathoktva mahatmano divamaruruhustada
Shatrughno pi mahatejastam senam samupanayat
70.8
सा सेना शीघ्रमागच्छच्छ्रुत्वा शत्रुघ्नशासनम् ।
निवेशनं च शत्रुघ्नः श्रावणेन समारभत् ।। ७.७०.८ ॥
Sa sena shighramagachchhachchhrutva shatrughnashasanam
Niveshanam cha shatrughnah shravanena samarabhat
70.9
सा पुरा दिव्यसङ्काशा वर्षे द्वादशमे शुभे ।
निविष्टा शूरसेनानां विषयश्चाकुतोभयः ।। ७.७०.९ ॥
Sa pura divyasankasha varshe dvadashame shubhe
Nivishta shurasenanam vishayashchakutobhayah
70.10
क्षेत्राणि सस्ययुक्तानि काले वर्षति वासवः ।
अरोगवीरपुरुषा शत्रुघ्नभुजपालिता ।। ७.७०.१० ॥
Kshetrani sasyayuktani kale varshati vasavah
Arogavirapurusha shatrughnabhujapalita
70.11
अर्धचन्द्रप्रतीकाशा यमुनातीरशोभिता ।
शोभिता गृहमुख्यैश्च चत्वरापणवीथिकैः ।चातुर्वर्ण्यसमायुक्ता नानावाणिज्यशोभिता ।। ७.७०.११ ॥
Ardhachandrapratikasha yamunatirashobhita
Shobhita grihamukhyaishcha chatvarapanavithikaih, chaturvarnyasamayukta nanavanijyashobhita
70.12
यच्च तेन पुरा शुभ्रं लवणेन कृतं महत् ।
तच्छोभयति शत्रुघ्नो नानावर्णोपशोभिताम् ।। ७.७०.१२ ॥
Yachcha tena pura shubhram lavanena kritam mahat
Tachchhobhayati shatrughno nanavarnopashobhitam
70.13
आरामैश्च विहारैश्च शोभमानं समन्ततः ।
शोभितां शोभनीयैश्च तथा ऽन्यैर्दैवमानुषैः ।। ७.७०.१३ ॥
Aramaishcha viharaishcha shobhamanam samantatah
Shobhitam shobhaniyaishcha tatha nyairdaivamanushaih
70.14
तां पुरीं दिव्यसङ्काशां नानापण्योपशोभिताम् ।
नानादेशागतैश्चापि वणिग्भिरुपशोभिताम् ।। ७.७०.१४ ॥
Tam purim divyasankasham nanapanyopashobhitam
Nanadeshagataishchapi vanigbhirupashobhitam
70.15
तां समृद्धां समृद्धार्थः शत्रुघ्नो भरतानुजः ।
निरीक्ष्य परमप्रीतः परं हर्षमुपागमत् ।। ७.७०.१५ ॥
Tam samriddham samriddharthah shatrughno bharatanujah
Nirikshya paramapritah param harshamupagamat
70.16
तस्य बुद्धिः समुत्पन्ना निवेश्य मधुरां पुरीम् ।
रामपादौ निरीक्षे ऽहं वर्षे द्वादश आगते ।। ७.७०.१६ ॥
Tasya buddhih samutpanna niveshya madhuram purim
Ramapadau nirikshe ham varshe dvadasha agate
70.17
ततः स ताममरपुरोपमां पुरीं निवेश्य वै विविधजनाभिसंवृताम् ।
नराधिपो रघुपतिपाददर्शने दधे मतिं रघुकुलवंशवर्धनः ।। ७.७०.१७ ।।
Tatah sa tamamarapuropamam purim niveshya vai vividhajanabhisanvritam
Naradhipo raghupatipadadarshane dadhe matim raghukulavanshavardhanah