UtshovSarga 75
75.1
नारदस्य तु तद्वाक्यं श्रुत्वा ऽमृतमयं तदा ।
प्रहर्षमतुलं लेभे लक्ष्मणं चेदमब्रवीत् ।। ७.७५.१ ॥
Naradasya tu tadvakyam shrutva mritamayam tada
Praharshamatulam lebhe lakshmanam chedamabravit
75.2
गच्छ सौम्य द्विजश्रेष्ठं समाश्वासय सुव्रतम् ।
बालस्य तु शरीरं तत्तैलद्रोण्यां निधापय ।। ७.७५.२ ॥
Gachchha saumya dvijashreshtham samashvasaya suvratam
Balasya tu shariram tattailadronyam nidhapaya
75.3
गन्धैश्च परमोदारैस्तैलैश्चापि सुगन्धिभिः ।
यथा न क्षीयते बालस्तथा सौम्य विधीयताम् ।। ७.७५.३ ॥
Gandhaishcha paramodaraistailaishchapi sugandhibhih
Yatha na kshiyate balastatha saumya vidhiyatam
75.4
यथा शरीरो बालस्य गुप्तः सन् शिष्टकर्मणः ।
विपत्तिः परिभेदो वा न भवेच्च तथा कुरु ।। ७.७५.४ ॥
Yatha shariro balasya guptah san shishtakarmanah
Vipattih paribhedo va na bhavechcha tatha kuru
75.5
एवमादिश्य काकुत्स्थो लक्ष्मणं शुभलक्षणम् ।
मनसा पुष्पकं दध्यावागच्छेति महायशाः ।। ७.७५.५ ॥
Evamadishya kakutstho lakshmanam shubhalakshanam
Manasa pushpakam dadhyavagachchheti mahayashah
75.6
इङ्गितं स तु विज्ञाय पुष्पको हेमभूषितः ।
आजगाम मुहूर्तेन समीपे राघवस्य वै ।। ७.७५.६ ॥
Ingitam sa tu vigyaya pushpako hemabhushitah
Ajagama muhurtena samipe raghavasya vai
75.7
सो ऽब्रवीत्प्रणतो भूत्वा अयमस्मि नराधिप ।
वश्यस्तव महाबाहो किङ्करः समुपस्थितः ।। ७.७५.७ ॥
So bravitpranato bhutva ayamasmi naradhipa
Vashyastava mahabaho kinkarah samupasthitah
75.8
भाषितं रुचिरं श्रुत्वा पुष्पकस्य नराधिपः ।
अभिवाद्य महर्षींस्तान् विमानं सो ऽध्यरोहत ।। ७.७५.८ ॥
Bhashitam ruchiram shrutva pushpakasya naradhipah
Abhivadya maharshinstan vimanam so dhyarohata
75.9
धनुर्गृहीत्वा तूणी च खड्गं च रुचिरप्रभम् ।
निक्षिप्य नगरे वीरौ सौमित्रिभरतावुभौ ।। ७.७५.९ ॥
Dhanurgrihitva tuni cha khadgam cha ruchiraprabham
Nikshipya nagare virau saumitribharatavubhau
75.10
प्रायात्प्रतीचीं हरितं विचिन्वंश्च ततस्ततः ।
उत्तरामगमच्छ्रीमान्दिशं हिमवता वृताम् ।। ७.७५.१० ॥
Prayatpratichim haritam vichinvanshcha tatastatah
Uttaramagamachchhrimandisham himavata vritam
75.11
अपश्यमानस्तत्रापि स्वल्पमप्यथ दुष्कृतम् ।
पूर्वामपि दिशं सर्वामथो ऽपश्यन्नराधिपः ।। ७.७५.११ ॥
Apashyamanastatrapi svalpamapyatha dushkritam
Purvamapi disham sarvamatho pashyannaradhipah
75.12
प्रविशुद्धसमाचारामादर्शतलनिर्मलाम् ।
पुष्पकस्थो महाबाहुस्तदापश्यन्नराधिपः ।। ७.७५.१२ ॥
Pravishuddhasamacharamadarshatalanirmalam
Pushpakastho mahabahustadapashyannaradhipah
75.13
दक्षिणां दिशमाक्रामत्ततो राजर्षिनन्दनः ।
शैवलस्योत्तरे पार्श्वे ददर्श सुमहत्सरः ।। ७.७५.१३ ॥
Dakshinam dishamakramattato rajarshinandanah
Shaivalasyottare parshve dadarsha sumahatsarah
75.14
तस्मिन्सरसि तप्यन्तं तापसं सुमहत्तपः ।
ददर्श राघवः श्रीमाँल्लम्बमानमधोमुखम् ।। ७.७५.१४ ॥
Tasminsarasi tapyantam tapasam sumahattapah
Dadarsha raghavah shrimanllambamanamadhomukham
75.15
राघवस्तमुपागम्य तप्यन्तं तप उत्तमम् ।
उवाच स तदा वाक्यं धन्यस्त्वमसि सुव्रत ।। ७.७५.१५ ॥
Raghavastamupagamya tapyantam tapa uttamam
Uvacha sa tada vakyam dhanyastvamasi suvrata
75.16
कस्यां योन्यां तपोवृद्ध वर्तसे दृढविक्रम ।
कौतूहलात्त्वां पृच्छामि रामो दाशरथिर्ह्यहम् ।। ७.७५.१६ ॥
Kasyam yonyam tapovriddha vartase dridhavikrama
Kautuhalattvam prichchhami ramo dasharathirhyaham
75.17
को ऽर्थो मनीषितस्तुभ्यं स्वर्गलाभः परो ऽथवा ।
वराश्रयो यदर्थं त्वं तपस्यसि सुदुष्करम् ।यमाश्रित्य तपस्तप्तं श्रोतुमिच्छामि तापस ।। ७.७५.१७ ॥
Ko rtho manishitastubhyam svargalabhah paro thava
Varashrayo yadartham tvam tapasyasi sudushkaram, yamashritya tapastaptam shrotumichchhami tapasa
75.18
ब्राह्मणो वा ऽसि भद्रं ते क्षत्रियो वा ऽसि दुर्जयः ।
वैश्यस्तृतीयवर्णो वा शूद्रो वा सत्यवाग्भव ।। ७.७५.१८ ।।
Brahmano va si bhadram te kshatriyo va si durjayah
Vaishyastritiyavarno va shudro va satyavagbhava
75.19
इत्येवमुक्तः स नराधिपेन ह्यवाक्छिरा दाशरथाय तस्मै ।
उवाच जातिं नृपपुङ्गवाय यत्कारणे चैव तपःप्रयत्नः ।। ७.७५.१९ ।।
Ityevamuktah sa naradhipena hyavakchhira dasharathaya tasmai
Uvacha jatim nripapungavaya yatkarane chaiva tapahprayatnah