Utshovসর্গ 8
8.1
হন্যমানে বলে তস্মিন্পদ্মনাভেন পৃষ্ঠতঃ ।
মাল্বান্সন্নিবৃত্তো ঽথ বেলামেত্য ইবার্ণবঃ ।। ৭.৮.১ ॥
8.2
সংরক্তনয়নঃ কোপাচ্চলন্মৌলির্নিশাচরঃ ।
পদ্মনাভমিদং প্রাহ বচনং পুরুষোত্তমম্ ।। ৭.৮.২ ॥
8.3
নারায়ণ ন জানীষে ক্ষাত্রধর্মং পুরাতনম্ ।
অয়ুদ্ধমনসো ভীতানস্মান্হংসি যথেতরঃ ।। ৭.৮.৩ ॥
8.4
পরাঙ্মুখবধং পাপং যঃ করোত্যসুরেতরঃ ।
স হন্তা ন গতঃ স্বর্গং লভতে পুণ্যকর্মণাম্ ।। ৭.৮.৪ ॥
8.5
যুদ্ধশ্রদ্ধা ঽথবা তে ঽস্তি শঙ্খচক্রগদাধর ।
৪অহং স্থিতো ঽস্মি পশ্যামি বলং দর্শয় যত্তব ।। ৭.৮.৫ ॥
8.6
মাল্যবন্তং স্থিতং দৃষ্ট্বা মাল্যবন্তমিবাচলম্ ।
উবাচ রাক্ষসেন্দ্রং তং দেবরাজানুজো বলী ।। ৭.৮.৬ ॥
8.7
যুষ্মত্তো ভয়ভীতানাং দেবানাং বৈ ময়া ঽভয়ম্ ।
রাক্ষসোত্সাদনং দত্তং তদেতদনুপাল্যতে ।। ৭.৮.৭ ॥
8.8
প্রাণৈরপি প্রিয়ং কার্যং দেবানাং হি সদা ময়া ।
সো ঽহং বো নিহনিষ্যামি রসাতলগতানপি ।। ৭.৮.৮ ॥
8.9
দেবদেবং ব্রুবাণং তং রক্তাম্বুরুহলোচনম্ ।
শক্ত্যা বিভেদ সঙ্ক্রুদ্ধো রাক্ষসেন্দ্রো ভুজান্তরে ।। ৭.৮.৯ ॥
8.10
মাল্যবদ্ভুজনির্মুক্তা শক্তির্ঘণ্টাকৃতস্বনা ।
হরেরুরসি বভ্রাজ মেঘস্থেব শতহ্রদা ।। ৭.৮.১০ ॥
8.11
ততস্তামেব চোত্কৃষ্য শক্তিং শক্তিধরপ্রিয়ঃ ।
মাল্যবন্তং সমুদ্দিশ্য চিক্ষেপাম্বুরুহেক্ষণঃ ।। ৭.৮.১১ ॥
8.12
স্কন্দোত্সৃষ্টেব সা শক্তির্গোবিন্দকরনিস্সৃতা ।
কাঙ্ক্ষন্তী রাক্ষসং প্রায়ান্মাহেন্দ্রীবাঞ্জনাচলম্ ।। ৭.৮.১২ ॥
8.13
সা তস্যোরসি বিস্তীর্ণে হারভারা ঽবভাসিতে ।
অপতদ্রাক্ষসেন্দ্রস্য গিরিকূট ইবাশনিঃ ।। ৭.৮.১৩ ॥
8.14
তয়া ভিন্নতনুত্রাণঃ প্রাবিশদ্বিপুলং তমঃ ।
মাল্যবান্পুনরাশ্বস্তস্তস্থৌ গিরিরিবাচলঃ ।। ৭.৮.১৪ ॥
8.15
ততঃ কার্ষ্ণায়সং শূলং কণ্টকৈর্বহুভির্বতম্ ।
প্রগৃহ্যাভ্যহনদ্দেবং স্তনয়োরন্তরে দৃঢম্ ।। ৭.৮.১৫ ॥
