Utshovসর্গ 10
10.1
অথাব্রবীন্মুনিং রামঃ কথং তে ভ্রাতরো বনে ।
কীদৃশং তু তদা ব্রহ্মংস্তপস্তেপুর্মহাবলাঃ ।। ৭.১০.১ ॥
10.2
অগস্ত্যস্ত্বব্রবীত্তত্র রামং সুপ্রীতমানসম্ ।
তাংস্তান্ধর্মবিধীংস্তত্র ভ্রাতরস্তে সমাবিশন্ ।। ৭.১০.২ ॥
10.3
কুম্ভকর্ণস্ততো যত্তো নিত্যং ধর্মপথে স্থিতঃ ।
ততাপ গ্রীষ্মকালে তু পঞ্চাগ্নীন্পরিতঃ স্থিতঃ ।। ৭.১০.৩ ॥
10.4
মেঘাম্বুসিক্তো বর্ষাসু বীরাসনমসেবত ।
নিত্যং চ শিশিরে কালে জলমধ্যপ্রতিশ্রয়ঃ ।। ৭.১০.৪ ॥
10.5
এবং বর্ষসহস্রাণি দশ তস্যাতিচক্রমুঃ ।
ধর্মে প্রয়তমানস্য সত্পথে নিষ্ঠিতস্য চ ।। ৭.১০.৫ ॥
10.6
বিভীষণস্তু ধর্মাত্মা নিত্যং ধর্মপরঃ শুচিঃ ।
পঞ্চবর্ষসহস্রাণি পাদেনৈকেন তস্থিবান্ ।। ৭.১০.৬ ॥
10.7
সমাপ্তে নিয়মে তস্য ননৃতুশ্চাপ্সরোগণাঃ ।
পপাত পুষ্পবর্ষং চ ক্ষুভিতাশ্চাপি দেবতাঃ ।। ৭.১০.৭ ॥
10.8
পঞ্চবর্ষসহস্রাণি সূর্যং চৈবান্ববর্তত ।
তস্থৌ চোর্ধ্বশিরোবাহুঃ স্বাধ্যায়ধৃতমানসঃ ।। ৭.১০.৮ ॥
10.9
এবং বিভীষণস্যাপি স্বর্গস্থস্যেব নন্দনে ।
দশবর্ষসহস্রাণি গতানি নিয়তাত্মনঃ ।। ৭.১০.৯ ॥
10.10
দশবর্ষসহস্রং তু নিরাহারো দশাননঃ ।
পূর্ণে বর্ষসহস্রে তু শিরশ্চাগ্নৌ জুহাব সঃ ।। ৭.১০.১০ ॥
10.11
এবং বর্ষসহস্রাণি নব তস্যাতিচক্রমুঃ ।
শিরাংসি নব চাপ্যস্য প্রবিষ্টানি হুতাশনম্ ।। ৭.১০.১১ ॥
10.12
অথ বর্ষসহস্রে তু দশমে দশমং শিরঃ ।
ছেত্তুকামে দশগ্রীবে প্রাপ্তস্তত্র পিতামহঃ ।। ৭.১০.১২ ॥
10.13
পিতামহস্তু সুপ্রীতঃ সার্ধং দেবৈরুপস্থিতঃ ।
তব তাবদ্দশগ্রীব প্রীতো ঽস্মীত্যভ্যভাষত ।। ৭.১০.১৩ ॥
10.14
শীঘ্রং বরয় ধর্মজ্ঞ বরো যস্তে ঽভিকাঙ্ক্ষিতঃ ।
কং তে কামং করোম্যদ্য ন বৃথা তে পরিশ্রমঃ ।। ৭.১০.১৪ ॥
10.15
অথাব্রবীদৃশগ্রীবঃ প্রহৃষ্টেনান্তরাত্মনা ।
প্রণম্য শিরসা দেবং হর্ষগদ্গদয়া গিরা ।। ৭.১০.১৫ ॥
10.16
ভগবন্প্রাণিনাং নিত্যং নান্যত্র মরণাদ্ভয়ম্ ।
নাস্তি মৃত্যুসমঃ শত্রুরমরত্বমহং বৃণে ।। ৭.১০.১৬ ॥
10.17
এবমুক্তস্তদা ব্রহ্মা দশগ্রীবমুবাচ হ ।
