Utshovসর্গ 9
9.1
কস্যচিত্ত্বথ কালস্য সুমালী নাম রাক্ষসঃ ।
রসাতলান্মর্ত্যলোকং সর্বং বৈ বিচচার হ ।। ৭.৯.১ ॥
9.2
নীলজীমূতসঙ্কাশস্তপ্তকাঞ্চনকুণ্ডলঃ ।
কন্যাং দুহিতরং গৃহ্য বিনা পদ্মমিব শ্রিয়ম্ ।। ৭.৯.২ ॥
9.3
রাক্ষসেন্দ্রঃ স তু তদা বিচরন্বৈ মহীতলম্ ।
তদাপশ্যত্স গচ্ছন্তং পুষ্পকেণ ধনেশ্বরম্ ।। ৭.৯.৩ ॥
9.4
গচ্ছন্তং পিতরং দ্রষ্টুং পুলস্ত্যতনয়ং বিভুম্ ।
তং দৃষ্ট্বা ঽমরসঙ্কাশং স্বচ্ছন্দং তপনোপমম্ ।। ৭.৯.৪ ॥
9.5
রসাতলং প্রবিষ্টঃ সন্মর্ত্যলোকাত্সবিস্ময়ঃ ।
ইত্যেবং চিন্তয়ামাস রাক্ষসানাং মহামতিঃ ।। ৭.৯.৫ ॥
9.6
কিং কৃতং শ্রেয় ইত্যেবং বর্ধেমহি কথং বয়ম্ ।
অথাব্রবীত্সুতাং রক্ষঃ কৈকসীং নাম নামতঃ ।। ৭.৯.৬ ॥
9.7
পুত্রি প্রদানকালো ঽয়ং যৌবনং ব্যতিবর্ততে ।
প্রত্যাখ্যানাচ্চ ভীতৈস্ত্বং ন বরৈঃ প্রতিগৃহ্যসে ।। ৭.৯.৭ ॥
9.8
ত্বত্কৃতে চ বয়ং সর্বে যন্ত্রিতা ধর্মবুদ্ধয়ঃ ।
ত্বং হি সর্বগুণোপেতা শ্রীঃ সাক্ষাদিব পুত্রিকে ।কন্যাপিতৃত্বং দুঃখং হি সর্বেষাং মানকাঙ্ক্ষিণাম্ ।। ৭.৯.৮ ॥
9.9
ন জ্ঞায়তে চ কঃ কন্যাং বরয়েদিতি কন্যকে ।
। ৭.৯.৯ ॥
9.10
ত্বং হি সর্বগুণোপেতা শ্রীঃ সাক্ষাদিব পুত্রিকে ।
মাতুঃ কুলং পিতৃকুলং যত্র চৈব প্রদীয়তে ।কুলত্রয়ং সদা কন্যা সংশয়ে স্থাপ্য তিষ্ঠতি ।। ৭.৯.১০ ॥
9.11
সা ত্বং মুনিবরং শ্রেষ্ঠং প্রজাপতিকুলোদ্ভবম্ ।
ভজ বিশ্রবসং পুত্রি পৌলস্ত্যং বরয় স্বয়ম্ ।। ৭.৯.১১ ॥
9.12
ঈদৃশাস্তে ভবিষ্যন্তি পুত্রাঃ পুত্রি ন সংশয়ঃ ।
তেজসা ভাস্করসমো যাদৃশো ঽয়ং ধনেশ্বরঃ ।। ৭.৯.১২ ॥
9.13
সা তু তদ্বচনং শ্রুত্বা কন্যকা পিতৃগৌরবাৎ ।
তত্রোপাগম্য সা তস্থৌ বিশ্রবা যত্র তপ্যতে ।। ৭.৯.১৩ ॥
9.14
এতস্মিন্নন্তরে রাম পুলস্ত্যতনয়ো দ্বিজঃ ।
অগ্নিহোত্রমুপাতিষ্ঠচ্চতুর্থ ইব পাবকঃ ।। ৭.৯.১৪ ॥
9.15
অবিচিন্ত্য তু তাং বেলাং দারুণাং পিতৃগৌরবাৎ ।
উপসৃত্যাগ্রতস্তস্য চরণাধোমুখী স্থিতা ।বিলিখন্তী মুহুর্ভূমিমঙ্গুষ্ঠাগ্রেণ ভামিনী ।। ৭.৯.১৫ ॥
9.16
