UtshovSarga 77
77.1
पुरा त्रेतायुगे राम बभूव बहुविस्तरम् ।
समन्ताद्योजनशतं विमृगं पक्षिवर्जितम् ।। ७.७७.१ ॥
Pura tretayuge rama babhuva bahuvistaram
Samantadyojanashatam vimrigam pakshivarjitam
77.2
तस्मिन्निर्मानुषे ऽरण्ये कुर्वाणस्तप उत्तमम् ।
अहमाक्रमितुं सौम्य तदरण्यमुपागमम् ।। ७.७७.२ ॥
Tasminnirmanushe ranye kurvanastapa uttamam
Ahamakramitum saumya tadaranyamupagamam
77.3
तस्य रूपमरण्यस्य निर्देष्टुं न शशाक ह ।
फलमूलैः सुखास्वादैर्बहुरूपैश्च पादपैः ।। ७.७७.३ ॥
Tasya rupamaranyasya nirdeshtum na shashaka ha
Phalamulaih sukhasvadairbahurupaishcha padapaih
77.4
तस्यारण्यस्य मध्ये तु सरो योजनमायतम् ।
हंसकारण्डवाकीर्णं चक्रवाकोपशोभितम् ।। ७.७७.४ ॥
Tasyaranyasya madhye tu saro yojanamayatam
Hansakarandavakirnam chakravakopashobhitam
77.5
पद्मोत्पलसमाकीर्णं समतिक्रान्तशैवलम् ।
तदाश्चर्यमिवात्यर्थं सुखास्वादमनुत्तमम् ।। ७.७७.५ ॥
Padmotpalasamakirnam samatikrantashaivalam
Tadashcharyamivatyartham sukhasvadamanuttamam
77.6
अरजस्कं तथा ऽक्षोभ्यं श्रीमत्पक्षिगणायुतम् ।
समीपे तस्य सरसो महदद्भुतमाश्रमम् ।। ७.७७.६ ॥
Arajaskam tatha kshobhyam shrimatpakshiganayutam
Samipe tasya saraso mahadadbhutamashramam
77.7
पुराणं पुण्यमत्यर्थं तपस्विजनवर्जितम् ।
तत्राहमवसं रात्रिं नैदाघीं पुरुषर्षभ ।। ७.७७.७ ॥
Puranam punyamatyartham tapasvijanavarjitam
Tatrahamavasam ratrim naidaghim purusharshabha
77.8
प्रभाते काल्यमुत्थाय सरस्तदुपचक्रमे ।
अथापश्यं शवं तत्र सुपुष्टमजरं क्वचित् ।। ७.७७.८ ॥
Prabhate kalyamutthaya sarastadupachakrame
Athapashyam shavam tatra supushtamajaram kvachit
77.9
पङ्किभेदेन पुष्टाङ्गं समाश्रितसरोवरम् ।
तिष्ठन्तं परया लक्ष्म्या तस्मिंस्तोयाशये नृप ।। ७.७७.९ ॥
Pankibhedena pushtangam samashritasarovaram
Tishthantam paraya lakshmya tasminstoyashaye nripa
77.10
तमर्थं चिन्तयानो ऽहं मुहूर्तं तत्र राघव ।
उषितो ऽस्मि सरस्तीरे किन्न्विदं स्यादिति प्रभो ।। ७.७७.१० ॥
Tamartham chintayano ham muhurtam tatra raghava
Ushito smi sarastire kinnvidam syaditi prabho
77.11
अथापश्यं मुहूर्तेन दिव्यमद्भुतदर्शनम् ।
विमानं परमोदारं हंसयुक्तं मनोजवम् ।। ७.७७.११ ॥
Athapashyam muhurtena divyamadbhutadarshanam
Vimanam paramodaram hansayuktam manojavam
77.12
अत्यर्थं स्वर्गिणं त विमाने रघुनन्दन ।
उपास्ते ऽप्सरसां वीर सहस्रं दिव्यभूषणम् ।। ७.७७.१२ ॥
Atyartham svarginam ta vimane raghunandana
Upaste psarasam vira sahasram divyabhushanam
77.13
गायन्ति दिव्यगेयानि वादयन्ति तथा ऽपराः ।
क्ष्वेलयन्ति तथा चान्या नृत्यन्ति च तथा ऽपराः ।। ७.७७.१३ ॥
Gayanti divyageyani vadayanti tatha parah
Kshvelayanti tatha chanya nrityanti cha tatha parah
77.14
अपराश्चन्द्ररश्म्याभैर्हेमदण्डैश्च चामरैः ।
दोधूयुर्वदनं तस्य पुण्डरीकनिभेक्षणम् ।। ७.७७.१४ ॥
Aparashchandrarashmyabhairhemadandaishcha chamaraih
Dodhuyurvadanam tasya pundarikanibhekshanam
77.15
ततः सिंहासनं त्यक्त्वा मेरुकूटमिवांशुमान् ।
पश्यतो मे तदा राम विमानादवरुह्य च ।तं शवं भक्षयामास स स्वर्गी रघुनन्दन ।। ७.७७.१५ ॥
Tatah sinhasanam tyaktva merukutamivanshuman
Pashyato me tada rama vimanadavaruhya cha, tam shavam bhakshayamasa sa svargi raghunandana
77.16
तथा भुक्त्वा यथाकामं मांसं बहु सुपीवरम् ।
अवतीर्य सरः स्वर्गी संस्प्रष्टुमुपचक्रमे ।। ७.७७.१६ ॥
Tatha bhuktva yathakamam mansam bahu supivaram
Avatirya sarah svargi sansprashtumupachakrame
77.17
उपस्पृश्य यथान्यायं स स्वर्गी रघुपुङ्गव ।
आरोढुमुपचक्राम विमानवरमुत्तमम् ।। ७.७७.१७ ॥
Upasprishya yathanyayam sa svargi raghupungava
Arodhumupachakrama vimanavaramuttamam
77.18
तमहं देवसङ्काशमारोहन्तमुदीक्ष्य वै ।
अथाहमब्रुवं वाक्यं स्वर्गिणं पुरुषर्षभ ।। ७.७७.१८ ॥
Tamaham devasankashamarohantamudikshya vai
Athahamabruvam vakyam svarginam purusharshabha
77.19
को भवान्देवसङ्काश आहारश्च विगर्हितः ।
त्वयेदं भुज्यते सौम्य किमर्थं वक्तुमर्हसि ।। ७.७७.१९ ॥
Ko bhavandevasankasha aharashcha vigarhitah
Tvayedam bhujyate saumya kimartham vaktumarhasi
77.20
कस्य स्यादीदृशो भाव आहारो देवसम्मतः ।
आश्चर्यं वर्तते सौम्य श्रोतुमिच्छामि तत्त्वतः ।। ७.७७.२० ॥
Kasya syadidrisho bhava aharo devasammatah
Ashcharyam vartate saumya shrotumichchhami tattvatah
77.21
नाहमौपयिकं मन्ये तव भक्ष्यमिदं शवम् ।
। ७.७७.२१ ॥
Nahamaupayikam manye tava bhakshyamidam shavam
77.22
इत्येवमुक्तः स नरेन्द्र नाकी कौतूहलात्सूनृतया गिरा च ।
श्रुत्वा च वाक्यं मम सर्वमेतत्सर्वं तथा चाकथयन्ममेति ।। ७.७७.२२ ।।
Ityevamuktah sa narendra naki kautuhalatsunritaya gira cha
Shrutva cha vakyam mama sarvametatsarvam tatha chakathayanmameti