Utshovসর্গ 11
11.1
সুমালী বরলব্ধাংস্তু জ্ঞাত্বা চৈতান্নিশাচরান্ ।
উদতিষ্ঠদ্ভয়ং ত্যক্ত্বা সানুগঃ স রসাতলাৎ ।। ৭.১১.১ ॥
11.2
মারীচশ্চ প্রহস্তশ্চ বিরূপাক্ষো মহোদরঃ ।
উদতিষ্ঠন্সুসংরব্ধাঃ সচিবাস্তস্য রক্ষসঃ ।। ৭.১১.২ ॥
11.3
সুমালী সচিবৈঃ সার্ধং বৃতো রাক্ষসপুঙ্গবৈঃ ।
অভিগম্য দশগ্রীবং পরিষ্বজ্যেদমব্রবীৎ ।। ৭.১১.৩ ॥
11.4
দিষ্ট্যা তে বত্স সম্প্রাপ্তশ্চিন্তিতো ঽয়ং মনোরথঃ ।
যস্ত্বং ত্রিভুবনশ্রেষ্ঠাল্লব্ধবান্বরমুত্তমম্ ।। ৭.১১.৪ ॥
11.5
যত্কৃতে চ বয়ং লঙ্কাং ত্যকত্বা যাতা রসাতলম্ ।
তদ্গতং নো মহাবাহো মহদ্বিষ্ণুকৃতং ভয়ম্ ।। ৭.১১.৫ ॥
11.6
অসকৃত্তদ্ভয়াদ্ভীতাঃ পরিত্যজ্য স্বমালয়ম্ ।
বিদ্রুতাঃ সহিতাঃ সর্বে প্রবিষ্টাঃ স্ম রসাতলম্ ।। ৭.১১.৬ ॥
11.7
অস্মদীয়া চ লঙ্কেয়ং নগরী রাক্ষসোচিতা ।
নিবেশিতা তব ভ্রাত্রা ধনাধ্যক্ষেণ ধীমতা ।। ৭.১১.৭ ॥
11.8
যদি নামাত্র শক্যং স্যাত্সাম্না দানেন বানঘ ।
তরসা বা মহাবাহো প্রত্যানেতুং কৃতং ভবেৎ ।। ৭.১১.৮ ॥
11.9
ত্বং তু লঙ্কেশ্বরস্তাত ভবিষ্যসি ন সংশয়ঃ ।
ত্বয়া রাক্ষসবংশো ঽয়ং নিমগ্নো ঽপি সমুদ্ধৃতঃ ।সর্বেষাং নঃ প্রভুশ্চৈব ভবিষ্যসি মহাবল ।। ৭.১১.৯ ॥
11.10
অথাব্রবীদ্দশগ্রীবো মাতামহমুপস্থিতম্ ।
বিত্তেশো গুরুরস্মাকং নার্হসে বক্তুমীদৃশম্ ।। ৭.১১.১০ ॥
11.11
সাম্নাপি রাক্ষসেন্দ্রেণ প্রত্যাখ্যাতো গরীয়সা ।
কিঞ্চিন্নাহ তদা রক্ষো জ্ঞাত্বা তস্য চকীর্ষিতম্ ।। ৭.১১.১১ ॥
11.12
কস্যচিত্ত্বথ কালস্য বসন্তং রাবণং ততঃ ।
উক্তবন্তং তথা বাক্যং দশগ্রীবং নিশাচরঃ ।। ৭.১১.১২ ॥
11.13
প্রহস্তঃ প্রশ্রিতং বাক্যমিদমাহ স কারণম্ ।
। ৭.১১.১৩ ॥
11.14
দশগ্রীব মহাবাহো নার্হস্ত্বং বক্তুমীদৃশম্ ।
সৌভ্রাত্রং নাস্তি শূরাণাং শৃণু চেদং বচো মম ।। ৭.১১.১৪ ॥
11.15
অদিতিশ্চ দিতিশ্চৈব ভগিন্যৌ সহিতে হি তে ।
ভার্যে পরমরূপিণ্যৌ কশ্যপস্য প্রজাপতেঃ ।। ৭.১১.১৫ ॥
11.16
অদিতির্জনয়ামাস দেবাংস্ত্রিভুবনেশ্বরান্ ।
দিতিস্ত্বজনয়ত্পুত্রান্কশ্যপস্যাত্মসম্ভবান্ ।। ৭.১১.১৬ ॥
11.17
দৈত্যানাং কিল ধর্মজ্ঞ পুরীয়ং সবনার্ণবা ।
সপর্বতা মহী বীর তে ঽভবন্প্রভবিষ্ণবঃ ।। ৭.১১.১৭ ॥
11.18