নাস্তি সর্বামরত্বং তে বরমন্যং বৃণীষ্ব মে ।। ৭.১০.১৭ ॥
10.18
এবমুক্তে তদা রাম ব্রহ্মণা লোককর্তৃণা ।
দশগ্রীব উবাচেদং কৃতাঞ্জলিরথাগ্রতঃ ।। ৭.১০.১৮ ॥
10.19
সুপর্ণনাগয়ক্ষাণাং দৈত্যদানবরক্ষসাম্ ।
অবধ্যো ঽহং প্রজাধ্যক্ষ দেবতানাং চ শাশ্বত ।। ৭.১০.১৯ ॥
10.20
নহি চিন্তা মমান্যেষু প্রাণিষ্বমরপূজিত ।
তৃণভূতা হি তে মন্যে প্রাণিনো মানুষাদয়ঃ ।। ৭.১০.২০ ॥
10.21
এবমুক্তস্তু ধর্মাত্মা দশগ্রীবেণ রক্ষসা ।
উবাচ বচনং দেবঃ সহ দেবৈঃ পিতামহঃ ।। ৭.১০.২১ ॥
10.22
ভবিষ্যত্যেবমেতত্তে বচো রাক্ষসপুঙ্গব ।
এবমুক্ত্বা তু তং রাম দশগ্রীবং পিতামহঃ ।। ৭.১০.২২ ॥
10.23
শৃণু চাপি বরো ভূয়ঃ প্রীতস্যেহ শুভো মম ।
হুতানি যানি শীর্ষাণি পূর্বমগ্নৌ ত্বয়ানঘ ।। ৭.১০.২৩ ॥
10.24
পুনস্তানি ভবিষ্যন্তি তথৈব তব রাক্ষস ।
বিতরামীহ তে সৌম্য বরং চান্যং দুরাসদম্ ।। ৭.১০.২৪ ॥
10.25
ছন্দতস্তব রূপং চ মনসা যদ্যথেপ্সিতম্ ।
ভবিষ্যতি ন সন্দেহো মদ্বরাত্তবরাক্ষস ।। ৭.১০.২৫ ॥
10.26
এবং পিতামহোক্তস্য দশগ্রীবস্য রক্ষসঃ ।
অগ্নৌ হুতানি শীর্ষাণি পুনস্তান্যুত্থিতানি বৈ ।। ৭.১০.২৬ ॥
10.27
এবমুক্ত্বা তু তং রাম দশগ্রীবং পিতামহঃ ।
বিভীষণমথোবাচ বাক্যং লোকপিতামহঃ ।। ৭.১০.২৭ ॥
10.28
বিভীষণ ত্বয়া বত্স ধর্মসংহিতবুদ্ধিনা ।
পরিতুষ্টো ঽস্মি ধর্মাত্মন্বরং বরয় সুব্রত ।। ৭.১০.২৮ ॥
10.29
বিভীষণস্তু ধর্মাত্মা বচনং প্রাহ সাঞ্জলিঃ ।
বৃতঃ সর্বগুণৈর্নিত্যং চন্দ্রমা রশ্মিভির্যথা ।। ৭.১০.২৯ ॥
10.30
ভগবন্কৃতকৃত্যো ঽহং যন্মে লোকগুরুঃ স্বয়ম্ ।
প্রীতেন যদি দাতব্যো বরো মে শৃণু সুব্রত ।। ৭.১০.৩০ ॥
10.31
পরমাপদ্গতস্যাপি ধর্মে মম মতির্ভবেৎ ।
অশিক্ষিতং চ ব্রহ্মাস্ত্রং ভগবন্প্রতিভাতু মে ।। ৭.১০.৩১ ॥
10.32
যা যা মে জায়তে বুদ্ধির্যেষু যেষ্বাশ্রমেষু চ ।
সা সা ভবতু ধর্মিষ্ঠা তং তু ধর্মং চ পালয়ে ।। ৭.১০.৩২ ॥
10.33
এষ মে পরমোদার বরঃ পরমকো মতঃ ।
নহি ধর্মাভিরক্তানাং লোকে কিঞ্চন দুর্লভম্ ।। ৭.১০.৩৩ ॥
10.34
পুনঃ প্রজাপতিঃ প্রীতো বিভীষণমুবাচ হ ।