স তু তাং বীক্ষ্য সুশ্রোণীং পূর্ণচন্দ্রনিভাননাম্ ।
অব্রবীত্পরমোদারো দীপ্যমানাং স্বতেজসা ।। ৭.৯.১৬ ॥
9.17
ভদ্রে কস্যাসি দুহিতা কুতো বা ত্বমিহাগতা ।
কিং কার্যং কস্য বা হেতোস্তত্ত্বতো ব্রূহি শোভনে ।। ৭.৯.১৭ ॥
9.18
এবমুক্তা তু সা কন্যা কৃতাঞ্জলিরথাব্রবীৎ ।
আত্মপ্রভাবেণ মুনে জ্ঞাতুমর্হসি মে মতম্ ।। ৭.৯.১৮ ॥
9.19
কিং তু মাং বিদ্ধি ব্রহ্মর্ষে শাসনাত্পিতুরাগতাম্ ।
কৈকসী নাম নাম্নাহং শেষং ত্বং জ্ঞাতুমর্হসি ।। ৭.৯.১৯ ॥
9.20
স তু গত্বা মুনির্ধ্যানং বাক্যমেতদুবাচ হ ।
বিজ্ঞাতং তে ময়া ভদ্রে কারণং যন্মনোগতম্ ।। ৭.৯.২০ ॥
9.21
সুতাভিলাষো মত্তস্তে মত্তমাতঙ্গগামিনি ।
দারুণায়াং তু বেলায়াং যস্মাত্ত্বং মামুপস্থিতা ।। ৭.৯.২১ ॥
9.22
শৃণু তস্মাত্সুতান্ভদ্রে যাদৃশাঞ্জনয়িষ্যসি ।
দারুণান্দারুণাকারান্দারুণাভিজনপ্রিয়ান্ ।। ৭.৯.২২ ॥
9.23
প্রসবিষ্যসি সুশ্রোণি রাক্ষসান্ক্রূরকর্মণঃ ।
সা তু তদ্বচনং শ্রুত্বা প্রণিপত্যাব্রবীদ্বচঃ ।। ৭.৯.২৩ ॥
9.24
ভগবন্নীদৃশান্পুত্রাংস্ত্বত্তো ঽহং ব্রহ্মবাদিনঃ ।
নেচ্ছামি সুদুরাচারান্প্রসাদং কর্তুমর্হসি ।। ৭.৯.২৪ ॥
9.25
কন্যয়া ত্বেবমুক্তস্তু বিশ্রবা মুনিপুঙ্গবঃ ।
উবাচ কৈকসীং ভূয়ঃ পূর্ণেন্দুরিব রোহিণীম্ ।। ৭.৯.২৫ ॥
9.26
পশ্চিমো যস্তব সুতো ভবিষ্যতি শুভাননে ।
মম বংশানুরূপঃ স ধর্মাত্মা চ ভবিষ্যতি ।। ৭.৯.২৬ ॥
9.27
এবমুক্তা তু সা কন্যা রাম কালেন কেনচিৎ ।
জনয়ামাস বীভত্সং রক্ষোরূপং সুদারুণম্ ।। ৭.৯.২৭ ॥
9.28
দশগ্রীবং মহাদংষ্ট্রং নীলাঞ্জনচয়োপমম্ ।
তাম্রোষ্ঠং বিংশতিভুজং মহাস্যং দীপ্তমূর্ধজম্ ।। ৭.৯.২৮ ॥
9.29
তস্মিঞ্জাতে তু তত্কালে সজ্বালকবলাঃ শিবাঃ ।
ক্রব্যাদাশ্চাপসব্যানি মণ্ডলানি প্রচক্রমুঃ ।। ৭.৯.২৯ ॥
9.30
ববর্ষ রুধিরং দেবো মেঘাশ্চ খরনিঃস্বনাঃ ।
প্রবভৌ ন চ সূর্যো বৈ মহোল্কাশ্চাপতন্ভুবি ।। ৭.৯.৩০ ॥
9.31
চকম্পে জগতী চৈব ববুর্বাতাঃ সুদারুণাঃ ।
অক্ষোভ্যঃ ক্ষুভিতশ্চৈব সমুদ্রঃ সরিতাং পতিঃ ।। ৭.৯.৩১ ॥
9.32
অথ নামাকরোত্তস্য পিতামহসমঃ পিতা ।