নিহত্য তাংস্তু সমরে বিষ্ণুনা প্রভবিষ্ণুনা ।
দেবানাং বশমানীতং ত্রৈলোক্যমিদমব্যয়ম্ ।। ৭.১১.১৮ ॥
11.19
নৈতদেকো ভবানেব করিষ্যতি বিপর্যয়ম্ ।
সুরাসুরৈরাচরিতং তত্কুরুষ্ব বচো মম ।। ৭.১১.১৯ ॥
11.20
এবমুক্তো দশগ্রীবঃ প্রহৃষ্টেনান্তরাত্মনা ।
চিন্তয়িত্বা মুহূর্তং বৈ বাঢমিত্যেব সো ঽব্রবীৎ ।। ৭.১১.২০ ॥
11.21
স তু তেনৈব হর্ষেণ তস্মিন্নহনি বীর্যবান্ ।
বনং গতো দশগ্রীবঃ সহ তৈঃ ক্ষণদাচরৈঃ ।। ৭.১১.২১ ॥
11.22
ত্রিকূটস্থঃ স তু তদা দশগ্রীবো নিশাচরঃ ।
প্রেষয়ামাস দৌত্যেন প্রহস্তং বাক্যকোবিদম্ ।। ৭.১১.২২ ॥
11.23
প্রহস্ত শীঘ্রং গচ্ছ ত্বং ব্রূহি নৈর্ঋতপুঙ্গবম্ ।
বচসা মম বিত্তেশং সামপূর্বমিদং বচঃ ।। ৭.১১.২৩ ॥
11.24
ইয়ং লঙ্কা পুরী রাজন্রাক্ষসানাং মহাত্মনাম্ ।
ত্বয়া নিবেশিতা সৌম্য নৈতদ্যুক্তং তবানঘ ।। ৭.১১.২৪ ॥
11.25
তদ্ভবান্যদি নো হ্যদ্য দদ্যাদতুলবিক্রম ।
কৃতা ভবেন্মম প্রীতির্ধুর্মশ্চৈবানুপালিতঃ ।। ৭.১১.২৫ ॥
11.26
স তু গত্বা পুরীং লঙ্কাং ধনদেন সুরক্ষিতাম্ ।
অব্রবীত্পরমোদারং বিত্তপালমিদং বচঃ ।। ৭.১১.২৬ ॥
11.27
প্রেষিতো ঽহং তব ভ্রাত্রা দশগ্রীবেণ সুব্রত ।
ত্বত্সমীপং মহাবাহো সর্বশস্ত্রভৃতাং বর ।। ৭.১১.২৭ ॥
11.28
তচ্ছ্রূয়তাং মহাপ্রাজ্ঞ সর্বশাস্ত্রবিশারদ ।
বচনং মম বিত্তেশ যদ্ব্রবীতি দশাননঃ ।। ৭.১১.২৮ ॥
11.29
ইয়ং কিল পুরী রম্যা সুমালিপ্রমুখৈঃ পুরা ।
ভুক্তপূর্বা বিশালাক্ষ রাক্ষসৈর্ভীমবিক্রমৈঃ ।। ৭.১১.২৯ ॥
11.30
তেন বিজ্ঞাপ্যতে সো ঽয়ং সাম্প্রতং বিশ্রবাত্মজ ।
তদেষা দীয়তাং তাত যাচতস্তস্য সামতঃ ।। ৭.১১.৩০ ॥
11.31
প্রহস্তাদভিসংশ্রুত্য দেবো বৈশ্রবণো বচঃ ।
প্রত্যুবাচ প্রহস্তং তং বাক্যং বাক্যবিশারদঃ ।। ৭.১১.৩১ ॥
11.32
দত্তা মমেয়ং পিত্রা তু লঙ্কা শূন্যা নিশাচরৈঃ ।
নিবাসিতে চ মে যক্ষৈর্দানমানাদিভির্গুণৈঃ ।। ৭.১১.৩২ ॥
11.33
ব্রূহি গচ্ছ দশগ্রীবং পুরং রাজ্যং চ যন্মম ।
তবাপ্যেতন্মহাবাহো ভুঙ্ক্ষ্ব রাজ্যমকণ্টকম্ ।। ৭.১১.৩৩ ॥
11.34
এবমুক্ত্বা ধনাধ্যক্ষো জগাম পিতুরন্তিকম্ ।
। ৭.১১.৩৪ ॥
11.35
অভিবাদ্য গুরুং প্রাহ রাবণস্য যদীপ্সিতম্ ।
এষ তাত দশগ্রীবো দূতং প্রেষিতবান্মম ।। ৭.১১.৩৫ ॥
