UtshovSarga 85
85.1
लक्ष्मणस्य तु तद्वाक्यं श्रुत्वा शत्रुनिबर्हणः ।
वृत्रघातमशेषेण कथयेत्याह सुव्रत ।। ७.८५.१ ॥
Lakshmanasya tu tadvakyam shrutva shatrunibarhanah
Vritraghatamasheshena kathayetyaha suvrata
85.2
राघवेणैवमुक्तस्तु सुमित्रानन्दवर्धनः ।
भूय एव कथां दिव्यां कथयामास सुव्रतः ।। ७.८५.२ ॥
Raghavenaivamuktastu sumitranandavardhanah
Bhuya eva katham divyam kathayamasa suvratah
85.3
सहस्राक्षवचः श्रुत्वा सर्वेषां च दिवौकसाम् ।
विष्णुर्देवानुवाचेदं सर्वानिन्द्रपुरोगमान् ।। ७.८५.३ ॥
Sahasrakshavachah shrutva sarvesham cha divaukasam
Vishnurdevanuvachedam sarvanindrapurogaman
85.4
पूर्वं सौहृदबद्धो ऽस्मि वृत्रस्य ह महात्मनः ।
तेन युष्मत्प्रियार्थं हि नाहं हन्मि महासुरम् ।। ७.८५.४ ॥
Purvam sauhridabaddho smi vritrasya ha mahatmanah
Tena yushmatpriyartham hi naham hanmi mahasuram
85.5
अवश्यं करणीयं च भवतां सुखमुत्तमम् ।
तस्मादुपायमाख्यास्ये येन वृत्रो निहन्यते ।। ७.८५.५ ॥
Avashyam karaniyam cha bhavatam sukhamuttamam
Tasmadupayamakhyasye yena vritro nihanyate
85.6
त्रिधाभूतं करिष्यामि ह्यात्मानं सुरसत्तमाः ।
तेन वृत्रं सहस्राक्षो वधिष्यति न संशयः ।। ७.८५.६ ॥
Tridhabhutam karishyami hyatmanam surasattamah
Tena vritram sahasraksho vadhishyati na sanshayah
85.7
एकांशो वासवं यातु द्वितीयो वज्रमेव तु ।
तृतीयो भूतलं शक्रस्तदा वृत्रं वधिष्यति ।। ७.८५.७ ॥
Ekansho vasavam yatu dvitiyo vajrameva tu
Tritiyo bhutalam shakrastada vritram vadhishyati
85.8
तथा ब्रुवति देवेशे देवा वाक्यमथाब्रुवन् ।
एवमेतन्न सन्देहो यथा वदसि दैत्यहन् ।। ७.८५.८ ॥
Tatha bruvati deveshe deva vakyamathabruvan
Evametanna sandeho yatha vadasi daityahan
85.9
भद्रं ते ऽस्तु गमिष्यामो वृत्रासुरवधैषिणः ।
भजस्व परमोदार वासवं स्वेन तेजसा ।। ७.८५.९ ॥
Bhadram te stu gamishyamo vritrasuravadhaishinah
Bhajasva paramodara vasavam svena tejasa
85.10
ततः सर्वे महात्मानः सहस्राक्षपुरोगमाः ।
तदारण्यमुपाक्रामन्यत्र वृत्रो महासुरः ।। ७.८५.१० ॥
Tatah sarve mahatmanah sahasrakshapurogamah
Tadaranyamupakramanyatra vritro mahasurah
85.11
ते पश्यंस्तेजसा भूतं तप्यन्तमसुरोत्तमम् ।
पिबन्तमिव लोकांस्त्रीन्निर्दहन्तमिवाम्बरम् ।। ७.८५.११ ॥
Te pashyanstejasa bhutam tapyantamasurottamam
Pibantamiva lokanstrinnirdahantamivambaram
85.12
दृष्ट्वैव चासुरश्रेष्ठं देवास्त्रासमुपागमन् ।
कथमेनं वधिष्यामः कथं न स्यात्पराजयः ।। ७.८५.१२ ॥
Drishtvaiva chasurashreshtham devastrasamupagaman
Kathamenam vadhishyamah katham na syatparajayah
85.13
तेषां चिन्तयतां तत्र सहस्राक्षः पुरन्दरः ।
वज्रं प्रगृह्य पाणिभ्यां प्राहिणोद्वृत्रमूर्धनि ।। ७.८५.१३ ॥
Tesham chintayatam tatra sahasrakshah purandarah
Vajram pragrihya panibhyam prahinodvritramurdhani
85.14
कालाग्निनेव घोरेण तप्तेनैव महार्चिषा ।
पतता वृत्रशिरसा जगत्त्रासमुपागमत् ।। ७.८५.१४ ॥
Kalagnineva ghorena taptenaiva maharchisha
Patata vritrashirasa jagattrasamupagamat
85.15
असम्भाव्यं वधं तस्य वृत्रस्य विबुधाधिपः ।
चिन्तयानो जगामाशु लोकस्यान्तं महायशाः ।। ७.८५.१५ ॥
Asambhavyam vadham tasya vritrasya vibudhadhipah
Chintayano jagamashu lokasyantam mahayashah
85.16
तमिन्द्रं ब्रह्महत्या ऽ ऽशु गच्छन्तमनुगच्छति ।
अपतच्चास्य गात्रेषु तमिन्द्रं दुःखमाविशत् ।। ७.८५.१६ ॥
Tamindram brahmahatya shu gachchhantamanugachchhati
Apatachchasya gatreshu tamindram duhkhamavishat
85.17
हतारयः प्रनष्टेन्द्रा देवाः साग्निपुरोगमाः ।
विष्णुं त्रिभुवनेशानं मुहुर्मुहुरपूजयन् ।। ७.८५.१७ ॥
Hatarayah pranashtendra devah sagnipurogamah
Vishnum tribhuvaneshanam muhurmuhurapujayan
85.18
त्वं गतिः परमेशान पूर्वजो जगतः पिता ।
रक्षार्थं सर्वभूतानां विष्णुत्वमुपजग्मिवान् ।। ७.८५.१८ ॥
Tvam gatih parameshana purvajo jagatah pita
Rakshartham sarvabhutanam vishnutvamupajagmivan
85.19
हतश्चायं त्वया वृत्रो ब्रह्महत्या च वासवम् ।
बाधते सुरशार्दूल मोक्षं तस्या विनिर्दिश ।। ७.८५.१९ ॥
Hatashchayam tvaya vritro brahmahatya cha vasavam
Badhate surashardula moksham tasya vinirdisha
85.20
तेषां तद्वचनं श्रुत्वा देवानां विष्णुरब्रवीत् ।
मामेव यजतां शक्रः पावयिष्यामि वज्रिणम् ।। ७.८५.२० ॥
Tesham tadvachanam shrutva devanam vishnurabravit
Mameva yajatam shakrah pavayishyami vajrinam
85.21
पुण्येन हयमेधेन मामिष्ट्वा पाकशासनः ।
पुनरेष्यति देवानामिन्द्रत्वमकुतोभयम् ।। ७.८५.२१ ॥
Punyena hayamedhena mamishtva pakashasanah
Punareshyati devanamindratvamakutobhayam
85.22
एवं सन्दिश्य तां वाणीं देवानाममृतोपमाम् ।
जगाम विष्णुर्देवेशः स्तूयमानस्त्रिविष्टपम् ।। ७.८५.२२ ।।
Evam sandishya tam vanim devanamamritopamam
Jagama vishnurdeveshah stuyamanastrivishtapam