8.16
তথৈব রণরক্তস্তু মুষ্টিনা বাসবানুজম্ ।
তাডয়িত্বা ধনুর্মাত্রমপক্রান্তো নিশাচরঃ ।। ৭.৮.১৬ ॥
8.17
ততো ঽম্বরে মহাঞ্ছব্দঃ সাধুসাধ্বিতি চোদিতঃ ।
আহত্য রাক্ষসো বিষ্ণুং গরুডং চাপ্যতাডয়ৎ ।। ৭.৮.১৭ ॥
8.18
বৈনতেয়স্ততঃ ক্রুদ্ধঃ পক্ষবাতেন রাক্ষসম্ ।
ব্যপোহদ্বলবান্বায়ুঃ শুষ্কপর্ণচয়ং যথা ।। ৭.৮.১৮ ॥
8.19
দ্বিজেন্দ্রপক্ষবাতেন দ্রাবিতং দৃশ্য পূর্বজম্ ।
সুমালী স্ববলৈঃ সার্ধং লঙ্কামভিমুখো যয়ৌ ।। ৭.৮.১৯ ॥
8.20
পক্ষবাতবলোদ্ধূতো মাল্যবানপি রাক্ষসঃ ।
স্ববলেন সমাগম্য যয়ৌ লঙ্কাং হ্রিয়া বৃতঃ ।। ৭.৮.২০ ॥
8.21
এবং তে রাক্ষসা তেন হরিণা কমলেক্ষণ ।
বহুশঃ সংয়ুগে ভগ্না হতপ্রবরনায়কাঃ ।। ৭.৮.২১ ॥
8.22
অশক্নুবন্তস্তে বিষ্ণুং প্রতিয়োদ্ধুং ভয়ার্দিতাঃ ।
ত্যক্ত্বা লঙ্কাং গতা বস্তুং পাতালং সহপত্নয়ঃ ।। ৭.৮.২২ ॥
8.23
সুমালিনং সমাসাদ্য রাক্ষসং রঘুসত্তম ।
স্থিতাঃ প্রখ্যাতবীর্যাস্তে বংশে সালকটঙ্কটে ।। ৭.৮.২৩ ॥
8.24
যে ত্বয়া নিহতাস্তে তু পৌলস্ত্যা নাম রাক্ষসাঃ সুমালী মাল্যবান্মালী যে চ তেষাং পুরঃসরাঃ ।
সর্বে তেভ্যো মহাভাগা রাবণাদ্বলবত্তরাঃ ।। ৭.৮.২৪ ॥
8.25
ন চান্যো রাক্ষসান্হন্তা সুরারীন্দেবকণ্টকান্ ।
ঋতে নারায়ণং দেবং শঙ্খচক্রগদাধরম্ ।। ৭.৮.২৫ ॥
8.26
ভবান্নারায়ণো দেবশ্চতুর্বাহুঃ সনাতনঃ ।
রাক্ষসান্হন্তুমুত্পন্নো হ্যজেয়ঃ প্রভুরব্যয়ঃ ।। ৭.৮.২৬ ॥
8.27
নষ্টধর্মব্যবস্থাতা কালে কালে প্রজাকরঃ ।
উত্পদ্যতে দস্যুবধে শরণাগতবত্সলঃ ।। ৭.৮.২৭ ॥
8.28
এষা ময়া তব নরাধিপ রাক্ষসানামুত্পত্তিরদ্য কথিতা সকলা যথাবৎ ।
ভূয়ো নিবোধ রঘুসত্তম রাবণস্য জন্মপ্রভাবমতুলং সসুতস্য সর্বম্ ।। ৭.৮.২৮ ॥
8.29
চিরাত্সুমালী ব্যচরদ্রসাতলং স রাক্ষসো বিষ্ণুভয়ার্দিতস্তদা ।
পুত্রৈশ্চ পৌত্রৈশ্চ সমন্বিতো বলী ততস্তু লঙ্কামবসদ্ধনেশ্বরঃ ।। ৭.৮.২৯ ।।