11.36
দীয়তাং নগরী লঙ্কা পূর্বং রক্ষোগণোষিতা ।
ময়াত্র যদনুষ্ঠেয়ং তন্মমাচক্ষ্ব সুব্রত ।। ৭.১১.৩৬ ॥
11.37
ব্রহ্মর্ষিস্ত্বেবমুক্তো ঽসৌ বিশ্রবা মুনিপুঙ্গবঃ ।
প্রাঞ্জলিং ধনদং প্রাহ শৃণু পুত্র বচো মম ।। ৭.১১.৩৭ ॥
11.38
দশগ্রীবো মহাবাহুরুক্তবান্মম সন্নিধৌ ।
ময়া নির্ভর্ত্সিতশ্চাসীদ্বহুশোক্তঃ সুদুর্মতিঃ ।। ৭.১১.৩৮ ॥
11.39
স ক্রোধেন ময়া চোক্তো ধ্বংসতে চ পুনঃ পুনঃ ।
শ্রেয়ো ঽভিয়ুক্তং ধর্ম্যং চ শৃণু পুত্র বচো মম ।। ৭.১১.৩৯ ॥
11.40
বরপ্রদানসম্মূঢো মান্যা ঽমান্যান্ স দুর্মতিঃ ।
ন বেত্তি মম শাপাচ্চ প্রকৃতিং দারুণাং গতঃ ।। ৭.১১.৪০ ॥
11.41
তস্মাদ্গচ্ছ মহাবাহো কৈলাসং ধরণীধরম্ ।
নিবেশয় নিবাসার্থং ত্যক্ত্বা লঙ্কাং সহানুগঃ ।। ৭.১১.৪১ ॥
11.42
তত্র মন্দাকিনী রম্যা নদীনামুত্তমা নদী ।
কাঞ্চনৈঃ সূর্যসঙ্কাশৈঃ পঙ্কজৈঃ সংবৃতোদকা ।। ৭.১১.৪২ ॥
11.43
কুমুদৈরুত্পলৈশ্চৈব তথা ঽন্যৈশ্চ সুগন্ধিভিঃ ।
। ৭.১১.৪৩ ॥
11.44
তত্র দেবাঃ সগন্ধর্বাঃ সাপ্সরোরগকিংনরাঃ ।
বিহারশীলাঃ সততং রমন্তে সর্বদা ঽ ঽশ্রিতাঃ ।। ৭.১১.৪৪ ॥
11.45
ন হি ক্ষমং তবানেন বৈরং ধনদ রক্ষসা ।
জানীষে হি যথা ঽনেন লব্ধঃ পরমকো বরঃ ।। ৭.১১.৪৫ ॥
11.46
এবমুক্তো গৃহীত্বা ঽ ঽশু তদ্বচঃ পিতৃগৌরবাৎ ।
সদারপুত্রঃ সামান্যঃ সবাহনধনো গতঃ ।। ৭.১১.৪৬ ॥
11.47
প্রহস্তো ঽথ দশগ্রীবং গত্বা বচনমব্রবীৎ ।
প্রহৃষ্টাত্মা মহাত্মানং সহামাত্যং সহানুজম্ ।। ৭.১১.৪৭ ॥
11.48
শূন্যা সা নগরী লঙ্কা ত্যক্ত্ত্বৈনাং ধনদো গতঃ ।
প্রবিশ্য তাং সহাস্মাভিঃ স্বধর্মং প্রতিপালয় ।। ৭.১১.৪৮ ॥
11.49
এবমুক্তো দশগ্রীবঃ প্রহস্তেন মহাবলঃ ।
বিবেশ নগরীং লঙ্কাং ভ্রাতৃভিঃ সবলানুগৈঃ ।। ৭.১১.৪৯ ॥
11.50
ধনদেন পরিত্যক্তাং সুবিভক্তমহাপথাম্ ।
আরুরোহ স দেবারিঃ স্বর্গং দেবাধিপো যথা ।। ৭.১১.৫০ ॥
11.51
স চাভিষিক্তঃ ক্ষণদাচরৈস্তদা নিবেশয়ামাস পুরীং দশাননঃ ।
নিকামপূর্ণা চ বভূব সা পুরী নিশাচরৈর্নীলবলাহকোপমৈঃ ।। ৭.১১.৫১ ॥
11.52
ধনেশ্বরস্ত্বথ পিতৃবাক্যগৌরবান্ন্যবেশয়চ্ছশিবিমলে গিরৌ পুরীম্ ।
স্বলঙ্কৃতৈর্ভবনবরৈর্বিভূষিতাং পুরন্দরস্বেব তদা ঽমরাবতীম্ ।। ৭.১১.৫২ ।।