ধর্মিষ্ঠস্ত্বং যথা বত্স তথা চৈতদ্ভবিষ্যতি ।। ৭.১০.৩৪ ॥
10.35
যস্মাদ্রাক্ষসয়োনৌ তে জাতস্যামিত্রনাশন ।
নাধর্মে জায়তে বুদ্ধিরমরত্বং দদামি তে ।। ৭.১০.৩৫ ॥
10.36
ইত্যুক্ত্বা কুম্ভকর্ণায় বরং দাতুমুপস্থিতম্ ।
প্রজাপতিং সুরাঃ সর্বে বাক্যং প্রাঞ্জলয়ো ঽব্রুবন্ ।। ৭.১০.৩৬ ॥
10.37
ন তাবত্কুম্ভকর্ণায় প্রদাতব্যো বরস্ত্বয়া ।
জানীষে হি যথা লোকাংস্ত্রাসয়ত্যেষ দুর্মতিঃ ।। ৭.১০.৩৭ ॥
10.38
নন্দনে ঽপ্সরসঃ সপ্ত মহেন্দ্রানুচরা দশ ।
অনেন ভক্ষিতা ব্রহ্মন্নৃষয়ো মানুষাস্তথা ।। ৭.১০.৩৮ ॥
10.39
অলব্ধবরপূর্বেণ যত্কৃতং রাক্ষসেন তু ।
তদেষ বরলব্ধঃ স্যাদ্ভক্ষয়েদ্ভুবনত্রয়ম্ ।। ৭.১০.৩৯ ॥
10.40
বরব্যাজেন মোহো ঽস্মৈ দীয়তামমিতপ্রভ ।
লোকানাং স্বস্তি চৈবং স্যাদ্ভবেদস্য চ সন্নতিঃ ।। ৭.১০.৪০ ॥
10.41
এবমুক্তঃ সুরৈর্ব্রহ্মা ঽচিন্তয়ৎ পদ্মসম্ভবঃ ।
চিন্তিতা চোপতস্থে ঽস্য পার্শ্বং দেবী সরস্বতী ।। ৭.১০.৪১ ॥
10.42
প্রাঞ্জলিঃ সা তু পার্শ্বস্থা প্রাহ বাক্যং সরস্বতী ।
ইয়মস্ম্যাগতা দেব কিং কার্যং করবাণ্যহম্ ।। ৭.১০.৪২ ॥
10.43
প্রজাপতিস্তুং তাং প্রাপ্তাং প্রাহ বাক্যং সরস্বতীম্ ।
বাণি ত্বং রাক্ষসেন্দ্রস্য ভব যা দেবতেপ্সিতা ।। ৭.১০.৪৩ ॥
10.44
তথেত্যুক্ত্বা প্রবিষ্টা সা প্রজাপতিরথাব্রবীৎ ।
কুম্ভকর্ণ মহাবাহো বরং বরয় যো মতঃ ।। ৭.১০.৪৪ ॥
10.45
কুম্ভকর্ণস্তু তদ্বাক্যং শ্রুত্বা বচনমব্রবীৎ ।
স্বপ্তুং বর্ষাণ্যনেকানি দেবদেব মমেপ্সিতম্ ।। ৭.১০.৪৫ ॥
10.46
এবমস্ত্বিতি তং চোক্ত্বা প্রায়াদ্ব্রহ্মা সুরৈঃ সমম্ ।
দেবী সরস্বতী চৈব রাক্ষসং তং জহৌ পুনঃ ।। ৭.১০.৪৬ ॥
10.47
ব্রহ্মণা সহ দেবেষু গতেষু চ নভঃস্থলম্ ।
বিমুক্তো ঽসৌ সরস্বত্যা স্বাং সঞ্জ্ঞাং চ ততো গতঃ ।। ৭.১০.৪৭ ॥
10.48
কুম্ভকর্ণস্তু দুষ্টাত্মা চিন্তয়ামাস দুঃখিতঃ ।
ঈদৃশং কিমিদং বাক্যং মমাদ্য বদনাচ্চ্যুতম্ ।। ৭.১০.৪৮ ॥
10.49
অহং ব্যামোহিতো দেবৈরিতি মন্যে তদা ঽ ঽগতৈঃ ।
এবং লব্ধবরাঃ সর্বে ভ্রাতরো দীপ্ততেজসঃ ।শ্লেষ্মাতকবনং গত্বা তত্র তে ন্যবসন্সুখম্ ।। ৭.১০.৪৯ ।।