দশগ্রীবঃ প্রসূতো ঽয়ং দশগ্রীবো ভবিষ্যতি ।। ৭.৯.৩২ ॥
9.33
তস্য ত্বনন্তরং জাতঃ কুম্ভকর্ণো মহাবলঃ ।
প্রমাণাদ্যস্য বিপুলং প্রমাণং নেহ বিদ্যতে ।। ৭.৯.৩৩ ॥
9.34
ততঃ শূর্পণখা নাম সঞ্জজ্ঞে বিকৃতাননা ।
বিভীষণশ্চ ধর্মাত্মা কৈকস্যাঃ পশ্চিমঃ সুতঃ ।। ৭.৯.৩৪ ॥
9.35
তস্মিঞ্জাতে মহাসত্ত্বে পুষ্পবর্ষং পপাত হ ।
। ৭.৯.৩৫ ॥
9.36
নভঃস্থানে দুন্দুভয়ো দেবানাং প্রাণদংস্তদা ।
বাক্যং চৈবান্তরিক্ষে চ সাধু সাধ্বিতি তত্তদা ।। ৭.৯.৩৬ ॥
9.37
তৌ তু তত্র মহারণ্যে ববৃধাতে মহৌজসৌ ।
কুম্ভকর্ণদশগ্রীবৌ লোকোদ্বেগকরৌ তদা ।। ৭.৯.৩৭ ॥
9.38
কুম্ভকর্ণঃ প্রমত্তস্তু মহর্ষীন্ধর্মবত্সলান্ ।
ত্রৈলোক্যং ভক্ষয়ন্নিত্যাসন্তুষ্টো বিচচার হ ।। ৭.৯.৩৮ ॥
9.39
বিভীষণস্তু ধর্মাত্মা নিত্যং ধর্মে ব্যবস্থিতঃ ।
স্বাধ্যায়নিয়তাহার উবাস বিজিতেন্দ্রিয়ঃ ।। ৭.৯.৩৯ ॥
9.40
অথ বৈশ্রবণো দেবস্তত্র কালেন কেনচিৎ ।
আগতঃ পিতরং দ্রষ্টুং পুষ্পকেণ ধনেশ্বরঃ ।। ৭.৯.৪০ ॥
9.41
তং দৃষ্ট্বা কৈকসী তত্র জ্বলন্তমিব তেজসা ।
আগম্য রাক্ষসী তত্র দশগ্রীবমুবাচ হ ।। ৭.৯.৪১ ॥
9.42
পুত্র বৈশ্রবণং পশ্য ভ্রাতরং তেজসা বৃতম্ ।
ভ্রাতৃভাবে সমে চাপি পশ্যাত্মানং ত্বমীদৃশম্ ।। ৭.৯.৪২ ॥
9.43
দশগ্রীব তথা যত্নং কুরুষ্বামিতবিক্রম ।
যথা ত্বমসি মে পুত্র ভব র্বৈশ্রবণোপমঃ ।। ৭.৯.৪৩ ॥
9.44
মাতুস্তদ্বচনং শ্রুত্বা দশগ্রীবঃ প্রতাপবান্ ।
অমর্ষমতুলং লেভে প্রতিজ্ঞাং চাকরোত্তদা ।। ৭.৯.৪৪ ॥
9.45
সত্যং তে প্রতিজানামি ভ্রাতৃতুল্যো ঽধিকো ঽপি বা ।
ভবিষ্যাম্যোজসা চৈব সন্তাপং ত্যজ হৃদ্গতম্ ।। ৭.৯.৪৫ ॥
9.46
ততস্তেনৈব কোপেন দশগ্রীবঃ সহানুজঃ ।
চিকীর্ষুর্দুষ্করং কর্ম তপসে ধৃতমানসঃ ।। ৭.৯.৪৬ ॥
9.47
প্রাপ্স্যামি তপসা কামমিতি কৃত্বা ঽধ্যবস্য চ ।
আগচ্ছদাত্মসিদ্ধ্যর্থং গোকর্ণস্যাশ্রমং শুভম্ ।। ৭.৯.৪৭ ॥
9.48
স রাক্ষসস্তত্র সহানুজস্তদা তপশ্চকারাতুলমুগ্রবিক্রমঃ ।
অতোষয়চ্চাপি পিতামহং বিভুং দদৌ স তুষ্টশ্চ বরাঞ্জয়াবহান্ ।। ৭.৯.৪৮ ।।